搵D社區中心有活動俾老人家先，之後再勸掂你老公一齊去視察環境，再下一步先帶你99去。又或者你搵咗社工先，之後再帶你老公同99一齊去見社工。而家最重要嘅一步係先同你老公傾，佢肯做先可以幫到你99同救到段婚姻。
未生千祈唔好生，唔好咁傻以為男人會因為個老婆生左就會顧老婆仔女先，佢地有小朋友只會更加覺得生佢既最偉大！其實你老公都好坦白亦都好清晰咁表達左，佢呀媽先係第一位，係呀，佢而家先六十幾，但女人長命d，分分鐘有九十，你預頂都要頂多二十年…未有小朋友就真係諗下點行落去，無論點選擇，相信你只能揀離開又或者忍。
1個讚
睇你頂唔頂得順，我有個朋友又係個奶奶係個寡母婆守仔，個仔一結婚話唔比同老婆住，要返自己屋企住返半年先，痴筋嘅
其實個奶奶想氹埋個新抱返去住，我個friend醒，打死唔肯，直情返娘家住，你有你返我有我返，講到明分開都冇所謂，最後係個老公忍唔住搬返去新屋，我個朋友完勝
我覺得你講得幾啱，講真老公咁在乎佢呀媽，你竟然叫個老公送呀媽入老人院，佢應該會覺得你好無情同冇企喺佢角度諗
我個陣新婚同老爺奶奶住，唔夠半年奶奶急病入咗醫院，我同老公要一齊照顧極度大男人又自我，脾氣臭嘅老爺，公司、屋企、醫院3邊走
老公個兄弟冇點幫手照顧，但只聽老爺一面之詞，成日俾說話我哋聽，成日話我哋對老爺唔好，但佢自己又冇點照顧自己個呀爸，個段時間真係好難頂，我老爺仲好意思怨我哋唔生b，我都冇諗過送老爺入老人院
但係老公嘅兄弟喺奶奶未死之前，已經講定要送老爺入老人院，話幾多錢都唔係問題，最緊要間老人院環境好
點知奶奶一走咗，陪老公嘅兄弟去睇老人院，呀兄弟話一個月俾成萬d環境咁差，我話好嘅老人院起碼要二萬尾，佢即刻縮沙
最後我同老公照顧老爺，但老公本身同老爺關係好差，所以變咗我主力照顧，但我哋都照顧咗老爺成年幾，佢至過身
其實我老爺奶奶走咗差不多三年，我老公就算同父母關係麻麻地都未放得低
我明白好多人都覺得我唔需要做到咁多，但我嫁俾我老公個刻，已經將佢父母當自己父母看代…….所以如果我係你老公，聽到你咁講其實對你都心淡咗一半，覺得你冇當佢媽媽係自己人，可能係咁佢先寧願成日陪你奶奶
又或者你老公經歷過老爺嘅離世，發現自己未有對自己爸爸盡孝道，所以先想對奶奶好d當補償，或者係令自己個心好過啲，又或者係你老公應承咗老爺要照顧好奶奶，所以至咁盡心盡力到忘記咗自己都有頭家
9個讚
你係好新抱，但冇需要做到你咁，你老公冇權要個老婆犧牲咁多（你肯一件事，唔代表個個都要咁），佢有家人照顧係佢責任，但都要記住佢老婆亦要過好日子，呢個係結婚嘅承諾。何況佢明明有自己兄弟唔迫，要你呢個老婆硬食
樓主老公都有義務諗下老婆感受，要抽身出嚟諗下係咪阿媽鑽牛角尖，係佢都要做啲嘢而唔係個人走咗去，話阿媽得一個老婆有第二個都冇所謂
4個讚
我結咗婚，絕對冇當老爺奶奶係自己父母，冇可能嘅事
我老公都冇當我阿爸阿媽係自己父母，所以我亦一定要佢父母保持距離
男人，同佢講道理冇用，反而要佢自己受返先知死
2個讚
我冇要求樓主要咁做，因為而家大部分嘅女性都唔會係咁，同埋li d係個人性格，冇得拎嚟做標準
