睇到你個呢msg我好touching 好感動好想喊 
我宜家回想返，其實辛苦都係頭個三四個月辛苦，去到第五個月已經冇哂事，我覺得自己完全係靠自己意志力去捱過辛苦，因為一直只係諗住只要孖B冇事我自己都唔會有事嘅 
2個讚
我認真架，我自己依家都有左，
如果要經歷咁多嘢，
我唔知自己頂唔頂得順，
呢種心理折磨都唔小嘢…
總之依家冇事就得喇，
祝福你一家人都健康平安
2個讚
不經不覺又係時候返去做產檢啦，本身我諗住自己call grab 車去，不過我朋友見到我面青青有啲擔心（其實長時間唔夠瞓，又食唔到嘢，仲不斷嘔嘅情況下，我相信每個人都會同我一樣，面青口唇白囉）所以佢専登做咗，我個柴可夫司機，媽咪就做‘跟得’夫人…一於跟實我。
去到診所當然要做指定動作，磅重量血壓同驗wee wee，跟著就係呆等見醫生。由於今次真係好唔精神，完全無狀態，所以喺等待嘅時候我就不斷喺度‘釣大魚’。釣咗差不多一個鐘頭大魚終於可以見到醫生啦。一入到去醫生都嚇一嚇，問我發生咩事，仲乜成個人‘落哂形’。醫生呀醫生，我每晚都瞓唔到覺，又食唔到野，而且仲嘔得越來越嚴重，係咪會持續嘔到生㗎？醫生就叫我唔使擔心，其實每個人嘅孕吐情況都好唔同，一般到咗三四個月嘅時候孕吐就會開始減少甚至消失。而正因爲孕吐攪到冇胃口同瞓唔到，隨著孕吐情況改善其他問題亦都會相應改善，所以唔使太過擔心。
同醫生講完兩句又係時候見下孖B啦，由於媽咪係第一次陪我去產檢，亦係佢第一次見到孖B，佢就好留心咁望實個mon等孖B嘅出現， 不過佢唔係好識睇，於是醫生就好比心機同媽咪講解究竟邊度係頭邊度係腳，媽咪睇到好開心，跟著醫生問佢想唔想聽下孖B嘅心跳，媽咪即刻話：‘吓，乜聽到㗎咩？真係聽到㗎？’ 話口未完醫生就已經開咗個喇叭比媽咪聽孖B心跳啦，媽咪話聽唔到喎，淨係聽到啲‘服服服服‘嘅聲咋喎！醫生跟著就同媽咪講：呢啲‘服服服服’聲就係bb嘅心跳聲啦。
待續……
9個讚
多謝你呀 
我都祝你事事順利，開心享受待產嘅每一天
期待你嘅小天使的到來 
1個讚
聽完心跳聲之後，醫生問我除左嘔之外仲有冇流血？雖然仲有流血，慶幸嘅係已經由紅轉啡了，不過個量都仲有啲多。而計返日子今日已經係week13+1，即係過咗三個月啦，我亦都打算下星期離開馬來西亞飛返香港。醫生覺得呢個時候飛返香港都適合，個胎都算陀穩，不過為安全起見佢建議我打多最後一支安胎針會好啲（唉！冇計啦，為咗孖B就唯有頂埋呢針，希望之後一切順順利利啦！）臨離開醫院，醫生都専登出嚟同我道別，佢話生咗就send孖B啲相比佢睇，希望一兩年後我帶埋孖B飛返嚟探佢。
