同另一個post唔同，我地只係小康
仔仔3歲7個月，留意到佢好鍾意數學，當做數學題係遊戲時間，平時非常主動問數學問題。加減數佢基本都識，係會有時大意答錯題目。最近佢識咗個小一姐姐，小一姐姐教佢乘數，佢而家都識識地2，3，4，5，6既乘數，唔係靠背，係自己慢慢加上去。
佢讀券幼，學校仲教緊1-20唱數，我諗過幫佢轉校，但係我短期內會離開香港，得返一年，係咪轉校都冇太大作用？
去到英國我哋都冇錢俾佢讀勁既私校（唉）
我又唔知點俾資源佢，帶佢上過數學興趣班，佢又嫌人哋悶，但係帶佢參加比賽就非常集中專注，跳級考k2仲攞獎……
佢認字都好快，冇谷過冇迫過，佢已經可以自己睇簡單嘅中英文書，朗讀到出黎
佢幾乎係自己學，我都唔係好識栽培佢，我見呢度有好多教育高手，所以請指教（跪下）
每位小朋友都係獨特，只要順其自然就得，無錢唔代表無教育，有錢亦都唔代表教育得好，無必要同人去比較，所謂教育高手，大多數都係理論式，何況小朋友每個都唔同，性格，喜好，背景….唔會有一套必朋勝教育方式，自己小朋友自己最清楚，用你覺得好嘅一套就可以
3歲7個月，已經識咁多
我仔4歲日日都玩玩玩，數數1234568910每次都數漏個7
樓主仔仔太叻了
唔明你問題喺邊
你覺得讀卷幼好有問題？券幼滿足唔到你小朋友？定滿足唔到你自己？
唔滿足都係尼自有比較。咁你同咩人比較？
你成篇都講到你小朋友咁勁。你又有能力俾佢上數學班。咁你其實想請教啲乜？
樓主係唔係擔心仔太叻，讀普通學校會覺得淺，無晒學習興趣？
所以想搵啲其他嘢比佢外補下？
抱歉，絕對冇show off嘅意思。因為我一直諗住俾小朋友開開心心過童年，所以揀咗間happy School俾佢。而數學興趣班佢上咗兩個月已經唔肯再上。
其實我問題主要有兩個：
因為就嚟離開香港，係咪轉去一間深啲嘅學校作用不大？
去到英國我冇錢俾佢讀私校，只係讀state school，我又有啲咩可以做到幫佢呢？
小朋友嘅能力係我意料之外，我一向都冇預計到，而且我好似冇乜資源投放俾佢。
係呀，唔知有冇一啲數學興趣班係有趣啲，佢可以鍾意上堂呢？
因為我同先生都出身基層，原本圈子冇咩人可以問，亦冇人有類似問題，見隔離post有咁多教育意見，所以想請教下（但當然我冇咩錢）
我無呢方面資訊，不過可以試下問下幼稚園老師？
老師年年見咁多學生，應該唔多唔少都有多啲心得意見。
我有問過啊，但係老師比較年青，冇特別俾意見
另外，我冇同學校講要移民嘅計劃
我覺得樓主你有心冇錢乜都做唔到架喔。
仲有一年就走搞咁多野做乜，再加上你使完一大筆錢移民，仲點有多餘錢俾個仔再上啲咩興趣班之類。
你個仔出年先得4歲多5歲岩岩好讀英國year 1, 
我估year 1教嘅野應該係香港幼稚園教嘅野，所以返學應該都係淨係玩玩玩架咋
如果真係有心嘅，你會唔會參加下啲YouTuber之類自己教？
非常多謝你嘅意見！雖然我冇乜信心自己教到，但係我會盡力
我見到你個post 就覺得似講緊我其中一個小朋友（笑，8成似）。但由於我唔係咩高手，只係一名對育兒有興趣既c9, 而且無外國讀書既resources, 所以hold住等其他高手答先。
回應1. 唔轉, 因為1年後有big change, 咁所以呢一年盡量比個stable 環境佢，而且呢一年就算轉校都無咩料到的。（你明兒科專家都唔建議係童年比咁多轉變比小朋友，同心理成長有關）
（我自己經歷，轉左，小朋友如魚得水。）
state school 我比較concerns 係個環境，易唔易學壞。同埋如果覺得小朋友讀左幾年真係好bright, 就要再睇點上一層了。
喺香港得返咁少時間，真係乜都無得搞。
如果過左英國，學校啲數真係會淺到佢幾年都唔使聽書。不過喺呢邊會咁細個補習嘅真係好少好少，主要係大陸人圈子會為11+補，不過都會由year 2-year 3開始，唔會太早，聽唔少人講補習老師係印度人，我諗印度圈子都好興補習，到時過咗嚟一兩年，適應得7788 ，你可以留意吓。
