一生人真係無幾何全身麻醉咁多次 
謝謝你！我都希望我嘅ivf經歷可以鼓勵同幫助到啲 ‘想去做’ 又或者係 ‘準備做‘ 定抑或係 ‘失敗咗’ 嘅jm 
謝謝你嘅支持呀 
你講得冇錯，未做ivf之前都只係試過一次全身麻醉，嗰次仲要係去剝智慧齒…一次過剝4隻智慧齒 
到咗第二日，胚胎專家嘅電話又到喇，佢話尋日抽嗰2粒全部成熟已經受精，亦都開始分裂。到咗Day5會再打電話通知我胚胎狀況。
又過咗三日，我再返去見醫生照陰超，睇下啲卵泡嘅進度如何。醫生睇到啲卵泡時都表現出非常滿意，佢係電視螢光幕指出呢10粒卵泡嘅size都差不多，唔會話有啲大有啲細，全部都有15mm以上，所以醫生決定4日後再抽埋剩餘嗰10粒出黎？（嘩，我嗰刻聽完之後好開心又興奮，點解？！因為我終於都有10粒［雙位數字］嘅卵泡啦；另一方面嘅係我終於都可以唔使再打針啦！講真，雖然打針對於我黎講已經唔係話好辛苦，不過始終都痛嫁嘛。）
當知道自己4日後就會抽最後一次卵泡，除咗要訂機票返香港之外，我仲專登上網睇下邊度有好嘢食，好想試吓啲馬來西亞美食（榴槤、大樹菠蘿、串燒、燒雞翼、肉干同肉骨茶等等）嘩！諗起都想食呀！訂訂下機票突然間諗起，今日應該去到Day5 嫁啦喎，胚胎專家仲未打電話黎，唔通又衰咗？諗下諗下電話就突然響起！終於等到胚胎專家電話喇。佢話嗰2粒embryos 已經去到Day 5，一切正常，係Good grade，剛剛send 咗去做PGS，報告一出我哋會再聯絡你。（嘩，好開心呀！原來唔係衰咗，我終於都再有胚胎可以去做PGS啦！）
不過到咗抽卵嘅前一晚，下面突然間見紅（吓，黎M?唔係掛，唔係打緊針冇M嘅咩？雖然流血嘅情況唔係好犀利，不過我超擔心，唔知會唔會影響聽日抽卵泡，我成個人嘅心情又再一次擔心同憂慮！攪到成晚都瞓唔着，喺張床度眼光光等天光。）
待續……
6個讚
先恭喜樓主造人成功, 仲要係龍鳳孖B, 祝BB肥肥白白, 身體健康
多謝樓主仔細分分享過程, 係唔易既造人之旅上加多點力量支持
1個讚
support!
樓主寫得好details, 係咪搵返d資料寫架？
好奇想知洗左幾多錢
1個讚
多謝你，我嘅分享都希望可以幫到其他jm，希望喺我失敗嘅經驗中能夠幫到‘準備做’又或者‘做緊’嘅jm 搵到佢哋成功嘅方法，盡量減少浪費不必要嘅時間同金錢！
1個讚
其實我一路寫返成個經歷出嚟，個感覺就好似噚日發生咁，所有嘢都好深刻（所以都幾details)
至於用咗幾多錢…好問題！其實我自己都冇正式去計過，我宜家只係粗略計算過，淨係喺馬來西亞做嘅所有費用……包括我用嘅針藥+照陰超+抽卵4次+PGS+植入前嘅藥+1次植入嘅費用，大概係三十幾四十萬左右（我都未計之前睇過中醫，機票同洒店嘅費用） 
6個讚
由於瞓唔著，所以就早咗出發去診所，一到咗診所我就即刻同姑娘講我好似黎咗M，下面見紅。姑娘就好緊張咁叫我等一陣，佢即刻去通知醫生，隔咗一陣姑娘叫我先去凖備然後係手術室等醫生。
好啦，所有嘢準備就緒，姑娘就叫咗我個名入手術室，而我老公就做佢嗰part（其實我每次入手術室抽卵嘅同時，我老公都會同步去取精，保證所有嘢都係‘新鮮’）不過今次入到手術室有啲唔同，麻醉師冇即時同我做麻醉，等咗一陣醫生就到，佢即時同我跟進返究竟點解會見紅（因為正常用緊藥係唔會黎M），問咗幾個簡單嘅問題，麻醉師就開始同我麻醉，我好快就瞓著咗喇。
