過去幾個月，由喺香港睇生殖科，到準備開療程時轉呔去台灣，係因為香港畀我嘅感覺唔係咁好，令我好大壓力同冇信心… 我知呢度都有唔少人喺香港做係冇問題甚至一次就bingo，呢個分享純粹係我嘅個人感覺，如果有jm同我一樣會考慮去台灣，可以作為一個參考。
首先想回溯返上年年中，我同先生決定備孕，當時我已36，而因為我哋結婚時冇諗過生小朋友，所以冇做過婚前檢查。於是我就同先生搵間體檢中心去做返個"婚前檢查"，當時我以為做呢個檢查(會check子宮/精子/隱性地中海等)就已經足夠，亦有同醫生講我哋係打算生小朋友想check清楚大家都冇問題，而醫生當然亦知道我哋年齡(高齡)，但睇報告時，個醫生只係好hea咁讀返份報告出嚟，即使我先生驗精嗰4個指數都係好低(講緊100%滿分，佢係得個位數)，但醫生都話冇問題，而我子宮超聲波照出來都完全冇異樣，當時唔知道/醫生亦冇講過最重要係要睇卵巢功能(AMH, FSH等指數)，成個過程就算我哋問過幾次「想生小朋友係咪冇問題」，得到答案都係「冇問題」。當時我都幾安心覺得唔使急，冇即時開始造人大計，而係用半年時間去食supplements，想養好精/卵先開始造人，但如果當時我知原來自己卵巢功能已衰退，我就唔會慢慢嚟浪費時間…
其實我哋都係今年年初先開始不設防造人，但先生冇耐性(其實佢一直都想要小朋友，之前只係因為我唔想生先冇嘗試)，佢覺得不如直接做IUI/IVF。於是我喺4月就安排做IVF，冇特別做research，只係聽到身邊好幾個已為人母的女性朋友都喺某間私家醫院生B，話婦產科係出名好，所以我就直接打去呢間醫院嘅生殖中心預約。
到5月我哋上去初診，即時做咗陰超，照到兩邊共有5個卵泡，我唔係好知咁代表好定唔好，醫生冇特別講有咩問題。醫生睇返我哋上年份報告，話我先生的指數係差到達唔到做IUI的門檻，但始終隔左成年，可以再驗多次，同時亦安排我下個cycle第2/3日返去驗血，驗AMH, FSH等卵巢功能指數。咁成個過程係feel到醫生同我睇到的評價一樣，係溫柔有耐性嘅，但之後我問佢我哋食緊D supplements有冇幫助，佢就反問我點解要食，同埋話唔可以長期食，對個肝唔好… 我覺得咁你話我先生D精差到連IUI都做唔到，咁係咪應該有D方法去改善下呢？嗰刻我已經有D覺得成件事我哋好被動，你一味話我哋差，IUI又唔合格做，IVF都係即管試下咁嘅feel (大拿拿十幾萬去試D你同我都冇乜把握又冇得做準備嘅事)，講到尾都係話成唔成功係睇我地做化，但我地又連食supplements去改善自己D指數你都唔建議咁…
之後先生驗精報告出咗，話好過上年少少，又話可以做IUI… 然後差唔多一個月後我的報告都出咗，係個姑娘打畀我，劈頭第一句就係話：「你報告出咗喇，D指數都幾差，醫生建議你直接做IVF，要盡快做。」之後佢就話可以即刻幫我約時間上去見姑娘做consultation(收費$300)同抽血(唔知點解又要抽同抽嚟做乜)，到下次cycle就可以開療程，而成個過程佢係有D趕住收線咁… 佢完全冇清楚咁講我每個指數係幾多同代表D乜，我嗰時做緊嘢，身旁有人唔係好方便問問題，我細細聲好簡單問左句，佢先講咗其中一個指數(AMH)係1.9，然後同我講正常係2.9去到最高係49.7 (但我查返正常值係2-5，我唔知49係代表乜，咩人先會有49)，所以我得1.9係好低…
(to be cont)
1個讚
