其實喺呢5個月入面，我好勤力咁返工，除咗要搵返啲銀彈之外，我仲要無停過去睇中醫調理身體。之前都有提過，我係一個外站空中服務員，長居英國，要睇中醫就要靠每次飛返香港停留嗰一兩日去安排。所以呢5個月我平均每個月都會飛4轉返嚟，差不多一星期一次。啲同事都問我飛咁密做乜？係咪想見多啲老公，要小朋友呢？我當然無講咁多啦，笑吓就算數，因為我知道身邊都有好多同事結咗婚好耐都未有小朋友，如果我講咗，應該都會有好多人嚟問我。不過，個IVF療程都未完成，就算要分享既都等成功咗先啦！
就係咁，嗰5個月就不停飛，不停睇中醫，不停食中藥同做針灸。但係我老公都仲係膽心睇中醫唔夠，仲要我飲同食其他supplements ，好似話乜嘢核酸飲品，乜嘢NMN，仲有啲乜嘢仙人掌berry呀！唉總之，抗衰老嘅，有益嘅都試，期望喺呢5個月裏面盡量改善身體狀況。因為到咗要植入嗰陣，萬一個子宮唔夠厚嘅話，一樣又係冇得做，到時候又要再等！
好啦，唔經唔覺下個月就放大假啦，即係今個月就要開始食藥同預備塞藥為移植作最後準備。每日重複又重複，食完就塞，塞咗又要瞓床成個鐘頭，不過點都好過之前抽卵嗰陣，起碼唔使要日日咁銡幾針。終於都嚟到ivf 療程嘅最後一關，就係要移植番入去喇（我係喺九月初做移植嘅）。移植前幾日就已經飛咗去馬來西亞，今次好彩係住喺朋友屋企，有家嘅感覺，個心情都輕鬆啲。仲有幾日時間，梗係要食盡佢啦，做咗大肚婆之後，好多嘢都唔食得（榴槤，沙嗲，肉骨茶……）
飲飲食食咗幾日，終於到咗移植日喇，今日一早就返咗嚟診所；喺移植之前，胚胎專家同我核對完個人資料之後，再三同我確認我總共有4粒胚胎。而今次會係移植2粒胚胎～一粒男仔（grading 係6AB)，一粒女仔(grading 係5AB)！確認好同簽哂啲文件之後，我就要開始搏命飲水去凖備移植喇。姑娘話要飲到急急地，膀胱脹咗先至可以移植。（脹咗照陰超放胎）
換好哂手術衫，我再一次踏入去手術室，不過今次間手術室有啲唔同，唔係之前抽卵嗰間，而且亦都冇麻醉師喺度。護士只係不斷咁問我飲夠水未，急唔急，想去廁所未。當我話急喇，想去廁所，佢就話係時候放入去啦。主診醫生亦都入咗嚟，佢叫我放鬆心情就可以，睇嚟醫生都好有信心。胚胎專家再一次同我確認移植入去嘅胚胎數量，之後醫生又再同我確認多一次，然後就幫我插喉管。由於我先天性子宮後傾，醫生用咗啲好長好幼嘅喉管導入，我總係感覺有啲唔自然，有啲怪怪地咁。當醫生準備好哂所有喉管，佢就示意胚胎專家準備。胚胎專家佢make sure 嗰2粒胚胎已經完全解凍到一個合適嘅溫度，然後就馬上進行移植。隨着醫生慢慢咁將（阿仔同阿女）嗰2粒胚胎放入去我身體入面之後，咁就即係代表我造人之旅開始進入另一個階段！而漫長嘅14日等待亦隨即要開始喇！
不過喺等待呢14日之前，我就先要瞓係手術床上面等（因為醫生做移植嗰陣會盡量同我放嗰2粒胚胎去最接近子宮內膜嘅位置，希望可以比胚胎盡快黐實，所以佢吩咐要瞓喺床上面最少45分鐘，當然醫生就建議我最好係瞓一個鐘頭以上，等佢黐實啲）其實瞓係度等唔係問題，但係喺手術室入一面都有啲凍，而且下面又冇著嘢，攪到好想起身去wee wee，我忍咗15分鐘左右已經好想去廁所，但係姑娘話未夠鐘唔比我起身（嘩，咁樣攪發我會瀬wee wee嫁喎）我忍我忍我忍忍忍，忍到機乎連忍者小靈精都要走出來啦！