今次其實都抽得好快（前後大概一個鐘頭左右就完成，我就開始醒番。姑娘跟著入黎檢查咗血壓之後就同我哋講今次抽咗8粒，（雖然冇抽哂10粒，但係我已經好開心啦）姑娘跟著就講醫生轉頭會見我，叫我抖一抖等一等佢。等咗半個鐘左右，醫生就到，佢話剛才係抽卵手術之前已經同我check咗究竟係咩原因見紅，原來有粒瘜肉喺度！不過喺手術期間亦都一齊清除咗，應該冇乜大問題。
而且今次嘅成績好好呀，一共抽到8粒，剩餘嗰2粒嘗試咗好幾次都沖唔到出，不過唔緊要啦，今個cycle抽出黎嘅數量已經多過哂上兩次加埋。同埋應該係之前另外嗰個醫生開嘅補精藥對先生都起到作用，先生啲精子嘅活躍度同型態都有改善，希望今次可以搵到粒正常嘅blastocyst 啦！
待續……
10個讚
寫得好detail, 做IVF真係好難=.=
Ivf嘅路其實係唔易行，從來都係睇下自己嘅運氣！不過係我嘅經歷入面可以睇到，當你遇到一個好嘅醫生同做個啱嘅test，Ivf條路一定會係事半功倍！ 各位‘準備做’同‘做緊’Ivf嘅jm 都要加油！
2個讚
到咗第二日，喺我正準備出發去機場返香港嘅時候，胚胎專家嘅電話就到。佢話噚日一共抽咗8粒卵，不過只有4粒係成熟，另外嗰4粒未成熟。未成熟嗰4粒，已經放咗落營養液到培，希望培養到佢哋成熟。而成熟嗰4粒就全部受精，不過只係得一粒分裂正常，其餘嗰三粒就分別分裂為2.1，2.2同8！（吓！有係咁？唔係呀嘛！又分裂埋啲2.1，2.2出黎？莫非想儲齊一套2.1，2.2同2.3？［苦中作樂］）
至於唔成熟嗰4粒會継續跟進。又隔咗一日，胚胎專家再打電話 update我，佢話唔成熟個4粒都全部受精，只有1粒唔正常，分裂咗做16，其餘嗰3粒都分裂正常。（嘩原來我嗰啲分裂咗嘅蛋蛋真係乜都有，1變2、1變4、1變8、1變16，仲要有集齊咗一套嘅2.1，2.2同2.3添！唔做過Ivf 都唔會知係咁，唔怪之得自己想自然‘有’會咁艱難啦！）
因為我宜家8粒受精卵入面得4粒係正常分裂（即係又得返一半），胚胎專家再次同我確認如果全部都可以去到 Day 5做blastocyst，問我想要攞幾多粒去做PGS！跟住我就同佢講之前有2粒拎咗去做PGS都未有報告，我暫時答唔到喺咪要攞哂去做PGS呀！隔咗一陣，胚胎專家同我check返之前PGS嘅報告，佢話上一輪PGS剛剛有報告（比預期中早咗成個星期），報告顯示嗰2粒嘅PGS一切正常……係pass。（吓！你講真嫁？唔好同我講笑喎！）跟住我問佢知唔知道係男仔定女仔（純粹八卦同好奇），點知佢好爽快咁就答我……兩個都係男仔。（OMG！我係咪發緊夢呀？真係pass咗？真係兩個仔仔？OMG!）我冷靜咗之後就同胚胎專家講不如睇埋呢一輪究竟有幾多粒可以去到 Day 5先至再決定拎幾多粒去做PGS啦。
就係咁，一個星期之後胚胎專家又再打電話黎同我跟進。佢話我第二輪所抽嘅嗰8粒卵入面到最後只有3粒係可以去到 Day 5 做 blastocyst，分別係有2粒 Good grade 同1粒Fair grade ， 而其中一粒Good grade 就係較早前話分裂唔正常嗰粒2.1。佢解釋，雖然呢一粒起初分裂有啲唔正常，但係佢都可以去到Day 5做blastocyst 而且仲要係 Good grade ，（因為診所覺得既然佢都可以去到Day 5仲要係good grade，所以佢哋決定幫我送埋嗰粒2.1（免費）去做埋PGS，因為佢哋都想知道呢一粒blastocyst 正唔正常（醫院都從來未見過），結果佢哋就將3粒送哂去做PGS，然後再冷藏。
待續……
10個讚
多謝你既分享!!!
