之前我都有開 POST 講過話我老公乜都 BAN, 無論我提議D咩, 佢都 SAY NO, NO 完又唔會有其他 SUGGESTION 比返我
超長文!!! 我諗唔到可以同邊個人講, 希望比個位我舒發下…
早輪講2個小朋友都2歲半 (孖B來), 唔上 N 班都上下 PLAYGROUP 丫 (其實我地遲早離開香港, 只要機位 OK, 我地就走得, 所以我地無特別去報 N 班)
5月既時候就報左一個要父母一齊上既 PLAYGROUP, 佢都 OK 既, 上完2個月, 我諗住再報, 個老師話其實以佢地既 STANDARD, 佢地可以試下報下一個 LEVEL, 不過個時間就啱啱係兩個訓晏覺既鐘數來
我自己就諗, 都係訓早D訓晏D既問題啫, 所以想照報, 但佢就話咁樣會對佢唔好, 到時扭計乜都學唔到
我聽完佢咁講, 都明佢 CONCERN, 於是我試下搵其他班, 搵左另外兩個 CENTRE 比佢地去試, 兩間我老公都唔鍾意, 一係就嫌人地間中心太細, 一係就嫌人地D老師英文水平唔好
總之佢就嫌三嫌四, 然後佢打算唔幫小朋友再報任何野
但我自己就覺得上完個 PLAYGROUP 之後, 我覺得佢兩個有明顯進步, 起碼我見到佢係個課室到學識左咩係 DISCIPLINE, 亦都無以前咁怕陌生人, 我唔想中間斷左佢, 唔想佢地將之前上 PLAYGROUP 學到既野忘記哂
於是我決定唔啱時間都照報返個個 PLAYGROUP
報完佢蟻咬咁, EE哦哦, 話我估咩咁急要迫佢地去學野
我解釋過無限次, 佢都係話我迫小朋友去學
一個星期返一堂 1 HR 既 PLAYGROUP 咁樣係迫咩??
除左上堂學野, 我 SUGGEST 出去玩, 佢都係 BAN
兩個小朋友個太麻9X歲, 難得四代同堂, 其實成日都想見下佢地
加上其實我地遲早移民, 真係仲可以見得幾多次??
我間唔中就 SUGGEST 話去探下太麻, 唔駛耐丫, 買外賣點心同佢嘆下茶都 OK 丫
佢一陣又話落雨, 一陣又話太熱, 一陣又話阻住人, 但我聽落就係覺得佢嫌帶住2個麻煩
我又 SUGGEST 帶佢2個去阿D阿姨屋企 (我老公同佢D阿姨關係其實幾好, 但疫情後真係無乜點見過面), 講緊真係落去坐下傾兩句, 可能買2個下午茶餐去食下, 咁就返屋企, 其實都唔會好難啫, 佢又話D阿姨到時都係掛住打牌, 無乜野好傾, 又話唔肯去
最近難得有個姨姨邀請大家去佢屋企玩, 其實我覺得都可以去, 都係個句, 移左民仲可以見到幾多次??
佢又話唔好, 又話人地屋企細, 但邀請成班親戚去, 然後又話到時其實都係叫到會, 即係食街外野, 又 BAN
我個心真係沉左落去, 而家係去見佢D屋企人, 我都唔介意帶佢地去, 我都唔明仲有咩好 BAN
FINE, 我都明佢可能怕人多, 風險高, 所以佢話唔帶, 我 OK
但佢突然 SEND 個 MSG 過來, 話同我諗野好唔同, 話佢會諗2個小朋友先, 但我就會諗佢班親戚先
個下我燥左, 你咩意思??!??!?
我睇唔到帶2個小朋友去佢親戚屋企既問題係邊度, 小朋友唔駛屈係屋企有街去, 班親戚又可以見下兩個小朋友, 有咩問題???
我覆佢話我唔係堅持要帶, 只係想提出我自己既睇法
佢再覆我話無人可以左右佢既決定
我即刻唔想同佢講野…
究竟我既睇法係咪一D都唔重要?? 我想討論, 我想傾, 但係佢角度好似完全無討論空間咁
呢個唔係唯一既問題, 之前試過好幾次都係咁, 我知每次同佢有意見分歧, 佢都會一意孤行
我每次就好內疚, 好似乜都幫唔到兩個小朋友爭取咁
其實我知係要好好坐低傾, 但似乎佢最近既情緒都有D問題 (見過佢喊到抽筋, 佢聲稱佢既問題係來自我父母, 話我父母唔比空間佢去教小朋友 <— 呢個又係另一個問題)
我好驚我同佢傾又會 TRIGGER 到D情緒, 我唔識去 HANDLE
最後每次我都只有忍左佢, 但我唔可能同屋企人同朋友講
所以係度同大家講求個安慰
其實仲有好多好多次衝突, 佢每次都認為只要我地離開左香港, 咁所有問題都可以解決到
但我無佢咁樂觀, 雖然話去到外國都仲會有人幫手, 但到時大家都無左份工, 又有其他問題衍生出來
不過打哂成篇野出來, 感覺都已經好D
希望各位靚媽都過後開心快樂
