知道係正常反應，但真係覺得個人就快虛脫… 而家8週左右，孕吐反應由6週開始出現，我諗我唔算嚴重，因為冇真係嘔出嚟，但就keep住覺得反胃，唔係淨係食嘢時先唔舒服，係全日無時無刻都唔舒服… 完全食唔到肉，聞到食物味會作嘔，飲水都唔係好飲到，因為一飲完個胃就頂住，就算只係飲一兩小啖都會唔舒服好耐，覺都瞓唔到… 每日都飲唔到500cc水，只可以自己煲白粥食，可以食到少少水果，食梳打餅，但真係吸收唔到幾多水份… 兩個禮拜內已經輕咗4kg… 醫生話我要吸收蛋白質畀BB，所以呢幾日都盡量食返雞蛋，飲豆漿，但真係食/飲得唔多，個人長期肚餓，餓到胃痛，全身冇力，但又食唔到飲唔到嘢…
因為而家一個人喺台灣安胎(要睇免疫)，真係好辛苦，個人半虛脫狀態，但冇人喺身邊，所有嘢只可以靠自己搞掂，老公最多只可以weekend飛過嚟一兩日… 呢個禮拜連出去睇中醫都去唔到(其實上星期的中藥我都未食晒，因為要用一大杯水沖藥，我根本唔能夠一次過飲晒一杯水)，全個禮拜冇出過街…
BB得來不易，我都同自己講有孕吐反應代表BB成長得好，要撐住，但喺完全吸收唔到足夠水份、營養同能量嘅情況下，我真係唔知頂到幾耐… 有咩方法可以令自己食同飲到多嘢？
我兩胎都係咁
我仲有啲奇怪嘢，就係成日個鼻都聞到怪味，挨到3個月就會開始好轉
試吓食啲酸嘢，真係會開胃啲
明白你好辛苦
但通常胚胎頭三個月自己有營養(台灣人成日講頭三個月胎兒"自己帶了便當"), 未使吸收媽媽果d 住
(有錯請指正)
惟有飲住檸檬水、食下梳打餅先, 三個月之後會好好多
1個讚
我嗰時係咁，飲薑茶對我有幫助，都食唔落㗎，但唔會成日反胃先。唔使擔心bb 無營養，我醫生話又唔係第三世界國家，唔會唔夠營養俾bb，我嗰時嘔到生㗎，又食唔到嘢。
我嘔到四個月，輕咗7磅。
往好方面諗，你而家輕多啲，之後重啲都有「空間」。加油。
我嘔到生之前一個星期，頭個五個月直頭食乜都嘔，唯有等無咁唔舒服嗰日儘量食嘢，平時就keep 住晗細片麵包、餅、甚至薯片，係無乜營養，但好過無嘢落肚。至於飲水，我會加少少檸檬汁/ 朱古力粉，有D味易啲入口
嗅覺真係敏感左好多，我而家租service apartment住，佢個廁所有陣味，因為係黑廁d味係散唔到，會谷出嚟，我試過一行入屋就想嘔，瞓瞓下覺都會畀佢臭醒作嘔… 而家唯有畀多d電費間中就開佢個浴室寶抽氣，24小時開住風扇吹，幾凍都開晒全屋d窗通風…
台灣d便利店通常有d茶葉蛋、香腸等熟食賣，有陣味，我而家係行唔到入便利店，會想嘔…
上星期有買左包話梅，唔舒服時含一含，但有時都吞唔到d梅肉落肚… 好彩係食到橙，柑嗰d, 酸酸地，不過有時空肚食唔知係咪增加胃酸就會胃痛…
我有聽過呢個講法，爬文都係咁寫，我喺呢度做產檢個醫生都話冇問題，話7成孕婦都係咁，問佢係咪可以開B6畀我，佢都話其實冇用，話d人覺得有用只係心理作用，呢個世界上係冇嘢解決到孕吐…
不過我去免疫醫生度覆診，佢就話我淨係食粥同餅乾係唔得，因為BB需要蛋白質，叫我食雞蛋，飲豆漿，好在我都勉強食同飲到，但佢叫我食雞同魚，我真係冇辦法，完全食唔到肉，尋晚有嘗試叫左個雞飯嚟食，但一打開個外賣袋就已經想嘔，成袋冇食過掉左…
我都希望過去兩年食好多高蛋白嘅嘢，而家可以足夠慢慢消耗同留畀BB，每日一包滴雞精都飲左兩年… 但有孕吐反應開始就飲唔到，呢幾日先開始嘗試飲返，希望補充到D蛋白質畀BB…
我喺呢度搵唔到薑茶，因為好多真係有茶(咖啡因)成份，純薑糖都搵唔到，好多加左黑糖… 最後我都係喺iherbs買，叫我老公拎過嚟畀我… 本身佢月中先會飛過嚟，但見到我咁辛苦佢而家會提早飛過嚟… 講真過去1.5年我幾乎個個月自己飛台灣取卵做IVF，我都冇乜嘢，咩都一個人搞掂，咩痛都忍到，但而家孕吐，我係半夜起身喊左幾次，可能係荷爾蒙影響，但我真心係好驚自己頂唔住… 加上試過流產同埋而家有免疫問題，每日都好驚，所以唯有係同自己講，有孕吐代表BB仲係好好的…
你嘔到生真係好辛苦，我想像唔到，我希望過左12週會好d…
Leila
10
