睇咗好多唔同嘅討論區留言差唔多2年，見到好多樓主嘅分享，亦有好多有心做IVF嘅JM遇到好多疑問，究竟IVF個流程係點呢?有啲咩test應該做？又有啲咩嘢要準備?
作為過來人，好想分享係呢2年裏面，去過咗加拿大、台灣、馬來西亞嘅造人之旅。希望可以用我自己嘅經歷，俾各位JM了解多啲其他地方嘅情況。從而俾到各位JM一點點鼓勵同支持。
另外，記錄低呢2年嘅生路歷程，希望等將來孖B大個咗睇返，知道佢地自己生來不易。
故事由幾時開始講起好呢？
好啦，就由我同老公結咗婚1年半都無消息開始講啦！(2017頭)
本身我自己係外站空中服務員，只飛長途，我同老公由拍拖開始已經係Long D，習慣聚小離多。平均一個月見到2～3次！
其實結婚前2年已經開始不設防，打算有咗咪即刻結婚，不過一直到婚後1年都無聲氣(頭尾3年)，我地開始擔心係咪有咩問題呢？之前覺得見得小，唔勤力，夾唔啱時間啫(前2年半)。之後有半年，見得多，勤力造，量體溫，夾時間，check排卵，都一樣無聲氣！
真係開始驚，自己年紀都唔細(當時37)，再拖嘅話，就越嚟越難有。差一年差好遠！
所以我地兩個都去咗睇醫生，結果發現原來我同老公各自都有問題。
究竟係咩問題呢？？
我老公精子活躍度得17%，雖然唔係最差，不過啲精子形態都唔太正常，有頭無尾，有尾無頭乜都齊！
而我check完晒，我輸卵管無塞，卵巢同子宮都正常，無移位，無水廇，但係天生子宮後傾。
不過AMH得0.64，FSH就高到14，當時我聽到呢啲數字都一頭霧水。
但係醫生好快就同我講係不孕症，因為我個卵巢年齡大，同我真實年齡不符（講白啲咪就即係卵巢功能衰退囉！）嘩！嗰一刻我簡直覺得個天好似冧咗落嚟咁！我從來無諗過自己會不孕，唔開心當然有，不過喊都幫唔到件事，所以我兩公婆唯有收拾心情去面對。就係咁開始咗我嘅IVF造人之旅。
因為屋企人嘅關係，我响2017年年尾自己一個飛咗去加拿大做我第一次嘅IVF。(2017年中，我同老公嚟加拿大探親嘅時候，已經做咗冷藏精子)
講真，當時乜都唔識，因為婦科醫生係屋企人，所以好放心，乜都無問，就連IVF個過程係點做都冇上網去望過或者去做資料蒐集，醫生叫我做乜就做乜。
好啦，終於要開始做第一次IVF啦，簽好晒啲文件之後，首先就走咗去照陰超睇吓今個cycle 有幾多個卵泡，初初照到左右兩邊各有5粒(卵泡)加埋都有成10粒（我個心諗都唔係咁差姐）之後就見姑娘，佢就比咗一大堆針藥出嚟俾我，叫我毎日幾點鐘打針同打幾多，同我打咗第一針之後就叫我返屋企，隔多兩三日再返嚟照陰超睇吓啲卵泡有冇大到。其實對於我來講最難克服嘅就係要自己打針。喺加拿大一般做IVF，都係自己打針，護士幫我打咗第一針，示範完一次之後，全部都要我自己解決。自己唔打就真係無人幫我打，咁唯有硬着頭皮，自已攞支針拮自己。由每日打1支，慢慢加到每日2支，到最後差唔多抽卵嘅時間就一日打3支。（講真，真係好痛，痛到喊，喊住咁打。）不過，諗起為咗造人，就算再痛都要繼續堅持。
過咗三日之後，我就再返去照陰超，結果簡直係晴天霹靂！
點解？
因為之前照到有10粒卵泡，今日照竟然得返5粒，冇咗一半呀！當時醫生問我會唔會考慮今個cycle 停咗佢先唔好做住，因為啲卵泡太少喇！（我當時都唔識比反應，只係呆咗唔知點算好）當我消化咗個結果之後，我問醫生下個cycle會唔會多過10粒？佢都答唔到。所以我決定繼續做，因為跟本我無咁多時間留喺加拿大。
好啦，經過左10幾日嘅銡針，啲卵泡嘅size都差唔多有16/17mm係時候可以抽出嚟啦！
待續……