由於我孕吐嘅情況都幾犀利，而且又食唔落野，雖然爹哋媽咪會陪我一齊返香港，不過老公都係唔放心，所以専登飛咗過嚟陪我同孖B一齊坐飛機返香港。喺臨返香港前呢個星期，我馬來西亞嘅朋友見我同爹哋媽咪嚟咗咁耐，都冇去過其他地方玩吓食吓，於是我哋就等埋老公，然後揸車去咗轉怡保睇吓嘢，食吓嘢同買下啲手信，今次仲專登跟住（走路去馬拉）個節目介紹嘅路線去玩。聽聞怡保啲豆沙餅、蓮蓉餅、花生糖、芽菜雞同埋啲湯河粉好好味。我樣樣都好想食（不過唔知孖B想唔想食同埋食唔食得落姐），而媽咪就最愛食花生糖，所以我老公排咗差不多2個鐘頭隊，都要買花生糖食，咁我當然就係坐喺架車度嘆住冷氣等食啦。
好啦，又係時候要同馬來西亞say個goodbye 啦。唔經唔覺喺度都住咗差唔多四個月，我好感謝馬來西亞朋友嘅招待，雖然係有啲唔捨得，不過唔緊要…… l will be back。第一次陀住孖B坐飛機，雖然我已經飛咗超過10年，所謂氣流之類已經習慣哂，不過心情始終有一種莫名嘅緊張（驚住會遇到突發嘅強氣流會拋離拋去），所以一上到機扣好條安全帶之後，我就再係個肚同條安全帶中間個位度攝咗兩個cushions墊住（保護住孖B）跟著就冇再除過（就連廁所都冇去過）。好好彩呢程機非常平靜，無風無浪咁就到咗香港，（孖B welcome to Hong Kong)
待續……
9個讚
眨下眼，原來我已經成個星期都冇寫到分享喇，呢個星期真係超忙，因為哥哥無啦啦發燒燒咗兩日，非常扭計而且又唔肯食嘢；再加上自己去咗打埋第二針，所以分唔到身去寫分享
就趁着哥哥今日精神好返啲，我終於都可以抽到少少時間再繼續寫餘下嘅分享啦:happy:
一飛到番香港，我突然間好想食燒味飯，所以一落機就係機場食咗個义燒燒鴨飯。不過媽咪話燒鴨好濕毒唔比我食，我唯有只係食啲义燒同下面有燒鴨味嘅豉油白飯，出奇地我可以食到一大碗飯而又冇反胃嘅感覺（哈哈，孖B應該都鍾意食燒味）所以返到香港屋企第一晩都好風平浪靜冇嘔過，我終於可以瞓返個舒舒服服嘅覺啦。，嘩！到咗第二日起身都已經差不多下晝一點幾，好耐都冇試過一瞓就瞓咗13個鐘頭，睇嚟孖B好鍾意自己屋企張床喎。食完個晏晝之後見冇乜唔舒服，咁就開始搵醫院同私家診所去登記準備係香港做產檢啦。
由於屋企係屯門區，為咗方便自己所以就打咗去屯門醫院度問究竟點先可以登記做產檢，當時佢哋回覆話只要一封醫生信就得。於是就book咗一個星期後係屯門醫院睇第一次產檢。不過係呢個星期入面，我又再次孕吐到坐天光喇。
待續……
咦係喎，今日原來係中秋節，我喺呢度祝各位jm 中秋節快樂！
17個讚
終於嚟到第一次產檢日子，由於約咗朝早9:00，所以一早就起身準備，不過之前一晚又係頂住頂住好想嘔咁，最後當然又係坐天光收場（有一刻我好想cancel唔去，不如瞓多一陣算吧啦）但係諗到一陣又可以見到孖B，即刻就成個人醒哂。
因為第一次喺香港做產檢，所以老公專登請咗半日假陪我去，不過一去到醫院門口就已經見到一條好長好長嘅長龍，排晒隊喺度等𨋢（嘩！咁多人，即係要等好耐搞好耐先至可以返屋企瞓囉！希望老公返工之前就可以完成晒所有檢查啦！）
