長文，想問下大家意見
家有兩歲小朋友，雙職父母，平時有屋人黎幫手睇住BB，所以工人主要係輔助角色同處理家務，雖然一開始都係叫佢要照顧小朋友加家務兩樣
工人喺香港做左差不多9年，46歲，黎左我地度差唔多一年，佢上一份工三年半被解約，佢話係因為遲左湊小朋友返學所以舊傭主炒佢，平時相處都唔好，所以個僱主炒左佢，留低另一個工人。再上一份就4年完約，所以我地都試下用佢，利申第一次請工人。
先講佢有咩問題，一開始嗰兩個月佢都做得唔錯同聽話，之後態度越黎越差，成日話自己攰，成日夠鐘開工都仲喺度食早餐，但佢都係做一般家務，已經唔駛點湊BB，而且做野好慢，一日有9個半鐘休息，同埋夜晚BB訓左佢其實佢無咩做，所以我唔知佢係真攰定點。
比較接受唔到嘅位係成日黑面，叫佢做野佢會唔應人，同埋唔鍾意就唔會跟我指令，用佢自己認為啱嘅方法做，叫佢換床單又會話佢兩星期前換過點解又換（？！）。平日唔會打招呼，我地買完野返屋企佢唔會出黎接我地，會繼續做自己野，叫佢先會出黎。
試過過左10點佢休息時間叫佢幫手，佢第二朝自己遲半個鐘起身，話因為我叫佢OT，但我每個月都有俾成幾百蚊bonus佢，而佢做多一陣野都要同我計時間！
休息時間就算大聲叫佢，佢都一定唔會出房。有好多偷懶行為，廁所啲膠邊發哂毛，但我叫左佢日日清潔；bb啲玩具叫佢每日清潔但成日有飯菜痴住，唔係大過錯但成日叫佢做野都驚佢求其做，但我其實無咁多時間check佢。下晝又會問都唔問就自己坐喺度剪指甲剪成個鐘。推bb車出街會單手推，等過馬路又唔lock住部車。玩具跌落地又唔執，照行過繼續做自己野。試過叫佢幫我買飯但俾屋企人撞到佢坐喺度玩電話唔返上去。
總結係無大過錯但態度唔好，成日想偷懶，做野慢，打份工心態。佢好嘅位係放假都準時返黎，衛生ok，食野唔揀擇。
想問下大家，呢個情況你地會點處理。有同佢溝通過但啲偷懶同駁咀行為繼續，只係俾我捉到嘅佢就做返，未捉到嘅就繼續hea做。黎緊會搬去大啲嘅屋，預視到佢未必搞得掂或者會嚴重黑面。
第一次請工人，唔知佢咁樣算係正常定唔正常，因為身邊朋友嗰啲又借錢又出去做兼職咩衰野都有。
睇你有幾需要個工人，講真呢個都雞肋，好又講唔上，但又唔算衰個批
8個讚
我比較接受唔到黑面，放左工仲要睇工人面色會好影響我心情，所以如果係我我會轉工人。
根據我以往既經驗，愈係香港做得耐既工人愈係有主見，如果你係冇咩要求，放左工淨係想屋企可以正常運作唔想佢乜都問你，呢種有d 年紀有經驗既工人識自動波就好啱。
但如果自己都係比較有意見有要求，鐘意工人照跟住做既，最好揾d 後生啱啱黎既，白紙一張比較易教聽話。
1個讚
都係，我都知有啲係好衰或者好蠢教唔到，但佢叫做正常人，換的話又唔知會唔會換到個更差。
我有同佢講過，可能我自己心情都唔好，佢就不停數自己有幾多野做，但其實對比嗰啲一個人湊b加做家務嘅，佢真係算好少野做，佢就話佢還佢，人地還人地，唔好比較喎，即是叫我接受佢係做唔到咁多野。
係，黑面好難頂，如果小朋友大啲我可能接受到，可以由佢自己黎，但而家小朋友太細我好多野要佢跟返足，佢就覺得我好煩。
想知好嘅工人係點，我唔知點評價而家呢個，但就一定唔係好囉。
雖然幾千蚊人工我唔會預佢做到100分，基本衛生合格我就算，因為請工人好鬼煩。
但你呢個又好似有太多問題，我諗我都會換一個。
我個人睇法經驗可以累積, 技能可以練習, 但心態態度你無得教
唔係話僱主就一定高高在上比錢就大曬, 但我地自己返工我都唔會對上司黑面, 所以黑面我一定唔可以接受. 唔中意呢份工就過主, 唔好比面色我睇
3個讚
同意，係態度問題為主，其實佢咁樣大家都唔開心，倒不如換過個，只能講佢唔適合湊newborn。啲姐姐interview就咩都yesyesyes，黎到就咩都say no。
