有冇檢查左先啊？有朋友冇消息去睇婦科發現朱古力瘤，輸卵管塞左所以要做左手術再試～咁就唔一定直接做ivf, 上網睇iui 成功率得十幾%
同埋照完輸卵管會通返啲，跟住果幾個月bingo機會大啲，我就係咁bingo，而且照嘅過程只係少少唔舒服，無特別痛
1個讚
其實你只係試咗大半年（唔使咁灰心嫁），不如你做哂所有檢查同抽血驗完先至再決定做唔做iui啦！（講真iui嘅成功率始終都咁係唔高）
有時每個月都太過在意有冇bingo，會比咗自己無形嘅壓力，咁樣會影響結果嫁。當你放輕鬆個人同埋唔諗佢果陣，小天使就會靜靜雞嚟搵你嫁，加油呀
4個讚
自從開始流血之後，我就開始冇乜胃口食嘢（係完全唔覺得肚餓）就算係肚餓，食完野之後都覺得成個口好酸，再望下條脷，成條脷都變白哂，我要搵手刮條脷，刮走哂啲白色野出嚟先至覺得舒服啲。打完支針原來都已經下晝三點，我突然間有啲肚餓，好想食印度薄餅，於是我就自己走咗去食埋個薄餅先返屋企。（嘩！我食咗一啖…我嗰口竟然唔覺酸，仲想繼續食，好耐冇試過好想食嘅感覺，於是我一路食一路食，最後我一口氣食咗4塊冇汁既淨薄餅！我諗孖B一定係好鍾意食印度薄餅）
打完第4支安胎計都差唔多有五日啦，雖然都仲流緊血，不過已經有好轉。我個心其實都仲係好擔心，話哂已經打咗成4支安胎計不過都仲有出血。我最後又忍唔住打咗比加拿大個醫生問下我個情況，咁流血法孖B係咪會有問題？佢聽完之後竟然同我講：‘冇事嘅，陀孖嘅係咁嫁啦，陀孖會好大機會會出血嘅，只要冇出現劇痛既感覺就得嫁啦！’（聽完佢咁講，我個心都定啲啦！）
待續……
10個讚
一直追看你成個造人之旅
一路睇都會覺得緊張
真心覺得你好堅強好犀利！
1個讚
［呢幾日孖B輪住扭計，搞到都冇乜時間可以繼續寫，等我宜家趁佢哋未起身食奶快快手寫啲先。］
其實喺我放胎之後第三日，我老公已經飛咗返香港做嘢，所以喺呢段時間我返診所覆診打針都係得自己一個，不過喺馬來西亞用Grab（即係香港嘅Uber）叫車真係超方便，而且我朋友又住得近診所，幾溝錢（幾蚊馬幣）就到目的地。
今日見完醫生，又打多支安胎針（又係喊住嚟比人撳住打），之後我同老公講醫生問我打算幾時返香港，點知我老公同我講，唔好飛嚟飛去喇，留喺馬來西亞安胎先，等陀穩孖B到三個月先再飛走啦。於是過咗一個星期之後，我老公就帶埋奶奶飛咗嚟馬來西亞，老人家話要煮嘢比我食。（吓！咁激動？！）
［妹妹剛剛起咗身，我寫住咁多先，要餵奶奶啦］待續……
12個讚
你奶奶都好有心
2個讚
講真老公同奶奶飛咗過嚟馬來西亞之後，我心情都好咗啲，冇再亂諗野（因為始終仲流緊血嘛，又唔想嚇親老人家）而奶奶一嚟到就整咗好多野比我食，望落去好豐富，不過我仍然都係冇胃口，完全唔想食。
其實自從老公同奶奶飛咗嚟之後，我毎日瞓到十二點幾左右都會比佢哋曹醒，抄我起身食嘢（佢哋怕餓親我同孖B）不過我每次都食得好少好少（因為每次食完嘢成個口都酸到好似嘔完咁嘅味，毎次食完嘢都要搵手去刮下條脷，先感覺冇咁酸。唔知係咪因為咁我就開始冇哂胃口唔想再食）我毎日食得最多既係生果：蘋果、橙同提子輪住食。老公見我肯食生果，於是就買咗我又細到大都好鍾意食嘅……榴槤返嚟俾我食。點知我一聞到嗰陣榴槤味，即刻走咗去厠所嘔，我即刻叫老公九秒九拎走個榴槤，匿埋自己食哂佢，同埋開晒屋企啲窗散晒啲榴槤味，因為我一聞到就想嘔。（我依家諗返都覺得老公好慘，佢一心諗住我呢個榴槤控超鍾意食榴槤，所以特登買咗貓山王俾我食，點知我一聞到，即刻想嘔，可能孖B唔鍾意食。）
