你老公會唔會係識你之前遇過啲貪錢女人？
點解咁講呢，因為我男朋友之前都係唔會透露自己收入幾多。
一齊幾年，近年佢先有講。
其實我知點解，因為佢前妻好貪錢，以前佢係成份糧由前妻分配，個女人由大貪到想佢奶奶賣鋪分錢，小貪到長輩俾佢老公嘅利是錢都要拎晒，啲錢就大花筒買名牌、炒股，「借」錢俾女家，好食懶飛，後來到個女人出軌走佬，我男友可以係話咩都冇晒要從頭嚟過。
後來佢識我，唔知係咪有陰影，驚我都會拎晒佢啲錢呢
，所以佢一直冇講，可能過咗咁多年，都知我為人，佢就有主動提自己收入。
2個讚
我係你就唔再搞。順其自然生到就生。
生仔唔係人生必需。到時仲多野煩。
至於你老公請假難，可能真係會俾老細gut。你做開freelance唔會明
唔知佢之前個女友係點，不過知佢缺乏安全感，因為自小父母離異(我62唔係佢親生老竇)，佢老竇好似係爛賭好食懶飛嗰d，冇乜點盡過做老竇的責任，但初期佢同佢家姐係同老竇住，佢媽同左我62一齊，變左嗰段時間佢好似孤兒仔咁，到之後搬左去同佢媽住，但我62對佢好惡，佢好唔鍾意… 所以佢一直好想自己搬出嚟住，所以好努力儲錢，對佢嚟講，自己有錢有能力有屬於自己嘅地方唔使｢寄人籬下｣係好重要 (that’s why佢都冇畀過家用佢媽，畀左佢就應該冇咁早買到樓)。
同我一齊之後，佢就決定買樓，搬左出嚟，同我講好想建立自己嘅家庭，我哋都好快就半同居狀態。但當時仲係拍拖，我冇問過佢幾多人工，因為覺得係大家私隱，而且一直冇乜興趣知，因為我自己又唔係搵唔到食要問佢攞，知嚟做乜？到4年前結婚後，我都冇問，唔需要知，後來係因為covid期間，我有段時間冇晒job冇收入，先至問佢幾錢人工，因為想知我係咪真係有空間失業一排，定其實我要即刻出去搵工做。咁佢當時係唔肯講嘅，覺得從來都冇過問呢樣嘢，點解會突然咁問，同埋話唔想我同佢比較，因為我當時都經常同d同屆同學比(有d做政府工已經做到高位搵多我好多)，佢話唔想我又同佢比搞到自己唔開心(咁佢又真係搵得仲多過我d同學)…
Btw, 其實佢都唔知我收入，我哋真係冇特別攞出嚟講過，但都會知道佢搵多過我，因為行業同工種問題(佢商界我傳媒，唔使講都知邊個搵得多d)…
咁我freelance之前都返過5,6年工，咁簡單嘅嘢又唔會唔明
只不過佢一開始只係話請唔到假，冇解釋點解請唔到，但之前個月突然請長假去旅行又好易請到嘛，所以我咪覺得佢係唔夠著緊台灣件事冇盡力去請，但同佢傾完，知係因為佢阿姐請左假，佢唔請得，下面成條team睇佢頭，咁我梗係明，如果佢一開始有講多d我就唔會亂諗嘢同誤會佢，而家大家攞左出嚟傾咪無事囉。
咁我鍾意咩佢都會買畀我，我想去邊度旅行都同我去，我問佢攞錢佢都會畀(係我唔好意思問啫)
你話佢防我呀嘛，咁除左因為覺得我貪錢，仲有咩原因要防我？所以我咪咁講
其實樓主老公又唔似係好刻薄嘅人，同居開始已經負擔大部分支出，之前雙方都一直冇透露開自己人工，到樓主失業嗰陣先突然問，可能當時樓主問嘅方式同埋情緒認為唔講比較好？
另外樓主話老公人工好高，想問下如果扣除晒開支，供樓，水電煤，父母家用, etc., 係咪都淨返好多呢？
其實我建議樓主想要幾多家用，幾多錢support 不如直接講啦，我睇樓主寫文都寫得咁長，會唔會平時表達都係咁長篇大論，可能人哋會攞唔到重點 
利申我冇睇晒樓主寫嘅嘢
3個讚
請恕我無知，咁辛苦做IVF唔係為生而生，咁係為左乜？
我有朋友2公婆都係超鐘意細路，一直想生只係嘗試自然懷孕食中藥之類都唔得，後尾ivf得左。我諗唔係全部ivf都係為生而生，只係樓主話自己好多年都唔想生，到3中至尾臨到女人生育死線轉馱，呢款就比較大d 機會之後後悔
1個讚
鐘意小朋友而生就唔叫為生而生？
睇黎係我唔太明咩叫為生而生了…
1個讚
我估佢朋友嘅情況係想生而生，好想好想要有小朋友，所以幾辛苦都值。
但樓主嘅情況係睇唔出佢好想好想要小朋友
3個讚
通常呢d都係瀨野多，因為生育死線見人有我又想有，等於到左30歲就要嫁一樣
