我細個啲利是儲起有二三千蚊，中學要睇醫生（皮膚）我媽叫我自己比錢，都ok呀因為係自己身體，不過睇幾次冇晒錢好難過
到我媽老，郁啲就話要睇私家，佢有錢又唔自己比（絕對唔少錢）。我話你知，我個心真係介意
睇少少病就千幾二千去港安，傷風感冒咋
5個讚
你媽知你搵到錢，但唔體恤你都有自己負擔
唉～
細個我哋幫阿媽封利是，都知道要用好多錢
阿媽同我哋講嗰啲利是錢幫我哋儲起或者用咗佢，我哋都冇咩感覺
因為覺得本身啲錢都唔係我哋付出，所以人哋俾我哋嘅錢我哋俾返爸媽都好應該。由細到大都覺得自己未識搵錢，啲錢真係唔係我哋嘅，因為真係佢哋養我地。到大個咗自己搵錢，先覺得有自由可以洗錢先可以買自己鍾意嘅嘢 (當然都要俾家用)。
甚至乎我仔滿月，我爸爸啲親朋戚友封咗好多利是，我全部都俾返我老豆。
3個讚
我可能比較幸福, 細個果陣我媽係會幫我地三兄弟姐妹一人開一個戶口, 放晒D利是錢入去(其實有時生日呀,D長輩都會派利是,我地都會入埋落去, 我侄仔出世我媽一樣係咁樣處理, 有咩錢就入晒入戶口到,我打算第時我仔出世都係咁做.一黎係佢細個既時候就可以幫佢儲定D錢, 唔會亂咁洗左佢…二黎小朋友又會覺得自己D利是錢係自己既…會甘心囉出黎D既…
BTW… 我封利是係用老公D錢… XD
我以為人人都係你咁諗，唔知原來咁多人Care啲利是錢
可能基本上我啲親戚都唔係香港，所以新年只會得3幾封利是，好少錢。
1個讚
我係自細親戚唔經常係香港，新年先返黎一次仲會封好大封，講緊 2X 年前已經有金牛同大牛，仲係雙封。未讀小學就唔多覺，但讀小學識個十百千萬，就會知道金錢係乜回事。
諗落以前父母唔識變通，一手當面搶走封利是，係小朋友都會唔開心。其實佢只要正向訓練，自動上繳可以換到禮物之類，咁就一定好開心咁畀曬父母 好簡單去化解。
1個讚
現實好多人自己做乜都冇錯，人哋做就錯
哇！好豪氣！
阿女細個D利是我哋幫佢入戶口，全部有條數。呢幾年佢大個D有金錢概念，收返嚟既利是我哋會同佢一齊數，因為一直有做理財教育，所以阿女好自動自覺會將舊錢分兩份，大舊果份佢會儲起(當然如果金額「未到」我心目中條數，我會軟性「誘導」 
) ，儲起果份佢又會分兩份，一份係比爸爸幫佢儲(爸爸話會比返利息佢，但呢個概念有D深，佢只知道放爸爸度會多咗少少錢)，一份佢會放落自己一個開唔到既錢箱度，剩餘幾百蚊就會放響佢另一個開到既錢箱度，比佢自己日常攞嚟用。
我覺得小朋友如果有初小，都應該試下比佢有份自己可掌控既錢，除咗教佢金錢概念，仲可以教佢點洗錢。我個女K3開始有零用錢(由利是、每星期幾蚊零用，同考試默書攞滿分既教學奬勵組成)，佢已經經歷過幾次「破產」 ，試過好多次因為為食洗大咗結果買唔到原本想買既玩具。最近呢年可能大個咗，定力好咗，入到去文具店、玩具店已經收放自如。見到想買既嘢會自己計好數，比錢之前又會再REVIEW一次係咪一定要買。
儲錢係第一步、教洗錢觀念係第二步，再大D就可以開始教佢哋點開源。覺得小朋友已經READY可以開始教金錢概念既，其實由利是錢入手係個好選擇。
6個讚
