第一胎係政府醫院生
嗰陣年紀輕諗住人一世物一世就試下個傳說10級痛有幾勁 
諗番起嗰陣嘅自己真係又傻又天真
揀咗婦產科好出名嘅廣華醫院
未生過唔知一入到去真係大開眼界
每間八人房都full晒 （一有人出院立即有人補上嗰個床位個種）仲見到有啲生完攬住個BB瞓喺走廊等床位
所有姑娘都忙到氹氹轉
佢地咁忙照顧起產婦上嚟就自然會有啲甩漏嘅
呢個我都明白
講返生產嗰日
上到房測胎心胎動
隔離床已經有幾個慘叫緊已經搞到我好緊張
我嗰陣時只係好疏落嘅陣痛開咗一指左右
測完一輪可以比我出去搵老公傾下計
跟住叫我入返產前房等待 老公唔俾入嚟啦
好彩仲有得篤下個電話同人吹吓水
到食飯時間老公又可以入黎探下我
到佢走咗之後陣痛開始強烈
陣痛一黎咩都做唔到 陣痛一走又篤番電話咁
維持左呢個情況好耐 跟住我就發覺點解根本冇姑娘嚟睇下我或者係內診檢查
第一胎又唔知道究竟痛成點先至係生得
跟住我就覺得要由被動轉做主動
好艱難爬起身撳吓個鐘仔，同姑娘講可唔可以check吓開左幾指，我已經痛到頂唔順
佢先勉為其難既樣幫我睇
之後發覺開咗三指左右 咁我就問有啲乜嘢止痛嘅措施可以減輕下個痛楚
想當然係冇
叫我調節呼吸啦 止痛針對bb唔好架
跟住就好瀟灑咁走左
跟住又過咗幾個鐘 痛到迷迷糊糊咁
陣痛真係愈嚟愈密好似身處喺虛幻空間咁
有一刻個心喺度諗如果有得揀死定係繼續痛
我真係會毫不猶豫揀死
跟住慢慢feel到有舊嘢想沖出嚟咁（真係似大便既感覺）
好神奇個身體係無用力架喎
嗰陣已經痛到唔識撳鐘叫姑娘
最後有個姑娘走過來睇一睇下我
入到呢間房係第二次見到姑娘咋
檢查完話我生得可以送入產房
（喂其實我係咪生得好耐你哋而家先發現到
）
入到產房記憶好模糊因為太痛了
淨係記得兩個助產士好忙碌咁樣準備工作
叫我對腳要擺喺邊度 要坐直啲個人
跟住老公唔知幾時入咗嚟
跟住冇耐就叫我可以開始配合陣痛用力啦
兩吓個頭仔出左再黎多下痾埋個身仔
生產過程比起前期陣痛只可以用一個字「爽」來形容
（雖然每一下用力都feel到下體爆裂既痛再用力生埋個身再爆多次，但我知道呢個係唯一既方法可以完結呢個痛苦）
陣痛痛到feel唔到剪咗會陰係真嘅
因為到佢要聯針果下先知道「吓 原來你剪左」
聯針嗰陣因為陣痛已經冇咗
所以你真係feel到佢每一下落針嘅痛
最後BB檢查完比自己抱返
推咗幾吓肚排啲惡露出嚟
就搞掂哂推番上去產後房
因為唔係探病時間 byebye左老公就開始自己喺病房單打獨鬥
首先我就發現吊緊子宮收縮嘅點滴佢嗰粒豆種得唔好
針口歪左（其實姑娘幫我種嘅時候已經問我 「哎呀種得唔好 使唔使再插過？」
我本著唔想麻煩人又唔係特別唔舒服就話唔緊要啦
但過左幾個鐘手指腫到好似豬蹄咁又麻又痛
搵姑娘過嚟同佢講可唔可以幫我拆咗佢點滴已經滴完
佢就話轉頭有專人嚟幫你㗎喇
跟住又串我插喺手腕點解手指會腫啊
最後過咗成個鐘先有人黎幫我拆
仲要串我 「有冇咁痛丫？」你試吓有枝歪咗嘅針插係你手腕睇吓痛唔痛？
病房嬸嬸語氣差已經好少事
比佢地呼喝 我覺得冇乜嘢
始終佢哋工作量大 病人又多我體諒嘅
「你個粥仲食唔食架？」
「污糟衫自己拎去污衣籃喎」
「桌面唔好放咁多雜物丫呢度醫院黎」
呢啲真係好小事
最頂唔順係生完第一篤尿要用尿盤痾
因為唔比落地驚你暈同要你痾足尿量
咁我未試過咁樣痾尿 戰戰兢兢喺床上踎咗喺度屙 個姿勢都唔好維持架
屙完叫嬸嬸幫我收啦
點知我等咗20分鐘都冇人幫我收
我嗰下真係好無助
嗰陣個點滴仲未拆。我對腳又好攰
最後堅持等到個嬸嬸過嚟幫我收
我真係一泡眼淚咁 佢就話唔好意思隔離清緊床
揀得政府醫院我預咗嗰兩日冇得瞓
其實俾你瞓你都唔敢瞓 因為個BB廿四小時擺咗喺你身邊
新手媽媽仲要自己一個真係好緊張好擔心佢喊一下都忍唔住拍拍佢
最印象深刻佢佢出世咗冇耐佢就屙咗佢第一次大便，墨綠色嘅屎
我望住咁大篤黑色嘅屎我真係呆咗喺度
仲要好黏痴佢pat pat好實
嗰陣好後悔點解冇做多啲功課練習吓幫BB換屎片
冇辦法頂硬上，用咗大量濕紙巾先抹得乾淨佢pat pat，用唔熟手嘅手法幫佢換咗第一次片片
都幾有成就感，不過之後好快崩潰因為隔左冇耐佢又屙咗第二篤，又係黑色既黏黏屎
8人房bb大合唱真係好熱鬧
嗰段時間我都係專注埋身上奶
奈何未上奶就真係未上奶
個胸脹卜卜 但係一滴奶都冇
問路過嘅姑娘佢哋都係話 多啲埋身就得
到第二日夜晚我真係頂唔順自己推阿B出去比姑娘餵奶粉
因為見到阿b餓又食唔到奶好可憐
去到見到一個姑娘對住10幾個BB
啲BB推車堆到門口都入唔到
咁我就將自己個仔堆喺護理房門口隊尾等待就走咗
自己返入房又忍唔住喊咗
好不容易眼光光等到第二日順利咁出院返屋企
個兩日真係玩到兩母子身心俱疲丫