等咗差不多30分鐘，終於都等到部𨋢上去做登記啦，登記完又到咗做指定動作嘅時間，驗尿、量血壓同磅重。（咦！45.3kgs…….我啲體重開始重返啲啲啦喎，唔錯唔錯，唔係繼續輕落去就已經好好啦。）好啦，好啦，check完哂基本嘢……就到咗等見醫生啦。由於尋晚坐天光冇乜瞓過，所以我一坐低就開始喺度釣魚，所以我最後‘樸’咗係老公個膊頭度一邊瞓覺，一邊等睇醫生。等咗差不多兩個幾鐘，終於都叫我個名啦，因為寫明老公唔比陪入去見醫生，所以得我自己一個瞓到夢夢鬆鬆傻下傻下咁行入去見醫生。
一入到去見醫生，對晒啲個人資料之後醫生就問我BB幾多周，計吓計吓原來孖B今日已經係week 15+5啦。我同醫生講我係陀緊孖B，因為佢哋係Ivf BB，跟手我就即刻俾埋馬來西亞嘅醫生寫嘅醫生信俾佢睇。醫生跟住就問我：咁你陀嘅係單卵雙胞胎定係雙卵雙胞胎？我就答係雙卵雙胞胎。然後醫生就講咗句⋯⋯點解你咁肯定呢？（我聽完之後，我覺得呢個醫生好好笑喎，馬來西亞嘅醫生明明已經喺封醫生信度寫到明我係雙卵雙胞胎，同埋我之前喺馬來西亞嘅時候已經照過陰超同超聲波，我自己已經見過係雙卵雙胞胎，點解講完比佢聽佢都要質疑呢？）醫生講唔夠兩句就叫我上床做檢查，（我初初以為又可以見到孖B啦，點知……姑娘淨係攞咗部機嚟同我check孖B個心跳，我淨係可以聽到孖B嘅心跳聲！）
姑娘一路check就一路不斷喺度‘依依哦哦’話我郁嚟郁去（嘩大佬呀！你唧Pat啫喱係我個肚度係超凍囉，同埋呢度啲冷氣好似唔駛錢咁，11月尾啦仲要開大個冷氣！姑娘呀，我其實唔係郁嚟郁去，我係凍到成個人喺度震緊咋）之後佢繼續喺度‘吟吟沉沉’話孖B點check心跳姐，我點知係咪check來check去都係同一個BB嘅心跳喎，孖B好難check心跳嗰喎！你真係肯定你陀嘅係孖B？你個肚唔似陀孖胎喎！跟著醫生都和應話：係囉，一啲都唔似陀緊孖胎！（嘩，呢句説話真係仲難聽過粗口喎，乜嘢叫做你個肚一啲都唔似陀繄孖胎呀？聽完嗰一刻我真係好想即刻走囉）
待續……
5個讚
睇到有啲嬲
我明香港公立醫護真係忙到踢哂腳,
都理解唔會好好面口…
但唔明白點解要講啲咁攻擊性嘅說話,
明知大肚婆情緒都比較敏感,
你忙、心情唔好咪唔好講嘢囉, 咁樣講你想人俾咩反應你…你地又唔俾照超聲波喇…
我諗你老公聽到可能嬲到叫你以後去私家產檢算… 
3個讚
我都覺！ 好差呀真係！就算佢地真係咁覺得，都收埋係心啦！
唔好話大肚婆，我聽到都覺得唔舒服！更何況敏感嘅孕婦，
重要你咁辛苦先陀到佢地，比人地咁樣打擊，仲要比人質疑···
都真係幾痴線··· 我明佢地返工都辛苦，但真係講者無心，聽者有意呀
佢地真係要留意下自己講嘅野咯 ：（
3個讚
痴線15週個BB 可以有幾大呀?
