深夜長文…
我侄仔又有新故事，又再大暴走，覺得一切都好無力…
話說呢兩日佢親妹妹嚟咗爺爺嫲嫲屋企小住，妹妹都有幾個月冇見喇。原本兩兄妹一齊玩下Board game玩下砌圖好開心好和平嘅，之後呢，佢哋一玩有少少身體接觸嘅遊戲就出事喇，哥哥唔小心整到個妹，但一句唔好意思都冇，兩個開始互相投訴，初生口角繼而動武，妹妹大聲講話要冷靜唔好嘈佢，哥哥就開始一堆粗口、不斷大力拍牆拍門… 最後我同老公迫於無奈用咗少少力將佢哋分開一人一間房冷靜。
冷靜咗陣，我同妹妹傾咗陣偈，了解事情，我亦教咗一啲遇到自己處理唔到事情時嘅應對方法俾妹妹。爺爺嫲嫲又同哥哥傾佢做得好同唔好嘅行為表現，過程都尚算平靜，之後佢哋純粹唔同對方交集，睇睇電視，好安靜。
但安靜係一個假像… 原來哥哥暗地裡Whatsapp媽媽上嚟將妹妹接返家，媽媽上到門大家都好震驚… 我哋再次同佢媽媽溝通好按原定計劃食完晚飯先送妹妹返屋企，佢媽媽亦同意。
真係好嬲，呢位小朋友憑乜野去代表任何人落逐客令？已經唔尊重人到一個地步，我同佢老豆講，佢仍然一如以往小事化無嘅態度。最後隻仔冇出嚟食飯，發爛炸又喊又摔門，等妹妹食完飯我哋走佢先轆翻出嚟…
個個星期都要處理佢嘅暴走行為，真係心好攰
你侄仔爸爸媽媽分開左？點解妹妹跟媽媽，佢就跟爺爺嫲嫲？會唔會佢由細到大無爸爸媽媽既愛，攪到情緒有問題，就快步入青春期，都幾難攪，你但求佢唔學壞就算，根本都無得教。
其實哥哥係咪妒忌妹妹可以跟媽咪，所以無意中有D行為針對佢？我有個表兄弟生長響健全家庭，但父母偏心細妹，細個時，有時阿妹做錯嘢，佢都會放大佢缺點投訴，想父母鬧阿妹，而且行為都幾明顯。會唔會哥哥都係咁心態？尤其響阿哥主場，佢覺得自己已「冇左」媽咪，響主場應該要自己話返事，所以放大左呢個心態，先下逐客令？
12歲父母其中一個唔響身邊，最有權力管教既阿爸又唔糾正佢行為，長老再親近都好難代替父母角色，真係好難搞。可能個小朋友內心都缺乏安全感，想引人注意，佢都好可憐。如果阿爸唔理，阿媽唔同住，不如交比專業人士，搵社工幫下佢。
呢啲我哋個個都知，佢一日諗唔通，點做都唔會幫到佢。佢學校社工都跟得好足，同佢開咗case，經常都會揾佢傾偈、輔導，不過停課呢段時間佢就明顯退步咗，尋日都發現佢唔太識同人相處及梳理自己嘅情緒，情緒到亦會用咗好多唔理想嘅方法… 我哋都好明白父母嘅愛同家教係好主要因素，但最好嘅時機過咗就係過咗，返唔到轉頭，佢而家開始踏入青春期同反叛期，佢繼續要執着真係冇人幫到佢。
1個讚
佢自小就同媽媽、妹妹分開咗，佢爸爸又唔太理會同照顧佢，早三年前爸爸仲搬走埋，我都好明白佢嘅受感同情緒顯生出嚟嘅行為問題。
佢好憎佢媽媽同妹妹？又不完全，因為每次兩兄妹都可以一齊玩得好開心，但我哋留意到一玩啲有身體接觸嘅玩意就會鬧交收場，妹妹同佢差1年，思想亦開始比較成熟，但哥哥似乎唔太識同女生相處嘅禮儀… 遊戲時有啲動作妹妹感到唔舒服或被冒犯，就引發大戰。
哥哥的確有好強嘅佔有慾同霸地盤嘅行為同意識，但佢爸爸從來都冇好好處理/教導佢。
原來個細路有咁嘅背景
父母都唔喺身邊真係好可怜
你可以做嘅真係好少
最多係一有時間陪佢玩, 當佢朋友
你好好, 肯教佢閙佢, 佢心入面可能都想有人鬧下佢關心佢, 希望你繼續關心佢, 唔好放棄佢
帶佢去行下山, 對多啲綠色植物, 或者對情緒有幫助
加油, 相信仲有得救, 引導佢諗通人生, 過多兩三年過渡青春期就會好好多
唔…… 佢內心係咪真係咁諗我會有一個問號。佢嘅地盤主義真係好強，喺屋企嘅尊橫霸度同對任何人嘅唔尊重，真係令我想切底放棄佢…… 而佢的確講咗一啲令大家想永遠放棄佢嘅說話，我冇讀過兒童心理學，解讀唔到，亦都睇唔透……
而佢講呢啲說話之係較早前嘅事。
「點解你哋成日都要返嚟？你哋唔出現我就唔需要做呢樣做嗰樣！你哋唔出現就好！」
「只有我阿爸先有資格管我！」
我真係好嬲我哥完全冇盡作為人哋個仔同爸爸嘅責任，唔理父母亦唔理自己個仔，以為有俾下家用就大晒咩都不聞不問！
每次返去見到阿仔本來都好好地但最後都因事跳掣發癲，真係心力交瘁……
平日爺爺嫲嫲照顧?
