我今朝都睇緊呢個
1個讚
有本書叫「童年之秘」、有講跌序敏感期、二-四歳其實好啱睇
2個讚
其實唔係你問題
有人話面對自己小朋友就好似經歷自己細個個時一次
細個家庭俾左乜你，你就會有對應或類似嘅應對（比如我諗我地細個都係俾人打同鬧多）
當你想用另一種方式去對待自己個小朋友（即係唔好打鬧）
咁你就會好無助，唔知點做，因為細個冇呢種方式
同埋當俾小朋友煩到爆個時，日日都係咁，情況好似成日都膠著咁，被磨到滑哂瓦都好正常
我都會開返俾佢做返。原因好簡單，因為唔想俾佢爆喊煩住
同埋吸取經驗就係問左佢先。但係有啲控制唔到嘅野就唔會問佢。
明呀，係生理上頂唔順。行埋少少喊到頭都痛埋。2歲呢個時期情緒大爆發，好似M到咁少少野就抆同爆喊。我唯有捱同埋學下點引返佢笑
其實小朋友笑點好低，做啲低能野就好易笑返。
原來係咁
咁你會唔會可以出返黎做野？搵人幫手湊自己返工？
不過就算你返工都一樣要收工/放假，總有面對小朋友嘅時候
小朋友嘅成長，係個好長嘅過程唔係一日就會好
你發現自己有呢個情況都係好開始，係個轉機黎
我仔8歲，同依家比兩歲嗰陣簡直係天堂。朋友個仔16歲，佢話個仔啱啱開始青少年期簡直當佢係仇人。做老竇老母有排捱。
3個讚
我明，你一啲都唔孤單
我脾氣都唔好，其實我女算乖，好少會講唔聽
但近排始終大個，好多都要唱反調
每次忍唔住大聲鬧完佢我就會諗咁樣唔得
然後我老公又係好有耐性嘅人
每次見到佢同個女相處我都好內疚
最內疚係我會鬧我女但我女仍然好痴我…
其實每個父母都係小朋友出世後學習中
小朋友一路大，我哋就一齊成長
慢慢摸索下小朋友嘅脾性，用佢方法令佢聽
因為小朋友脾性個個唔同，真係父母先知咩招對付到佢
2個讚
唔講對錯、佢會為其他小朋友「出頭」、又幾搞笑
我識果個小朋友係（三年級）、喺屋苑平台、比個阿婆嘅買送車揩到一下、佢會好大聲喝個阿婆：「有冇搞錯呀？」
外人以為小朋友冇家教、但其係係因為個腦缺少某啲血清、所以唔以咁樣講嘢人地會難受。
小朋友有食藥、同行為治療、有改善但冇得根治、只係「發癲」嘅情況少左
我好想, 但冇人支持我, 老公反對, 連四大長老每一個都反對我出黎做野. 其實只要我一點頭, 舊公司即刻請返我, 但個個都阻止我. 我花咁多心機教個小朋友, 佢連講野都講唔到, 淨係識大喊大叫, 我諗我好快頂唔順會打佢, 狠狠咁打.
我完全冇耐性, 我只係識照顧自己, 我想放棄教養小朋友, 唔想再湊佢唔想再教佢.
高估左自己, 而家知衰, 輸哂咩都冇, 日日被疲勞轟炸.
