如題，如何看待小朋友駁嘴？
駁咀係好事，因為佢地肯思考、表達意見，但要注意態度。
所以我小朋友駁咀好有禮貌
17個讚
要視乎內容、態度
無話大人講嘢一定啱，小朋友反駁就唔啱
10個讚
喺我屋企，小朋友係可以駁嘴
其實我唔係好識分咩叫駁嘴
小朋友有道理我係會聽
小朋友駁嘴通常係大人講一套做一套
識駁嘴證明小朋友有思考能力
想唔想小朋友長大後好好同你溝通？
6個讚
今日我話個女叫佢做嘢快D，做完然後落去買嘢，佢都仲慢慢嚟，最後我同老公自己落去
返嚟老公問佢知唔知我話佢咩，叫佢複述一次，我話佢成日係屋企，點樣學習日常生活嘅嘢？點樣知道出面嘅世界係點？佢就嚟連樹木係綠色都吾知啦，佢即駁我：「樹木點會係綠色呀？」我火都嚟埋，我講錯一句，佢洗吾洗用一種恥笑既態度嚟駁我嘴？我當刻火到打咗佢一巴……
1個讚
我對自己仔女比較開明，駁得啱我會認衰，但要解釋返其他大人未必會咁包容，要注意語氣和場合。
進化論就係要一代好過一代，我三十幾歲先明嘅嘢，呢個細路仔5歲就睇到，更要提我有錯，有前途。
點解我會咁諗，因為我細個俾老豆打到 PK, 就因為佢教我中文但我又指出佢筆畫有錯，老一輩係唔駁得嘅，童年陰影令我青少年時期都比較好蝦，去到三十歲做人老豆先搵到真正嘅自己。
佢之後有咩反應？你老公呢？
打完呢一下，你以後會後悔嘅，我以前就係因為咁俾老豆打嘅細路。
咁多年之後，我係無咩同老豆交心嘅溝通，家用我照俾，只因為佢有養我，去到中學佢就已經無能力教我功課，感情真係好一般，似責任多一啲。 我細佬讀書差，細個都唔識駁老豆，反而老豆同佢 close 啲。
4個讚
首先，你話你同老公落咗街留低阿女一個向屋企，咁我假設你女女已經12歲以上
咁媽媽你要留意，呢個年紀已經唔適合體罰，青少年自尊心好強，而且有研究support體罰打面嘅話，係最傷自尊心
無論阿女態度有幾差，做錯咩嘢，都要忍耐唔好用體罰嚟懲罰佢，否則佢只會更加唔尊重你，甚至討厭你
而且你會因為阿女一句說話而打佢，咁證明你平時都唔係說教型媽媽
而家開始叫你要同個女講道理都幾難，尤其係阿女開始反叛期，未來大把嘢激死你
不如試吓唔好樣樣嘢都要佢順你意先，好似佢落唔落街，棵樹係唔係綠色，你贏又好佢贏又好都唔係咩大事，拗嚟都冇意思，只會增加磨擦，咁不如唔理好過啦
有啲小事阿女大個啦，比佢知道父母都尊重佢可以比佢自己話事，好似落街買嘢呢啲唔想落咪唔好落囉
但係到重要事，例如同親戚食飯一定要一家人一齊去，咁就點都要佢去
我會同佢講，平時父母尊重你，你唔想落街都由你，但係呢個飯局需要你出席，咁就唔該你都尊重返父母，一齊出席
好多人都講，生女多數都孝順父母，挨過呢個反叛期，阿女就會乖架啦，希望係
4個讚
駁嘴代表佢都識/肯用腦思考，亦覺得可以同你溝通。連駁嘴都懶得駁，咁就只代表關係差都不能修補，連你講嘅嘢一句都唔想聽。
有時候反而係佢冇包袱冇旁念，思路仲清晰直接。
如果用武力/輩份去壓制駁嘴，咁即係代表控制唔倒自己情緒，只識得怒羞成怒，欺壓身份低過你嘅人，同職場上啲 old pat pat 大媽一樣。
我經常咁樣提自己，一諗係如果唔識控制自己，同啲五十歲八婆大媽一樣，一味識蝦新人但完全冇料扮四條，度
就會熄滅。
諗起以前阿媽講過「你今日咁曳，他日有仔女佢哋就雙倍奉還。」 呢個時候我就話「咁你細個都一定好曳，所以先有我咁惡啃」 係咪好想一把車埋黎呢～
3個讚
我細個就係阿媽認為我錯就鬧，解釋一定係駁咀，小則鬧再得甘d，大則俾人打。
大個以後有咩我都唔想再同佢講。
3個讚
你講錯，佢恥笑你，你打佢；
佢恥笑你，你打佢，佢係咪要斬返你先啱規矩？
點解要打佢？你冇嘢下話？
3個讚
識駁咀係好事，雖然唔知係咪叻但至少唔係蠢，識用腦反擊
老一輩成日講權威性人格，要下級盲從上級，所以有咩父母官、天下無不是之父母嘅講法，其實就係佢地唔分對錯，只要求服從。
而家我地Lee代就睇育兒書、心理學書先去教小朋友，睇書嗰陣就會發現原來好多父母根本唔識教，佢地個理論係棒下出孝子，但其實已經打碎左個親子關係，講到幾錫仔女都冇用，佢地只會記得比人打。
今時今日仲兜巴車嘅父母⋯我唔係好理解到佢地個諗法⋯我會問自己小朋友想唔想出街、想食乜嘢餸、想打機定睇電視，因為我愛佢、想佢開心，到佢唔乖嗰陣，我會同佢講自己唔開心同勞氣，之後大家就開始deal，deal到大家都滿意為止。打？Never!
6個讚
如果我講錯野，我會扮傻：係呀，媽媽口快講錯野，唔俾笑 (笑住講)
跟住同佢地一齊笑
將來，佢地可能會再講 (OK ，有一單已講咗三幾年！) ，如果處理得好，係美好回憶
6個讚
好事，懂批判思考。我細個俾大人鬧我駁咀，我根本唔明，我只係表達自己啫。
以前奶奶鬧我「仲駁咀！？」其實係佢唔想我繼續講
長遠個人會無自信
1個讚
老公有話佢，佢亦過嚟同我道歉，咁我咪叫佢食飯先
我對仔女暫時未識駁，但係我覺得睇完呢度學到嘢，袋咗落袋!
我諗媽媽你一時火遮眼，唔太識同佢溝通駁返佢咀啫！對住小朋友，一定要個腦急轉彎！
你照同佢：唔係綠色係咩色？你又唔做快 d 同媽媽落去一齊去望下，話比媽媽聽，咁我落左去望到係綠色，就綠色架啦！你同我而家落去望下，上返嚟話我知咩色，好無？
咁樣又做到你想佢做既野，唔傷感情，記得係小朋友面前，要冷靜諗下你想佢做乜，就諗辦法令佢做，唔好介意邊個啱錯
佢駁咀口才好，好過蕃薯啦！開心 d
3個讚