小朋友小六，最近經常唔肯返學，呢一個半月冇返3次學，問佢原因，佢有時話因為當天有測驗，然後覺得自己唔識，所以唔想返。另外有一次佢話自己懶，所以唔想返。
同老師傾過，老師話佢返到學校同同學相處都好開心，應該冇被欺淩嘅問題。於是安排社工了解下實際唔想返學嘅原因係咩
小朋友講返，社工第一句係話: 你媽咪叫我搵你傾下計，小朋友當然就覺得被媽咪出賣，然後社工剩係比玩具小朋友玩，冇同佢傾啲咩
想請問大家，社工咁樣嘅approach係恰當？ 宜家小朋友覺得媽咪出賣自己，唔信任媽咪，唔肯見媽咪 (外婆係主要日常照顧者)
似同呀媽關係有問題多啲
但呢件事發生之前同媽咪關係冇咩問題，同埋想問大家覺得社工咁樣講有冇問題？因為我覺得好有問題
你意思係唔想返學可能係因為想媽咪關心自己多啲？
認真，你應該先同社工傾，小朋友唔返學原因好多，你做媽咪都唔了解自己小朋友，點解會覺得社工一定幫到手？！
如果你唔想小朋友知道見社工係你建議，應該一早同社工夾下先，唔係而家嚟質疑社工有冇問題。社工可能表達上有問題，但小朋友乜都唔肯講，其實社工可以做嘅嘢真係有限。
你花時間出post問社工有冇問題，不如認真關心一下小朋友點解唔返學，呢排學童自殺率高企，你會唔會俾太大壓力小朋友，所以佢唔返學逃避考測，花時間陪伴小朋友，同佢一齊出街食飯或者玩下，慢慢重建同小朋友嘅關係先！
問下婆婆
唔太認同, 社工本身的工作就係溝通同輔導，所以說話技巧好重要，亦係呢方面的專業人士。而且社工接觸學生之前應該已經初步了解過學生的情況, 大約知道現況係點。當然家長都有責任, 但係呢件事當中, 就正正係家長束手無策, 先請學校社工幫忙。
我小朋友小三, 之前都有情緒問題, 同班主任傾過之後, 都有向學校社工求助，社工同我傾過電話, 又同小朋友傾過幾次, 之後我調整過對小朋友的學習期望, 社工又向老師溝通幫忙, 一個學期之後感到情緒問題大大改善。
如果家長依然相信社工的話， 可以再同社工溝通下，將你的擔心同憂慮講比社工知道。
但輔導本身並不能解決事件，只係比相方放低固有的偏見，試下睇清現況，又或者換個角度睇事件。
不能再同意更多…
樓主, 社工對小朋友嚟講係一個陌生人, 陌生人要同小朋友傾計, 一定要有一個佢放心安心嘅切入點, 當然我唔排除社工表達得唔好, 但唔可以將小朋友覺得媽咪出賣自己呢個責任推落其他人身上, 坦白講, 小朋友對父母有堅固嘅信任感係一定唔會咁諗, 如果小朋友真係咁諗, 就好明顯互信不足, 再加上你仍然未知小朋友真正唔返學原因, 就要再放D心機啦… 如果我係你, 佢唔想返學就放任一下, 再慢慢觀察吓… 阿媽唔易做, 加油… 
認同！
小朋友唔返學有好多因素，但我唔認同社工做法，個社工似交差多過幫人
建議你出去搵專業人士幫手，或者真係同小朋友傾多啲，聽佢講嘢，唔好迫佢
首先，我唔係媽咪本人，我係佢哋屋企人
媽咪同外婆當然有嘗試了解小朋友唔想返學嘅原因，但就係同班主任傾過都冇咩進展先搵社工幫手，睇吓會唔會有咩新角度。 (冇覺得社工一定幫到手，只係睇吓會唔會多個機會了解到小朋友)
當然我都覺得事前應該同社工傾過之後再比社工同小朋友傾會好啲，但學校社工都有責任了解小朋友嘅背景？
如果出post問大家意見=冇用心了解小朋友，咁我都唔知講咩好，或者所有人都唔應該出post問人意見，應該自己努力解決問題
講返有冇比太多壓力小朋友，我都幾肯定係冇，因為我見小朋友每星期得一樣課外活動，每日做功課唔係太多，其他時間係玩、打機、睇YouTube(平時小朋友唔係好鍾意出街)，喺我嘅角度係應該要多啲活動同溫習多啲添
雖然唔係好信任學校社工，但都會同社工傾下，了解下社工同小朋友真實嘅對話係點。
同時會抽多啲時間陪小朋友，同佢建立關係，其他嘅之後再算
婆婆都有了解過，但冇特別進展
懶同想逃避測驗算唔算係原因？學習有困難應該點處理？陪佢做功課、溫書佢又唔想做、唔想溫。
多謝你分享你嘅經驗，會同學校社工同班主任傾下。
同埋都會同小朋友建立關係，睇下之後會唔會了解到原因。
跟婆婆住嗎? 老人家牙力又差啲, 好難叫得郁啲小朋友
我覺得可以班主任了解下情況…佢先係真正對住啲學生, 社工我估其實少入班, 陌生人一樣
我只係感覺到你之前第一個post重點係社工到，好似想搵人認同社工係有問題
不論社工有冇問題，應該先關心了解小朋友先係重點。
當然可以上網問意見，重點應該放係小朋友，唔係社工。
小朋友小六應該要考呈分，佢成績係咩位置？有冇想入嘅中學？自行揀咗咩小學？對中學生活有乜期望？會唔會唔捨得小學同學？小六學生差不多到青春期，會唔會有戀愛煩惱？
其實都有人提出左 係咪同媽咪關係有問題
如果改成" 你外婆叫我搵你傾下計" or “老師叫我搵你傾下計” 小朋友又會唔會咁反感? (應該無人有確實答案 但你地可嘗試諗諗)
講又咁講 社工其實唔清楚大家關係下 如用咁既開場白 確係有d"冒險" (又或係咪媽咪俾錯訊息社工 … 如媽咪與子女存在問題 又沒向社工透露)
另外俾多一兩節時間社工 佢可能想睇定d或同小朋友熟絡d 先再行動
…以上齋估
我反而覺得，小朋友仲會講返社工講過啲乜嘢
都唔係完全收埋自己
都知道同小朋友建立良好關係然後了解確實原因係解決方法，只係想了解下社工咁樣嘅開場白係咪恰當，同時會約社工同班主任面談，了解下社工嘅工作態度同專業操守，如果媽咪都唔信任社工，就唔會想將小朋友交俾呢位社工處理，所以社工專業與否都係重點。
多謝你提出多樣可能性，會繼續嘗試了解小朋友有煩惱嘅地方喺邊。
非常同意，點解媽咪叫社工搵小朋友傾計就係出賣？正常唔會咁諗，除非母子關係本來就有問題。而媽媽唔係主要照顧者，本身小朋友都未必對佢有信任感，不如多啲陪返小朋友建立返個關係啦。