你真係好好教養··· 如果我係你我應該已經奔潰爆喊住咁樣XX個醫生
就算真係個pateint錯帶漏野（in which你唔係），都唔可能用呢個態度咯
真係好離譜，做得醫生可唔可以有少少愛心同同理心。
2個讚
真係好彩唔使再遇返佢 
係呀，你講得啱，我真係冇乜睇公家醫院嘅經驗，呢個經驗簡直係畢身難忘 
原來有成個幾星期冇update喇！
最近真係好忙，除咗忙著喂奶同換片之外，亦都忙著回覆jm嘅pm。
喺度同大家講個開心嘅消息丫，終於都成功安排咗第一位jm出發飛去馬來西亞啦，而且佢哋亦都已經完成隔離，過兩日就會見醫生同安排開針！其實開始寫咗呢個分享大概三個月左右，已經有jm pm我，問我意見，亦都有問我攞馬來西亞診所嘅資料同埋係邊個醫生 
我識答嘅我都會盡量解答，直至到有jm問我可否幫佢聯絡安排到馬來西亞做IVF，我當然非常樂意啦，不過始終要照顧孖B，我怕係過程中會有甩漏
但係我老公就同我講，可以幫到就盡量幫啦，問得我嘅jm，應該都經歷過傷痛同失敗，難得睇到我嘅分享，大家都算係有緣，幫下手聯絡一下應該都唔難啫。就係咁，我就開始咗幫第一位jm安排佢嘅馬來西亞造人之旅。
當年我去馬來西亞嘅時候，無疫情…唔使隔離話飛就飛，而且又有當地朋友收留，再加上有關Ivf 嘅資料蒐集我老公乜都攪掂曬，就梗係簡單啦。不過今時今日，又要申請簽證（正常外國人不准入境），又要揀灑店/醫院做隔離，仲有啲jm好想搵返我個主診醫生幫佢哋做，所以真係攪咗好耐，足足搞咗成差唔多2個月，幾經波折jm終於都係8號風球下順利出發咗啦！我希望診所可以幫到jm 尋找到屬於自己嘅小天使咁我就最開心不過 
好啦好啦，就趁住孖B瞓晏覺，等我繼續寫個分享先 
話咁快又一個星期啦，我又要去醫院準備做另一次產檢。之前醫生話乜資料都要知，所以老公喺之前一晚專登印哂啲資料出嚟比我準備帶去。（嘩，之前做咗咁多次產檢，啲資料連埋孖B啲沙龍，加加埋埋原來有成本書咁厚喎）
去到醫院又係排曬長龍等lift，等咗15分鐘先至入得到，嚟到多胎婦產科，感覺完全唔同起碼冇之前咁多人，簡直就係天淵之別！我做完哂登記之後，姑娘就叫我坐低等叫名。等咗幾分鐘之後，姑娘就叫咗我去d驗尿、量血壓同磅重。（咦！45.3kgs…….我啲體重開始重返啲啲啦喎，唔錯唔錯）好啦做完基本嘢又到咗等睇醫生嘅時間，希望冇上次等咁耐啦！等下等，等下等，等咗45分鐘左右，終於都叫我個名啦！
待續……
16個讚
老土啲講句你真係做左功德
我都有朋友努力好多年，
但好似冇尋求幫助
所以身邊嘅人都唔敢俾意見或問佢哋
3個讚
一樣情況，我都係自然懷孕生咗兩個，見倒樓主給幾經辛苦終於成功有得敲鐘真係感動到流馬尿
要加油丫
湊大啲細路仲有排辛苦架XD
2個讚
偶然上網睇到你的分享！我用左2個半鐘一口氣睇哂！好感動！睇到流哂眼淚！睇到你敲鐘個刻好戥你開心
你好叻好叻！你好勇敢好有毅力，好佩服你！好鼓勵！我剛開始第一次ivf開針，5日後（琴日）返去見醫生，得一粒卵，好難過。醫生話下個月再試，琴晚臨睡前不停流淚！今朝就見到你的分享！好被激勵！我好高齡，我遲婚小產過一次，唔識保養，入左風，用左年半先回服身體！請問可否介紹你馬來西亞嘅醫生，謝謝！祝福你一家！祝福孖B健康快樂成長加油