收左線之後，我真係成個人沉晒，冇晒心機同希望，我諗個感覺同有人同你講你患左絕症差唔多。同埋我都係唔清楚我份報告係講左D咩，其實我畀$2000去驗3個指數，就算你唔講解，係咪都應該起碼逐個指數同我講返？最衰係當時我真係唔方便問，於是我等到第二日方便嘅時候再打去問清楚，今次呢個姑娘就好抵讚，好有禮貌同溫柔，即時搵返我D報告出嚟，逐個指數同我講返係幾多，之後仲同我go through左一次做IVF嘅過程，講完亦好有禮貌地問我仲有冇其他問題，好有耐性，個感覺係好舒服，我覺得呢D先係應有嘅態度，因為去得做IVF嘅人，就係本身有各種問題先會不孕，其實本身已經不安/冇信心，有D人可能已經去到好desperate，仲要十幾萬十幾萬咁畀… 如果下下仲要畀人不斷提你「你D嘢好差」，「你年齡好大」，「你要同時間競賽」，「你冇時間諗架喇最好盡快做」，然後又叫我放鬆心情唔好咁大壓力，其實對件事係冇幫助個喎。你畀人嘅感覺係真係想幫我，定係想賺我錢，有時就真係取決於你嘅態度同說話方式，你當係公關技巧氹下我都好，其實有好多事實嘅嘢我知，指數唔會呃人，我自己有眼睇，真係唔需要你不斷強調「好差好差」去打沉我。
之後我同先生就上去做consultation，冇諗過畀$300但過程係叫我哋自己用手機睇一個10分鐘video… 睇完問你有冇問題，如果冇問題嘅話就會畀一大疊同意書畀你簽，簽完你下個cycle就返去開療程架喇… 咁我想問consult左D咩？我同我先生真係呆X左，咁個video又真係好似講晒所有嘢咁嘅，但如果上嚟係睇video就唔應該收$300囉… 咁我點都搵D嘢嚟問下喇，我問關於PGS嘅嘢(但佢講解完我同我先生都唔知佢講乜)，我問我D指數咁差，咁會唔會抽一次卵得好少唔夠做，又或者放完胎都難著床？咁現階段我可以做D咩？姑娘就話我咩都唔使做因為到時開療程D針藥就已經幫到架喇，之後我好衰唔衰同佢講我食緊中藥，佢就即刻好大反應話做IVF唔可以食中藥，會撞佢哋D針藥(但我只係想喺IVF前用中藥調理，冇諗過開療程後繼續食)，又話咁樣我上次驗血唔可以作準，尤其是我FSH係好唔正常地高到17(正常<10)，話可能係畀中藥影響左，又叫我停左中藥之後起碼要隔3個月先可以做IVF… 我心諗我係諗住下個月做個喎，你而家叫我隔3個月咁耐… 但我又要同時間競賽，咁點呀？之後佢話關於PGS同中藥問題，佢會幫我問醫生，會再打畀我。總括嚟講，consultation後我係仲confused過之前…
幾日後醫生親自打畀我，劈頭第一句就叫我即刻停中藥，同埋叫我下個cycle返去再抽多次血驗D指數，除左話我AMH 1.9係好低之外(我一直都唔明係咪差0.1就已經差好遠呢？)，FSH咁高都係好大concern，但呢個指數係會fluctuate所以要睇幾個cycle作準，叫我再驗多次血後再返去覆診(我又奇怪咁點解第一次驗左17之後，你地唔係即刻叫我下個cycle驗多次而係叫我上去簽紙做IVF？仲要連consultation個姑娘都識講，FSH咁高係唔會開療程喎…)。至於PGS，我好記得佢話：「做左對你冇好處」，佢話因為以我D指數嚟睇，我唔會抽到好多卵，質素都唔會好，所以本身可以培養到做胚胎嘅已經得好少，再做埋PGS之後可能係零，所以佢唔建議做，有培養到的胚胎都放入去試下…
