之前睇隔離post大家講new build浴室，估唔到自己間屋個浴室啱啱就發生咗一個令我非常非常煩惱嘅漏水問題。
事源係突然發現套厠樓下嘅睡房天花有撻好長嘅水漬，已經即時通知發展商cs，但佢就約咗水喉師傅幾日後先嚟睇，但第2日撻水漬越嚟越大，仲發現睡房牆身都開始有水漬，覺得個漏水問題應該非常嚴重，所以就打緊急熱線搵師傅嚟睇，師傅發現係厠所條去水喉接駁位鬆咗所以漏水。因為啲喉入晒牆所以唔cut開啲牆身都發現唔到。
師傅整返埋個鬆咗嘅接駁位，就話整好咗，我同佢講可唔可以加強返條喉管令佢以後唔好好似今次咁無拿拿鬆咗漏水，佢話唔駛，另外地板天花同牆身嘅問題佢就話叫我問返cs果邊，跟住佢就急急腳走咗。
之後email同cs講返我好擔心個地板天花同牆身，因為就咁睇啲水係已經滲晒入去，中間啲保溫棉估計都應該都濕晒，點知佢話等啲天花牆身乾晒佢地就會搵人上嚟油返油架啦咁。
睇到佢咁覆我真係好愕然，佢淨係話會安排人嚟油油，但係入面啲木呀保溫棉呀濕晒，啲水滲晒入去，係可以就咁等佢自己up返乾嘅咩？咁樣up法入面唔會發霉咩？
我真係唔識點同發展商啲cs deal, 佢地成日都想hea我。間屋已經超多嘢要執漏，有啲執完仲衰過之前，為咗間屋呢啲嘢，真係覺得好煩好煩。
所以想請教吓大家知唔知道，而家咁嘅情況正常係要點樣整返好佢？我上網睇過嚴重漏水係要cut開啲地板，換過啲保溫棉，我而家個情況係咪都要咁做？我應該點同cs果邊講好呢？
唔該晒大家。
類似情況，我係朋友既 new build都見過。
去水喉接駁位，哩度部份興用手擰實果種，香港則接近全用塗膠水接駁，主要係手擰果種材料費貴好多。
好彩我幫朋友係浴缸底發現，唔使𠝹開牆搵。
只能講運氣唔好，遇著個粗心大意技工。
係，因為去水喉無水壓，擰返實唔會再漏水的。
也沒甚麼方法補強，除非 cut左佢再接駁塗膠水果種，但要透過牆洞去做好麻煩，人工費會好貴，無必要。
另外，你唔使咁擔心。
短期內既浸水，對木材結構係無影響，除非浸到大半年以上。同樣，夾層裡的保溫綿係玻璃纖維，唔吸水的，無浸一年半載都無影響。
而天花及牆身係石膏板，表面浸水位多少會有些發脹，不過無受力作用唔使理。
唯一既處理方法，的確係等風乾後上油蓋住水印就算。
我喜歡 diy唔係鐘意勞動或為慳錢，係太多裝修水電工做野馬虎。但無一年半載唔會發現到問題，收晒錢過左海就係神仙。
8個讚
多謝晒你嘅回覆呀～睇完你咁講，咁我都冇咁擔心啦～
你真係好犀利，間屋嘅結構物料乜都識，仲識自己diy～
諗諗吓，唔知有冇啲咩course係關於呢啲嘅呢，第日等個仔大啲走去讀吓都好
佢地啲手工真係可以求其到一個點，好似浴室個浴屏咁，整咗成7次，成大半年到而家啲水都仲係會喺浴屏流出嚟，整極都漏，我已經盡量叫自己睇開啲，但係成日呢樣要整果樣要整都真係好困擾，而家仲要攪單漏水落天花牆身，真係人都癲
想問下點解沖廁時d喉管會響嘅？已經叫左發展商整，但連續2個ensuite都係咁就有d奇怪
係細發展商嚟架，叫Lovell, 不過佢都有5星架，啲評級真係信唔過