同埋我爸媽從來都唔會因為我地考第一或者攞scholarship 嗰d而買禮物或者送錢比我地。佢同我地講佢哋以前想讀都無得讀，而家我哋可以唔駛擔起頭家全心全意讀書，讀書就係我地責任同benefit自己嘅，盡力爭取好成績係應份。
我覺得呢套理念幾好，因為我哋唔會扭計話你想我叻d就買咩比我先啦。
我諗我第時都會咁教仔。過時過節買玩具禮物ok，但唔會同佢學業achievement 掛鉤
3個讚
我仔好細個已經開咗銀行戶口，
大啲就唔冼開，佢返小學已經開始會攞錢買，愈大要求愈多，
到咗中學佢就自己袋住啲錢，唔想比你入落戶口。
其實唔怪得你老公話你想話你吞個仔錢嘅，你跟本就係做緊。
你睇埋樓主老公點將小朋友啲利是錢投資先…蝕咗佢老公唔會補返筆數
大家都係家長，跟本知發生咩事，『投資』藉口嚟嘅啫，10年八年後攞得返出嚟先算啦！
其實教小朋友理財，呢個係個好topic,希望等到高手開post再睇大家分享，上面有啲分享都唔同做法，但老土講句各有好處，都要睇返家庭本身理財態度同小朋友年紀先講到點教會比較好
我就ftm,老公比哂份糧我！以前公司新年有雙糧就拎唻新年買衫包利是，呢幾年冇雙糧，我都係用返果份家用買衫包利是，再包埋比老公返公司派，一年一次，新年一家人應該開開心心，最多過完年慳返！囡就由細個每年幫佢儲起，用保鮮袋寫年份，一包包儲起，到佢大啲就一半利是比佢用，一半用保鮮袋包起，到佢話要去台灣讀書，我就比返哂啲利是錢佢傍身
我唔係高手，我都想分享下我仔啲利是錢點用。出世到五歲，D利是我放係我戶口。到佢6歲時，就同佢開咗個兒童儲蓄戶口，將之前D利是錢連本帶利存入佢嘅新戶口(每年我有記低佢收咗幾錢利是，我付年息2%,做為利息)。
小學時，因為學校冇小賣部，佢冇嘢買，每星期嘅零用會儲係個簿仔度(我自制
)，仲有月息2%，(目的鼓勵佢少使錢)，佢明D唔明D，淨係知月尾會有幾毫子利息
到中學，佢已經好知錢嘅重要性，所以唔肯全部利是存入銀行，我游說佢將利是錢分三份， 儲起一份，自己用一份，第三份另就請4大長老飲茶，(唔夠梗係我墊底啦)，次次都氹到佢哋好開心，覺得個孫好乖仔。
3個讚
好多謝你分享呀
我女就8歲但仲係一舊飯咁，今年初開始我有俾零用錢佢，但可能無返學又少出去，無咩機會用，有時唔記得俾佢佢都無追返我…
我好記得喺其他post有睇到你講教仔仔分3份錢，因為我老公理財能力一般，我有略略同佢講過你點教理財
睇嚟由利是錢開始教小朋友理財係個好的切入點
2個讚
其實我仔以前都係一舊飯，又係唔緊張錢。
你囡8歲，依家灌輸D簡單嘅用錢概念，點用利是錢係幾好嘅機會。
我之前睇過一本書教小朋友理財，話最好俾佢哋用現金來買嘢，坐車，咁比較容易D建立對錢嘅概念。
未試過洗錢對「錢」真係冇概念架，想買乜叫爸爸媽咪就有，父母唔想買就乜都冇，可能忍咗去可能鬧脾氣，都唔係好出路。所以比少少錢由得佢自主掌控，等佢慢慢有概念知道點用錢，要買鐘意既嘢就要儲起舊錢，今日洗晒將來見到好鐘意既嘢就冇錢買…呢D大道理口講唔深刻架，自己試過先入腦。依家細細個仲聽教，洗極「破產」極都係有限錢，父母仲可以循循善誘，所以我覺得要趁佢哋細就開始教理財。
小朋友個個唔同，教佢哋方法都有好多種，希望多D人一齊討論，互相參考支援。
1個讚