如果我冇理解錯(包括醫生同姑娘嘅說法)，佢地主張係，只要有胚胎就唔理好醜放左入去先算，因為放左入左去都未必著到床，但叫做可以一試搏個機會率，你唔試就係零。同埋放胎之前驗過冇問題，都唔代表放左入去佢發發下育唔會有問題，所以係要有問題的話你點驗點篩選都會有問題，都係搏，所以有得搏好過冇得搏，只要有胚胎培養到出嚟，就搏，放入去試下得唔得，唔好篩走佢。
佢地呢個角度，我係理解，但唔同意，可能如果我仲係30以下我會搏，但我已經近40，染色體異常嘅機會大，如果個胎係異常，著到床都大機會流產，唔好彩真係陀到但生出嚟有問題，個後果佢地唔使承受佢地梗係覺得可以試架。我覺得都去到做IVF呢一步，都係用錢解決問題，有PGS呢D option去篩選，點解唔做呢？仲要我同先生都高齡，指數都係佢地所講的「差好遠」，咁點解仲主張我地搏？我覺得有D不負責任嘅。
(to be cont)
2個讚
我後來越諗就越覺得奇怪，點解係我consultation完簽晒「生死狀」(同意書)都準備話要開療程之後，先突然會安排我再驗血同見醫生？點解驗完第一次血後係冇安排見醫生，只係有個姑娘打嚟同我講好差呀要即刻做IVF？如果我consultation時冇問問題要姑娘幫我問醫生，咁可能就已經跳過左再驗血同覆診呢個step(suppose係佢地覺得有必要先叫我做)，總之我就覺得佢地跟case係咪跟得比較求其同亂嚟呢？而因為我之後決定去台灣做所以就冇返去驗血同覆診，慳返$3000。
其實呢段時間，我有留意到台灣IVF的資料，但最初真係覺得唔會考慮，覺得點都近水樓台比較好，但去到呢個位，我係完全地放棄左香港，決定去台灣，因為我唔想打一場冇把握嘅仗，仲要我嘅觀點同醫生係相反，我堅持己見就好似唔聽佢話咁，但聽佢話我又覺得唔合理。反觀台灣，PGS(佢地叫做第三代IVF)其實好普偏，而中西合壁嘅療程都可以選擇(以我所知，愛X同禾X都附設中醫部)，佢地唔會覺得中醫同佢地相沖，反而會相輔相承去提高成功率，而唔係好似香港咁，咩都叫你唔好做唔好食唔使準備，但成唔成功就睇你自己造化… 我明白一件general成功率得30+%嘅事，醫生係唔會想畀好大信心你寫包單包生仔，唔可以令人覺得唔成功係佢地責任，但香港vs台灣醫護的態度，好明顯係消極+畏首畏尾vs積極+盡力而為。
於是我就安排去台灣做IVF，初步估算，就算我做埋PGS兼真係差到要抽兩次卵先夠做，加埋機票酒店都係同香港打個和。我喺網上預約王X瑋，第二日已經有姑娘打嚟同我講解，係令我覺得好窩心，好有效率，之後亦有email詳細資料，仲有line chat。我下個月就飛，呢段時間有去做針灸，跟《養卵聖經》食supplements同做運動，可能有D人會覺得冇用，可能只係自我感覺良好，但「自我感覺良好」對心理質素係有正面影響，起碼我覺得自己有盡力去作準備，而唔係聽天由命。
上星期禾X嚟香港搞講座，雖然我唔係去禾X做但都去聽一聽，現場有10分鐘時間同醫生做一對一諮詢，我問我最大的疑慮就係指數差，會唔會抽得好少卵？