又唔可以話輸晒嘅，所有家長都係邊做邊學，我覺得你現時最需要嘅係唔好當小朋友係怪獸，生人勿近，你試下去接納佢先，佢有幾麻煩，其實你自己細個都可能一樣
1個讚
你知唔知道佢地阻止嘅原因係咩？老公知道你個狀態ma？老公對你同小朋友相處嘅情況點睇？
我見你話你睇好多教養書，我覺得你係個用心嘅媽媽，同埋你都對自己有要求，你會覺得係自己脾氣唔好，發脾氣對佢唔好，打佢係唔好你，你想改善
而家喊鬧嘅情況過多，你承載唔到，其實你嘅付出一定唔會白費，只係未到收成時間
兩歲嘅小朋友自我，情緒同語言仍然係發展階段，三樣野一齊發展，不停互相影響，有衝撞，令佢地冇辦法如大人所想咁去達到一啲大人嘅期望
我地可以做嘅其中一樣係學識放鬆自己，適當地放低對佢哋同對自己嘅期望
生小朋友，選擇離開職場，模式大大轉變並唔係單單用贏輸就做到結論嘅，或者當初係高估左自己，不過小朋友其實仲好細個，點解會係輸哂呢，點解又要低估左佢嘅可能性呢
2個讚
我好彩隔離屋無咩投訴
我嗰個都係少少唔順心就lur地尖叫大喊
首先shut down咗自己先，佢叫嗰下你掩埋耳仔都係一個訊號俾返佢知道，咁樣人哋耳仔唔舒服，我會再補多句，人哋耳仔唔舒服就唔會聽你講
佢仲要叫嘅，我就由佢自己叫飽佢，離開一陣大家都抖抖，靜少少就返去問佢咩事
佢唔識講架，所以都係會繼續忟
我同自己講，佢未識好仔細咁表達自己，可能都會好忟，兩個一齊忟就會爆煲
最難搞係lur地
喺屋企我哋係由佢lur唔會俾佢得逞，有時佢lur d無厘頭嘅嘢就會「支」佢等佢起返身
喺街lur我都幾崩潰，主要係身體嘅人嘅目光，我都研究緊點處理
我個人本身極易忟憎、心急同火爆，所以佢一爆，我就同自己講，係我生嘅，所以我唔想佢成長之後都同我一樣爆
我嗰個一歲零嗰陣，我鬧完佢，佢指住個公仔嘰呢咕嚕咁鬧，見到之後，我就真係打從心底相信係無論如何都唔可以發佢脾氣，因為佢會學得好快
你越發脾氣，佢就越覺得學你就會有用
大家都心情好嘅時候就再講道理
哦一次兩次三次哦到佢記得為止
到有一日佢真係記得做返，你會好開心，記得一定要讚佢，仲要喺其他屋企人前面都讚，咁佢會鍾意繼續做
不過佢有時都係繼續又唔記得又loop過 
唔好理
長期戰鬥嚟架，唔好嬲親自己唔舒服
我都摸索緊點樣可以同佢溝通得好啲 
加油
3個讚
唉，做左父母就會明其他父母嘅難處，我係街見到只會鄧對方辛苦。只有啲冇同理心嘅人先會小事化大又拍片又盛。就算係街扭，我都唔理得其他人咁多（除咗巴士），如果嘈嘅就移佢去第二度再由佢扭到夠。通常要抖順條開先可以再溝通到，未停之前講咩都係晒氣
我未生嘅時候見過有個小四五嘅大肥仔扭長老買野扭到落地，長老冇理佢。我都只係覺得好誇張，咁大個仲扭。而家就明長老可能同佢戒緊毒，真係要忍住
係架，當你聽到佢講一次你鬧過佢嘅說話就會好心up，完全係回力標來。唔係唔開心佢鬧你，係感受到自己唔應該咁講
2個讚
我不嬲做法係，喺街一扭，無論喺邊做緊乜，明明啱啱見到朋友都好，都即刻同佢走搭的士返屋企，返到屋企其實到都冷靜咗，再慢慢同佢解釋，佢頭先失控，所以我地嘅安排要取消，今日休息，佢三四歲果陣試過兩三次，就冇再發生過。
大家都辛苦
琴日我仔發脾氣，做樣話要打我（5歲）
我話我唔開心，我喊(扮)
佢就收聲，停左
我話我個心裂左(用手做個心型，之後分2邊)
我問佢，你想媽咪個心係一個？定分開？
佢話一個
我見佢靜左我就解釋佢既行為，問佢係咪唔開心，唔開心可以點樣做，佢點頭
我話你要同我講sorry,因為你想打我，你話唔要我