1個讚
如果只係受人同受荷爾蒙影響
香港女人讀書多，遲婚遲生普遍。
我覺得生仔死線係三十頭，或者係三十五前。之後除非有幾個工人湊一個，否則自己辛苦
我更無知
即係呢 1x年來都無分享過升職加人工呢 d 開心嘅日常生活小事？
男人升職都會同另一半講，因為開心。女人一般就問下加幾多咁。
其實除左呢樣，樓主老公重有冇其他嘢隱暪？
除左旅行，叫老公買嘢，兩個人平時有冇開心事分享？
以生理角度，理想就第一胎30前，最遲35，第二胎40前，但生仔唔應該因為咩死線，人地有我又想有，係要諗下點解想生，如果係因為以上2個理由，唔生好過
我估都唔少人後生時生係呢個原因，本身唔討厭細路嘅話
但年紀大，思想應該成熟，就真係要諗清楚
有 d 嘢過左就過左，冇得後悔，更加唔好勉強，只會影響現在的生活
跳住睇，少少感想
1） 第一個post 講到老公好衰，後尾又幫佢開脫。如果唔係自欺欺人，咁就係你一開頭over react太負面。 下次鑽牛角尖前建議同佢先溝通
2） 有咩要求直接講清楚，正經事唔好諗撒嬌。 「你邊日要嚟台灣，醫生話鮮精效果最好」。
你衰在太矛盾，明知老公要俾錢，你問人攞錢又尷尷尬尬，唔得理直氣壯，自己暗錢之後又要屈住。自認堅強唔使人陪，個心又要覺得委屈。 屈到頂唔順先至爆喊出嚟。 如果我身邊人係咁，我會覺得自己先係俾人屈嗰個
3） 如果老公好難攞假去台灣，連鮮精都留唔到，倒不如用晒啲卵之後轉返香港做IVF。
11個讚
我反而睇完哂全部覺得樓主性格未走出童年陰影，好易產後抑鬱。
我覺得我唔會勸樓主唔生，因為以佢性格，佢生左或無生都會後悔。
要走出困局，咁就想法要理性一啲。唔係到時湊仔又係覺得自己做到，叫老公唔洗幫，但之後又默默委屈得自己湊。
我小朋友先幾個月，好彩有人幫，老公都唔係豬隊友，但見啲媽媽谷已經講到搵學校。你要有心理準備，有啲人會話唔係啊，我唔洗佢讀咩咩咩學校，但呢個世界好現實，人以群分。唔係話要佢好勁，宜家唔學壞，唔睇抖音已經好難架啦。
不過講到底，我知你都一定會試生b咁你就放鬆心態啦，聽人講真係越緊張越唔得。
同有一個tips就係expectation management，例如你可以覺得自己做到，但你要求左要工人或者陪月先。你到時真係handle到，你可以唔要。但你由一開始無既野，再要求人，人哋就會覺得你要求好多。錢一樣，一開始講多啲，無用哂再俾返老公/儲起。
2個讚
我反而覺得樓主太介意人哋點睇佢
生咗小朋友條路會好難行，會行得好辛苦
隊友幫到仲好少少
一陣隊友嫌煩、夫妻多拗撬、咁就更艱難
2個讚
或者大家define下咩叫做為生而生？
你又覺得要為咩而生先有資格生？
有時唔係想長篇大論，但就係冇講到，就會畀人誤解左。我其實一直鍾意小朋友，有強烈母性，同另一半組織家庭，撫養孩子同佢一齊經歷人生，我都覺得係一件值得體驗嘅事。但之前抗拒生(請留意返同埋唔好曲解我，我一直係講｢抗拒生｣而唔係｢唔想生｣)，抗拒係因為驚因為唔敢，因為我知件事唔係咁簡單，我會諗同考慮好多嘢，唔想不負責任地生左先算，唔想為左趕死線而未諗清楚就生。我諗嘅嘢當中都有包括樓上有d jm勸我唔好生嗰d，我就係覺得唔係咁簡單架，我係咪真係ready架？我係咪一個好媽媽？另外就係覺得呢個世界只會越來越差呀，唔使十年就世界末日(我廿年前已經咁諗，但到呢刻大家都仲生out out喺度係咪？)，驚生小朋友出嚟佢會受好多苦架… 拿，我再寫又會畀人話長氣，唔講重點架喇，但我咁多年嚟唔生(唔係唔想，係唔敢生)的原因，我可以再寫多幾千字…
結婚前有嘗試認真同老公再傾呢個問題，某程度上我係想佢逐一反駁我的疑慮，話我知係我太悲觀，畀d信心我，兩個人一齊努力，但當時冇傾得好好，亦冇定論，之後不了了之左。我仲一直大安旨意覺得仲有時間，再諗清楚先喇，千祈唔好一時衝動呀。然後到36歲，原來冇時間喇喎，要同老公傾最後一次，一定要傾到定論，傾完覺得唔生嘅，就以後唔需要再諗呢件事，但如果大家決定生，就要加緊步伐追返d時間，40歲前有就有，冇就冇架喇。