做媽媽真係唔容易
真心替你高興
祝願孖b 健健康康，快樂成長
1個讚
時間過得好快，眨下眼又過咗兩個禮拜，終於等到胚胎專家嘅電話，PGS報告终於出咗喇！報告顯示Fair grade 嗰一粒喺第13、第18同埋第21對嘅染色體都出現問題（即係T13-帕陶氏综合症，T18-愛德華氏綜合症同T21-唐氏綜合症），屬於唔正常，所以呢一粒唔可以用！而另外嗰2粒Good grade嘅PGS報告都顯示正常，係 ‘Pass’！（我又八卦咁問咗究竟呢次係仔定係女）報告顯示2個都係女。（嘩！2個都係女！咁我咪即係有2個仔同2個女喺手囉！我係咪發緊夢呀？！OMG!）
冷靜咗之後就諗起，咦？嗰粒2.1都pass PGS？乜唔係唔正常嘅咩？胚胎專家話佢哋檢驗咗嗰粒胚胎嘅23對染色體，全部都正常，不過如果呢粒要做移植，佢會係最後嘅選擇，因為雖然佢嘅PGS係正常，但係分裂既時候有啲唔正常，所以就算移植咗入去之後，醫生都會幫你keep住check個狀況！詳細情形你可以喺凖備做移植之前約見醫生問清楚。
當知道個報告之後，我哋兩公婆就開始商量究竟幾時放返入去。（其實最快就係可以喺抽完卵黎咗2次M之後就用自然週期放返入去）因為老公總係覺得我打得太多針，連續4個cycle抽5咗次卵，成個身體都已經七勞八傷。之前我個中醫有講過，IVF打嘅針係好刺激個子宮 ，本身個子宮已經開始衰退，再谷到咁盡，咁快放返入去始終唔放心。所以都係等個子宮休息吓，返香港搵阿中醫調理好返個身體先做植入，順便用啲時間去儲返下啲銀蛋先。（雖然喺馬來西亞做Ivf係平過喺香港同加拿大好多，不過話哂我喺馬來西亞都抽咗成4次卵再加埋做咗6粒PGS，講真做咗咁多次就算平極都使咗幾拾萬啦［每次都要2～3萬馬紙］！我又唔係富貴人家，我同老公之前辛苦儲落啲銀蛋其實都差不多用完，為咗要阿B，我都要返工飛多幾轉去儲返下啲銀蛋先可以再去做移植。）
待續……
7個讚
謝謝分享！
一次過由頭睇到呢度，真係一個漫長嘅過程。
咁辛苦先搵到4粒Good grade而且又Pass咗 PGS嘅胚胎，其實都只不過係行咗整個過程嘅1/3。而喺呢1/3過程中，我覺得PGS呢個test係必需要做嘅，由其好似我呢啲高齡、AMH又低而且又開始卵巢衰退嘅女士。見到啲JM講，醫生話得1～2粒唔使做啦，做咗如果check到有問題嘅話到時就乜都無。其實我覺得咁講都幾不負責任，跟本就係為咗有卵植入而講。做test要錢，植入手術一樣要錢，咁點解唔check咗正常先植入呢？粒卵嘅基因正常，乜唔係成功率高啲咩？唔通無做PGS植入失敗咗之後，JM再做下個cycle果陣嗰啲醫生會俾折扣咩？（純屬個人意見）因為我主診醫生講過，如果胚胎係基因正常，以我嘅年齡（當時已經39）成功率都有80%以上，所以點解我（就算每次都係得1～2粒）都會拎每一粒Day 5嘅 blastocyst 去做PGS。