忍下忍下都忍咗45分鐘，我終於頂唔順大聲叫：‘姑娘，我要去廁所呀！’（我就黎爆炸啦！）佢哋就即刻快快手咁走過嚟，慢慢慢慢咁扶我起身（因為我宜家係佢哋嘅眼中，移植完成之後，我就係一個大肚婆喇）不過當我去到廁所想wee wee嗰陣，唔知係咪忍得太耐谷得太耐，我竟然屙唔出！嘩，呢種感覺簡直畢生難忘（雖然我已經有過三次呢啲忍wee wee嘅經驗，不過呢次［第4次］係我忍得最耐嘅一次）好想屙但係又谷住屙唔出，急到爆炸呀！我谷得好辛苦，但係又唔敢用力屙。最後我要坐咗成5分鐘左右先至可以慢慢咁等佢自己慢慢咁滲下滲下咁流出嚟（唔係屙出嚟囉），我用咗成10分鐘先至覺得自己已經去得哂啲wee wee。可能我去廁所去得太耐，我老公仲以為我有啲咩事添。哈哈！
待續……
9個讚
由於我老公怕我做完移植之後搭飛機返香港會有影響（雖然醫生冇講過會有問題，但盡量避免會有呢個可能性）所以佢決定唔比我同佢一齊番香港，要我係馬來西亞等埋呢14日，驗完血確定咗Bingo先再算。就係咁，我就走咗去搵我馬來西亞個朋友，我喺佢嗰度住住到等驗血。14日嘅時間雖然唔係長，但係呢14日對於做完移植胚胎嘅人嚟講就真係好煎熬！（曾經做過胚胎移植嘅JM一定會好明白）
雖然我已經唔係第一次去等呢14日，但係我嗰刻嘅心情實在太忐忑不安啦，我成日都喺度諗，究竟今次係咪真係會成功到嫁？差唔多乜嘢test 都做哂啦喎，如果又唔得咁點算好呀？我哋啲積蓄已經差唔多用晒，如果真係要再做過嘅話都要起碼等返一年半載先儲夠銀蛋至可以再做過，到時我起碼都41/42歲啦，再高齡啲咪仲難啲，唔通真係要認輸？！？
講真丫，放完落去第一個星期，我個身體真係完全冇咩特別感覺，但係去到第八第九日之後，我就發覺個胸好漲，谷到爆，就連’Hi‘吓都痛到想喊，我啲‘bra bra’都開始唔係咁啱着。之前我從來都冇試過係咁，我見個喼有幾支驗孕棒喺度（之前用剩嘅），於是我又心癢癢，又忍唔住走去偷偷地去驗！
嘩，一驗之下我好快就見到有兩條線！唔通中咗？！於是我就即刻打比老公諗住話佢知個好消息同佢開心share，點知老公就一盤冷水照頭淋咁話我：‘你唔好傻啦，乜你唔係喺第三日先返過診所打過支針咩，會唔會係啲針藥影響咋，你休息吓好過啦，驗乜鬼吖，諗咁多，過多幾日咪知囉！’（唉老公都話得啱，所有嘢都已經係注定咗，算啦，當我冇見過呢兩條線啦！）
待續……
6個讚
嚟到第十二日，喺我瞓緊覺轉身嗰陣，一下唔小心‘Hi’到個胸，嘩！好L痛呀！（真係痛到想打人呀）我嗱嗱聲走去塊鏡度檢查一下係咪撞瘀咗定係邊度腫咗（真係痛到想喊），不過check完又唔見到有啲咩，只係見到自己個胸大咗同漲咗好多（唔通就黎m到？升咗cup嘅？）諗吓諗吓我又忍唔住走咗去偷驗。今次又係好快就可以見到嗰兩條線而且仲深色過之前，我喺討論區見過啲JM講話如果Bingo咗個胸會漲痛㗎喎，唔通？（唉，算罷啦，都係唔好話俾老公知住先啦，費事又比佢話。）
