謝謝你！我都希望喺呢度嘅分享可以比做緊Ivf 或者將會做Ivf嘅JM一啲鼓勵同支持（Ivf唔係一條容易走嘅路，希望係旅途中大家一齊鼓勵支持一下大家
1個讚
謝謝你支持！我會繼續努力，其實宜家我當係寫日記，第時可以比我對寶貝睇返比佢哋知道原來佢哋係得來不易 
2個讚
謝謝你，我會繼續努力慢慢寫。
1個讚
謝謝你嘅支持！
喺台灣返咗嚟之後我就繼續睇中醫同針灸，希望對自己有啲幫助。（其實當時都有懷疑過睇咗咁耐中醫究竟有冇幫助）再抖多一個月之後，等下個cycle我哋兩公婆再去加拿大試最後一次！
終於又返嚟加拿大，又等到M嚟喇，又係時候去照陰超。講真丫今次照陰超之前，我個心都已經打定輸數，應該都冇乜幾多粒，但係出奇地今次有7粒喎。（嘩！超開心呀，未試過有咁多粒）於是我又展開咗我第三個IVF打針嘅流程！
由於今次黎做嘅心態係最後一次，今次就聽中醫講黎個中西合壁，希望多啲蛋同質地好啲！所以今次我除左毎日打針之外仲毎日都食中藥。（其實我自己好憎食中藥，不過諗到為咗要成功做到阿B，幾難食都要good一聲吞咗佢）唔經唔覺又過咗10幾日，又係時間抽蛋喇！
雖然今次抽卵都係全身麻醉，不過抽到一半嘅時間，我感覺到下面好痛（好似有嘢喺度撩撩吓）同埋覺得自己開始醒醒地，我不斷喺度縮、喺度掙扎，朦朧間我聽到有個姑娘係我耳邊講‘冇事嘅，好快就得㗎啦，唔好郁啦’，隔咗一陣之後我又開始冇咗意識咁瞓着咗啦！抽完之後一樣送咗我去觀察區度唞咗一陣，不過今次唔同嘅係老公拍醒我，佢叫我起身嘅時候我只係feel到自己好暈好wing好想瞓，跟著聽到姑娘話比我瞓多一陣，如是者我係觀察區度瞓咗成個幾鐘。
待續……
10個讚
支持樓主,謝謝你努力分享啊!加油呀!
1個讚
我慢慢咁開始有返意識，咁啱肧胎專家剛剛經過，佢就同我哋兩公婆講啱啱睇過我抽出黎啲卵泡，今次抽到五粒出嚟而且全部都成熟可以用，等佢處理好之後就會拎去用ICSI受精。（我就趁住呢個機會問佢第一次IVF嘅卵泡靚仔啲定係今次嗰啲靚仔啲呀？佢就話第一次嗰啲其實好差，正常佢哋唔會建議放返入去，不過因為我唔係住喺加拿大，所以先幫我放入去，睇吓有冇成功嘅機會）
好啦，又到咗等佢地1變2，2變4，4變8嘅時間啦，好不幸有2粒係Day 3嘅時候停左，最後得返3粒可以去到Day 5！而我今次亦都係選擇放鮮胎，我覺得反正都係放，放2粒落去起碼多個機會先嘛，剩返嗰1粒就雪起咗！
唔知係咪喺呢個地方留得太耐，超唔想再留喺度等呢14日，所以最後當我放完嗰2粒入去之後就即刻搭飛機走人返屋企。其實第一個星期唔知係咪因為時差關係，大部份時間都係瞓，食飽就瞓，瞓飽就食，成個人好relax。不過到咗第二個星期，慢慢開始適應返個時差，就開始瞓唔得多，個腦又開始喺度亂諗嘢…究竟我今次得唔得呢？好想知道今次有冇中奬呀！如果唔得嘅話我又應該要點樣做好呢？當時個腦淨係浮現咗好多問題，仲有好多負面嘅畫面。
為咗唔好俾自己亂諗嘢，我嘗試去做好多唔同款式嘅甜品蛋糕去打發時間，令自己去分散注意力，結果做咗一大堆甜品蛋糕出嚟，一下子又食唔哂，所以又停咗冇做。當一停低咗冇嘢做我又開始亂諗嘢，結果我就開始上網去睇吓啲IVF討論區，去睇下其他JM做IVF嘅經過問同分享。