其實我個企缸牆身入面都會間唔時傳出一啲跌嘢落地嘅聲，達達達咁，冇規律嘅，類似啲水滴咗落地嘅聲，但係大聲好多嘅，連樓下間房都聽到
我都想請問吓係咪正常嘅呢？係咪類似以前喺香港夜晚都會聽到啲波子聲咁呢？
我知呢間呀，唔算細我諗中型啦，d樓都唔平，但原來可以咁差，不過好depends on site manager跟得好唔好，落差可以好大，同一個地盤唔同時間收樓質素都可以差好遠，呢度d人做野係冇準則
去到新地方生活，要處理好多事。
可以多少幫到減輕你既壓力，太好了。
我本身做過建材代理商一段時間，所以對各材料都有一定知識。
但第一次買屋裝修時，都被隱藏問題攪到好煩。住左一年到，就要拉過晒大半間屋既電線做明線。
之後特登去上下相關短途課程，不過學埋都係些純理論課，浪費時間。
到第二次買屋時要全爆大裝，街報百二至百五萬裝修費。
剛好當時去開既體育會有兩個師兄弟做開裝修，一個泥水一個水電。佢地話自己人，只收行內判頭純人工價，但兩個人做唔晒咁多野，如果搵行家來幫手唔敢保證會好似佢地咁用心機做。
結果係我落埋手做，因我可以彈性上班，便每日抽半日出來。
由清拆，彈墨，地基，水喉，開坑走線，砌牆，防水，批蕩，油油，牆紙，鋪瓦，地磚，鋁窗，大門房門，馬桶，潔具，龍頭，廚櫃抽氣等。
全部都有份做，佢地又教埋我各種實際經驗。
一共做左九個月，九成料都用歐洲貨，計埋佢地人工只係用左七十萬。自己做，當然手工好耐用性又高。
可惜，19年完成。。。只住左一年便被迫離開了。
你個浴屏係咪 new build常見既半截可動式玻璃屏？
漏水位係咪兩邊是旦一邊？ 如果係，個浴缸同浴屏水平不一致，而家基本上都係纖維浴缸，四邊有高低位可調節。不過人企入浴缸時會壓低左，要著量調返高些。
其實無咩理由，哩個係簡單野整極都整唔好。
4個讚
兩廁或以上用同一條污水管，如果無做氣口，即管中間有排氣位。
一個馬桶沖水，氣壓突然加大，會迫向另一個馬桶，便會發出聲響。
加左排氣，氣壓有得釋放便只有沖水聲。
要係水管做，入晒牆無得就咁後加了。
由於唔係法例指定，香港或英國，都係有些有，有些無做。
1個讚
真係要天時地理人和先學到同跟到咁多野， 不過都要有基本知識先攪得掂
唔係，香港波子聲係剛筋係英泥裡面冷縮熱脹發出。
比較麻煩，留意下係咪唔用水就無達達聲，一用水無耐就有。
我間 new build都係咁，原因係去水喉某個位忘了落喉碼管死，一有水流過搖擺碰到支撐木材，達達聲。
其他 snag我都自己攪掂晒，唯獨哩個我迫發展商。只要同我攪掂哩個其他都唔使你攪。因要開牆洞，我怕個兩年全保會失效。
結果分兩次來，開左三個牆洞先搵到。。。
補牆既手工仲差到咩咁，全部係我自己之後重補執返靚。
另外你小心一下，講開馬桶氣口，氣口排出既臭氣係經內牆升上閣樓邊位排出。
所以如果你整水喉開果幅牆，剛好係氣口用果幅牆的話，補牆做得唔好會一直有臭味走出來。
你檢查下有無味比較好，唔係氣口牆就無咩所謂。
1個讚
我覺得一係學，一係要賴過野先會知