只係如果樓主老公之前唔係咁對佢呀媽，係老爺過身之後先係咁，樓主就要試下喺老公個角度諗下，點解佢會咁為個呀媽，背後係唔係有咩原因
4個讚
我老公有迫過，當中發生咗d事，不過冇諗過佢兄弟好無賴，我老公都唔想我硬食
只係我自己嘅性格，睇唔過眼一個冇咗另一半嘅老人家好落寞咁
我老公嘅兄弟d老婆基本上個個都當老爺透明，就算冇工返都唔想幫手照顧，所以你講得啱呀，冇必要做到我咁，只係我性格會選擇幾辛苦，都想盡力讓老人家晚年生活過得好少少，唔好覺得佢得番自己一個
5個讚
我都覺得層住做得好好，比我都唔會幫到咁多。但係老公冇人幫，老婆仲要迫佢去迫啲兄弟，好似冇人企佢果邊，最差嘅結果係老公壓力爆煲。
咁講樓主老公同樓主其實都鑽緊牛角尖，如果咁易抽到身，樓主可能都唔會咁大怨氣。死亡比在世嘅人帶來嘅影響係好大。
如果要靠改變奶奶來改善現狀，係好被動嘅解決方向。我自己都有經歷過家人過身，要搬離新居陪住屋企人超過半年。當時都有擔心老公嘅關係，輔導員教我抽啲時間同老公傾偈。見唔到面嘅就lunchtime 傾下電話，自己行多步會易控制好多。
3個讚
你係超好，我做唔到，但我好欣賞你，你老公娶到你係佢執到
我屋企人有事，我要求我老公接接送送我去照顧，我已經好感激佢，其餘嘢我自己嚟
我覺得樓主老公都要識做，要為下老婆諗
哈哈….可惜佢個陣唔識珍惜，溝通上嘅誤會，加上佢屋企嘅情況，佢有提出過分開
好彩之後佢肯陪我一齊見輔導，而家大家嘅關係好咗好多
1個讚
我都覺得要，所以都要了解下樓主老公係本身超重視佢媽媽，定係老爺過身之後至變成咁
了解咗樓主老公，先知之後有冇咩對策
其實樓主唔鍾意奶奶都無可厚非
有邊個新婚冇耐就晚晚自己一個人過會開心
而奶奶唔係話掛住過左身嘅老公，或者唔適應冇左另一半，而係話怕黑
有另一個仔未結婚唔痴係要搵新婚嘅細仔
而樓主老公就淨係晚晚陪，突然間又陪，大半年，仲聽到咩「老母得一個，老婆可以有幾個」呢啲說話，做老婆聽落一定會覺得對方明顯不懷好意
樓主由無奈，生怨氣，到越來越唔鍾意奶奶，好明顯樓主老公冇安撫老婆
樓主嫁俾老公，到有事前唔知老公係咁，差落太大，先會咁大反應
樓主，你唔嫁都嫁左，亦都發現到老公有不似預期嘅一面，佢原生家庭帶來嘅牽絆，呢個唔係容易改變嘅事實
呢啲男人你越話佢家人不是，佢越對你反感
而而家事實上老爺真係過左身，奶奶又冇自己社交，未走到出黎都好正常，你覺得佢地感情一般，一家唔知一家事，你又唔可以用自己主觀感受黎衡量佢地父母嘅感情
我少少建議係，如果你仲好愛老公，希望佢回頭就唔好再講太多奶奶點解唔會獨立，或係老公面前講一啲同奶奶有關嘅負面野
你要接受現實，你老公應該都係唔會放手由佢媽媽一個人
希望你將自己從怨恨退返出黎，你覺得好難受希望老公可以抽時間陪你，你可以照直講，但唔好加太多佢家人點點點係內容入面喇，因為你一講佢家人點唔岩點唔著，佢就會自動block左你嘅訊息，其實你就只係希望佢會陪你，你希望同佢有多啲二人世界嘅時間，你希望佢顧家人嘅同時唔好唔記得你，你覺得自己好似冇左個老公咁，正面啲話佢知其實你想要佢為你做乜，而唔係佢家人要做乜
其實都難為左你，因為結咗婚仲要晚晚自己一個人食飯，可能老公又成日唔返黎訓，係會諗埋一邊