待續……
9個讚
真係好難想像到個過程係幾辛苦…你好叻
1個讚
唔會生，純粹留名學嘢。
PGS/PGD就咁睇，只有做基因篩選，好似好普通野，點解加拿大果邊ivf唔包埋？如果植入胚胎日後先發現有問題，咪晒錢晒時間？
聽聞有機會全軍覆沒
如果胚胎數量少, 就未必會搏
同埋香港做既話呢樣野係要額外加錢同用時間做
(講緊要等好耐先知結果, 唔係一兩日既事)
咁樓主就趕唔切day 5 擺番鮮胎入去
有錯請各姊妹指正 
PGS/PGD係唔會包埋喺Ivf嘅費用嫁，佢係optional 嘅檢測（仲要唔係間間Ivf診所有得做），所以係要额外收費（而且仲要逐粒胚胎去計錢 ）
有啲JM會怕到最後‘全軍覆沒’而選擇唔去做，其實移植咗入去先發現有問題，除咗嘥錢嘥時間之餘，仲會攪到自己好傷身同埋心理會有陰影嫁！所以之後我都冇再放新鮮胎，有得做嘅都全部拎去做PGS。
P.S. PGS係check基因排序正唔正常，而PGD係check粒胚胎有冇父母已經知道嘅隱性遺傳疾病（喺加拿大唔係所有Ivf診所都會做呢兩個test，所以當時我係加拿大嗰度冇做到PGS)
多謝樓主詳細分享
1個讚
係呀，真係會有機會全軍覆沒嫁。
講真放咗入去（仲要好忐忐咁等14日）先知道係‘全軍覆沒’，同驗完PGS出黎先知道係‘全軍覆沒’其實個答案咪係一樣！
有好多會係因為胚胎數量少而唔去搏做PGS，寧願搏放返入去。好老實就算係比你搏到bingo，不過之後先發現有基因問題（例如有T21）到時咪仲唔知點算好。
所有地方做PGS/PGD都係會額外收費，而且最少要等兩個星期先至會知道結果。所以如果選擇做PGS/PGD嘅，多數都會係雪起咗先然後等結果。
2個讚
謝謝你嘅支持！
1個讚
一路睇你分享，一路諗起自己做iVF 既經歷。唔知係未麻醉太多，所以個人無乜記性，你既分享令回憶返返來。我當時不斷諗點解人哋咁易有小朋友，我咁困難。我小朋友宜家就兩歲半，見到佢會提醒我生命好寶貴。
你同你先生真係好叻，因為飛來飛去做IVF 真係身心疲累。知道孖B 一歲，恭喜你啊! 願你哋一家開開心心，身體健康。
1個讚
嘩！睇完啲討論區講喺香港會點樣做IVF之後，其實我有啲慶幸自己冇喺香港做IVF嫁。點解咁講？？因為响加拿大嘅醫生曾經同我講過，佢哋只會幫病人放Day 5嘅 blastocyst 入去, 唔會移植亦都唔會雪起Day 2/ Day 3嘅embryo。佢話如果連Day5都去唔到既，咁放入去做乜鬼喎？（我見到有啲JM講，醫生話粒embryo喺外面養唔大，放入去可能會大呢？）唉！嘥錢嘥時間，仲要影響埋自己嘅心情同比個假希望自己，最後仲令到自己好失望好唔開心，為乜呢？真係嘥鬼氣！
我諗諗下又覺得講得幾啱喎，我見香港個啲都係為咗要有胚胎’雪‘而會選擇Day 2/Day 3就拿拿聲雪起佢，因為佢哋怕啲胚胎等唔到去Day 5做blastocyst，怕會全軍覆沒，到期時乜都冇…得個吉。（講真丫，如果係咁我寧願唔雪，冇希望就唔會有失望嘛！你話係唔係？）
如果我同你講兩個失敗個案：
第一個，有一粒embryo喺實驗室培養，檢查咗係有缺陷，收到電話通知你培養失敗；第二個，培養完嘅blastocyst，直接移植入去，要你好忐忑咁去等14日，然後先知道係失敗！