到咗第二日，我起身一打開房門就聞到嗰陣非常濃烈嘅榴槤味，唔聞猶自可一聞到又即刻走咗去厠所嘔。當我嘔完就去痾wee wee！嘩，流血流得好勁，完全係好似嚟M咁，我驚到即刻大喊大叫，老公比我嚇到即刻衝咗入廁所。老公見到我咁樣，佢即刻打咗比醫生，之後再call Grab去診所見醫生！
待續……
9個讚
睇哂 好欣賞你 陀孖B呢段路真係唔易 你好叻呀
1個讚
一去到診所，姑娘就即刻同我量血壓，磅重同驗wee wee，跟住就直入去咗見醫生（連等都冇等）醫生一見到我就問我仲流緊血？我驚到口都震話：‘無停過，啲血今次係滴出嚟，多到直頭好似嚟m咁！’ 佢就即刻好快手同我照超聲波睇下孖B嘅情況。我就即刻望實個mon 等孖B嘅出現。隔咗一陣，我就見到有2粒野喺度閃閃吓 ，醫生話孖B長大咗，佢就即刻開埋心跳聲比我聽！當聽到佢哋嘅心跳聲又快又響亮，我真係有啲想喊！
雖然聽到佢哋個心跳聲好強壯，但係宜家先係week 9 +5，而且流血嘅情況越來越嚴重，我真係好擔心！醫生照完超聲波之後都有講，陀孖B嘅風險係好高，宜家嘅出血情況，基本上冇乜嘢可以做，暫時可以做嘅就只有係繼續打安胎針，不過打安胎針都唔可以一直咁打，最多都係打到去week 12/13左右。因為週數越大，安胎針對身體亦都唔會再起到太大作用。（唉，咁即係幾時先至會唔再流血呀？）不過無論如何我哋保險啲，你今日打多一支安胎針先啦，反正原先下個星期都要返嚟做產檢，到時產檢嗰陣再睇下出血情況係點，睇吓到時仲使唔使再打安胎針啦。就係咁，我又跟咗姑娘出去打我最唔想打嘅安胎針。
其實當我聽到醫生話冇嘢可以再做果陣，我成個人就好似判咗死刑……喺度等死！唉算啦，所有嘢都係整定，唯有當自己真係m到，嚟完就冇事啦！
待續……
9個讚
樓主你好嗎？好少見你咁多日都無 update，期待你分享嘅經歷！
1個讚
一口氣睇到呢度
覺得你真係好堅強好犀利
你一定會係個好愛錫仔女同有能力保護到佢哋嘅媽媽 
1個讚
唔知係咪醫生話冇嘢可以再做，我就冇再為出血嘅事放係個心度，聽天由命。不過我又開始另外一個問題，就係孕吐（嘔餐死啦！）我喺討論區見到啲jm 分享話多數孕吐會係喺起身果陣，刷緊牙果陣，聞到唔想聞嘅嘢果陣都會嘔。不過我就係喺半夜三更瞓瞓下果陣先嚟嘔！（唔係呀嘛，瞓著咗都要爬起身走去嘔？孖B喺咪有啲乜嘢唔舒服，喺咪投訴緊我呀？）不過隨著孕吐嘅出現，我流血嘅情況就開始慢慢咁有改善。
眨下眼又係時候返去做產檢啦，不過醫生一見到我就話：‘嘩，仲乜嘢冇見你幾日你瘦咗咁多呀？輕咗成4個kgs喎！係咪食唔到嘢？係咪瞓唔到覺呀？’ 其實全部都係囉，醫生！而流血嘅情況其實都仲係有，不過就已經開始冇咁犀利啦！
好啦，好啦，又到咗指定嘅動作照B超同聽心跳啦，望住個mon 又見到孖B又大咗啲，心跳都有成150幾同160幾，大至上都總算係一切正常。不過醫生話因為仲有血塊圍繞著嗰2粒胚胎，為安全起見都要繼續打多3支安胎針以策萬全。就係咁我又跟咗姑娘出去，我又再一次俾人撳住嚟打……針。
待續……
10個讚
好開心，收到好多JM嘅pm，關心我同孖B最近嘅狀況，見我好耐無update，擔心我同孖B有咩事！
喺度真心多謝各位關心 
，當初寫呢個post我都係抱著純分享嘅心情，日記形式咁記錄孖B嘅誕生過程，估唔到有咁多JM留意，更加估唔到我嘅故事會幫到其他人。IVF條路，除咗過來人會明白箇中辛酸外，就算自然懷孕嘅媽媽都唔會明白。
