想問下有冇家庭兩位小朋友相差10年或以上嫁？相處會唔會有代溝？大嗰個會唔會吾理細果個呢？本身諗住一個就夠啦，丫仔已經10歲，巳避孕下仍然有左，有好多擔心旣野不停係腦裏問自己
2個讚
我自己哥哥大我12 年，代溝好大，加上父母唔太識教我哋相處，係近1x 年好d。
我大女17、同我細仔19mths 、相差15 年，暫時唔會有代溝，家姐都好錫細佬、細佬都好痴家姐，感恩大女亦冇覺得我偏心….
5個讚
代溝一定有。如果 11 歲仲玩 BB 玩具車玩得好開心，係人都驚啦 
現階段唔需要擔心，養好身體最重要。
睇下你 “理” 嘅定義係咩。你係想阿大係一個哥哥，定係一個保姆？好多年紀相差好遠嘅阿大都經常被老點做 “保姆”，好似係一個必然咁 “做咩唔睇住 BB/做咩唔陪佢玩”，好容易唔記得阿大其實都係一個小朋友，有自己學業、圈子、興趣，佢冇諗過自己要做保姆。例如哥哥同同學打波，你會唔會話 “畀細佬同你地一齊玩，佢想同你玩” 定係 “可以啊，你出去同朋友開心下～細佬今次留返屋企”，又或者食甜品嗰陣 “你做咩唔幫細佬搣開塊紙/畀細佬揀先” 定係 ”你揀先，之後幫細佬搣佢嗰塊紙“
有啲天生鍾意小朋友，鍾意做大哥哥，當係自己個 BB 咁湊，餵奶陪玩換片都肯參與，有啲係好獨立，唔太鍾意小朋友，平日唔會特別陪玩。
最重要係畀啊仔知道你尊重同愛佢，亦明白佢有自己生活同感受，係 “阿仔” 而唔係 “哥哥”。睇下遲啲 BB 出世之後，每個月都有一兩日係三人行，仔仔同埋爸爸媽媽一齊出去吃飯，就冇 BB 份，等大仔明白到你對佢嘅關愛並無減少。佢唔需分一半，而係樂意同 BB 分享。
15個讚
自己係咁嘅 case
感情好好， 可以有家姐做聆聽者，就好似多個長輩咁 
2個讚
你仲相差大啲家姐錫細佬就好啦！
2個讚
當然想佢係做一個哥哥榜樣，亦都會錫bb陪伴佢，我只怕自己照顧BB時間太多，忽略咗佢，所以我冇時冇刻提住自己唔可以忽略咗大嘅，屋企突然間會多一個成員大家都要時間去調節心情
1個讚
我同我弟弟相差9年
我既年代重男輕女,所以覺得偏心
弟弟出世後要幫手沖奶換片
到我升中開始忙,無乜時間同弟弟溝通,之後返工結婚,感情好一般,不過佢搵親我我都會比意見佢
希望你生左細細之後要兩個小朋友要分配好時間,教佢地相親相愛。
2個讚
其實男仔好多時單向思考，唔會諗太多。
我自己唔會叫佢哋去做乜榜様，什麼家姐、哥哥要錫細佬陪多啲。
反而我細仔出世前，成日同我大女講： 細佬出世之後、又未識表達，爸爸媽媽會用多咗好多時間去照顧佢，我希望你會主動話我哋知，你需要我哋，我哋會盡快抽身出嚟比你。
媽媽知道你平時都好乖，所以我好感恩，希望細佬第時會覺得家姐係一個值得佢去學習嘅人。
當一個新家庭成員加入，真係要全部一切學習。
媽媽加油啊
4個讚
其實任何年紀、相差幾多年都應該係咁，我朋友兩個仔，相差2、3年左右，總之細佬做錯，阿哥都要被罵，因為我朋友覺得做阿哥嘅有責任去叫停佢、教佢。
其實人人都係獨立個體，佢第時肯唔肯去照顧、陪bb 玩，好視乎佢自己鐘唔鐘意bb、或錫唔錫自己弟妹，人哋嗰個做到又唔代表自己嗰個做到。何況，係父母選擇生佢出嚟，佢做哥哥嘅其實無責任。
9個讚
題外話，我有朋友同個妹相差20年，佢呀媽都難以置信中左獎！唔少人以為係我朋友生，扮係自己呀妹，佢大叫冤枉
8個讚
身體健康隔幾多年都中
係阿，以前細個細既跌倒受傷。
細既做錯事，或者家姐照顧得唔好。
都會比阿媽打.
有時候都覺得家姐好慘,因為都係大5年咋.
3個讚
單純咁諗
唔同老豆有機會
1個讚
我覺得相差幾多年都好，最緊要唔好因為佢係大就要求佢要點點點，哥哥應該點點點，家姐應該點點點，每一個人都係獨立個體，成為哥哥姐姐唔係佢揀。
我有三個小朋友，大嘅好錫細嗰兩個，中間嘅又好錫大同細，細果個兩歲，都係好仰慕家姐。
我成日提自己唔好要求佢哋做大嘅要點做，佢哋感受到爹哋媽咪愛錫佢哋，自然都會錫妹妹，又會主動幫手睇妹妹等我可以沖個涼咁。我平時抱住個細嘅，都係全部心機時間分比大果兩個，當自己拎住個手袋咁
樓主，我覺得你要擔心嘅唔係兩個小朋友相處，而係隔咗咁多年，自己有冇心理準備從頭再嚟過？最少要再損失五年自由。
重新再嚟過嗰種辛苦，同第一次經歷湊小朋友係唔同嘅辛苦。
我兩個隔6年都經常要反問自己，為乜要咁辛苦
小朋友之間係咪相親相愛，某程度上都係取決於父母比佢哋有幾多愛，小朋友好簡單，比幾多時間佢就=幾多愛。細嘅出咗世之後，你仲有冇信心有精力應付細嘅再加個青春期少年？做足心理準備，到時唔使亂晒陣腳。
5個讚
識人差9年，兩姐妹，冇計傾嘅
家姐習慣要照顧細妹，阿爸阿媽好偏心偏細妹
去到青春期有自己朋友似乎冇乜所謂
唔知大d會唔會close返d
1個讚
呢啲事成日見，我都有試過，我係大果個
1個讚
十年算少，我聽過係大十七年，個家姐當自己係阿媽咁
1個讚
識人分別相距12同16年，
最細個個係全家嘅寵兒。
我估視乎家庭教育同性格多，同年紀未必有絕對嘅關係。
1個讚
我都一樣，大女同細女差好多
又係明明避咗孕都有，我仲要一把年紀呀陰公
我有一句話就係：隨遇而安
兄弟姐妹係緣份嚟，冇人知佢哋會相親相愛或是陌路人
我哋做阿媽既盡力俾時間，陪伴和包容
同盡量唔偏心咁已經足夠
加油
2個讚
我同我妹就相差10年，我唔想要細妹同兩個唔特別fd，但都唔係仇人，大左無一齊生活就好似普通朋友但唔會傾計。
不過好彩由細到大都唔洗照顧佢。
我同啊妹係有代溝同唔會理佢，不過人人性格唔一樣。
2個讚