講真，第一胎嘅話鬼識咁多咩，知要換片，嘔奶要換衫。但係啲衫係邊，點睇洗唔洗換片，媽媽都係岩岩見到個BB幾個鐘，點會突然間識。我係醫院見過有媽媽到臨出院，都仲要姑娘教先知尿片藍色即係濕左。
其實呢啲基本照顧可以整份簡介派俾媽媽自已睇都冇咁荒啦。上過講座都好，生完仔好多俾人打左一身咁，邊記得咁多野丫。
2個讚
呢個真！
見有媽媽比護士話， 搞到好自責咁因而情緒低落，為咁搞到抑鬱就唔抵。
生仔真係好講彩數，同一間醫院，有啲人好好彩，有啲人唔好彩。
我第一胎喺產後經歷都係地獄級別（但產前同產房都好好），生完真係有創傷後遺症（本身生產過程唔順利再加地獄產後房）。
好彩第二胎同一間醫院生，終於叫做遇返啲有愛心嘅醫護。
所以如果身邊朋友有猶疑，究竟去公立定私家，負擔到我一定叫佢去私家。
我嗰時都有試過，半夜我附近床嗰堆媽媽全部都有唔同原因落唔到床、我自己全身上下都駁晒機又係落唔到床，都比較難去照顧bb，所以有事時唯有㩒鐘仔，過咗陣有個姑娘好似癲咗咁衝入嚟大鬧一句：知唔知姑娘好忙架？全部人都唔俾㩒鐘！然後大家都無人理，嗰時真係喊出嚟。
1個讚
試過一次懷孕初期作小產心情已經唔好，
去到姑娘收症時候，
我聽到佢同另一個姑娘講
佢唔想番工。
另一個姑娘就話
你唔想番工關我咩事。
問我有冇藥物敏感。
同一時間又叫我攞身分證出嚟。
我話無。
佢同人吹緊水聽唔到。
佢之後好串咁講，
頂你，我問左你幾次都唔答我。
我心諗後生女都係咁。
照答佢無，
之後繼續問症。
係呀，我之前嚮威院生，一心諗住餵人奶，點知餵唔到（乳頭扁），BB冇乜點食過奶。我同姑娘講，可唔可用針筒餵住水奶先，個後生姑娘態度好差咁講話，餵人奶係咁架喇，我一刻勁無助，真係唔想BB跌磅而留院。我真係懷疑過姑娘自己都可能冇生過。
最後我BB跌磅太勁，要留院，要我自己出院先，留院時其實姑娘咪又係餵水奶，仲係用奶樽餵添。。。做乜要強迫d媽媽餵人奶
。
4個讚
反而我聽到有開刀媽媽唔想喂人奶，
啲姐姐好好咁同佢講：
你唔想喂就唔好攪個胸，
谷奶好辛苦架。
利申：廣華醫院
我就係豬左開頭話會餵人奶，應該一開始就堅決餵奶粉。
就係我對面床，
第一晚個太太話試下喂人奶。
到第二晚直接同姑娘講
Bb食唔飽係咁喊夜晚休息唔到，
自己又唔夠奶，
可唔可以試吓喂水奶。
姑娘直接話好呀。
初生bb住係醫院2日無濕片無小便脫水嘅案例真係聽唔少
我仔就係係醫院返到屋企嗰日痾結晶尿（橙橙地色咁）
好彩問題唔大，飲多幾次奶就無事
所以要餵人奶追奶番屋企慢慢追
要留意bb係醫院要有奶落肚
1個讚
我係助產士縫，一路縫一路教新人
今次第二胎去做唐氏檢查嘅時候醫院安排左個所謂母乳講座，俾本書你睇睇完去見母乳姑娘/助產士，聽佢講點解需要母乳，又話唔好餵奶粉，會搞到bb胃唔舒服會嘔架，浪費時間
如果我係第一胎聽完真係會以為一生完就做到佢講咁完美…
1個讚
我都係廣華生，好好喎
