今日天陰陰心情唔好, 講下原生家庭對我既影響
本身屋企重男輕女, 我有一個家姐同細佬
由細到大淨父母係錫細佬
我同家姐好似生出黎為左養家咁
細佬讀到中四冇讀書, 到而家30歲人, 冇一份工返得長, 食屋企住屋企
就算我讀書唔差, 我阿媽阿爸係從來唔會讚我
中學時我生暗瘡, 淨係不停叫我飲涼茶, 唔好食咁多熱氣野
又話我咁醜樣又肥第時嫁唔出, 冇人要
本身已經好自卑, 俾佢地講多兩講, 直情行路都抬唔起頭
(已經戒晒口, 都照生暗瘡, 其實一過左青春期就冇再生)
總之父母永遠睇野都係好負面, 從來唔會鼓勵我/支持我
所以野都反對左先
後來佢地離婚, 阿媽趕我走, 我自己搬出黎, 又係一個轉捩點
(詳細唔講了, 我既經歷可以寫做長篇小說)
講下正題先, 原生家庭對自己既影響
到而家性格都係好自卑
就算已經靚左瘦左, 俾人讚都唔會覺得開心
會覺得對方係講客氣說話, 唔係真心
個人好冇自信
細個物質資源唔係好豐富(其實屋企算中產, 但自己永遠過得好窮)
而家搵到少少錢, 好大洗, 好似彌補以前既不足咁
買名牌, 但係買完又會內疚覺得好貴
其實覺得心靈好扭曲
睇野同父母一樣好負面 (冇自殺已經好理智, 雖然有諗過亦有嘗試過)
對愛情方面, 因為好缺愛, 經常有人對自己好少少就會鍾意人
拍拖5-6次, 唔算好多, 但冇親情唯有用愛情代替
而家結左婚有小朋友, 慶幸老公屋企係同我完全相反
慢慢俾佢影響到, 會正面d諗野
但係原生家庭既影響, 到而家都好強烈感受到
就算自己好努力改變, 性格已經定左型
覺得用緊一生去治療童年咁 
35個讚
你能夠有呢啲反思,又可以組織到家庭
證明你成長咗好多
原生家庭對我地係好大影響,但我地察覺到呢啲影響之後
就可以選擇唔再俾佢地影響自己,同埋我地嘅下一代
全看你如何選擇
11個讚
樓主而家同父母見面多嗎?
我原生家庭都係有D扭曲
但因為2個大人要番工
2個小朋友要ZOOM 工人姐姐搞唔掂
而且住得又近
要成日見面
每次食飯D 要好努力咁去控制自己
1個讚
所以而家有句說話講幸福的童年治愈一生，不幸的童年用一生去治愈。我都提醒自己，希望小朋友有個快樂童年。
27個讚
近期有聽過呢句說話,真係十分十分同意!現在自己家庭算是滿意,但原來內心深處,仍會受在原生家庭成長過程影響。
我明，好多上一輩嘅父母都踩多過讚，唔覺得讚係有需要（我細個 XXXX 嗰陣都冇畀人讚，咪依家一樣活得好好），但鬧就必須，少少事都又鬧又打。
所以我提醒自己：1. 適當嘅讚係必須的 2. 唔可以亂發脾氣又打又鬧 3. 父母可以畀意見但唔可以霸道干擾，要識 do
2個讚
係呀, 有時都提醒自己唔可以用上一代既方法對自己個仔
但係點都有影響
例如好小事又驚呢樣驚o個樣
個人好冇安全感
希望自己慢慢改變
2個讚
我覺得你好努力，雖然家庭背景係咁，但係宜家又搵到錢又有自己家庭，你本身一定好上進
我媽媽又係錫晒細佬對我差，但係細佬大個就算搵到錢都一分錢無比過佢，亦唔理屋企，我覺得佢已經受返佢種嘅因
1個讚
而家同父母斷左聯絡了
我結婚生仔, 阿媽都有參與, 中間同佢關係有好轉
但生完仔又因為D小問題鬧交
阿媽淨係關心我個仔, 完全冇關心我…
我覺得唔見面之後, 真係好開心, 冇煩惱
而老豆一早有第2個家庭
你老爺奶奶有冇機會幫手湊?