反正痛到醒咗，我就索性起身同埋個朋友出去行吓街食下嘢。我哋閑聊嘅時候，朋友都有問我心情緊唔緊張？會唔會驚係多胞胎？（吓！咩多胞胎呀？我係孖胎喎，因為我放咗2粒嘛。）佢話比我知，喺兩年前佢有個朋友都係去呢間診所做Ivf ，佢當時都係放咗2粒，但係去到開獎嘅時候啲HCG 超高，到咗check心跳果陣就發現佢原來係陀咗5胞胎！（what？5胞胎？你講笑咋？！？）佢話絕對唔係講笑嫁，因為有啲胚胎係移植咗入去之後，胚胎自己會再一次分裂（即係單卵雙胞胎）所以咪問你緊唔緊張囉。唉！算罷啦，我可以中獎已經好滿足啦，我唔諗咁多喇，其實中到幾多個都係個天安排，到真係中咗先再算啦！）
眨吓眼就到咗第十四日，終於等到去驗血嘅日子喇，我一早就返咗去診所抽血，抽完血之後，姑娘就叫我下午兩點左右先再返嚟見醫生睇報告，因為都要等大概4-6個鐘先至會有報告。 （唔知喺咪之前偷驗過見到有兩條線呢！所以我嘅心情都比較平靜，一啲都唔緊張。而且我喺出發去診所之前，我又偷偷地走咗去驗…今次係即時見到兩條好深色嘅線。其實我心知應該係中咗奬嫁啦，只不過係唔知個HCG高唔高呢？係咪中咗孖胎啫？）
終於到咗下午兩點，我再次返到去診所見醫生，醫生一見到我第一句就同我講：‘congratulations!’ 個驗血報告顯示你已經成功懷孕，你個Hcg係7982！（吓！七千幾？咁高？我之前第一次bingo果陣check都係得個213咋喎！唔通我中咗孖？！）因為你移植咗2粒，咁即係代表你好大機會已經係陀咗孖胎，至於實際陀到有幾多個BB，咁就要等到week 8 check BB 心跳果陣先可以confirm 到啦！不過醫生再三吩咐我要繼續按時早晚塞藥，如果有啲咩問題就要即時通知佢同返嚟見佢！
跟著我就跟咗姑娘出去配多啲塞藥返屋企，不過今次有啲唔同，我今次終於都可以去敲響個懷孕鈴啦（其實係呢間診所佢哋有個傳統，就係如果你確定係成功懷孕之後，佢哋都會帶你去到個懷孕鈴前面俾你去敲響佢，等所有人都知道個好消息去為你拍掌同送上祝福）之前每次嚟都見到有人敲鐘，次次都幫人拍掌，今次終於到我喇！
待續……
20個讚
我自己係自然懷孕既，見到個post好好奇就走入嚟睇，估唔到我竟然睇晒。見到你去敲鐘我忍唔住流眼淚🥲congratulations 你真係好叻好叻！
6個讚
我係自然懷孕,每次睇到人哋千辛萬苦去求b 嘅故事覺得好感動
好佩服
2個讚
睇完你個故事，我更加想攬住我女狂錫丫，當初醫生開左4個cycle排卵藥比我，話係最後機會，如果唔係就要ivf，最後第3個cycle就bingo左 真心唔敢想像如果我要做ivf會點，我一定無你咁勇敢
2個讚
斷斷續續追左成個星期
見到你敲懷孕鈴個下真係好感概！！！！
我都眼濕濕····
雖然我仲未bingo，但都有被你感動到～
希望龍鳳胎身體健健康康，快高長大，最重要係大個左佢地一定要孝順媽咪呀！！！！
2個讚
其實當我敲響呢個懷孕鈴，祝福嘅掌聲剛剛靜下來。成個Ivf 旅程都只不過係過咗2/3（喺阿B未陀穩，未出世之前，我都仲未算係成功）
開心嘅情緒都未夠24小時，惡夢又上演啦！（咁難得先叫做陀到，點解唔可以俾我開心多幾日呢？）就喺醫生宣布咗我bingo嘅第二朝早，當我屙完wee wee一抹，嘩！又流血嘅（阿B你唔好嚇我好喎！）我即刻打比老公話佢知我又開始流血啦，我不斷喺度話，今次我已經好聽話，我冇再搭飛機飛來飛去，我冇再去街走來走去，我只係好乖咁留咗係朋友屋企等結果，就算結果出完之後我都冇周圍去，點解又流血嫁，我好驚呀！老公就叫我冷靜啲，快啲打返去診所話比醫生知。於是我就即刻打返去診所話比姑娘知我見紅，佢就叫我即刻返去診所見醫生。去到診所，姑娘就即刻幫我量血壓、磅重同驗wee wee，可能我個情況算叫做緊急，我去到診所等咗10分鐘左右就見到醫生（比著係平時，就算係預約咗個時間，都一定要等多起碼成個鐘頭先可以見到醫生。因為幫我做Ivf嘅醫生實在係超級忙）