7個讚
謝謝你嘅祝福呀 
當然可以介紹比你啦，不如你pm我，我再詳細講比你知吖（我唔知點樣係呢度pm你 ）
1個讚
原來我私訊唔到你的，可能新會員的關係！你有時間先send 比我，謝謝你
My gmail account is
lingling20@gmail/com
/=dot
Thanks
原來係咁 我已經email 你，你睇吓收唔收到個msg
1個讚
去到醫生房門口，姑娘就問我：'先生有冇同你一齊嚟呀？佢要唔要同你一齊入去見醫生？’（嘩！好開心丫，今次姑娘可以比老公陪我入去見醫生）一入到醫生房核對完個人資料，醫生就開始問我而家喺第幾週？預產期係幾時？陀緊幾多胞胎？陀嘅係單卵雙胞胎定係雙卵雙胞胎？有冇家族遺傳病？做咗T21未？（問嘅問題其實同上次個醫生問嘅都差唔多，不過感覺就好唔一樣，呢個醫生好有禮貌咁逐樣問）我就逐一咁回答醫生嘅問題，之後就諗住攞尋晚印出嚟嘅資料俾醫生睇，點知醫生話唔需要㗎喇，仲叫我慢慢去張床到準備照超聲波，因為照完超聲波就會一清二楚BB嘅狀況㗎啦。（咁上次嗰個醫生究竟係咪婦產科呢？佢上次問長問短，又話我乜資料都無帶嚟，所以我老公琴晚專登印出嚟）
計計吓，原來我已經有3個幾星期冇見過孖B啦，（唔知佢哋點呢？有冇快高長大呀？）當醫生準備吱啲啫喱落嗰肚果陣，我個心係度諗…唉，個肚又要凍冰冰啦！當醫生一吱，嘩！好暖呀！啲啫喱竟然係暖㗎，以前照親超聲波，醫生都係吱啲凍冰冰嘅啫喱落嚟，今次可以用啲好暖嘅啫喱嚟照，真係好好窩心好舒服啊！）
醫生一路照就一路同姑娘講啲尺寸，我估應該係量度緊孖B嘅頭仔，手仔同腳仔嘅長度。度咗大概十幾分鐘之後，醫生話孖B一切正常。但係醫生話我已經係week 16+6，我要自己出去出面自費去做T21。我老公就同醫生講，其實我哋做Ivf 果陣已經做埋PGS，做Ivf 嗰位醫生已經同我講過PGS係pass 所有嘢係正常，我唔需要再去做T21，唔使嘥錢再去做啦。不過呢個醫生竟然話我做PGS果陣只係抽咗少部分細胞組織去檢驗，並唔係全部，所以有好大機會都會有T21情況出現。（吓，乜嘢叫做抽咗少部分細胞驗唔代表全部？呢個係咩玩法同理論嚟㗎？如果照佢咁講，就算抽血驗或者其他無創性檢查都唔係100%準啦，除咗抽羊水外。我地做得IVF，除咗係因為難自然成孕外，就係怕會有遺傳病，所以做咗PGS，確保基因正常。）跟著呢位醫生就話除咗做T21之外，仲要去做埋妊娠糖尿檢測，之後姑娘會比埋個日期比我去check糖尿。如果冇乜嘅話，一個月後再返嚟再check 。我同老公相量過，T21就唔會驗喇，我哋信之前嘅PGS test，不過糖尿就會準時去驗，始終我都係高齡加陀孖B嘛！
待續……
8個讚
