教養書會話，教唔等於要鬧，鬧係最唔prefer 既方法，然後成本書教點樣不打不駡都教好小朋友。
但事實上人一累／趕時間／理智線一斷，就咩書都扔晒衝口而出。
我覺得講到尾都係耐性，同埋你幾多能耐同小朋友磨，係咪可以磨個天荒地老jie。
7個讚
有時放鬆下啦，份糧分幾part，分一part係消閒
“但事實上人一累／趕時間／理智線一斷，就咩書都扔晒衝口而出。”
我媽就係咁，佢生兩個又要返工又要招呼長老（我爸同我媽果邊加埋十幾個親戚），俾我係佢人都癲。
無法忘記嘅一次係二年級放學無做功課，仲講大話去掩飾，阿媽放工發現時嬲到跳掣，打完之後仲趕咗我出街，轉頭佢喱入房喊。
佢講嗰句「唔要你呀！」，我聽完真係好驚好驚…
而我阿爸居然乜都無做，坐喺度睇戲食花生…
所以我只會生一個小朋友，同埋揾咗一個會幫手湊仔嘅老公。
2個讚
其實鬧唔等於教, 好多時鬧/打都係父母自己發洩情緒
我有睇教養書, 小朋友做錯, 父母態度要堅定
要用耐性
而大部分小朋友都係受軟唔受硬
你打鬧佢係會驚, 但個心唔服
我都試過鬧完個仔, 佢好驚, 唔要我抱
o個下我自己反省, 係咪應該咁惡對佢, 其實係一件好小事
好內疚
唔係話打鬧唔得, 但父母自己都要諗下, 打鬧既目的係咩, 唔通淨係想子女驚你咩
3個讚
細路仔邊識諗咁多、阿媽成日講到咩到為你架嘛、唔係你佢駛咁辛苦、慘過做女吖、為你犧牲咁多仲唔生性、咁女人生左小朋友係好大改變既、我有時都忍唔到架
、只好自己不停提醒自己有啲說話真係唔好講
我都抱抱你, 大家都辛苦了
其實開呢個post目的係想搵下同路人
因為呢D野好少同人講(EVEN對朋友都係)
冇經歷過好難明白
你都好叻, 某程度上會有少少多謝原生家庭令到自己性格堅強
知道要靠自己…唔可以靠人
不過每日用$20呢樣野…你係咪俾太大壓力自己?
食個早餐都唔止$20…
學樓上絲打話齋, 將D錢分開幾part, 唔洗計到咁盡
我一出糧, 即刻儲幾千入銀行, 其他剩番既就係開支, 冇限住點用
咁樣好似舒服D
起碼有儲錢都感覺安心D
3個讚
我都去搵下呢本書黎睇先
希望我都可以慢慢放開
1個讚
絲打, 你要加油
其實好多同路人
有時上網呻下, 都係一個宣洩既出口
父母係冇得選擇, 但離開左佢地之後
我先知道原來生活可以有好多種方法, 自己搵D興趣令自己開心
或者睇下書/電影/韓劇治療下
時間可以慢慢沖淡D唔開心既事
到左某個年紀就自自然然睇化…
4個讚
認同，調轉諗返，如果係父母做錯，例如揼左佢嘅寶貝收藏、整污糟佢份功課、遲左出門口所以搞到佢遲到、唔見左野錯怪左你、WFH 開會講野太大聲嘈到佢，小朋友鬧你，你又接受到嗎？有啲父母話 “我都講左 sorry 啦！你仲係度發脾氣！” ，甚至一句 sorry 都唔講就話 “怪你自己唔收埋啲野/你自己趕時間唔識早啲提我架？/因為你成日整唔見我啲野，案底花，所以我最懷疑你！/ 間屋你住曬架？我嘈你咪行遠啲囉！”
如果小朋友同父母講返呢度同相同說話，我會否接受？如果我做錯但我唔接受佢咁樣鬧我，我又憑乜鬧佢？育兒書所寫嘅鬧係「大聲、憤怒、惡去令小朋友警醒」嗰種，教係「我唔會靠大聲靠惡去壓過小朋友，我會講點解佢做錯，正確做法係應該點，可以點樣補救，錯要知錯同接受懲罰」。小朋友閱歷少，好需要你指導，當你自己第一年入職，你做錯左，老細鬧你但冇教你，你唔知即係點做，咁下次就好容易又錯，老細又鬧，重重複複。唔想自己做錯老細鬧，將心比己我又有需要鬧小朋友嗎？
打鬧唔 work 在於當刻大家情緒都係負面，說話「冇養份」，你都冇教佢點樣做先正確/符合你要求，只係同佢講 no no no 我唔畀你做，咁佢點知應該點做？控制情緒很難，但唔係不可能，大家繼續努力練 EQ。
10個讚
你嘅留言又勾起咗我嘅回憶，當年我媽揼咗阿妹收藏多年嘅一條玩具金鍊（係隻玩具狗身上拎嘅，我妹當佢真寵物，隻狗要丟就留起條金鍊，點知都俾阿媽當垃圾丟埋…)
我媽居然怪我妹無同佢講唔丟得。
我阿妹關門喺房喊咗半日，所有人都唔肯見…
你可以想像我阿妹有幾憎佢。
宜家我媽老啦，兩個女都搬到老遠，我又唔俾個仔佢湊，我諗都係佢自己攞嚟…(我同阿妹會每星期返娘家一次探望）
2個讚
調返轉，如果阿妹畫花左阿媽張信用卡單，然後講句：「你都冇講話唔畫得」，相信 10 個阿媽 9 個就即刻鏟到阿妹上天花，兜巴車到阿妹喊曬口，嚴懲侍候。
呢啲亂丟野經常發生，次次都搞到兩母女發曬脾氣，阿女嬲阿媽明知如獲至寶話唔可以揼都監生揼左佢，阿媽就嬲阿女對自己發脾氣。我啲老屈事件，隔十幾年都仲記得清清楚楚，可以想像當刻幾咁入心。
細細個都有教，想人地點對你，你一定要點樣對人。大家對外人就記得，但對住家人就唔記得。
3個讚
呢個topic好沉重，係我好少同人分享嘅事
慶幸結咗婚去咗另一個截然不同嘅家庭，有對我好好嘅老爺奶奶，有錫到我燶嘅老公，I’m healing
5個讚
我好記得, 自己老母永遠都係雙重標準 ，只有怪責沒有讚賞 …
所以係佢眼中我係黎向佢討債
呢種人自己發脾氣就有恃老賣老，賴人地激嬲自己；仔女發脾氣就係EQ低、廢青
同樓上一樣, 掉左仔女啲野就怪仔女自己冇執好間房
仔女病左要請假就怪仔女生活習慣唔夠好
班親戚叫我地就下佢, 次次都比我鬧返佢地轉頭!
