我37歲(年尾就38), 其實同老公都係上年先決定想生仔, 但心知大家底子都唔好，我哋首先去做咗個"婚前檢查"check下先，當時check到老公d精子係幾差，而我個子宮係冇乜大問題(嗰時係冇驗卵巢d指數), 但因為我本身月經量好少(得3日), 照超聲波都係話我子宮內膜薄(4mm), 呢個情況本身都係難著床成孕，加上精子都差就更加難。
咁嗰時我哋開始食supplement想養好d精同卵(有d後悔當時唔係選擇睇中醫，而家食咗成年supplement都好似冇咩幫助)，一路去到今年年初先叫做正式開始不設防做人，有用試紙check排卵期前後嗰幾日先行埋… 咁到而家叫做試左半年都唔中喇(其實有一半原因係唔夠勤力，我哋太少行埋)，老公就比較心急，主張做IVF, 佢覺得咁樣唔使慢慢試得咁辛苦(因為佢有強直性關節炎，做"劇烈運動"佢係會好攰)，但喺我嘅角度，捱針捱手術嗰個係我，如果可以自然懷孕就點都好過要打針同做手術喇…
我哋上個月都去咗仁安見醫生(我本身係本住去做IUI嘅心態去睇)，老公再驗多次精，比上年好咗但都係差，然後我上星期抽血驗埋卵巢d指數, 結果AMH得1.9, FSH 17.3, LH 9.55, 醫生話我d指數都好差，所以建議做IVF, 唔建議試IUI…
其實我上月中開始拉埋老公一齊去睇中醫，因為我條心都仲係想調理好個身子，如果可以自然懷孕就最好，唔係嘅就算做IVF, d精同卵好d, 成功率都高d呀… 而家食咗2-3星期中藥，但今日去仁安見姑娘做consultation時，佢一聽到我話食緊中藥就叫我做IVF就唔好食，因為中西藥唔可以一齊用藥，又話我FSH指數咁高都可能同我食緊中藥有關，因為中藥多雌激素。
其實我本身都唔係話想IVF同食中藥同時進行，而係想食3個月中藥調理，打好個底，到8,9月先做IVF, 但姑娘就話我卵巢儲備已經低，再過多幾個月可能仲低，又話最好係停咗中藥2-3個月先做IVF… 咁即係如果我想8,9月做IVF, 我而家就要即刻停中藥，但我嘅concern係，我都未調返好月經量/子宮內膜厚道嗰d, 如果咁樣去做IVF其實都係難著床，但姑娘就話佢哋開西醫/針劑畀我就已經係處理咗呢個問題，係冇必要食中藥…
姑娘話會再幫我問醫生意見，但其實上次見醫生時，我連同佢講我哋食咗一年養精/養卵supplement, 佢都反問點解要食，佢係好似唔建議食supplement咁(更何況中藥呢), 但我覺得有d奇怪嘅係，正常食d葉酸supplement都要啩… 感覺係佢哋好似覺得IVF開的針劑同藥就已經足夠，你最好唔好食/做其他嘢同佢哋d嘢相沖，即使你本身底子差，佢哋覺得你要做嘅唔係調理，而係喺變得更差前盡快做IVF, 但同時又講到有好多uncertainty, 就算抽到卵都唔代表質素好，就算放到胎都唔一定著到床(講到尾又睇你本身底子), 一次唔成功你咪繼續畀錢試第二次囉… 講就梗係容易，但大拿拿十幾萬十幾萬咁使架嘛，都係想有多d把握先做啫… 老實講，香港做IVF嘅成功率其實都幾低，如果單靠佢哋d嘢就足夠，成功率就唔會咁低喇…
睇d中醫講，就個個都話IVF同中藥可以雙管齊下，但生育科西醫就想你最好唔好做其他嘢… 我唔知有冇jm係先用中藥調理再去做IVF(甚至同時進行)? 如果食緊中藥係咪真係要停藥2-3個月先做IVF?