你同你爸媽講﹐
向你哥講唔湊、湊唔掂﹐
你哥先至會諗方法；
其實有個可能係個細路想吸引父母注意。
點講好呢…？
爸爸當阿仔係隔離屋嘅寵物
媽媽當阿仔係心肝寶貝
嫲嫲當阿孫係自己個仔
阿仔當佢爸爸係神級偶像，媽媽、嫲嫲係ATM+工具人……
真係會教會鬧嘅就係爺爺、我同我老公
呢種關係都維持咗10年喇
我都就快生BB，我同老公冇可能再投放咁多心機時間落佢度，除非佢諗得通願意受教啦
之前同住而家唔係
不過5年來都Keep住個個月都返去兩三次
BB出世去返去坐月兩個月
佢媽媽係咪有原因照顧唔到佢？定當初傾時一人一個小朋友咁分？媽媽願唔願意照顧返佢？
呢個小朋友需要父母教育，阿爸冇責任感會害左佢，如果媽媽能力許可同願意，小朋友又肯，可唔可以比返佢教？好過hold住個小朋友響度由得佢「自由發展」。
你都盡晒力，始終隔一層，盡幫效果不及佢老竇嘅關心。
繼續咁落去，可以預見將來識到不良少年後，仲頭癢。
希望佢突然開竅。
一直都溝通好一人一個，佢媽媽都有能力同空間照顧佢嘅，不過個衰仔唔領情，又成日FF媽媽、妹妹對自己唔好。佢媽媽一有空間就會同佢兩兄妹去玩去旅行，但個衰仔就當佢媽媽鍾無艷咁囉…
佢老豆反而完全唔會做呢樣野，最多只會簽下通告同睇下功課。得閒都唔會同佢傾偈/出去玩，由細到大都係一人一部電話 各自修行…… 講真，我哥連同父母飲餐茶都唔願意，唔好講話旅行啦
現實啲講，我覺得單憑爺爺、你老公同埋你要教好佢係冇乜可能。如果你夠菩薩心腸嘅話，可以試吓每次見面同佢私下平心靜氣傾兩句，單純關心下佢，唔好諗住訓話或者教好佢，其實咁大個仔點會唔知呢啲行為唔好呢，佢可能係覺得唔需要做俾你地睇，同埋控制唔到。而家但求如果你哋私底下有兩句偈，到佢喺學校有啲咩麻煩，或者俾人蝦，你都可以觀察到，甚至佢可以有個大人講吓。
btw, 同性通常易傾啲，如果你老公唔介意，可以定期check in下佢。有時就係屋企有個朋友長輩一兩句，就可以拉得住個細路唔好行錯路
我哋一般都唔會鬧，可以嘅都盡量發掘佢嘅優點去讚下，有時見佢做得唔好都會花時間說教，但近來佢啲行為同態度越嚟越過份，真係忍唔住要爆佢。
佢平時冇禮貌唔尊重人都算，而家郁少少就講粗口鬧嫲嫲，小小野就發晒脾氣，唔順意就對妹妹郁手郁腳，要全世界圍住佢轉，攪到理佢又唔係唔理佢又唔係。
我同老公自問算好耐性，但而家真係攰喇，比對住平時嘅學生更攰…… 我哋曾經都會希望或者常試相信我哥會負責起育佢呢位兒嘅責任，可惜係“never”。
呢位小朋友其實好幸福，幸福到佢認為所有野都係必然。我有時會極端啲去諗，我寧願佢切底變壞，嘗試喺出面俾人教訓或者狠狠地承受自己做錯嘅惡果。
唉，睇住個細路變壞真係好心噏… 老土d , 搵d 教會哥哥姐姐撩佢返教會，學下樂器打下波咁 
1個讚
經過返娘家坐月呢個半月，我對呢位已經12歲升咗上中學嘅年青人切底心死喇，我放棄喇
下，真係無得救？
由頭睇到尾都係爸爸問題，養不教父之過，要爸爸做野先得，小朋友根本無視其他人。
btw恭喜你生左！
多謝你
嗰位年青人開到口話我做乜要翻嚟住，阻住佢。佢又竟然去撞我老公帶嚟工作用嘅電腦密碼，撞唔到又發爛炸粗口鬧我老公，仲要衰到format我哋部腦，好彩重要野都存咗喺外置harddisc，知會佢阿爸有呢件事，佢阿爸就係咁咦話兩句就完，我哋真係嬲到想殺人呀！
今日攞翻部電腦走，佢又發爛炸鬧我哋，鬧我哋唔講道理喎？真可笑！又屈我哋整爛咗佢擺喺地下一珍而重之嘅玩具？嗰刻我嬲到情緒失控爆喊咗出嚟
所以，我放棄喇，我寧願放多啲心意喺自己個女度