醫生睇返我年齡同指數，話「不會很差呀」，因為以37,38來說，AMH 1.9其實唔算好差好差，同正常值2都係差0.1，佢話估計可以抽到10-15粒卵，就算有70%受精/培養唔成功，都仲有大約5粒可以用，做埋PGS亦可以，當然如果我再等多一年半載先做，AMH就會再跌就唔係咁好喇… 佢咁樣講我係覺得起碼我有返D信心同希望，雖然都係叫你同時間競賽但我唔覺得大壓力或難受，佢叫我而家最緊要食好瞓好，唔好咁大壓力，FSH都會降低，呢個指數會 fluctuate叫我唔使太擔心… 反觀香港醫生其實完全冇同我講過我可以做D咩會有幫助，一味係話你「差」，仲要「差好遠」，會抽得好少卵… 雖然我都有同禾X醫生提到我有食好多supplements包括DHEA，佢都有問我點解要食DHEA(因為如果有肌瘤等問題會越食越衰)，亦有話主要食葉酸同Q10已經足夠，都感覺到佢係唔建議你自己食好多supplements，但個感覺都唔會話令你「覺得自己做錯事」咁要「即刻停左佢！」
而家我懷住去旅行的心情去台灣做IVF，呢段時間可以做的準備、可以調理嘅方法，都盡做，唔會畀醫生阻止叫停，有準備有信心去打呢場仗。
4個讚
我之前就係禾馨到做IVF一次成功，有睇到樓主講到係香港做諮商，比完錢結果叫你睇片真係幫樓主嬲左。
我都分享一下之前禾馨的經驗，醫生做諮詢時，會同你解釋呢個數值係咩意思，呢個數值高左或者比正常的低，都會同你講「唔洗太驚，可以咁樣解決。」。
如果有野講，都會好細心咁聽你講，我在香港睇醫生大多數都係一邊睇住個mon一邊聽你講來打字。
覺得個心會舒服好多。
而且佢地雖然係YouTube上有好多衛教資訊，但係就算唔明，你去問，佢地都會好有耐心去解釋。
諗番起我可以一次成功，其實除左醫生好細心同專業的意見減輕左我做試管的壓力之外，佢地實驗室都好專業。
會同你講番培養左的胚胎係咩等級，同埋講到就算胚胎等級雖然好，但係如果年齡比較大的話，都可能有染色體異常，可以透過PGS來驗下。再植入染色體正常的胚胎來增加懷孕率。
聽完之後會對佢地有信心好多，所以好同意樓主講 台灣醫生真係積極好多。
希望樓主都成功懷孕！ 
2個讚
加油！等你來繼續分享！
我有幾個朋友也是在台灣做ivf 成功的！
我自己之前都去台灣睇過皮膚科、又平又好又細心！
3個讚
方便講下係邊間做?
我見台灣送下個月有係香港搞講座，報左名，但如果你有咁既經驗，我可能就cancel啦 
嗰日聽禾X講座畀我嘅感覺都幾好，台灣真係專業好多同服務質素好好多。
PGS喺台灣應該幾普遍，但喺香港你唔問佢都唔會同你講，講又講得唔清唔楚有d支吾以對咁(感覺係好唔想你做d咁複雜嘅嘢)。其實我都明如果卵數量同質素唔好，做PGS可能會篩完後冇胎放，香港個醫生亦有講切片檢查都可能會令到個胎用唔返，但我覺得佢喺我都未開始療程就同我講做PGS「對你冇好處」呢句說話，個感覺硬係覺得唔好太好受… 令我覺得佢已經打定輸數(同時令我都冇晒信心)… 我覺得係香港呢方法技術唔係咁好，所以佢哋先咁保守，最好唔做唔錯。
我自己都睇咗好多資料，其實做定唔做PGS，作為醫生可以同我講睇到時抽卵後嘅數量同質素再決定都未遲，唔使療程都未開就咁肯定咁同我講我唔好抽到好多卵，其實我到而家有時諗返起佢講d嘢，都仲會唔開心同擔心自己嘅情況…
我research時發現原來台灣醫美都平香港好多，以前我以為淨係食嘢平，好想喺台灣打pico lol~
我揀咗王X瑋度，我見送X鳥呢度都有人講同讚，有講座去聽下冇壞，點解要cancel? 我覺得唔ok嘅係香港，台灣有好多選擇，你去聽下講座再爬下文，揀間啱自己嘅
我朋友係台灣+香港做過超過5 次ivf+ PGS, 中過一次但冇左
我同你情況差唔多,都因年紀問題…食左家計會開既排卵藥都唔成功,朋友都建議我做IVF而且最好快D做(趕年齡),我想去台灣做,但唔知邊間好,你介唔介意PM俾我你做既醫院,無言感激!