2個讚
你如果到最後都大機會會換人, 倒不如同佢攤牌一次 — 重申呢份工嘅基本要求. 有啲咩不妨寫低佢, 大家清清楚楚. 做到點係本分, 做到咩程度有機會有啲bonus… 好似做 performance management 咁
但底線係, 唔能夠黑面. 呢個屋企容納唔到黑面嘅人. 如果再黑面就bye bye
因為如果你橫掂都預左要比一筆agency fee 重頭黎過, 就當比個最後機會大家
又或者有轉機. 冇咪疊埋心水換人
如果係我
我一開始係唔會請呢個姐姐
1 年齡問題，太多身邊過來人朋友提要搵3x，因為小朋友會大，到識行識走喪跑，你要有心理準備佢未必追得郁。去公園，過馬路要諗下，雖然見你話有長老，但長老都會老，見有時啲公公婆婆追個孫都好吃力，始終非1822
2 有前科嘅唔請，前僱主改變唔到嘅，我覺得自己都比較難改到佢
3 我prefer請未黎過香港嘅，最好做過中東，非單一工種嗰啲 eg唔係淨係負責煮飯/洗車
可以試下同佢傾，要睇下佢係咪等錢用，如果等可能會著緊返啲啲啲。畢竟已係成人，呢個年齡喺東南亞已經係長老級，性格已定型，唔好期望改變到佢
3個讚
我個工人年紀仲大，5x歲，喺我度做咗年幾，我同我2歲嘅女去公園，d人以為我姐姐係婆婆
佢喺香港做咗十幾年，雖然佢好錫我女，但唔係好識煮飯，我老公對家務有要求，已經親身示範咗好幾次俾姐姐睇，但都係達唔到基本要求，冇乜記性同冇乜心機學
除咗有次帶住我女成個鐘唔聽電話之外，基本上冇乜大錯
但我哋嚟緊會換工人，因為會多個bb
我老公成日話我阻住姐姐返鄉下享
嚟緊個新工人都係睇彩數
我姐姐都係5x 歲, 未黎我屋企之前已經喺香港做左接近20年. 我小朋友出世前1個月開始. 佢對我小朋友都係好好
佢煮野食就普通啦, 唔係難食又唔係好好食, 唔好太高要求. 但打理屋企家務井井有條, 而且好主動, 唔計較 (星期日返到黎會幫手), 個人亦簡單純樸, 放假只會搞自己野 (例如匯錢) 大部分時間去屋企附近嘅公園坐, 傾計同食野
我感覺佢算中上, 起碼好多野唔使我粗心, 但針無兩頭利, 高啲能力, 相對佢人工亦高啲 (我地而家比緊 7000). 我有時都會覺得少少重皮, 想慳啲啲, 不過講到底有時一分錢一分貨…
我想帶出嘅係請人唔會有完美, 10分有得7-8分都要收貨
另外, 請年長姐姐照顧小朋友, 可能體力不及後生, 但我自己經驗又還好, 佢從來無令我擔心過. 而且, 安全嘅野應該係雙方面, 都要從小灌輸小朋友注意自己安全, 拖實姐姐, 唔能夠100% 責任都推比姐姐
2個讚
我姐姐都係5x歲，我ftm，兩個小朋友。我姐姐湊BB有經驗，比我有耐性，BB唔舒服時好識照顧佢地，識同佢地唱遊，教佢地英文。最大問題係冇體力，所以唔放心俾佢單獨帶小朋友去公園。做家務都眼花花地，唔係好睇到邊度污糟。
呢個姐姐不過不失，但又唔敢搏請新工人，都係等BB大個先。
你呢個俾7000只可以講正常，唔算好好，而你呢個case亦說明左要俾到7000先請到正常人
每個僱主對於姐姐工作內容嘅要求唔同, 同埋表現點樣為之合格, 唔合格, 優秀, 大家準則都未必一樣. 例如有啲只需要佢照顧隻狗, 帶左隻狗散步, 餵飽左就係做得好好, 又有啲係需要佢照顧老人家小朋友煮飯打掃屋企, 如果唔夠時間抹埋鞋底就係唔合格
至於人工, 理論上同一個工種, 待遇應該以經驗, 能力, 技能等去區分到底人工係高定低
換個角度, 有2個員工, 1個10年經驗1個零經驗, 但攞嘅人工係一樣, 試問有啲咩可以驅使10年嗰位更努力去工作?