我希望過左頭3,4個月會好d… 我而家半夜會餓醒，日頭都係長期感覺到自己餓過龍，個身體好似自我消耗緊咁，但有時連餅都食唔落，就"冷"去煲粥食，但之後半碗仔粥，食成個鐘都食唔完… 總之個人就長期飢餓同虛脫狀態，真係有d想入醫院吊鹽水算…
希望好似你咁講，之後有quota畀我大吃大喝~
Leila
11
係，而家都係但求唔餓死，垃圾食物加工食物只要食得落都照食，尋日食kfc食得落佢個薯條同半隻雞比，有時都想買薯片食但忍左手，因為我有免疫問題，即係本身身體已經發炎，我要控制住發炎指數，所以唔敢食得太熱氣/放肆…
我而家都會飲下寶礦力，但雖然佢係有d味，飲嗰下易入口，但飲完之後我個喉嚨就會有陣怪味，食完白粥之後都會…有時呢陣味都會令我想嘔，可能要含粒話梅/糖先會好d…
A_lcy
12
唔得咩？我嗰時都係買現成黑糖薑母茶、或者自己煲薑加黑糖
懷孕期啲荷爾蒙影響真係好可怕，我兩胎都懷疑自己有少少抑鬱症，成日亂諗嘢
但過咗3個月就開始好返好多，覺得攞返自己個腦，可以正常思考返
第二胎時因為有經驗，所以孕初期我直情咩都唔諗咩都唔理，食得就食、瞓得就瞓，多啲休息，咩都等挨過3個月先算
1個讚
Leila
14
我查到黑糖係活血化瘀，所以我唔敢食，我試過失胎又有免疫問題，所以凡事比較小心，好多平常孕婦食/做嘅嘢冇問題，可能喺我身上就會有問題… 我都知我係有d paranoid, 但真係好驚，唔想再失去… 所以會好小心…
我兩胎都頭三個月輕左10磅
當時同事仲以為我減肥成功
其實真係唔好太擔心，食完就嘔，嘔完有胃口就食，我最後真係乜都食，薯片、叮飯，諗起想食就食，少食多餐，唔好勉強自己一定要食蛋等。個陣有人叫我飲陳皮薑水，都有少少幫助。
出唔到去就睇下劇，聽下歌訓多啲，就會捱過
加油
1個讚
Leila
16
我係因為保胎所以成日擔驚受怕，之前喺香港保唔住嘅慘痛經歷好大陰影，如果唔係而家都唔會寧願一個人留喺台灣3個月，免疫問題好複雜，我初期隔日就去抽血驗hcg，每個星期再額外花千幾蚊抽血驗免疫指數… 就算我5週照到閃閃我都未放心，繼續咁樣瘋狂抽血，到7週我先抽少左，我抽血都抽到隻手瘀晒… 真係希望可以平穩過度… 但每一日都好驚… 然後而家食唔到嘢，個人完全冇精力，好辛苦，就變得更加軟弱，驚自己一個人"累"低左唔知點算… 其實到呢一刻我都未敢開心，我未感受到懷孕嘅喜悅，真係到抱到上手先係真，每日都好驚…
Leila
17
因為本身瘦底，BMI剛剛達標嗰d，如果再減磅落去就會過輕… 我其實算好彩我冇真係嘔出嚟，但我嘅冇胃口/反胃係全天候，即係其實係唔會有一刻覺得有胃口… 所以一直都食唔落，但又餓到胃痛腳軟…
陳皮薑水係自己煲？我而家喺台灣，之前仲出到街都唔係好知呢d嘢喺邊度搵到，而家直頭連街都出唔到… 最後都係喺iherbs買左d薑糖，等緊老公帶過嚟畀我…
頭三個月BB好似未吸媽媽營養。
好似其他會員講，食完嘔，嘔完再食番啲，食到就食，無胃口就慢慢逐啲逐啲食。
（因為諗起我最近腸胃炎，只能飲水，食唔到嘢，食到嘅都係梳打餅，個半塊餅用咗我大半個鐘嚟食。）
我果時都係好似你咁，我覺得自己有啲神經質咁
我係結婚6年冇備孕都冇小朋友，之後有咗1次，但去到8w就走咗，果次好傷心
醫生跟進之後過咗年幾再懷孕，跟住我就痴痴哋咁，成日好驚又無啦啦走咗，4w抽血驗hcg，之後每兩星期照一次超聲波確保仲有心跳，啱啱照完幾日又開始擔心冇心跳，總之就好神經質，所以都懷疑果時自己有抑鬱症
去到過咗3個月，個胎穩定咗，啲反應又冇咁勁，我先開始正常少少，冇話成日擔驚受怕咁
而家局外人就叫你放鬆啲啦，其實自己果時都係當局者迷
1個讚
其實我都瘦到得46,47kg，返工著衫著雞翼就真係好睇，啲同事都話太瘦唔好再減
唯有俾多啲正能量自己，吸引力法則，每朝起身，同BB講聲：「我哋今日食乜好？一齊去試吓有咩好食」真係乜都食落口就食，連檸茶酸酸地都照飲。最後發覺啱食嘅係車厘子同士多啤梨，日日買嚟食。過咗3個月就好好多
你有冇其他屋企人可以飛過嚟陪你？
陳皮薑水就係落塊陳皮再加幾片薑煲水，陳皮本身有少少甜味，易入口，睇吓屋企人可唔可以幫你買少少帶去台灣用？