我順產，朝早晨咁早生，上返產後房已經派早餐時間，第二日中午就出院。遇到幾個護士都幾好
1個讚
我都分享下，我喺威記安胎+生仔
舊年11月中見紅入院，當時27週。醫生檢查過宮頸短需要留院觀察，一留就留到35週先準出院。
產前房住左足足2個月，其實都還好，自己安排好時間沖涼食野探訪，唔好阻人收工/要人四周圍搵你量體溫/血壓/篤手指，多數都唔會黑面啦
膳食方面真係不敢恭維。椰菜/生菜/雞肉粒/豬肉粒 而家見到都怕。好啲果日已經係小棠菜+雞翼。有個餐係蒸豆腐，加啲肉燥上去…但係成碟野都係凍嘅
仲有一樣，產前房係冇牛肉食嘅，問左好多人冇人知點解
講真120蚊一日你仲想點？姑娘都有問過我啲膳食要點改善，佢想做到好健康果種。我第一句就話，唔好加榨菜啦！唔健康呀。
到左36週3早上突然穿水，拿拿臨坐的士去威院。坐的士左果陣已經越黎越痛，痛到fing開老公隻手。當時一直忍，同自己講唔好喺的士生仔，捱到去醫院先，其他時間腦海一片空白。
落的士已經要老公推輪椅推我上去。果刻心諗唔知開左1度未？咁Q痛嘅？痛10幾個鐘仲得了嘅？
上到產前房門口，坐低填表，寫到職業果欄已經痛到寫唔到字。嬸嬸話你咁熟面口嘅？我答係呀我住左2個月果個26號床…
後尾痛到意識迷糊，只係記得俾人夾手夾腳擺上病床，推到去某個位拉埋簾，嬸嬸幫我除衫除鞋著紫袍，姑娘伸手一探，叫左聲哎呀開到8度，落產房啦！
落到產房等姑娘助產士set up晒啲野，再等多一陣，姑娘/醫生話生得，開始吸氣推bb出黎，吸左大約3次到就ok。落到產房到生仔大約用左30分鐘。
生完成個人輕鬆晒，由於過程太快，冇笑氣冇剪會陰，係爆左少少，等姑娘/醫生打麻醉聯針後又等一陣就上產後房。生完冇耐有職員俾個電話你報平安。
產後房冇想像中咁惡劣。感覺比產前房仲輕鬆啲。係就係8個人一間房，但又未至於8個bb一齊喊，但肯定訓唔好架喇。
仲有，走佬袋唔準用喼，一定要用袋，而且唔準咁大袋。嬸嬸話冇位放喎。
4個讚
始終私家服務好啲，樣樣都同你計錢
仲係幾十年前咩，依家應該無乜學歷低護士
5個讚
最低都要護士學校讀四年
我幾年前又係好似你咁諗要試吓政府醫院，同平D 嘛 
給論係，產房姑娘好好，但產後房姑娘唔好，之後返政府醫院檢查都係感覺唔好，完全feel 到佢地無心做
好幾萬同幾百蚊比較，加上一個一世嘅回憶，個人覺得去私家好D
我覺得似旅行住6星同3星既分別，睇你重視邊樣多啲
1個讚
初期 QE 推母乳嗰陣真係比媽媽好多壓力, 我生大仔時都係咁。但不得不承認, 如果私家生而又無咁好恆心埋身, 身邊好多朋友都變左泵媽/無餵人奶。公立有啲姑娘語氣態度係好差, 但好既都有, 我自己就第二胎都係返 QE生, 嗰陣反而係醫院主動同我餐餐餵奶粉 (可能阿B出世血糖低), 最多餵之前放阿B比我埋下身。
我覺得公立好多時政策係好, 但實行起上黎無咁多人手, 攪到前線醫護好燥 
1個讚