你地自己唔專業就唔專業啦
係你地無得照超聲波先要用個胎心機掃黎掃去咋嘛
佢地d 說話真係難聽過粗口呀
2個讚
好啦，聽完孖B心跳聲之後，我諗住著返件衫嘅時候，姑娘就大聲問醫生係咪要check 埋其他（吓check其他，仲有咩嘢要check 呀？又話無嘢照嘅！咦，唔通改變主義，可以用個mon嚟睇吓孖B？不過，之前都係邊睇邊照順便聽心跳，乜香港係分開嚟做嘅咩？咁奇怪？）隔咗一陣，醫生就嗌話check埋啦，跟住姑娘就叫我除埋上身衫，佢話要check 胸喎！我即刻問姑娘點解要check，佢就話just make sure 我個胸冇硬塊喎（吓！乜香港做產檢要做埋呢啲嘅咩？唉！肉隨砧板上，你話check 乜就check乜啦。我諗我都係時候認真考慮吓我究竟喺香港生定返英國生喇！）
除咗件衫都差不多成兩三分鐘，醫生都仲未肯入嚟check，我就越來越震…係凍到震，我開始全身不受控制咁震，姑娘就開始驚，不斷問我咩事呀，做乜咁震呀？姑娘我好凍呀！（喂大姐呀，你叫人除哂啲衫又開大個冷氣，正常人都凍到震啦，更何況係一個通宵冇瞓過嘅大肚婆呢！傻的嗎？）
佢見到我震到好似人哋抽筋咁，先識大叫：喂！搵人熄咗個冷氣佢，同攞兩條毛毯嚟，個大肚婆好唔掂呀！佢講完個大肚婆好唔掂喎，果刻個醫生先識衝入嚟睇下我咩事（吓，醫生你仲喺度望，你冇嘢呀？你見我震到咁，你仲想check啲乜呢？）醫生跟住就話姑娘：個patient 凍成咁，你哋冇mon住嘅咩？佢依家震成咁，我都check唔到住㗎啦，等佢冇咁震我轉頭先再過嚟check啦（天呀，我究竟去咗邊度呀？！我都唔係要求啲咩星級服務啫，我淨係想快快脆脆俾你哋check完，我可以返屋企瞓啫！點解會遇到啲咁嘅醫生㗎？！我果一刻已經決定咗：我唔要喺香港生，我要返英國生！）
待續……
8個讚
過咗10分鐘左右，我成個人開始暖返啲，我就問姑娘仲要等幾耐，如果醫生再唔嚟check嘅我就走喇，明明無病都凍到病！我一講完句說話，醫生就跟著入嚟（頂，其實喺咪我唔講你就冇打算入嚟check呢？阿醫生呀，你一直都喺間房入面，我哋只不過係一廉之隔。究竟你喺隔離做乜呢？其實未準備好，可以唔叫我入房住。叫個大肚婆除曬衫等你係咩玩法呢？我明嘅，屯門醫院都有好醫生，只係我唔好彩遇唔到啫！）
摸咗兩吓個胸，淨係問吓我有冇痛，跟手就叫我著返衫（用咗都無1分鐘，佢隻神之手，究竟有無摸到啲乜呢？）我著返好啲衫之後就出去坐咗係醫生枱旁邊，醫生就問我以前有冇試過好似頭先咁樣（凍到抽筋），我答佢：當然係冇啦！（因為我唔會無啦啦剝曬衫喺度對住個冷氣喺咁吹囉！）之後佢就話：下次如果覺得凍就記得同姑娘講啦！（吓？叫我下次記得同姑娘講？你哋冇病呀？究竟你哋係聽力有問題‘撞聾’定扮聽唔到呢？）醫生，其實我已經講過，不過冇人理過我囉！佢聽完我講之後當堂 O咗咀。
跟著好快就轉咗話題問我預產期係幾時？我就答佢4月尾。醫生好大反應咁話：吓4月尾？咁你宜家咪20週囉？唔係呀，今日係week15+5咋醫生。馬來西亞醫生話如果我陀嘅喺單胎，預產期會係5月尾，不過我陀嘅喺孖胎，所以預產期會早啲大概係4月尾左右。跟著醫生就問我有冇醫生證明，我就比咗馬來西亞醫生寫嘅信比佢，信入面嘅內容好清楚交代咗我係做完Ivf 後懷孕及懷孕咗幾多週，預產期會係幾時。不過醫生睇完封信之後又再問我有冇其他資料？我就即時問仲要乜嘢資料？
待續……
6個讚
真係好離譜！
我睇完真係內心講左好多句粗口！
搞到我更加確認我唔想係香港公立醫院生 T__T
都唔係全部唔好，有d 都好好。
就算政府醫院做產檢，都有10幾個醫生，有d 會問得比較詳細，睇起碼5分鐘，有啲1分鐘打發你走，另外有d 就比較冇禮貌（講野冇尾音，好直，會有hard feeling)，有啲醫生亦好nice 好溫柔。
仲要係免費喎
所以都係睇自己好唔好彩
3個讚
睇到呢度, 真係好鄧你開心! 我都睇到眼濕濕, 我個仔都係IVF bb黎, 我既子宮都係麻麻地, 老公又弱精…
試過2次IVF, 第一次係仁安做, 植入左2次都失敗, 開始仁安做既時候我順便去威院排隊, 仁安失敗後我keep住做運動, 完全無食中藥supplement 只有食葉酸
其實仁安失敗後好快就到威院開始療程喇, 感覺威院生植科都好pro, 我大大話話只係抽到5粒, 仲要得2粒可以做到胚胎=.=(果時33歲咋), 但好好彩地植入一粒已經bingo左, 真係估唔到公家做先中…所以各位去私家做既JM 都可以排埋公家, 多個希望, 價錢仲要係平10倍!