見完醫生之後，姑娘叫我出去外面等佢，佢去幫我排期check妊娠糖尿同埋下一次產檢。等咗10分鐘左右，姑娘就幫我預約一個星期後就去做check妊娠糖尿，一個月後先返嚟做產檢。（嘩，一個月先做一次產檢？我係馬來西亞，醫生話因為係孖胎，而且之前又試過流啡，所以兩個星期check一次，check密啲安全啲。返到香港一個月先check一次會唔會耐咗啲呀？咁唯有自己安排啦！）其實經過上次嗰位醫生同我做產檢之後，老公已經開始搵定私家醫生去做產檢，既然公立醫院一個月先做一次產檢，老公覺得我陀住孖B始終風險都大，所以我哋都決定兩個禮拜後搵私家做產檢，跟住過多兩個禮拜再返公立醫院check，一公一私，每兩星期check一次，咁應該點都會安全啲。
就係咁，兩個星期之後我就去咗私家醫生嗰度做產檢，不過去見私家醫生嗰日，我又開始流啡（Noooooo…又嚟流啡？孖B，你哋冇事嘛？唔好嚇我好喎）去到見醫生，佢同之前公立醫院嘅醫生一樣，問曬所有嘅基本問題：宜家係幾多周？預產期係幾時？你陀緊孖胎，咁知唔知係單卵雙胞胎定係雙卵雙胞胎等等，答完哂問題之後我就話俾醫生今朝又開始流啡啦，係咪孖B有咩事呢？醫生就叫我冷靜啲先，等佢照完B照就會知道答案。醫生一路照一路慢慢咁係個mon度話比我聽孖B情況好好，好活潑，手仔腳仔係度郁緊，照睇就無咩問題。跟住醫生再俾我聽孖b心跳聲，兩個都正常！
我純粹八卦咁問醫生，其實我宜家week18+2，究竟睇唔睇到邊個係男仔邊個係女仔呀？醫生笑笑口咁話：其實已經睇到啦，囡囡係比較高啲既位置，而仔仔就係下面，聽佢哋倆個嘅心跳聲都好好，囡囡嘅心跳聲就似乎響亮啲同埋跳得快過仔仔少少，不過倆個都係喺正常嘅range 入面。至於流啡嘅問題，暫時見唔到有出血嘅現象，所以都唔需要太擔心，如果之後流得再犀利啲就要即刻通知佢又或者即刻入院check。（聽完醫生咁講，我個心情都冇咁緊張啦！）
待續……
8個讚
好多謝大家關心我同孖B，呢2星期不斷有jm私訊問我，見到我咁耐冇乜update，問我係咪有咩事？唔舒服？ 係！呢2星期我自己耳水不平衡，全日都只可以瞓喺床度，不斷喺度wing 下wing下…啲嘢不斷係度轉轉轉，啲訊息我見到都覆唔到，孖B只可以辛苦公公婆婆。約咗一星期先睇到醫生（電話會診）食咗幾日藥，今日好返啲啲先可以再打寫覆各位jm嘅訊息。趁住而家冇暈冇嘔，孖B又瞓晏覺，繼續寫落去。
好好彩…過咗幾日之後就已經冇再流啡（本來以為好開心），不過又開始坐天光嘔到飛起嘅生活。唉，基本上一起身擘大眼就會感覺想嘔，但係就頂住頂住嘔唔出，然後每晚到咗10:00之後，想嘔嘅感覺就越嚟越犀利。之前喺馬來西亞嘔都係一個星期2-3日，最差都係一個星期4-5日，每日都係嘔一次，嘔完就可以瞓到覺。但係今次就係晚晚嘔，仲要係每晚嘔2-3次，嘔足7日，仲要瞓唔到覺。（孖B你哋係咪有咩投訴呀？點解要我嘔到咁呀？）
由於我係咁嘔，我老公就捉咗我去睇中醫，諗住食中藥可以幫我減少孕吐嘅情況，不過我真係好唔鍾意食中藥，我相信孖B都唔係咁喜歡食中藥。老公越逼我飲，我就越嘔得犀利。我記得有一次老公沖埋啲中藥攞埋去床度俾我飲，但係我一飲完就噴射式咁嘔出嚟，噴到老公成臉成身由頭濕到落腳，仲要成床成地都濕哂，之後仲要麻煩老公抹地換床單（當時已經半夜2點）