一入到醫生房，佢就問我有冇邊度唔舒服又或者痛，但係我又乜都冇，於是醫生就迫於無奈唯有同我照陰超（因為我只係得4週，用超聲波都唔會照到做乜會流血，而且平常有咗都唔會喺呢個時候去照陰超，因為怕整到BB而導致流產）佢一放入去照，就見到有2個胎，不過其中有一個黐得唔係好實，有啲血塊喺周圍，而另外一粒旁邊就有血塊。醫生話宜家肯定咗係孖胎，但係呢個時候唯一可以做嘅就係打安胎針，希望阿B可以黐實啲，之後等啲血塊流晒出嚟就唔會再出血。
見完醫生之後，我就跟著姑娘出去等打安胎針（其實我一路等一路就心驚膽跳，我好驚又再一次一場歡喜一場空，好驚孖B有事，當時真係好想爆喊）過咗一陣，姑娘就叫咗我入房打針，一入到房姑娘就叫我慢慢上床打側屈身瞓喺度，跟著佢就叫我要全身放鬆，因為呢支安胎針係要打喺屁股度而且仲會好痛。（我當時聽完姑娘話會好痛嗰陣仲喺度諗打針梗係痛嫁啦！姑娘你係咪想分散我注意力呢？我都忍到痛嘅，話哂都銡過N咁多針嘛。）當姑娘一銡支針落屁股度，我成個人即時痛到不斷喺度嗌喺度叫，姑娘只係一直喺度撳實我唔俾我郁（平時打針好快銡咗落去一陣間就打完嫁嘛。嘩！呢支安胎針姑娘就打咗差唔多成1分鐘有多！）我最後真係痛到頂唔順，終於爆喊咗出黎！姑娘只係不斷撳實我同安慰我話：‘我知道打呢支針係好痛，所以之前已經比定心理準備你，事關呢支安胎針係油針嚟，所以一定要打得好慢先可以俾個身體去吸收，如果打得太快積聚埋一齊咁就麻煩喇！（所以姑娘同我打完支針之後都不斷咁同我按摩個屁股，盡量避免佢積聚埋一齊）
待續……
10個讚
呢支針都真係好痛，痛左打完個針口會瘀。我記得當年做ivf 打到13週，每兩三日一次。
謝謝你！我相信小天使好快會嚟到你嘅身邊，加油呀！為你打氣
我都係打到week 12左右（打到醫生話唔再同我打，因為再打都唔會有乜幫助）我好彩針口位冇瘀青不過就有少少腫咗，我連坐喺度都有啲痛。呢啲安胎針真係打到驚，每兩三日就銡一次，左右左右咁打，宜家諗返起都打冷震！
1個讚
好多謝咁多位JM支持我寫呢個分享，孖B呢排出牙仔好扭計，搞到呢幾日都冇時間去寫同回覆各位JM嘅訊息。比少少時間我，我會慢慢咁覆各位JM。好啦，趁著孖B仲未起身，等我宜家再繼續寫少少先。
唞咗10分鐘，開始冇咁痛我就慢慢落床準備返屋企去休息。點知姑娘同我講，由今日開始要每隔三日就要返嚟診所打一支安胎針，直至到聽BB心跳為止（吓！唔係啩，咁咪即係仲要打多兩針？！真係好L痛嫁！不過為咗對孖B，喊住打都要打啦！之前經過咗咁多次失敗！咁難先可以陀到孖B，頂硬上啦！）當打完第一針之後，出血情況其實係冇乜改善，可能啲血塊係宜家先開始正式流出嚟。
我喺等照心跳嘅呢段日子，除咗返診所打安胎針之外，我每日大部分時間都係瞓（我諗一日24小時入面我有17個鐘頭都係瞓）。雖然打嗰支安胎針真係好L痛，每打一針，我就喊一次，喊下喊下眨下眼又打完咗嗰三支安胎針喇，終於都到咗聽孖B嘅心跳既大日子啦！喺等緊見醫生之前，我個心其實都仲喺度囉囉攣咁，（因為之前睇到啲討論區分享話去照心跳先知道冇咗心跳又或者係化學咗）我可能自己比咗好多無形壓力比自己，我真係好驚入到去聽唔到孖B嘅心跳聲呀！事關我打完嗰3支安胎針之後都仲喺度流緊血嘛！