雖然完全係兩件事，但係结果都係一樣………係失敗！JM比著係你，你又會點樣揀呢？你問我嘅，我一定係揀前者！（起碼唔使攪到自己個心情囉囉攣十幾日先啦！）當然每個人都有權選擇自己想要嘅做法啦。（呢個純粹係我個人嘅感覺）
好啦睇睇下啲討論區，唔經唔覺有到咗開奬日啦，我一早起身就走咗去抽血驗Hcg ，希望可以快啲知道結果嘛。不過當電話響起嗰陣，我突然間全身起雞皮疙瘩，個心七上八落好驚咁。（完全唔知點解會係咁！）
待續……
9個讚
多謝你！
其實自從孖b出世，我睇到其他jm嘅分享，都會勾起我嘅回憶。
IVF條路真係唔易行，見到好多jm遇到問題，都會上嚟問，亦都有好多jm無私咁分享。
雖然自己唔係咩專家，不過我係用家嘛！既然自己有咁嘅經歷，如果分享係可以幫到jm嘅，我十分樂意！有問題，大家傾吓都好！想當年，我都想搵人傾呢！
我喺度都祝福你一家人身體健康，開心愉快過每一天 
，
4個讚
結果姑娘話今次嘅hcg檢驗指數係1.9（即係今次又衰咗啦！）我未嚟得切消化呢個事實，（其實好想爆喊）就即刻打咗比我馬來西亞嘅朋友（因為呢個朋友講過如果我今次再失敗嘅話，就叫我去馬來西亞佢之前做過嗰間試下，話哂…佢都係過來人，曾經做過一對龍鳳胎同埋一個仔一個女嘛！）跟著我就打咗去馬來西亞，預約3日後見醫生，仲即刻訂埋三日兩夜嘅機票酒店。然後過兩日就出發啦（剛剛好去到m就來了）
去到馬來西亞之後休息咗一晚，第二朝一早就去到呢間診所。到咗好快就做完哂啲基本嘢，填表、簽文件同做檢查（嘩，呢間診所大過台灣嗰間好多，人又多過台灣嗰間喎！唔通真係咁勁？！喺等緊見醫生嘅時候，我就隨手攞起本小冊子睇下佢哋嘅診所簡介（因為呢間診所係朋友介紹，我就信哂個朋友，所以完全冇去望過間診所究竟有咩做同埋成功率係有幾多！）我見佢哋寫自己嘅成功率有82.5%（果陣係2018年，宜家睇返2020年都有成82.9%），喺全亞洲都數一數二嫁喎。仲有丫，佢哋解凍卵子嘅成功率仲要係100%。（咦，我見啲JM講過溶咗雪會跌grade嫁喎，佢哋可以做到同雪之前一樣grade？！咁ok 喎！）
待續……
6個讚
等呀等，出去食完個晏再飲埋杯拉茶返嚟都仲未到我，最終等咗六個幾鐘頭，終於可以見到醫生啦。一入到去醫生就好詳細咁問哂我哋以往做IVF嘅資料，用咗咩嘢藥，用咗幾多份量。之後就開始照陰超，醫生話我今個cycle 有7粒可以開針啦。我老公就好奇咁問醫生，我上個cycle 先啱啱抽完，需唔需要抖下先，等下一個cycle 先再開針呢？
不過醫生就好肯定咁話：‘你太太嘅AMH得0.64，所以每次都係得個位數字嘅卵子係好合理。今個cycle有7粒，如果唔抽等下個cycle 其實都唔會多，而且仲要浪費咗今次嗰7粒。Anyway 開針與否你同老公自己決定啦。不過，如果太太仲係後生嘅話，我都會建議佢休息一下先再做，但係以佢嘅年紀，已經唔可以再等，等多幾個月個答案其實都係一樣…甚至會越來越少！所以我會建議太太即刻開針做，最好係連續抽幾個cycle，抽到有10粒以上嘅卵泡再做埋PGS去搵啲正常嘅肧胎，咁先至會有機會成功！’（嗰一刻我喺度諗，呢個醫生都好識搵錢喎，連續開幾針咪好貴囉！）跟住醫生繼續解釋：’其實呢個係好簡單嘅數學題，卵泡越多，可以培養到好嘅blastocyst 嘅機會就越大。’