因為我個仔係奶奶湊既
但我奶奶好好, 直頭好過我阿媽(對我都係)
如果有其他人幫到手, 就唔洗搵自己父母
我完全明白, 每次見面都要忍住唔發脾氣, 真係好辛苦…
2個讚
我家姐叻過我, 女強人
但自從父母離婚後, 佢好憎我老豆, 因為係老豆包二奶先離婚
佢冇拍過拖…而家4X歲仲係單身, 應該一世都唔會拍了
同我係另一個極端
睇錢極重, 一樣大洗買名牌
(因為以前屋企真係冇零用錢…想買野係自己搵工返part time儲)
而我細佬係要乜有乜…
2個讚
係, 其實上一代係唔會點讚
同埋真係又打又鬧
咁我覺得有一個好處, 係令我大個好堅強
不過人際關係方面就好冷淡/對人有戒心
我地呢一代應該開明D
冇以前咁專制, 同埋知道又打又鬧長遠係唔work的
2個讚
m_m_m
14
好明白
我嘅育兒理念係正向教育，唔打唔鬧
但我媽會睇唔過眼，鬧我仲乜縱個仔
有一日個仔同我講唔想去婆婆屋企，因為婆婆乜都唔俾
我內心一涼～
但又無奈（唔想個仔憎自己親人），結果自己補飛，叫個仔聽婆婆話，我會親自獎佢。
自己父母無得揀，唯有睇開d…
但有時就算原生家庭完整但長期家嘈屋閉其實都會造成心理扭曲睇淡婚姻
利申:自己就係
4個讚
我唔想自己仔女對自己印象係河東獅，將來佢養家嗰陣將啲負能量過返曬畀我。
所有生物都一樣，不論係寵物定小朋友，從來都係教，唔係鬧同打。如果鬧同打係 work 嘅話，就唔需要監獄，畀人打一身鬧兩句就可以糾正到。
2個讚
2年半前我知道自己將要做媽媽, 特登上左一個workshop, title 類似係”成為最好的父母” — 其實唔係真係要優勝或者同人比, 而係認清有啲負面嘅野可能由原生家庭黎, 客觀咁去睇同分析, 同埋幫助自己脫離嗰個唔好嘅循環.
我自己最大嘅得著係用同理心去睇一啲父母嘅行為, 例如佢地嗰代好少讚賞, 多多批評. 雖然咁樣係唔好, 但其實佢地都係受害者, 因為爺爺嫲嫲 / 公公婆婆都係咁對佢地, 習以為常, 一代傳一代. 佢地都無感受過 “讚賞 / 愛”. 當然父母對我地嘅影響好大, 但睇清楚之後, 就係我地自己嘅選擇去做唔一樣嘅父母.
3個讚
原生家庭係好影響, 但搵個同你唔同既伴侶就有助自己改變. 我係一個諗野好負面既人, 同父母既教育有關, 因為佢地乜野都係由壞處諗先, 甚至乎我之前有個男朋友都係呢類人, 直至遇到老公之後, 佢改變左我好多. 佢係一個好正面既人, 成日會用唔同方法去令我唔好諗負面野, 雖然都未改得晒D負面野, 但真係feel到自己遂步改變
2個讚
好認同，而且呢D真係有苦自己知，講比人聽好少人明。
雖然我家庭係完整，但父母關係由我細個開始已經好差，成日家暴(老豆打老母，仲要拎刀出黎追斬)，我係大女要保護細佬妹同阿媽，即使我唔夠力但每次見老豆郁手我都會出去擋，但梗係比人打埋一份啦。
細個帶住恐懼過日子，而我無形中成為左我阿媽傾訴同陪伴者，而佢由細到大都會不停將D觀念例如: 「女人就係咁命苦」「結左婚為家庭犠牲哂自己所有唔會有好回報」「有得揀唔好結婚生仔」等等掛在口邊…而我細個覺得佢真係好慘，覺得佢係生左我地先咁痛苦，所以呢D觀念深深植入左我腦海。
我好關心佢感受，又細到大都好聽話，佢話一我唔敢話二，就算違背左自己意思都會盡量聽佢，久而久之變成左佢對我情緒勒索，而我一直都覺得佢好慘所以好多野都就哂佢…但其實我內心好痛苦，佢唔開心可以搵我做發洩對象但我如果講唔開心，只會比佢鬧我/ee哦哦。
因為呢D問題令我患上左情緒病，用左好多年時間去克服(個陣做左好多次傻事)，我覺得自己一世都係咁，成舊垃圾唔會有人愛(自己都唔想愛自己)，自悲到唔敢中意人，覺得我痴埋去任何人都會令佢地唔開心…好強烈被人遺棄既感覺。到後來出黎社會，雖然叫克服左個病，但內在個自己好似永遠都醫唔返，諗野好負面，已經好努力去改變但過去家庭對我創傷真係好難磨滅…
15個讚