講個秘密你哋知丫，其實本身我哋選擇做PGS嗰時係冇諗過會知道粒胚胎究竟係男定女，雖然我呢間ivf診所係可以比你揀生仔定生女 ，但其實個PGS報告原來已經知道埋係男仔定女仔（老實講好多地方嘅胚胎專家或者醫生就算做咗PGS都唔會講比你知係男仔定女仔，所以我哋知道係男仔定女仔其實係一個bouns）
不過，就算有啲JM産量多嘅，我覺得都應該抽幾粒grading 好嘅去做PGS，因為就算經驗幾好嘅胚胎專家或者醫生都只不過係靠肉眼睇粒胚胎外表嚟去分grading，佢哋無透視眼可以睇得穿嗰粒胚胎究竟入面有冇基因問題。
另外，我覺得香港嘅IVF中心，喺培養胚胎方面同外國有好大分別，香港無論公家或者係私家嘅都會將Day2/Day3嘅卵做植入，又或者冷藏。而我之前喺加拿大或者馬來西亞嘅診所，佢哋全部都要培養到Day5 blastocyst先至會用嚟植入或者冷藏。
而且喺香港做Ivf 嘅JM，一般有過幾次失敗嘅經驗之後，醫生先至會提議佢哋去做PGS。（Why? 點解唔一早講清楚有呢個offer，然後俾啲JM自己揀呢？由其是啲高齡或者係有卵巢衰退嘅JM) 失敗咗先講，可能係粒胚胎基因有問題，所以流産，做下一個cycle果陣我哋驗埋PGS啦。（喂呀，早講吖，醫生）不過，就算會做PGS，個程序都好奇怪，竟然會係先冷藏，等JM決定做PGS先再去解凍，然後再攞去抽組織驗，跟著又冷藏返，最後等結果。驗完Pass嘅先又再解凍去放胎。咁玩法，蛇都死啦，何況係個粒胚胎。
我主診醫生講，就算佢哋診所嘅技術可以做到解凍後，保證胚胎質素跟冷藏前一樣grading 都好。佢哋都只會係雪一次，所以每粒受精卵培到第5日就會攞去做PGS（事前已經決定），之後再冷藏，直到移植放胎先會去解凍。
睇過咁多討論區，聽咗咁多JM講香港IVF嘅程序，好明白JM嘅無助。講真，我哋兩公婆真係無咁多時間，財力同埋精神去再慢慢試。而且，我嘅心理同生理上都未必承受到小産所帶嚟嘅傷痛（經歷過小產嘅JM應該會好明白）宜家難得有4粒正常嘅胚胎，之後嘅步驟真係不容有失，就係咁我老公決定要我起碼休息最少半年先放胎，呢半年一方面盡量調理身體，另一方面，老公就繼續上網搵資料去深入了解其他導致失敗嘅原因，希望可以盡量避免流産嘅可能性，確保萬無一失。
待續……
13個讚
於是喺五個月之後，趁住我有一個星期假，我就飛咗去馬來西亞一轉去見醫生，順便去攞埋啲針藥同問埋之後做移植嘅流程作出凖備。一見到醫生，佢就話做咗咁多次，終於都搵到正常嘅blastocyst 啦，仲要有4粒，而且呢4粒都係Good grade，成績唔錯！好啦，最困難最艱難嗰步已經告一段落，接著落嚟就係睇下我想要幾時放返入去同埋放幾多粒啦。（老實講，之前試過咁多次都係失敗，我自己的確有啲心理陰影，好驚今次又唔得！）
我就同醫生講：‘我諗住過多三個月先至放番2粒入去，因為三個月之後我先至有三個星期嘅大假放。’
醫生返問番我：‘你肯定想放2粒？如果放2粒就好大機會係孖胎嫁啦喎？你想要孖胎？’
我就話：‘因為我之前都係放開2粒嘛，2粒唔係成功機會會大啲咩？’