講完之後我又錫返佢，話原諒佢
每個小朋友都唔同，可能有啲要多少少時間先冷靜，同自己講「唔好比佢影響」「唔洗嬲，等佢發洩左先」
大家加油
3個讚
我會唔理其他人先，首先處理左小朋友嘅情緒先，當然同佢嘅對話都會加入一啲希望佢諗吓身邊有其他人係道，要顧及一下環境
例如話
我明白你而家好嬲/好難受，你因為（咩原因）而唔開心，所以而家要尖叫同埋想好似係屋企咁訓係地下，不過我地其實唔喺屋企，冇人會訓地下架傻豬，你喺呢個地方訓地下好危險，人行過會一野踩落你道，或者你會kick到人然後受傷，我好擔心你會受傷，會好痛，我亦唔希望有人會因為你而受傷
我見你一路都好忍耐，媽媽其實好欣賞你架，你只係黎到呢下（個原因）而忍唔住姐，其實冇事架，媽媽一直陪緊你，你需要我抱下你嗎？可能會好一啲架（慈愛之手張開）
好多時可能佢會喊得好勁好大聲，其實佢乜都聽唔入耳，我會選擇等佢暫時停止喊時去同理佢個情緒，如果唔得就再等
一般情形下，只要你講到個觸發點/引導到佢講出觸發點，佢地就會突然間好好多
同埋都可以加入一啲第三者，佢地冇咁熟悉嘅人，佢地會比較防備，同時唔會做成你同佢嘅對立，好似保安叔叔之類，0拿，唔係我唔俾你lur，係人地唔俾
然後就係啲小魔怪mode，可能佢地會駁嘴話
我就係鍾意阻住人，我就係想人地受傷，我就係想自己受傷，我都唔怕
咁呢啲就要按情況逐一擊破
阻住人是少，受傷是大
想人受傷？人地受傷你會有咩感受？你自己喜歡受傷嘅感覺嗎？唔喜歡點解要咁樣對人呢
想自己受傷，咁就要扁晒咀咁話但你受傷嘅話，媽媽爸爸都會好擔心，受傷仲可能要入醫院（見唔到爸爸媽媽架啦）
如果佢都好重要當日嘅行程，就話咁就去唔到邊度邊度架喇
如果佢好為食就話受左傷入院，應該食唔到你最鍾意食嘅野
都係要按照父母對佢嘅了解去講
有時係好容易因為身邊環境，時間而令自己轟一聲就爆
大人好多時都會比較想處理左件事，或者係個狀況先，然後先到小朋友個人本身
例如佢大喊大叫，我會好想搵方法停咗佢嘅喊聲
又例如如果我當下佢個喊點好莫名奇妙，就會覺得點解佢要咁樣發脾氣，然後會異常地心煩
覺得佢無理取鬧，找我麻煩
就算佢話佢好難受想我抱下佢攬下佢，當下有時真係嬲到冇辦法去抱同攬佢，去安撫左佢先
好明白同理解
3個讚
比長老湊住一日半日可以嘛？ 你需要出去抖下氣
1個讚
真啊
諗深一層係件事重要啲定小朋友重要啲，呢個可能唔同事件，唔同觀點角度會唔同
有更多時候係其實小朋友嘅哭鬧未必係最大嘅問題，問題係大人當下嘅睇法
即係
其實佢訓係地下一陣，有咩問題呢，係，可能會受傷，但唔係即時嘅危險
可能會遲到，但今次遲到左又點呢，佢都應該要學習一下咩叫遲到，同遲到嘅後果
可能會做唔到本身嘅行程，咁做唔到又點呢，又係要陪伴佢接受同面對個「後果」
個一下佢做唔到自己個要求，咁點呢，係咪代表佢冇下一次機會，或佢下一次都做唔到呢
如果唔係令佢有即時危險，或令其他人即時有危險，其實有冇空間去放緩一下
可能當下好騷擾到人，我地係有責任去處理，不過如果我地個態度都係好硬，咁小朋友又點敢求我地幫手，或者講出佢嘅感受呢，所以呢個時間更加要忍住，慢慢對應
大人有時可能係自己有一啲期望，唔係話規矩，守時，行為問題唔重要，唔處理，而係既然當下佢係要大喊，想大人安慰，點解大人係小朋友需要大人嘅時候，反而著緊嘅係規矩，守時同佢行為嘅對錯
大家嘅期望有出入，處理嘅方法會唔會令大家越行越遠，咁係咪自己想要嘅結果，而自己想俾佢嘅訊息係咪真係有好好傳遞
1個讚