我地最後決定生，係因為雙方都想，我冇辦法迫老公諗晒所有問題，但有同佢講，叫佢有心理準備，唔好生左先怨，要一齊努力同付出… 總之呢d prep talk做晒，而我自己簡單d講就係改變左主意，覺得之前係過度焦慮同overthinking縛手縛腳，其實唔使將所有嘢諗到最差。簡單講，我唔係到左死線就為生而生，而係到左死線迫我將咁多年來考慮嘅嘢再重新考慮一次，去做最後決定。最後despite all fears都決定生，係因為我哋雙方一齊下定左決心。
至於點解要做IVF，就係因為我卵少而佢精唔夠活躍，自然嘅成功機率好低，老公好想快d生唔好再拖(講左我40歲就唔再試，而我當時37佢已經39)，佢唔想再嘥時間，寧願使多d錢去做IVF。托賴，我個case相對straightforward，但我知有人係自然懷孕好幾次但全部流產，有人係有免疫問題等而要做IVF，只可以講唔係個個條命生得好，所有嘢順風順水理所當然冇挫折，有d人就係要比其他人付出更多先可以得到同樣嘅嘢… 我哋如果唔係已經考慮得比一般人更多更清楚，係唔會幾十萬幾十萬咁拎去做IVF，去打針去用自己身體去教飛，因為索性唔生一定簡單容易好多… 所以請唔好講到我地係無腦冇諗過，係人有我有的玩票心態。
係呀，有d人做嘢係趕死線得來冇思考，30歲前結婚，35歲前生仔。我係29歲老公求婚，5年後34歲先肯嫁，我諗左5年呀！諗到ready先做，又唔急嘅，50歲先結都得架，唔結都得架。但生仔唔同，高齡限制係鐵一般的事實，如果有意思想生嘅，唔到我再慢慢諗多十年，而且我都諗左廿年架喇。當然任何人都可以覺得我冇資格生，睇死我生左會後悔，冇問題，你又唔係我。出呢個post時，我係前一日先剛取完卵回港，預計下個cycle植入，我好興奮期待地同老公plan行程，但佢只係苦悶地講一句請唔到假，同我期望有落差，於是就開始鑽牛角尖，覺得得自己一個努力… 講真，如果後來佢解釋唔到點解請唔到假、同佢講佢唔夠錢佢都唔理的話，我係一定會即係煞停唔生。但實情係佢阿姐block左假佢唔請得，莫非要佢夾硬放令阿姐不滿佢炒埋佢咩？當然有人會話我｢咁都信｣，覺得我老公其實唔想生架喇所以唔配合，但佢開埋公司個app畀我睇全team個請假calendar，所以我信。至於錢，同佢講完佢即刻過多5萬畀我，我話唔使咁多(因為係欠一兩萬only)，佢話唔緊要，之後都要用。咁所以我知道係我鑽左牛角尖，可能打左咁多針又剛取完卵，荷爾蒙又亂晒都有影響我情緒，但既然問題解決左，咁件事咪繼續，我都冇晒疑慮，只係你哋有人覺得我自欺欺人/老公根本唔想同我生係我一廂情願兼婚姻觸礁(我老公聽完都笑)。如果而家要將件事回歸到應唔應該生、甚至為咩而生呢d恆久冇答案嘅哲學問題，即係叫我好似之前咁再諗多廿年諗到60歲…
我寫到咁長都冇人睇得晒睇得明架喇，我都唔想再解釋，多謝各位。
每對夫妻相處模式唔同，你係咁唔代表係金科玉律，唔代表人哋唔係咁人哋就婚姻有問題。我識有d人係買支水都問老公買唔買，一齊決定買先買，有人痾屎唔出都同對方講添。你覺得升職加人工係開心嘢，正常夫妻會分享，但我同佢都覺得冇咩咁特別或要開心慶祝，當然佢升職都有同我講，但佢係唔想升，因為升左仲大workload同壓力，佢唔係興高采烈同我分享，佢係灰左，所以唔係所有人情況係同你一樣。可能我又唔係一般女人，我冇問佢加左幾多人工，一直覺得佢嘅錢，佢想講就講，唔想講就唔講，我冇特別問，我自己都有自己的人工。但之前出現講人工的矛盾位，係因為我失業冇左自己份人工先突然問佢有幾多，但佢覺得十年來從來大家冇過問對方點解我突然問… 其實如果我唔係嗰排失業/之後假若生仔頭幾年要做FTM，要佢經濟support，其實我都唔會問，覺得冇必要問，呢個係我哋一直以來嘅相處模式。
如果佢仲有其他嘢隱瞞我，我應該都唔會知，唔係點叫隱瞞。
如果兩個人平時冇開心(或唔開心)嘢一齊分享，零交流，咁我唔知我哋係點樣一齊左十幾年。