嚟咗英國幾年，前幾年都冇咩嘢。但唔知點解，今年開始日日心情都好差，有種無力感湧現。
想回流但又唔想，仿似無處可逃。
（～超級放負開始～）
很懷念香港多姿多彩又安穩的生活。
雖然工作壓力大，OT又多 老闆又煩L，但我忘不了同同事蛇王吹水講是非、返工諗食lunch、食lunch 諗dinner 嘅快樂時光。
雖然歷盡甜酸苦辣，但每每放完長假去完日本又一條好條漢。
銅鑼灣尖沙咀旺角近在咫尺，半個鐘就到。
想食好西，中日韓法美意任君選擇且價廉物美。
買野 DONKI、 AEON、 SOGO 應有盡有。
鐘意又可以bookmark openrice ，又可以隨時約朋友打邊爐食自助餐。
以前理所當然嘅野，嚟到英國變得千金難買。
好多時，孤獨感係回流的原因，好多人就話要融入。語言先唔講，但種族文化不同必然造就無形隔膜，所以都唔好再呃自己話有幾易融入。除非細個已經係英國，如果唔係真係好難同外國人交心。
講真，回流兩字有閃過腦海，但始終好多朋友都四散各地，就算返返去，也跟以前不一樣。
已經好積極進取生活，又返工返學識朋友，但個心總好似有個洞，無論如何也無法填補。
唔想活在過去，但又放唔低以前。搞到而家唔上唔落。
請問有冇人好似我咁？
（～放負完畢～）
7個讚
樓主唔適應係外國生活苦悶？
離開住咗咁耐嘅出生地去另一個地方，唔係單單幾年就可以適應或融合。唔好話後生，老人家90年代移民到呢家都會掛住香港。
如果真係想繼續係英國生活，就要諗番當初因乜要移民。
3個讚
唔一定要同本地人交心先叫融入嘅，成年人先過去會好難。嚟緊好天，享受下春天、夏天嘅美好。行得開，就揾個短trip 去下。或者生活上無香港咁多姿多彩，都唔會一無是處。
5個讚
socialising呢個方面英國係好唔同，因為英國人吹水勁，但唔太會深交，佢哋之間會有種距離
嚟到呢度又比較摺，對嚟對去係家人，再加上天氣，的確辛苦
我都懷念以前職場上識好多同事，做到好朋友，飲飲食食
你有冇嗜好？發展一下，做下運動又work
我最近有朋友八十年代移民，仔大女大，而家都決定回流過晚年
移民適應係斷年計，應該要幾年先得
外國比較適合摺嘅人
諗返喺香港，一早起身就要撲出去食足早午晚三餐，又朝玩到晚，如果個人真係好outgoing 可能好開心。依家我出去玩，食飽個早餐先慢慢出去，hea 到黃昏前好返屋企沖涼休息，唔係感覺會好攰。
4個讚
我又係喎，點都喺屋企食一餐先，出去食嘢冇乜好食，而且幾個鐘就想返屋企
如果樓主諗下而家中年（假設你係）過一個另類人生，休息下會唔會感覺好啲？有幸黃金時期喺香港過一個繁華嘅年代，而家抖下，懷緬下
1個讚
正常，遲移民通常都唔太適應，因為同香港反差太大
唔駛逼自己做到真正融入，但係要放鬆d接受本土文化同生活態度咁樣諗可能會開心d
1個讚
A_lcy
10
如果彈藥夠，可以飛返去食下嘢，雖然香港d 物價貴，但食港式仲平過英國嘅。唔好理d 政治、on9 嘢，返去行下，唞一唞，整理返好心情繼續生活。
3個讚
雖然主旋律話遠離香港人，但我應該冇，同事就來自世界各地，大家都唔係土生土長，仲有啲新鮮感
得閒補下平機票行下，搵下興趣，又係一條好漢
ps 只係嚟左2年
1個讚
我阿呀媽係大陸落香港，講緊decades計，香港同大陸係文化飲食語言上面已經相對易適應，但佢依然話適應唔到香港 
直情好早已係大陸買左樓諗住退休返去住，
到有一次佢北上住一星期，然後就話適應唔到大陸，之後就再冇返去退休諗法。
成年人移民唔理幾多年後都會有一種alienation feel，但到你真係返番去你以為嘅家鄉，你反而一樣感受到alienation, 其實好多時你係慢慢適應左adopted country而不自知。
我唔係批評回流，不過我覺得亦要有心理準備，係自己家鄉有alienation我覺得反差會更大, 講緊唔係返去住一頭兩個禮拜嗰種
11個讚
回憶總是美好嘅，所以啲人成日話讀書果啲開心啲咁之嘛
呢個都好有機會，仲要depend on 香港個局勢
樓主呢啲情緒好平常，移民必經階段，講出嚟好好，圍爐圍爐圍爐
唔使諗回流住，慢慢嚟，我覺得到你入籍前後大概會知道個心想點，到時再算
4個讚
呢啲係正面思維同行動，好有用
我加多一個：試下唔好咩都同香港比較，你當新生活體驗咁：哇乜原來英國人咁㗎？咁樣諗嘢㗎？好搞笑。但盡量唔好同香港比較，比較只會令自己辛苦，尤其是而家香港都未必有嗰種好
我都經歷過兩個低谷，低起上嚟好低，唔係自殺，但覺得做乜都冇用，但大約年幾左右覺得都係開心同值得嘅，而家好enjoy，但仲係有抱怨同放負，不過相信住每個地方都會有啦
2個讚
咁奇怪，通常啲人都係話冬天先會嚟了覺得抑鬱，但依家進入夏天
我都幾明白你嘅心情，果一種突然間覺得空虛寂寞成個人好空洞，好似得返自己一個人嘅感覺，冇咗果種可以同三五知己/豬朋狗友一齊吃喝玩樂吹水嘅時光。
我幾認同樓上幾位，叫你返一返一轉香港，因為當你發現你懷念嘅只是舊時回憶，你會抒懷。或者嘗試打一打個電話俾你最好嘅老友，好好咁吹一轉水，應該都會有幫助。
我最近都係心情麻麻地，有少少抑鬱跡象。
都係覺得難融入，掛住以前等等。
搵左個香港人counsellor傾，同埋中醫針灸，
又好似好左少少。
暫時未唸回流，
大方向有唸過攞左passport後去台灣/東南亞地區生活。
感謝大家的安慰又冇罵我放負 
回憶總是最美好 (agree), 其實就係知返香港都未必太開心先最苦惱。
景物依舊，人事全非，熟悉嘅人都走晒，返去都唔知做咩，最慘係而家好似冇左個backup。
之前諗 就算英國唔得，都可以返香港。但而家冇左呢支歌仔唱， 除左留係度都唔知可以點。
都唔知呢啲負能量幾時消失，我朋友話係咩星逆行 所以先諗野咁負面。
希望係啦。
2個讚
咁我又冇諗過去其他地方住，講真就算移民去日本，我相信最後都會出篇咁嘅文話唔適應，始終香港先係我地嘅家。
1個讚
夜欄人靜，突然空虛寂寞起嚟，不過好彩唔涷
可能聽大家講，遲下返香港行下，可能感覺又會唔同。