同一時間俾佢參加多啲課外活動，玩吓運動先係呢邊主流，side track下佢，等佢唔使focus學校學唔到嘢，擴張下佢嘅世界都有益。
你太謙虛啦，你嘅見識比我多好多。
多謝你嘅意見！我都有諗過唔想俾小朋友轉變太多，而且小朋友都唔係一個容易適應新環境嘅人，但又見到佢返學嫌啲嘢太淺，開始上堂瞓覺。
老師係有留意到佢唔同，但老師係新黎，之前個老師無端端做做下走咗……而家新老師教咗佢兩個月，上次都特別搵我，話我個小朋友學嘢非常快，其他同學要教好多次先識嘅嘢，佢第二次已經重複到出嚟，喺其他同學學緊唱數嘅時候，自己喺度講加法，100+10+1，200+400咁。不過問題就係，佢開始上堂瞓覺……老師話，如果佢唔瞓覺就會走來走去搞搞震……
但係老師非常年輕，冇特別比建議我，只係講佢留意到嘅嘢。
小朋友校園生活大致都係開心，建立到自己朋友圈子，平時放學會講好多八卦無聊嘢我聽，但係其他嘢一冇興趣瞓覺……
我最近都有搵啲深少少嘅數學俾佢，k3至小一，我見到佢非常有興趣，唔係全部都識，但係非常專注，成日揸住啲練習行嚟行去，唔識就主動問
不過佢唔可以定時定候坐定定做練習，佢係一個好隨心嘅人，佢想學嘅時候就陪佢學。我都有諗過係咪要建立佢讀書習慣，不過諗諗吓都係得三歲幾，可能之後先做？
多謝你嘅建議，我都試吓教吓佢玩棋，之前我驚佢太細個，所以冇教佢。
超級多謝你嘅意見！我會一路留意小朋友嘅發展。
好呀！到時我會幫佢報多啲課外活動！
而家我都係盡量帶佢周圍去多啲唔同地方，睇多啲唔同嘅嘢，我諗都係學習嘅一種掛？
個人認為無論去到邊個國家讀書，讀乜嘢類型學校，人對學習嘅興趣真係重要過資源。難得你小朋友喜歡學習，就保持呢份興趣吧。我唔會特別為呢年轉校，去到外國可以考慮增加佢其他方面嘅興趣，例如唔單係數學，可以係science, 外語，地理。
唯一擔心係，聽你咁講，要小心佢去到外國咁淺，佢更加失去興趣上課，覺得唔洗/唔想聽書/同同齡學習交流。呢個係關乎interpersonal skills 發展，比起成績都係好重要吖
絕對係！
我地永遠唔會知我地覺得好嘅安排，係咪對小朋友真係好，不過作為同佢一齊成長嘅家長，我地可以一路陪佢、觀察佢、聆聽佢。
黎到英國摵甩左香港教育嘅框框，生活又簡單左，相信你地可以有好多空間慢慢成長同進步。
Ps. 回對上個post, 閱讀習慣無論喺香港定英國都咁重要，3歲幾唔早喇，我啲小朋友由6個月開始培養，我自己個人主觀又極端嘅意見係「最好要喺小朋友1歲識得凡事no no no之前培養好習慣」
不過英國小朋友都好簡單，唔係打機就係運動，或者睇書，你唔比佢打機睇電視，自然就會睇書
我都係擔心呢一樣嘢，所以先上嚟問吓應唔應該轉校，因為老師話佢最近一個星期非常唔專心學習，比之前情況更加嚴重。
唔知你有冇咩建議可以俾我呢？
Don’t be silly
我細個係玩奧數，但我唔係至在比賽同成績，我覺得真係好玩同relax!
到而家幾廿年後，小朋友對數學無咩興趣，反而係佢啲同學搵過我補習。我都接受。
有時教小朋友或者工作、生活好stress, 我都會拎數出黎做，或者解邏輯迷題，好療癒
（啲fd都話我變態）
至於細個求學時期，雖然屋企同學校比唔到太多資源我，不過老師平日都搵我幫手幫同學補底，雖然無晒小息時間，不過可以教到人由唔識到識，好有滿足感，可以令一個好驚數學嘅同學，變到無咁驚，我自己都非常非常開心
有一段時間數學係我嘅命，亦成為我永遠嘅心靈療傷空間。
唔好意思，係我表達得唔好，我嘅意思係坐定定讀書嘅習慣，即係做練習學習。
佢好鍾意閱讀，佢慣咗朝早會閱讀一次，夜晚亦都會閱讀一次，每次會睇幾本書，我暫時都係俾佢揀佢鍾意嘅書，如果同類型嘅書佢睇得太多，我就會同佢約法三章，等我揀一本我想佢睇嘅書。佢同一本書會睇好多次，睇到厭咗就會去下一本。
但係要佢坐定定，定時定候咁學習就真係有啲困難，都係佢突然想問我，我就坐低教佢。