講到呢度，我同老公當然明白啦！話哂之前都有三次失敗嘅經驗嘛，當照到有5粒卵泡就只係抽到3粒，最後培養成功嘅就只係得返2粒，仲要唔知健唔健康，正唔正常喎。所以呢一刻我同老公個心都決定咗要開針。我只係想知多啲PGS嘅作用。當聽完醫生解釋，只要做咗PGS就能夠搵到正常嘅blastocyst，以我嘅卵巢狀況成功率應該有八成以上。
聽完呢句話，我老公即刻同醫生講：‘開針啦！’ 醫生跟著就講：‘其實先生啲精子嘅活躍度同形態都唔係十分好，我會開啲補精嘅supplement 比先生食一個月，希望可以輔助到啲啦！’ 就係咁，我就開始咗我第四次嘅IVF療程。
待續….…
8個讚
由於今次嚟馬來西亞之前跟本就冇諗過會即刻開針，所以只係訂咗三日兩夜嘅機票酒店，宜家我又要嗱嗱聲訂過另外一張機票同酒店準備三日之後再飛番嚟照陰超去跟進返啲卵泡。結果我一個星期入面飛咗嚟馬來西亞2次！其實喺馬來西亞做IVF嘅流程同加拿大嘅都係大同小異，不過，醫生知道我失敗咗三次，所以今次就用咗唔同嘅針藥，希望效果好啲。如是者又過咗10幾日，又係時間要抽卵啦！（今次開針，我都停咗食中藥，反正之前食住做都唔得，試吓唔食有無奇蹟出現）
到咗抽卵嗰日，喺預定時間去到診所，姑娘就安排好間獨立病房比我，然後叫我換好哂手術衫之後等叫名（其實我抽卵嗰日，除咗我之外，仲有另外五個人。嘩！佢哋真係好忙，唔怪得知平時去診所等照陰超嘅時候，見到啲醫生走上走落，原來就係一邊喺上面手術室同病人進行抽卵手術，之後又走返落去診所幫其他病人照陰超同會診）
講真丫，其實喺加拿大抽卵同係馬來西亞抽卵都係用全身麻醉嘅方法，不過喺馬來西亞就會喺隻手背上面針，一粒豆，之後再叫你吸幾啖氮氣去令到你昏昏欲睡，所以當我喺馬來西亞抽完之後，我都冇出現暈暈地同wing wing地嘅情況。隔咗一陣，手術室嘅姑娘就走黎幫我檢查狀況同check血壓，一切正常。姑娘跟著就同我講今次抽咗2粒。吓？咩話？！乜唔係有7粒咩？我即刻追問個姑娘：‘你係唔係攪錯咗呀？醫生話有7粒卵泡，點解得2粒嘅？！’（話哂今日連埋我都有成6個人抽卵泡，係咪攪錯咋！）姑娘即刻再幫我check。
等咗20分鐘之後，姑娘同我講冇攪錯到，今次我只係抽到2粒。佢話如果我覺得有問題，轉頭可以安排我去見醫生問淸楚。但係點都好，胚胎專家都係會用ICSI嘅方法去幫卵泡受精，而聽日胚胎專家會打電話通知我啲卵泡嘅受精情況。
等呀等，等呀等，等咗兩個鐘頭終於見到醫生喇，我老公就已經急不及待咁追問點解得2粒，喺咪有咩問題發生咗呀？（抽咗咁多次，今次照到有7粒係最多，反而抽得最少，一半都無，得嗰2粒）醫生就解釋，佢已經用咗兩倍份量嘅藥水，但係好可惜沖極都沖唔到出嚟，最後只係沖到2粒，所以係冇辦法嘅情況之下，我只有接受得2粒嘅事實。佢仲安慰我話，唔緊要啦，下個月我哋會繼續抽嘛。（我嗰刻係勁無奈囉！）
由於我係要連續抽卵，所以醫生就幫我計下次大概幾時會嚟M，然後再同我預約埋嗰日再返嚟照陰超。就係咁，手術之後嘅第二日我就飛咗返香港休息啦。
待續……
6個讚