一番到去診所，同之前一樣量血壓、磅重同埋驗wee wee，之後就等見醫生。因為今次唔係緊急，我又呆坐等咗差不多50分鐘先見到醫生（其實呢50分鐘仲難捱過等嗰14日，因為我好擔心孖B，唔知佢哋點樣，佢哋仲喺唔喺度啊！一路等我就一路驚，我個腦淨係諗埋啲唔吉利既事！）
12個讚
一入到去見到醫生，醫生即刻問仲有冇流血呀？我秒答：‘梗係有，仲好似仲嚴重咗（根本就未停過，好似嚟M咁！打咗安胎針都冇用！咁樣流血法孖B係咪唔得咗啦醫生？’ 醫生就叫我唔好擔心住先，慢慢上床照咗再講。
由於今日可以照到‘閃閃’，我終於都唔使再塞入下面照陰超啦！（雖然醫生好有經驗同手勢好，但自己始終都真係擔心塞支棒入去照會整親孖B）
當我準備好之後，醫生就唧咗啲暖嘅啫喱係我個肚上邊，慢慢開始去尋找孖B。好快我就係個mon 度見到有兩粒野係度閃下閃下，醫生同我講：‘嗰兩粒閃下閃下嘅嘢就係孖B個心仔係度跳跳下，暫時睇落去孖B都幾好，你想唔想聽下孖B個心跳聲？’ 當然想啦！（超級想呀！）隔咗一陣，我就開始聽到啲‘活活活活’聲！醫生話呢啲就係BB嘅心跳聲啦。我聽到佢哋兩個嗰心跳聲之後，我成個人都定咗啲，成個人都覺得鬆咗一口氣！聽完心跳之後，醫生仲幫我同孖B各影咗一張‘沙龍’比我留為紀念添。（雖然張相睇唔到邊個打邊個，但係我好興奮，我終於都有孖B嘅第一張相啦！）
待續……
17個讚
Ihyl
102
我有問過醫生，佢話支安胎針係啲黃銅體（即係平時啲用嚟塞下面嘅藥）
佢有解䆁因為我係用Ivf方法，所以自己身體可能未必能夠提供到足夠嘅黃銅體（雖然仲仍然定時用緊塞藥，但係可能唔夠，所以就會有機會導致有出血嘅狀況。）
其實支安胎針算係黃銅體嘅補充劑 
Ihyl
103
雖然孖B嘅心跳好正常，不過醫生都好清楚睇到仲有血塊圍住嗰兩個胎，而且我仲有流血，醫生話為安全起見，佢建議我再打多支安胎針，跟著佢就問我打算幾時會離開馬來西亞返香港？我話起碼等到穩定咗冇再出血先會考慮飛返去啦。醫生都好讚成，佢就叫我宜家一定要好好休息同準時塞藥，就算出緊血都要繼續塞，一定唔可以停！希望打埋今日支安胎針，流血嘅情況可以解決。
嘅然未返香港，醫生就叫我要每兩個星期返嚟做產檢，直到我返香港為止。但如果中途再有出血或者其他問題的話就要即刻通知佢同返嚟見佢。就係咁，我又跟咗姑娘去打嗰支超級無敵勁L痛嘅安胎針。可能姑娘見我個樣好唔想打（因為好痛）於是佢就問我想唔想試下企喺度打？佢話有啲準媽媽覺得企係度打會冇咁痛。（真係嫁？好丫，試下都無所謂！）當姑娘開始幫我打支安胎針係右邊Pat pat嗰度嘅時候，我feel到成隻右腳由上而下開始完全麻痹哂，但我係麻痹之餘仲仍然feel到好痛（姑娘，你呃人！你又話無咁痛嘅？！）結果我又係比姑娘撳住嚟打，唔俾我郁！我又再一次喺度叫，喺度喊，成個癲婆咁。（我喺嗰一刻真係好想放棄唔再打安胎針，真係每打一次我就爆喊一次）
待續……
7個讚
你好利害吖，我同老公都備孕咗大半年都冇消息，每個月cycle都等開獎但失落，宜家唸住試下IUI先，但見你咁有勇氣BB真係得來不易