你唔駛鍾意佢家人，都唔駛同佢地好熟
佢地唔尊重你，你都做好自己先，好好地同老公溝通，老公在乎你，佢自然會返黎
10個讚
咁你都真係好大量
唔計較照顧埋佢家人都仲要講分開
真係心都碎埋
雨過天晴，祝你幸福
又黎奶奶是原罪，老公死左半年想個仔陪下唔俾，怕黑又唔俾，煮餸難食又唔俾，用下個仔個廚房直頭罪該萬死咁款。
都真係碎到一地都係
不過知老公唔係衰人，只係最錫佢嘅奶奶急病走得太突然，再加上在生嘅父親、兄弟都唔生性，從來冇為我老公諗過，佢壓力爆煲
我老公當時打咗好大篇嘢，講要分開，我當佢一時意氣亂講嘢，不過個陣睇完係有條刺喺度
條刺一直放喺心入面好耐，直到bb出世幾個月後，再見輔導員，喺老公面前講咗出嚟，成個人舒服晒，而我老公之後都有改變
我明白樓主覺得奶奶搶咗個老公，但真心不停批評佢屋企人對件事冇幫助，只會令你愈嚟愈憎你奶奶，你老公就愈嚟愈憎你，反而好似樓上咁講正面啲話你老公聽你想點會好啲
其實我個陣心底好唔喜歡老公嘅兄弟，仲要講到出口話佢兄弟唔幫忙照顧老爺，所以個陣其實我都唔知自己俾咗好大壓力我老公，講真li段時間唔易捱
我曾經都係過來人，明白li個情況一d都唔易撐過去，但不停對老公身邊人抱有不滿，辛苦嘅會係你同你老公，只有你同老公嘅感情受到傷害，但其他人咩事都唔會有，咁樣真係好唔抵㗎
唔需要好似我咁全心全意去照顧老爺奶奶，但你如果間中幫你老公一、兩次陪下奶奶，你老公應該會感激你
9個讚
恕 我直言，長此下去，有咁既老婆，又冇小朋友，我會可能選擇離婚。
話說我老婆同我老豆關係不太好，反而同婆媳關係唔錯，有日我媽走了，大家都好傷心，初頭我都係日日去老豆屋企倍佢過夜，因為間屋得佢兩老住，媽走了就得番老豆獨居，唯一既家姐都行動不便，我主力要 take care 老豆，又要 掩飾自己既傷心，真係好吃力，又要應付工作，工作其間又要掛住睇下老豆，真係冇時間顧慮自己頭家同老婆，我知我老婆傷心之餘都好辛苦，又要睇住小朋友，都需要有人支持，但我真係心靈同體力都透支到極限了。有次無意 聽到老婆同人傾電話，話自己好似冇老公，做左單親媽媽… 我就問佢係米嬲左我，佢話佢係好嬲呀，不過叫我照去倍老豆，佢唔會同老豆爭寵，以後既日子倍佢一個就夠；果一刻我有更多力量應付了。
希望樓主呢段時間多支持身邊既家人，一同 渡過難關。
4個讚
借post一問…你真係一個好老婆，所以想你俾D意見我…
我老公近來因為失業變得好唔開心，我已經半年冇見佢笑，而家一至七都返part time job，早出晚歸，完全冇時間陪我同小朋友，每次我問佢有乜唔開心，佢只係答「冇嘢」、「好攰」、「想瞓」，我係佢面前哭過好幾次佢都唔理我，唔出聲，我send msg 俾佢又唔覆，究竟我有乜可以做，我仲好愛佢，但已經唔知可以點…心很累、很痛…
其實我都唔係一個好老婆嚟㗎，結婚前我哋去過兩間婚前輔導，都解決唔到溝通問題
婚後其實我除咗盡心盡力照顧老爺奶奶，我個陣都因為老公嘅兄弟，俾咗好多壓力我老公，都有埋怨過佢，個陣都不愉快㗎⋯⋯但好彩之後我有咗，有產前抑鬱，佢肯陪我一齊見輔導，而家嘅關係同溝通先得到改善
不過想了解下你係ftm 定有工返？