Leila
13
你send個pm畀我, 我再覆你。我唔好識點send…
我最近打算做Thermage flx, 有搵台灣香港有thermage flx認證的去quoted價, 係香港有平過台灣的, 但我驚香港係試做價, 上去會爆hard sell, 所以1516中, 台灣的話點sell都應該無用, 一句不在台灣住應該可以ko佢, 你係台灣邊間做, 可否介紹下?
台灣Body Check都平好多的。
Leila
15
update下… 到左台灣，我同老公見左王醫師完成初診…
-
本身話睇王醫師的等候時間會比較長(叫我預起碼等3個鐘)，但結果冇等好耐，可能因為我約8:30AM冇咁多人，反而係我自己塞車遲左半個鐘… 我地登記、姑娘初步講解、照陰超、見醫生、抽血，成件事3個鐘內完成，我地12點左右已經搞掂晒D嘢走得，但當時就開始越來越多人。
-
有一重大發現係，我喺香港驗AMH 1.9，但原來香港同台灣個計法唔同，換算返台灣的計法係得0.27… 其實香港個姑娘打電話嚟同我講我好差時，係有講AMH正常值係雙位數最高可以去到49… 但因為姑娘冇詳細講解(個指數都係我問佢先講)，而我一直爬文睇到都係話AMH正常值係2-5 (都係台灣網站)，所以我以為係佢講錯，但原來香港同台灣個計法唔同… 我終於都明點解香港個醫生講到咁冇把握，亦明白點解佢話我的指數「差好遠」，而家一切都make sense了… 呢方面我係怪錯左香港個醫生嘅，但有咁大誤會，都係因為由始至終佢地冇安排我見醫生講解報告，連份報告都係我返去見姑娘時叫佢印返畀我先有，而我自己當然係唔識睇喇…
-
雖則而家知我AMH得0.27又高齡，但王醫師都冇講/表現到我呢D係冇希望架喇咁樣，佢反而會話我37,8歲都唔算好高齡呀，因為佢地好多patients係40以上嘛，我諗好似我呢D咁差的case佢地都處理唔少… 當然佢都有講我嘅指數係差，但都係輕描淡寫，冇不斷強調呢樣嘢，可能都係唔想我難受同太擔心，呢樣嘢就係香港醫生做唔到的…
-
王醫師有提到，我AMH低可以食DHEA，我過嚟台灣前有食左2個月(要食3個月先開始見效)，但諗住嚟到都要開針(香港醫生成日覺得任何嘢都會同D針藥撞唔畀你食架嘛)，所以我就冇帶d supplements過嚟… 王醫師問我點解唔帶埋過嚟繼續食，因為係可以食到抽卵前…
-
另一重大發現係關於FSH，我喺香港驗過一次FSH係17超高，見姑娘時佢話如果做IVF個cycle驗到FSH都仲係咁高係唔會開療程畀我… 但因為呢個指數會不斷變，而香港醫生姑娘只係叫我停中藥再驗多次，話睇多幾次去參考，我覺得我好似只能夠不斷咁驗，驗到唔知幾時有一次FSH唔知點解會自己低返我先可以開療程，呢樣嘢困擾左我好耐… 嚟台灣前，我都擔心萬一嚟到再驗都係咁高唔開得療程，咁我就白行一趟，然後又要等下個月再飛過嚟…
點知，台灣的醫生同姑娘同我講，佢地已經唔會再睇FSH呢個指數去決定開唔開/點樣開療程，正正就係因為呢個指數起伏可以好大，所以佢地唔會視之為一個決定性的參考指數，甚至今次驗血佢地都冇驗FSH，只係驗AMH同另外兩個比較重要的指數(我已經唔記得係咩)，同埋超照聲波睇卵泡情況去決定。簡單來說，香港用的method係比較落後。