唔經唔覺到咗Week 19+3，又到咗驗妊娠糖尿嘅日子啦，由於之前一晚又係坐天光嘔天光，我成個人冇曬精神之餘仲好想嘔，一早去到醫院就等飲糖水，呆坐等幾個鐘去做檢查，其實真係好辛苦，啲糖水甜到一個點，一飲就好確喉整到我係咁喺度咳，然後就好想嘔。不過姑娘話千祈唔好嘔，因為如果忍唔到半路中途嘔咗出嚟，我又要再安排過嚟驗多一次，姑娘話就算我係嘔都要吞返落去頂硬上，一定唔可以嘔出嚟。
待續……
6個讚
辛苦曬媽媽
你真係異於常人地堅強
2個讚
樓主你好嗎？一切安好？
嘩！原來上次寫孖B已經係差不多兩個月之前嘅事喇！
時間過得真係好快，呢個幾兩個月實在太忙，忙住照顧孖B啦，又忙住覆jm啦，加上又聖誕節要忙著預備聖誕大餐同買聖誕禮物，攪到都無時間繼續寫落去。
不過點都要分享一下啲開心事先，呢2個月已經有3位jm先後到步馬來西亞，開始咗療程，希望各位可以俾啲祝福佢地3位，平安早孕。
好啦，講返孖B先。上次講到飲糖水……好辛苦咁頂硬上，終於都忍住唔嘔出嚟，順順利利咁抽到血去驗妊娠糖尿啦。不過，兩日之後，收到姑娘電話，都知唔方係好嘢，姑娘話之前抽血驗嘅時候，發現我嘅鉀偏低而肝酵素就偏高，姑娘要我馬上入院留醫檢查！吓？！姑娘，我一啲事都冇喎，我除咗好想嘔同夜晩瞓唔到覺之外，無其他嘢啦喎！我可唔可以唔入院呀？（最後當然係唔可以啦！最終都係call咗老公早啲返，等老公放工返嚟陪我入院）就係咁，我無啦啦比人捉咗入醫院住。一入到醫院，老公同我辦好入院手續之後，姑娘就走嚟量血壓同埋抽咗5筒血（唉！無啦啦又比人銡，又要住醫院，諗諗下今次好似係我咁大個女第一次住醫院）因為我第一次住院，老公怕醫院嘢唔啱我食，於是佢就走咗去買咗啲腸粉比我食（因為我之前講好想食）食完之後，我又開始想嘔。老公就叫我瞓一陣休息一下，話咁快探病時間就完，姑娘叫我老公要走喇。當老公走咗冇耐就有個醫生嚟巡房，醫生問我究竟知唔知道點解要入院，我就答佢，姑娘打比我話我嘅鉀偏低而肝酵素偏高所以要我入院嘛。醫生就話：係，冇錯，鉀偏低有好多原因，不過我哋宜家會比啲鉀水你飲咗先，聽朝再抽血驗，睇下會唔會有改善，如果冇改善嘅話，我哋會再從第二個方向去搵原因。而肝酵素方面，你最近有冇食過中藥或者其他藥物呀？噢！我先兩日有飲過中藥呀。醫生就話：孕婦飲中藥會導致肝酵素飆升，而肝酵素太高就會影響BB嘅生長同發展，所以由而家開始你唔好再飲任何中藥或者食中成藥喇！
其實，好多孕婦懷孕期都會食啲中藥去安胎，真係好普遍，但係原來會咁嚴重，各位jm真係要注意呀！
待續……
11個讚
新年快樂！謝謝你嘅問侯 我同孖B一切安好，之前因爲孖B第一次流鼻水好扭計，同埋又到咗聖誕節，忙著準備聖誕大餐同買聖誕禮物，所以都冇乜時間繼續寫孖B嘅故事
1個讚
咁就好啦！一直都期待您嘅分享，因為知道一切都不容易！多謝您咁用心將您嘅經歷寫出嚟
2個讚
十分多謝你嘅分享!
有時間的話 可否分享馬來西亞嘅UCC 醫院資料
(新會員pm唔到><）
Viviyannc/yahoo/com/hk
唔該曬
1個讚
我剛剛email咗你，你睇吓收唔收到
1個讚