呢幾日好迷惘，想搵人呻吓
唔經唔覺原來自己已經40有多
人生唔算太暢順，不過不失咁
結咗婚，冇仔女
老公大自己17年，慶幸身體都仲健康
唔需要自己特別照顧，但錢就搵唔到
但又未至於要我俾返錢照顧佢
到而家我哋都冇樓，只有幾百萬現金喺手，
一直都租樓住，呢個係我焦慮嘅其中一個原因。
點解唔買樓，就因為講咗好多年，
喺香港搵夠就一齊返美國（佢係公民我唔係）
而我喺香港開公司
疫情嗰陣都試過月入六位數字
但疫情到而家，生意上唔返去（都因為自己冇乜心搞積極去搞），而家扣返啲租金月入大概30-40K，基本上靠呢份收入比租同生活開支。
覺得好焦慮，好怕生意越嚟越差，
到時基本嘅生活開支都支撐唔到。
另一方面，自己又好厭倦而家嘅工作，
我只係一人嘅生意仔，做咗老闆之後
根本完全休息唔到，個心同神都係工作之上，
成日都提自己要休息，但總係放唔開。
我想摺咗間公司，呢兩年搬去美國住。
但我老公喺嗰邊大，就覺得我嘅諗法好天真，
佢覺得美國嘅生活成本好高，治安又唔好
怕我未必搵返而家嘅收入同
唔習慣當地嘅生活，
而佢呢個年紀，去到美國都冇嘢做，
佢鍾意啲中華文化，例如氣功養生嗰啲，
去到美國又未必咁多志同道合嘅人。
但佢一直都算好遷就我，
如果我想，佢都願意同我一齊返美國。
講返我自己，以前香港工作都係全英環境，
英文都叫流利，溝通唔係問題。
本身都有一種比較特殊嘅專業資格，喺美國承認嘅，搵啲entry Level工都應該OK，但可能要捱下咁。
我而家好糾結，因為我覺得老公心底其實唔想走。
我自己冇外國Passport，我真係好想走，
好想要個好啲嘅生活環境
同去攞返張綠卡保障自己。
我成日同老公講，如果唔係因為你，
我一早自己一個去咗英國或者加拿大
（因為移民去外國係我由細到大嘅心願）
同埋而家呢個年紀，如果仲唔走，
我真係怕自己適應唔到。
但另一方面，我搞唔清自己係唔係逃避，
因為香港間公司唔順利，
就想搬去第二個地方，由頭嚟過。
總之而家個心情喺想走，
但係又好糾結嘅混亂思緒當中
你有得揀，好多人想揀都冇得揀。
知足常樂啦，人生總有起跌，人一世物一世梗係過去見吓世面，反正只係四十幾，唔啱住仲可以返轉頭食回頭草。
5個讚
其實你都真係好想走，提左好多句都講想走，而留喺香港亦唔見得生活會再有咩起色同動力。
不如落手研究下搬去美國，籌備過程中應該會愈來愈清晰將要面對咩轉變同困難，咁你會清楚自己係咪仍然有呢份勇氣。
6個讚
你講得好啱，我未儲到呢份勇氣，同我成日認「凝」住老公唔想返去，一直覺得自己堅持去美國，可能係一個自私嘅選擇
平時唔識勸你，但喺呢個大環境下，我傾向建議先穩住一個外國國籍先，何況你話呢個係你心願，即係實際上+心理上你都有呢個需要
再過多幾年，你兩個都未必走得郁
2個讚
佢肯陪我走，只係我覺得佢唔係太想
如果我堅持，好似好自私咁
樓主話：佢一直都算好遷就我，
如果我想，佢都願意同我一齊返美國
1個讚
聽你話因為香港工作同埋租樓住冇物業，好大壓力，你想移民去一個生活環境好，有保障既地方。 先不討論邊個國家比較「好」， 但你考慮嘅嘢美國未必咁啱你，英國反而有得諗
以我所知，如果你喺美國冇供過類似pension / NI , 即使你係公民，將來都唔會有國家資助， 睇醫生亦要俾錢，有錢先有得醫，而且非常昂貴。 大城市好啲嘅區喺美國應該要千萬以上，而且要keep住交property tax 亦唔平。 美國係要後生去搵高人工先抵諗，高風險高回報。中年先至去錢又唔多，好難搞。
去英國，反而夠錢買平樓一間收租一間住，打份牛公供下NI都得。 不過每個國家都有問題，你想有保障環境好係講邊方面？ 不如了解下個國家嘅缺點，計吓數先。 你一離開香港，喺香港份生意就返唔到轉頭。 如果你地有啲實質計劃，你老公都可以移得安心啲。
11個讚
你呢個情況都唔止係移民問題，係個家庭問題，長遠住屋點解決，養老、工作、生活、醫療點？好嘅係你哋有得揀，經濟條件不俗，身體又好，感情又不錯。放開心情同老公傾，好好計劃下，始終佢已經近六十，無論留港移英美加，點都要好好諗下個將來
如果移民亦要快，救生艇會收，人年紀大亦難走得郁，唔會成日有好似呢幾年咁咁多機會移民
加油
1個讚
你講得好啱，Pension / 醫療保障係我既考慮點之一，以我所知係要交足夠10年稅先有某程度既保障，呢個都係我想趁依家仲係未太老，去美國打工既原因之一。
居住方面都係煩，大城市既樓價確實分分鐘貴過香港，去到美國都可能性要比更貴既租金去租樓，我依家都仲做緊資料蒐集。
基於以上幾點，我同老公都有傾過移居去成本比較低既地方，例如泰國都係一個考慮點。但去泰國就攞唔到美國護照，但自己又無子女，一本美國護照其實都未必係自己想得咁重要
2020年前 無樓揸手 就可以話焦慮
今時今日 不知幾多人想揸住幾百萬而唔係揸住層樓喎
你幾百萬點運用 收下息都應該夠俾租?
英國應該係最好既地方 解決到你大部份既焦慮(住屋,醫療,國藉,正常收入,退休plan…) 係解決唔到你老公喜歡中式生活啫
2個讚
以樓主所述現時狀況，其實離開冇得輸。揸住幾百萬，依家唔會買樓，但又繼續要交貴租，百物騰貴，暫時食高息，但長遠再十年，年紀大，想租樓都難，銀紙搣搣吓，貶貶吓，就算未有經濟壓力，一定有心理壓力兼影響夫妻關系。 考慮搵個地方自己買得起兩房小單位同時有工作機會，公一份婆一份，有工作有心有力，點都繼續做。
1個讚
唔好介意，我覺得樓主冇仔女已經少好多焦慮
可以去邊到都得又唔駛考慮住(好學校之類)附近
好似樓上分析，英國似係最佳選擇
美國真係要有D錢(或果邊有親人有屋俾你哋住) 就好
既然係心願，不如放手一搏
如果真係發覺唔鍾意都可以返番香港
你整好個proposal 俾老公，佢見你有晒計畫可能踏實D，加油！
1個讚
英國都好似係比較好嘅選擇，比美國平，入場費少（5+1）