醫生就笑住講：‘你係咪想放一個男仔一個女仔呢？（哎喲，比醫生睇穿咗，比佢估到添！）其實你放幾多粒都只係一條好簡單嘅數學題，因為放2粒嘅話，能夠成功嘅機會率一定會係高過放1粒㗎啦，而且你所有胚胎都已經做哂PGS仲要係正常，所以成功率會比冇做過PGS嘅再高啲！不過就要有陀孖胎嘅心理準備，因為當你陀到去6個月嗰時，個肚就會好似人哋陀住單胎嘅9個月咁，差不多就嚟生得咁大，會比較辛苦，如果你都覺得冇問題嘅話當然可以放2粒啦。我諗咗一陣，我都係決定放2粒，我想喺機會率同成功率高嘅情況下放，希望有個好結果！
與此同時，我老公亦問咗醫生，有無需要做埋ERA/免疫系統嘅test？醫生就好有耐性咁解釋，其實check ERA主要係搵最合適嘅植入時間，而且外國有報告講，少於30%嘅女士子宮容受性有異，植入時間有機會影響胚胎著床。另外，免疫系統失調嘅病人自身免疫細胞亦都有機會攻擊胚胎，不過我之前都有試過成功著床（只係唔好彩小產咗），所以唔似有以上兩個問題，既然係咁就唔好浪費金錢去做呢兩個檢查。如果真係擔心免疫系統問題嘅，喺植入嘅時候，會開藥嚟幫我做好預防嘅準備。
聽到醫生咁講，我哋兩公婆都放心咗。最起碼，我哋擔心嘅問題係有解決嘅方法。（既然醫生都話唔哂做，咁我就唔做啦，我又可以慳返啲錢嘛）
待續……
16個讚
好堅持又勇敢呀你兩公婆! 經歷咁多次終於成功, 現時一對仔女都一歲, 好開心!
1個讚
好啦，好啦，我終於都有胚胎可以放返入去啦，回想返喺呢整整15個月嘅尋醫過程裏面，我覺得搵到一個好醫生係好好好重要（傻的嗎？！其實個個都知啦，如果唔係做乜咁多JM求介紹喎）當然，今時今日，上去啲討論區問吓就知道邊個醫生口碑好；就算唔問，睇下分享都會略知一二啦。但係，大家睇分享嘅時候，通常都係見到講話邊個邊個醫生細心，我做咗一次就得咗喇，口碑好好。不過就無乜聽到講話邊個醫生技術有幾好？
當然，我換咗咁多個醫生，換返嚟嘅心得就係要搵個用藥準，手勢好嘅醫生去幫你做。用藥準確，谷得啲卵成熟，都要手勢好同抽得哂出嚟先至得。就好似我之前咁，明明有7粒，最終抽得2粒，嗰個心情，外人係唔會明嘅。如果連用藥都唔準，谷黎谷去都谷唔大又唔熟啲卵，抽卵有幾叻都無用啦！喺咪？（所以其實我自己好感激我喺馬來西亞最後幫我嗰一個醫生，就連我喺加拿大嘅屋企人都話呢個醫生係 ‘好好醫生’！）
但係，另外一個心得我覺得更加重要嘅就係，JM要多啲同醫生溝通，要識得問醫生問題，你識問，醫生先會講多啲。呢一點往往係做第一次IVF嘅JM比較輸蝕，因為見到個醫生真係唔知問佢乜好，又或者係個醫生超忙，好快就咁睇完個症然後就叫你要點點點之後就同你講bye bye…根本就冇時間俾你去發問問題。所以，要了解成個Ivf 嘅過程真係好緊要，有啲咩test可以做（PGS/PGD/ERA/免疫失調)，啲test做完係有咩作用？自己有無需要去做呢？真係要同個醫生溝通清楚先至會知！我哋都係從多次嘅失敗當中學習（而我感恩嘅係，好彩我老公肯陪我一齊行，因為好多時好多問題都係我老公問醫生嘅）
待續……
8個讚