7個讚
喺囉喺囉，都係自己唔好彩第一次喺呢間醫院做產檢就遇到一個咁不愉快嘅經歷，不過後來我去同一間醫院嘅多胎婦產科度繼續做產檢果陣，情況就非常唔同啦。
我都試過比個男醫生，都算年輕既，但講野好直咁嚇親，我個時有少少流啡，佢兇我一定要入院，真係好hard feeling。我都知佢為我好，但如果佢溫柔少少，我諗會冇咁難受，最後我當然有入院啦
再之後咁多次產檢，都冇咗遇返呢個醫生
1個讚
醫生就問我會唔會有做Ivf嘅報告之類？例如:用咗咩藥做Ivf，陰超相片等等（吓，啲報告同產檢有咩關係呀？Ivf 用咩藥都要知?）我乜都無準備喎，啲資料喺手機，不過要比少少時間我搵返出嚟比你睇。醫生就好唔耐煩咁話：吓！等你搵？搵到幾時呀？咁好嘥時間搵啦！（我聽完嗰下呆咗，又係你話要睇資料，咁即係你究竟係想睇定係唔想睇㗎？其實都唔係好重要啫！）
之後佢就打咗電話去多胎婦產科度話我去錯咗佢哋嗰度做產檢，要麻煩佢referral 返我上去多胎婦產科嗰邊follow，（excuse me, 我老公打電話嚟醫院詢問點樣可以登記做產檢嘅時間，完全冇人提過做產檢要分開多胎定單胎！而且book咗個產檢appointment之後，問咗姑娘需要帶咩文件嚟做產檢，佢只係話需要帶身分證明文件、醫生信證明係懷孕同懷孕幾多周，佢從來都冇提過要帶什麼陰超嘅相片或者其他資料之類，我又未試過喺香港做產檢，咁我又點會知道你哋需要呢啲資料呢？）然後佢繼續係電話度再三強調話我乜嘢資料都冇係手，只係知道自己係Ivf做咗孖B喎，你哋好自為之啦！（聽完之後，喺嗰一刻我都費事亦都唔想再同呢個醫生再講任何一句嘢，簡直係speechless)
當呢位醫生收咗缐之後就話我唔應該嚟呢度做產檢，佢已經幫我book咗下個星期一上9樓多胎婦產科度做產檢，仲叫我到時記得帶咗所有資料去，唔好再好似今日咁，如果唔係就做唔到產檢。我當時就回覆呢位醫生話：我先生打電話嚟book產檢嘅時候從來冇人講過話需要帶你所講嘅資料嚟做產檢，所以我冇預備。（講真丫，其如果係自然懷孕嘅，睇咗一次私家醫生確認咗懷孕後就排公立醫院做産檢嘅，究竟會有咩資料俾醫院呢？我嚟做産檢就係想知多啲資料啫！唉…….）
待續……
9個讚
唔…只可以話樓主冇睇公家醫院嘅經驗, 無論產科定其他專科, 公家醫院醫生見病人都係滾水淥腳咁, 睇之前病人要諗定哂啲問題, 如果有咩報告,資料就要準備定係手, 見到醫生就show hand咁掉哂俾佢, 佢話冇需要先算。
不過醫生連等你開電話睇都廢事, 睇來佢都係諗住隻CASE 甩左手去第二個醫生, 有咩資料再等果個醫生睇就算。
1個讚