-
另外關於PGS，我自己一直有一套諗法，覺得就算唔夠卵，我寧可抽多次儲多D，儲到夠數去做，而我的concern係高齡同指數差，所以擔心胚胎異常機會大。我見王醫生時，佢都有講我的卵唔多，而且冇流產經驗又冇咩家族病史，指數差同染色體會唔會異常係冇直接關係，所以係冇咩原因同必要一定要做PGS，除非我真係好怕流產。
之後粵語專員有再詳細D同我地傾同就我地情況去講解利弊，聽完佢講我地真係史無前例咁清晰地知道發生緊咩事。例如我照到有5個卵泡，咁其實到時抽卵都只係會抽到5粒左右… 可能係我同老公冇常識，但我地一直以為打針「谷卵」係會谷到多D卵出嚟(因為香港個姑娘係咁樣講)，但原來係唔會。以我有5個卵泡來說，正常情況係會有4個萎縮，1個會發育完成然後排卵，而做IVF打針只係幫我谷嗰4個本身會萎縮的卵泡令佢地繼續發育，所以最後我都只係會抽到5粒卵，授到精捱到去Day 3可能得1-3粒，咁樣如果我做埋PGS就真係零喇…
所以而家情況，其實同香港醫生本身講的一樣，所以我都係怪錯左佢喇LOL… 不過都係嗰句，香港醫生冇安排我返去見佢面對面傾講解，只係喺我返緊工時打電話嚟同我講幾句，我又冇得同老公一齊聽一齊問問題，真係搞到一知半解又好多誤會囉… 同埋呢位粵語專員姑娘講解的過程，我冇特別覺得好難受或擔心，總之聽完佢清晰的分析講解(加上搞清楚我AMH係得0.27)後，我終於明白亦接受自己係咩情況，好清楚了解弊處同風險，做PGS的確係對我冇好處嘅…
-
我終於可以做好合理的期望管理，而家都係等開針藥，得唔得都係試下咁喇，只可以放鬆心情盡量平常心去面對喔~ 當去個長旅行囉~~ 嚟緊我唔會特別update自己情況了，但大家有咩問題或分享心得可以繼續呀~~ 多謝各位耐心睇我寫長廢文~~
5個讚
Leila
16
幫你推推，我都好想做醫美呀，但都唔知邊間好，同埋今次過嚟係做IVF，唔知打D高能量嘢有冇影響，所以可能都係得個諗字… 但或者可以去洗個牙都好haha，我估都會平過香港~~
台灣美上美。莊醫師好出名的、YouTube 有不少片。佢哋好似冇package 呢樣野所以唔冼sell, 及appointment 長期爆、唔冼sell都好多生意
1個讚
多謝分享
之前睇到你響仁安既經驗都覺得好差, 明白點解你立定決心去台灣做
祝你好孕 
1個讚
感謝樓主分享，本人跟樓主同齡，最近去左威記私家症求診。 一樣被告知卵泡只照到5粒，安排了驗AMH及先生驗精液，黎緊月尾會回醫院睇報告。期待樓主繼續分享台灣ivf ，祝好孕。
2個讚
Leila
20
我見你冇pm我，我又搵唔到點pm你，喺度答你喇，都唔係咩秘密，我本身都係喺呢個forum度睇其他人分享，我自己見到比較常見香港人會選擇嘅台灣IVF有王家瑋、禾馨宜蘊、愛群、送子鳥、茂盛，除咗茂盛喺台中外，其他都喺台北有診所，你可以網上查詢同預約，比較下價錢嗰d，我問咗兩三間，一般做最basic嘅療程圍返係港紙7萬左右。希望幫到你~
1個讚