小兒係18M時曾經返過一D都幾受歡迎既幼稚園所開辦既playgroup，全堂不停扭計，最後仲比學校投訴添，但我好理解點解小兒不停扭計，因為唔好話小朋友，連我作為大人都覺得悶，何況佢咁細仲要迫佢坐定定，因為小兒平時較少扭計，佢只係太喜歡自由，之後就有媽媽介紹我去左一間蒙特梭利既playgroup上堂，發覺原來小兒都可以好熱愛返學，當然老師既功勞都不少，親眼見過佢地無比既愛心同耐性，從此我就開始不停咁研究有關特梭利既野，包括學校，發覺有好多出名既蒙特梭利學校學費都真係幾金，基本上我地D一般家庭唔係個個都負擔到，後來又發現，原來香港都有好多有學券既幼稚園而家都積極推行蒙特梭利，所以都有返D署光，終於比我搵到間係屋企附近既學校係行蒙特梭利，而佢又有位比我插班，我勁開心，但到我去交註冊費時發現，老師教導小朋友既方法，同我所認知既有D唔同，即時唸返起之前係其他post有家長提到，香港好多所謂行蒙特梭利既學校同playgroup其實都唔係正規，一來真正要考到蒙特梭利老師教學既資格其實都唔易，二來因為教果班人大部份都係一直接受香港傳統既教育，所以到自己去教小朋友既時候，其實此終都跳唔出傳統教學既框框，就算間學校既環境、教具都符合到蒙特梭利既標準，但最重要既老師配合唔到其實都好徙氣，唉。。。我今日真係深深體會到，有點灰，而家希望既就係，雖然呢間唔係間正統既蒙特梭利學校，但小兒都可以快快樂樂返學啦！
2個讚
係有咩唔同呢？～
自己唔係好熟書，但感覺傳統華人係比較家長式唔容易放手，而呢種教學法鼓勵比小朋友自由發揮，所以要做到十足十係唔容易。
蒙特梭利係以小朋友為主導，會聆聽小朋友，並等待小朋友回應，當然呢D都係要係安全環境底下啦，所以以我返之前間playgroup既認知係，老師係超有耐性，唔會硬性要求小朋友去做某一D野，但我係呢間學校短短既10mins左右就見到老師好似有D趕進度咁去做下一part既野，無咩耐性等待小朋友回應咁囉
2個讚
你依家係屋企都有行蒙特梭利教育法嗎？
無錢唔好話蒙特梭利，生活都有困難
如果幼稚園唔得，咁屋企可唔可以蒙特梭利先
1個讚
有啲學校會嚴格要求老師教幾多做幾多，做唔曬嘅話可能飯碗不保。又有啲家長見到小朋友學得唔多又投訴。
2個讚
係，好難過家長果關。
我女幼稚園時，明明間幼稚園宣傳重點係少功課，唔知點解有d家長都會投訴唔夠功課
香港普通學校最唔夠係時間，又多限制，好難行到理想既蒙特梭利，搵到個近似既又有愛心既就算唔錯啦，好難樣樣有。
反而係小朋友大個點安排，如果要去咁free既學校唔駛考慮傳統學校，ischool 或海外升學係條路，但都唔平啊。
你既分享令我諗起我個囡有相同經歷
係…有時唔係老師唔想俾時間等小朋友回應，而係學校要跟教育局d活動時間要求，所以其實做每樣嘢都趕趕地
同埋少功課家長又嫌少，俾多d又話多，所以要滿足家長真係好難
你講嘅我都有類似體會, 同都同意真正蒙特梭利 (又或者華德福, Reggio Emilia 等) 係需要一定財力, 因為教職員質素背後係要好多投資. 如果金錢有限, 或者試下唔好著眼於 “蒙特梭利” 呢個字眼, 因為容易質素參差, 魚目混珠. 反而有啲有資助嘅學校, 雖然唔打正蒙特梭利旗號, 但都係以小朋友為主導嘅活動 / 主題教學, 反而相近少少. 另外最重要, 我覺得係自己屋企嘅環境, 真正安全情況下比小朋友獨立自主, 貫徹體現蒙特梭利嘅精神. 共勉
3個讚
我囡無讀N, 上咗一年蒙特 playgroup，都係負擔唔到繼續讀蒙特學校。
都會擔心佢喺傳統教學嘅幼稚園會被歧視
所以揀咗間超 happy 卷幼，好感恩有 offer
至於話行蒙特梭利嘅卷幼，我相信一定好難好似私校咁大自由度，但求唔好咁威權式管理、多啲啲鼓勵自主、多啲理解同接納坐唔定嘅小朋友，我已經滿足了(鬼叫自己窮haha)
可能努力在家蒙特梭利都會有好好效果呢
私立幼稚園要畀錢，啲家長覺得「冇嘢做」「冇顯著效果」，覺得唔值。
所以入呢類幼稚園甚至小學，家長真係要好識得做夠資料收集同懂得放開放手，10 歲前對小朋友嘅學術水平要變成「佢合格/學到 7、8 成冇太大問題就得，留力等中學再追」。講就容易但 10 個家長先得 1 個可以做到咁放。
其實係香港冇錢，好多野都好難行落去…
1個讚
見你個題寫「喺香港」，咁啱呢排做緊 uk 嘅 research，其實嗰邊都只有極少數 state school 行 montessori，nursery 唔難搵，但想駁上蒙特小學都係要$$$讀私校….
Same! 不過相反！
明知學校一定每日有功課，爸爸叫小朋友唔好做（平時婆婆湊開，婆婆要返大陸工作幾天）就搞出咁既野！
返到學校小朋友喊！
因為人人有功課交，佢冇！
為乜呢？要唱反調不如讀第間啦！
難為小朋友，一陣學會冇責任心就死！
係小朋友世界呢樣係天大事情，小朋友好慘啊
1個讚
咪係！小朋友好驚架咁樣！
我覺得呢個爸爸好冇責任心！
如果係覺得個女辛苦不如直接退學啦！
難為老師一番心機！
蒙氏教育好似呢幾年先係香港彈起？
唔知有冇長遠嘅research 證明到對小朋友長大成人，之後發展上嘅正面impact
聽最多都係外國某名人都係接受呢種教育
我依然覺得，每個小朋友都係獨特，要因材施教，唔單止要搵好學校，係要搵right school 適合bb，唔係適合家長嘅學校
所以唔洗咁介意蒙唔蒙得成嘅
1個讚
其實想行蒙特梭利最主要都係唔想小朋友比香港填鴨式既教育底下成長姐，因為自己都深深體會到果種辛苦，我由細到大都好唔鍾意返學，但到出黎做野之後先發現其實自己原來都幾鍾意學習，所以先唔想自己小朋友都係咁姐，我想佢能夠愉快中學習，其實當你發掘到學習既樂趣，自然就會覺得返學同上堂辛苦，學到既野自然就多，所以學校真係好重要，而家為有退一步再搵下邊D happy school係同自己理念差唔多
1個讚