之前浴缸滲水到廚房天花。自己開晒啲浴缸都揾唔到邊到漏。揾人黎整先知佢點 check
呢到啲裝修佬真係好過份
我地屋苑site manager已經換過兩次，即係有3個唔同人，啲嘢同完呢個site man講，佢走咗又有第個site man嚟問，又要講多次，唉～不過我已經算好彩，我搬嚟嘅時候已經係第2任，聽返屋苑啲鄰居講，第一任係做得好差，佢地勁不滿
係呀，佢地係會keep住安排人嚟整嘅，不過間唔中又放下你飛機咁，有次明明有人喺屋企佢又話冇人喺度，攪到佢access唔到，但完全冇聽到敲門聲或門鐘聲，有幾次直程等咗師傅成日，冇嚟到，跟住打去cs先話今日嚟唔到，有次話朝早8點半嚟，但7點半嚟咗，要睡眼惺忪咁招呼佢入屋，佢地…真係好隨心所欲
你真係好好人，之前見你回應其他人嘅問題，你都會好認真咁分享又答得好詳細
今次你真係令我釋除咗好多疑慮，減輕咗我唔少壓力。本身我係超擔心，因為上次租屋租著間發霉發得好勁嘅屋，有嚴重滲水問題，個業主三幾日就嚟整一次，好驚而家呢間屋會變成咁
可以自己裝修自己間屋，好唔簡單呀～仲要用咗咁長時間去攪，俾咗咁多心機落去，好可惜呀～不過呢個又真係一個非常難得嘅經驗，又有行內師傅教路，一邊學嘢一邊又可以幫自己慳到錢
浴屏果度，係呀，我地係普通半截可動式玻璃屏，佢一開始係3個角落頭漏，整咗幾次之後就漏兩邊角落頭，而家就漏一邊角落頭，plumber今日嚟咗睇，佢度咗個浴屏個尺寸，跟住話個浴屏同個企缸個size唔match喎，之後有幾次都係佢嚟整，可能佢都整到想放棄，佢話下次會拆過晒個浴屏同企缸，重新砌過一個新嘅。其實佢咁樣拆過晒再起過，我仲擔心，唔知整完會唔會仲差。之前屋企大門同門框就係有裂痕，要全隻門連門框換過晒，而家換完個大門邊啲牆身俾佢𠝹到爛晒，條門縫仲有少少漏風，門口地氈冇咗一忽，門口出面唔知點解多咗條gap，到而家都未整返好，唉～
唔好意思呀，講開呢啲真係好多嘢想呻咁，當初買new build就係唔想煩咁多維修問題，點知原來都有好多嘢要煩
原來都幾大鑊咁，我之前成日以為係同波子聲一樣原理，所以都冇乜理到佢，咁我要留意下啲聲咩情況會出現先得，多謝你話俾我知呀，如果唔係我又懵下懵下以為係正常，係我老公有時會話好嘈，我仲同佢講香港啲波子聲咪又係咁
不過諗起如果要開牆洞先整到…我就…唉
雖然達達聲，但唔會漏水的。
唔算係大問題，唔好再比自己壓力。
聽你發展商外判間 trader手工咁差。
可能由得佢會安全些，因為情況唔同漏水，漏水除左靠經驗，仲可以用濕度計或紅外線溫度燈來追位開牆。
哩種只能靠隱約既達達聲來估位開洞，有機會開完幾個洞都搵唔到。。。
而自己唔識 diy修補牆，等佢派人來補隨時愈整愈衰。
幫我開牆搵果個最終都係搵唔到邊個位發出聲音，死馬當活馬醫，全部有水管貼到木材位既地方，都塞保溫綿落去當防撞用。叫好彩見效，唔係就無喇喇多幾個洞。
哩個無緊急性，等第時識到可靠既 handyman，甚至自己學會 diy先考慮整唔整都得。
無需要新增壓力比自己。
1個讚
