有少少後悔擺佢入女校讀書
幼稚園小學中學都係女校，又唔高又唔算靚，仲要身體問題唔玩得劇烈運動，個問題唔影響外貌，但連啲上山下海玩運動識男仔嘅機會都無
大學送佢去外國讀書諗住識啲鬼仔，但讀文科識曬全部都係鬼妹，諗住啲鬼妹都有好介紹，但好多已經中學有拖友，無就同我女一樣單身，碩士讀多一年教育系，又係一大堆女仔仲係大陸人，畢業之後完全無聯絡！
最弊我女教中學，學校啲啊 sir 唔係結曬婚就已經三四十歲，女同事好多仔都生埋。佢啲飯腳同事都結曬婚，五十幾歲仔女未讀大學都讀中學 
，最後生嗰個都接近四十，早排經常一齊食飯同放工行街嘅同事係兩個仲有 2 年退休嘅 “阿婆”，我都唔知傷心好定係慶幸佢識得職場同長輩相處
阿女啲同學由細玩到大，成日約出黎玩，但班女都係做律師，阿女話佢地工作環境都係女人多，同我女一樣都係未拍過拖
我老公都係老一輩親戚介紹識，我同老公轉校多，又前前後後去外國讀書，無舊同學聯絡，我無做嘢好耐老公又退咗休，想介紹搭上搭都無
阿女唔肯返教會，依家放暑假日日坐屋企就更加唔洗見人，佢話依家轉咗常額穩定咗，會報興趣班學嘢，但學整餅畫畫外語玩音樂咪又係女仔多，啲人話讀 MBA 識到男仔，但我女無呢個需要讀 MBA，無得再讀
我急過佢，本身圈子細，教書更加圈子細，遲多幾年就真係入墳墓單身一世，我知佢教高中壓力大學校追成績，測驗考試之前又忙又大壓力唔開心，有時候星期六日都改緊卷。我幫唔到佢又唔識開解佢，我想佢有人陪有人傾心事，老咗都有人陪行街食飯，依家手仔都未拖過，點算！ 唔通真係要相睇 
你個女自己都唔急，你急咩？有錢既話，單身一樣生活快樂，仲有你個女會唔會係鍾意女性，所以無同你講
14個讚
我個背景同你個女有啲似，但我幼稚園同小學係男女校，但細個都冇同男仔玩
中學愈大愈怕男仔，出街買鞋、收銀，如果d後生男sale，我係緊張到嘢都講唔到，寧願唔買
我大學同工作都係全女仔，有少數嘅男同事但都已婚
就算我有小學同學聚會、返教會，但本身諗住自己識唔到男仔孤獨終老，所以訓練下自己獨立一個人去旅行、一個人睇戲食飯
點知有次個小學同學帶咗兩個男仔朋友一齊去睇展覽，之後就識咗其中一個，約咗一次行山一次睇戲，曖昧咗好耐，之後我嘅初戀變咗而家嘅老公
有時d嘢你放棄唔諗，可能就會有意想不到嘅安排
同埋其實你個女自己本身點諗，如果佢覺得冇需要咁急識男仔，我建議你唔好做雞仔媒人，免得影響關係
15個讚
我個朋友都係咁
由細到大女校
大學讀教院
出黎教書
唔知佢出左pool未…
點搵？求黃大仙啦 
講笑咋！
認真答：
首先睇你個女想唔想先？我知有好多都好佛系，個心想但無行動，有啲就真心冇乜所謂，自得其樂
如果想認真識人但又無渠道，試吓speed dating嗰啲揾啦
我識一個couple, 專業人士，都係靠speed dating相識，之後結婚、生仔
不過緣份嘅嘢，都係可遇不可求，樓主你都要放鬆心態，對大家都好！
1個讚
其實唔關讀唔讀女校事。我由細到大都係讀男女校，但都係好遲先拍拖。
想當年我老豆同你一樣，好急要我拍拖結婚，佢越急，越逼我，我越反感。
緣份嘅嘢，你作為旁人，你急唔嚟，亦都無得逼。
啊女以前大學有玩交友 app 試下識男仔，所以我知佢有急過。佢做老師之後就鏟曬啲 app，話驚俾學生家長見到
以前都唔覺做老師有問題，依家睇就好麻煩，浦又唔得，交友 app 又驚
我都知急唔嚟，我都有諗過，全港咁多女校無理由咁多女仔都無拖拍，但見好多人都係舊同學聚會或者介紹噠著，呢部份我女系完全無得諗
慶幸阿女都唔係教番女校，以前佢讀書啲 miss 大半未結婚，佢初初搵工有幾間女校請，好彩佢都話女校多規矩好麻煩又多女人多是非推咗
其實如果開心，單身都無問題，你都見好多人離婚、喊打喊殺收場。。。
8個讚
+1
以前無app就話要靠父母, 朋友介紹
而家佢連app都刪埋, (可能佢有留, 不過唔想你過問)
咁佢都揀左佢想既路
樓主, 唔過問都係關心既一種, 你都可以用其他方法問下
今日去無街去, 無既去參加下興趣班, 當係輕鬆下
(我親戚參加興趣班識到佢老公, 當然, 係我眼中, 我覺得親戚人好, 心地好, 口才好, 都有去過外國讀書, 高職位, 人靚, 就算當年就快40歲, 都識到男朋友, 因為佢公司又係無咩男仔, 又無轉工, 所以識唔到人)
但唔好成日問, 問得多, 關心得多真係會煩,
佢自己都控制唔到既事, 你問多, 佢只會心更煩
3個讚
首先，有另一伴都未必有上面呢堆你期望嘅野，分分鐘要湊多個仔多過有人分擔
第二，俾你參考下，我大學同另一個同學grad trip backpack識我老公，或者叫你去多啲旅行或者睇下佢教邊科，睇下有無咩考察團
作為旁人, 見到你咁樣品評你個女, 善意提醒一下
你未必有惡意, 但你係佢阿媽, 更加要欣賞佢, 帶正能量比佢
唔同嘅人只要合眼緣, 性格情投意合都可以成為朋友情侶. 比到多啲信心佢, 帶出吸引力法則, 好可能會遇到有緣人
3個讚
咁佢單身快唔快樂?
點解一定要結婚？如果結婚後生活質素比單身低，結來做乜
2個讚
其實呢啲嘢，佢自己唔想都急唔嚟
1個讚
只係擔心阿女，佢真係矮，五尺都冇，個樣又BB，把聲都BB，行出去都當佢中一二咁，我想像唔到有男仔會鍾意拖住個似阿妹甚至阿女嘅女朋友出街
有，大把蘿莉控。唔好俾個term嚇親，現實生活見好多靚仔鐘意細細粒女仔
1個讚
我都係呀，其實有緣嘅，就算外表係點都唔會擋得住，當然唔好太邋遢啦
我有問我老公點解揀我，因為連奶奶都開口問我老公點解搵個咁矮嘅女仔做老婆
我一向冇打扮冇化妝，但總會有啲男仔喜歡乾淨簡單嘅女仔，我老公佢話欣賞我嘅內在美，對人好
2個讚
又唔使諗埋一邊嘅… 我地每個人都有機會同權利被愛
我身邊都唔少唔打扮, 細細粒嘅女仔, 都係有好歸宿. 緣份嘅野話唔埋. 唔係一定李嘉欣先有拖拍…
再講, 你係媽媽都唔接納 / 學識欣賞自己女女, 又點可以要求其他人去愛護珍惜佢?
3個讚
有錢單身都唔錯呀
2個讚