呢個星期比較忙，因為有JM急需要幫忙，所以日日都忙著聯絡醫院，希望可以早日出發。連我老公打俾我都無聽佢電話，佢都問我有咩咁忙呀（有啲不滿）？不過當佢知道我幫緊jm，我老公（即刻冇投訴）即時同我講，幫得幾多就幫幾多啦，條路咁難行，有人幫有人問係差好遠。當初如果我哋都有人問嘅，可能都唔使咁辛苦。
21個讚
我都突然醒起好耐無見你 update, 專登搵返嚟睇，我會俾耐性等你 update~
1個讚
呢幾日我繼續努力為有需要嘅jm解答同分享我喺馬來西亞做Ivf嘅資料，我發覺原來有好多jm 都有同一個疑問⋯⋯就係怕同醫生會有溝通上嘅問題！例如話喺台灣做，醫生講國語，好多jm都話識聽唔識講，只係大家都用繁體字，有咩唔明就睇字；另外去泰國做嘅，英文又唔係好流利，啲字又唔識睇，所以一定要搵個翻譯，不過個翻譯又係講國語嘅；咁究竟喺馬來西亞做，醫生係講乜話嫁？我可以同大家講唔使擔心，因為我去嗰間IVF中心喺有華人醫生，佢哋係識得多國語言嘅（廣東話、國語、英文甚至馬拉文佢都識）而當時我嘅主診醫生佢全程亦都係同我用廣東話溝通，我相信溝通絕對唔會有問題嘅，希望解答到jm們嘅疑問啦！
8個讚
眨下眼老公過咗嚟都差不多成個幾禮拜，又係時候要番去香港返工。不過奶奶就怕我自己一個人喺度，佢就留咗喺度陪我順便煮嘢比我食。
而我個休息時間隨著孕吐嘅開始又變到好似以前番工咁日夜顛倒，每日都差不多半夜3點幾4點先瞓得到，瞓到中午左右奶奶就會走嚟叫醒我起身食嘢，（佢驚我同孖B會餓親）不過每次起身走去刷牙嗰陣又會想嘔，攪到成個人冇哂胃口唔想食，每次都係食得嗰一兩啖，之後又會再想瞓過。就係咁我嘅體重又再進一步下降到得返45 kgs。
過下又一日過下又一日，好快就捱到打完嗰3支安胎針，而出血嘅情況已經有好轉，不過孕吐嘅情況就越來越頻密。由最初一個星期入面有1晩半晩爬起身嘔1次，到之後一個星期有2至3晩坐喺度嘔1至2次！每一晩都瞓得唔好，好似有嘢頂住頂住咁，坐喺度等天光，每次都係到天光之後又會慢慢感覺好啲…（唉！孖B，你地點解唔俾我瞓呢？依家先week 10+2，幾時先嘔到week 40呀！吖唔係，係week 36先啱！醫生講過陀孖嘅會早過單胎4個星期左右。）
9個讚
呢幾個星期過得好慢，終於嚟到week 11+3，出血嘅情況已經由紅轉啡啦，應該叫做穩定咗，總算叫做鬆口氣，不過孕吐嘅情況仍然持續…‘嘔餐死’同埋仲係冇乜胃口！繼續食小小嘢個口就酸到爆炸，就要走去廁所‘刮脷’，刮刮下又會無端端反胃，跟著又嘔餐死，惡性循環。（究竟幾時先至完呀？幾時先至個口會唔酸呀？）
過多兩日奶奶就要返香港，佢見到我咁嘅樣，又擔心同唔放心。所以我爹哋媽咪就決定喺英國飛過嚟陪我，等我唔使自己一個人喺馬來西亞，順便試下整嘢比我食，睇下會唔會好啲（佢哋覺得煮返啲我由細食到大嘅味道可能會好啲）
當然結果都係一樣，完全無幫助，依然係冇胃口食同埋完全唔想食嘢。反而孕吐嘅情況就越嚟越頻密，由一個星期有2至3晩坐喺度嘔變成一個星期有4至5晩坐喺度嘔（唉！孖B你哋想點呀？已經冇乜嘢可以比你哋嘔㗎啦！瘦身都唔係陀緊B嘅時候呀！係都生完先嚟瘦咋！）
待續……
7個讚
睇到都心酸呀～
完全想像唔到到底成個孕期有幾辛苦先帶到孖B到呢個世界上
媽媽真係好偉大！
2個讚
好彩你已經生左，
唔係真係好擔心你🥲
2個讚