仲要係死藍屍！
我明果種怕無錢嘅感覺
細個屋企人試過欠人錢、仲要有晚知道有人嚟追數、果晚趁我同呀哥訓左仲要偷偷地離開屋企、結果第二朝發現門口鐵閘比人落鍊鎖左。我細個成日幻想有日屋企會比人放火燒屋…
搞到出嚟做嘢好耐、都唔敢申請信用咭、就算呢傢用、一截數就立即找數、唔敢拖。
成個18-28歲我都用嚟治癒緊自己嘅童年、有時覺得如果細個環境好啲、咁我會更加識享受呢10年嘅時間。
2個讚
係…就係咁，我爸不停借大耳窿，佢地真係上黎拍門，有次仲推倒我細佬，同埋用其他單位後樓梯d垃圾擺我地屋企。前兩年，我爸仲借左100萬一走了之，留比我同我細佬還。我地不停收到恐嚇msg, 仲上我細佬公司搵佢。
呢d經歷，真係未試過唔會明白。好多身邊人都叫我唔好咁慳，但我真係好似有強迫症咁好驚無錢，雖然而家已經好左好多，但內心都係一用錢就會怪自己。我連買個麵包，都會諗好耐…
6個讚
我有深深感受，不過唔係我自己嘅原生家庭.
係前夫原生家庭好有問題，佢媽媽應該有情緒病，兩姊弟應該有遺傳，佢媽係佢哋細個用暴力解決問題，前夫就家暴我.
我有一個健康原生家庭，都比佢搞到我極自卑，到依家我仲會發惡夢見到前夫.
真心希望佢唔好再去害人，情緒有問題就去睇醫生.
3個讚
前題係個小朋友會認真聽你講完而又明白去實行，而現實係大多小朋友喺父母有耐性同佢哋解釋時當耳邊風，唔出到震耳欲聾都唔去做，起碼我屋企嗰兩個係咁。
我鬧，但堅持要鬧得有道理。
我識人行最理想嗰套，因為佢認為鬧仔都係虐兒，但當小朋友一扭起上嚟，真係無人治到佢，因為佢個個都唔驚。
我唔否定你講嘅方法，亦都好完美，簡直係唔傷感情又教到小朋友，但世界咁多小朋友，育兒唔會淨係得一套。
Sorry 樓主，離哂題。
4個讚
認同，家家有難唸的經，人人唔同性格，我只係從自己經驗出發，我認為嘅「鬧」即係無理取鬧，只係一味靠惡嚇到人唔再犯，你嘅「鬧得有道理」，我會歸類為「教」，因為有講道理。
諗返起以前睇嘅溏心風暴 2，荷媽嗰種「鬧」，我會認為係「教」，因為佢鬧嗰陣係有解釋點解佢鬧，點解係錯，最後有講應該要做乜 (e.g. 收返你嗰句說話/同佢道歉)。雖然係電視劇，但都可以學習一二。
可能自細經歷係一做錯，就係不斷鬧好多難聽、侮辱自尊嘅說話 (e.g 死廢柴、冇 X 用、殺死你) 同埋體罰，對呢種只鬧唔教係好抗拒討厭，到依家都有陰影。學校老師亦同一方法，齋鬧唔教。結果好怕做錯野好怕冇人 guide 住，少少出錯都嚇到眼淚都飆出黎，驚人地發脾氣。啲人以為我嬌貴叻開唔鬧得，我就有口難言。如果原生家庭唔係咁樣育兒嘅話，我肯定唔會咁樣。
所以咆哮之前都要諗下有冇必要，同埋言詞會唔會傷害小朋友，因為講左好難收返，有時係影響佢一世。
6個讚
有冇小朋友?
如果冇既話, 離婚可以同前夫斷得乾乾淨淨
講真如果家暴既話, 真係要即刻走, 如果唔係生命都有危險
2個讚
你講得好好、真係要的起個心行出去先知會唔會有改變。
我身邊有人又係同令一半相敬如冰、大家零交流、但佢好怕改變現狀、最後用不停買野去滿足自己、搞到成屋野、冇人幫到佢。