另外要自己真心接受小朋友的特質自己會舒服d, 自然就唔會有希望失望的loop, 相反當佢進步左時會覺得係bonus
之後你就能引導埋大仔點接受和與弟弟相處，前提係先改變自己心態，初初係唔容易，但經常諗下佢出世個刻的喜樂，父母初心一定係小朋友能健康長大
1個讚
係啊，我贊成你接受最worst然後積極現實地面對，調節心態好重要
路過，覺得你係好爸爸然好老公。希望你地一家可以撐住。
我唔知自己岩唔岩，但係我覺得你應該同大仔解釋細佬情況，點解會有呢D行為，應該點面對同對應，我相信小朋友係可以明白同配合。
相反佢唔知咩事淨係覺得細佬打佢，佢反而更加唔中意細佬？
1個讚
搵岩中心會好好多，普通機構就真系只係一開始有幫助。打人呢d都係好經典可以解決既。
邁步Step，心橋，和協康最好。其他NGO都係一般。你可以直接問下呢d中心，佢呢個程度既小朋友，將來點發展。佢地見過咁多case，實俾到好多example你
2個讚
Sorry其實你係想表達啲乜
？不如改改，我怕樓主睇落會更加sad。。。
Last sentence as 樓主加油，唔知社會服務有無啲你哋同類家長嘅圍爐group? 有時同路人互相支持都好緊要！
1個讚
我想表達嘅係，樓主已經做得好好
不過為免誤會，都係delete post
1個讚
只係四歲、仲大把時間改善、好多高度自閉都有高智能、對某d科目特別勁、只係比較有性格、佢只係脾氣差會自理唔會要住宿舍囉、你諗太多啦
唔係個個s位都入特殊學校、s位幫到好多就入返主流學校架啦、我都有個sen小朋友、口都話放棄左好多次、瞓醒又黎過囉
4個讚
我仔都係自閉症，兩歳時都係成日打人！當時我未知佢有自閉症，以為佢係洩之後才發現原來佢想同其他小朋友玩不過未識表達！
有時會覺得同佢哋溝通唔到，不過父母都要重複又重複講！因為唔知幾時會入咗腦講返出嚟！
2個讚
4歲keep住training 係有用，佢係統感出咗問題，條路係難行，唔好氣餒，我識幾個家庭都有A仔A女，細過有做training，宜家中學返緊主流中學喇，雖然性格係有少少古怪，少少難溝通，但已經相比之前細個時經常失控已經好好好好多。
加油呀！
1個讚
阿大其實係好錫細佬，成日會保護佢，但當佢如做功課，或用好多時間砌玩具，阿細會攪破壞，令到唔想同佢玩
1個讚
屋企人係自閉症，其他人冇呢啲經歷就只會講「保持希望，繼續訓練會有改善」，但佢哋唔明白我家人自閉症嘅嚴重性。我家人唔識講野，識自己食飯但唔識清潔，日日都會傍晚 6-8 點呢段時間脾氣差會打人尖叫，由細到打都有，呢樣完全改唔到，我由細畀佢隨機搣、打到大，最後解決方法就係打返佢轉頭。佢識寫字認字但寫唔到任何句子。針灸嗰啲乜都試過，洗左唔止幾萬，係冇改善，所以最後只能安然接受。我唔敢同朋友講屋企情況，有心儀對象唔敢輕易去馬，因為父母年老過身就要輪到我照顧佢，心儀對象佢都要照顧佢，仲可能畀佢打埋一份，沖涼去廁所都要幫埋佢，佢唔介意但佢父母可能介意。人地養大我對象，唔係要黎受苦。
雖然有庇護工場/宿舍，但要計分，包括父母年紀、父母有冇殘障、冇私樓、有冇兄弟姐妹、自閉症患者嚴重程度。家人未嚴重到可以即刻入，入左又怕佢發脾氣打人同畀人打。
你所形容嘅：
返S位→特殊中小學？→等到老豆60左右就嚟排到宿舍→老豆老母瓜柴→個細路喺宿舍等死
「等到老豆60左右就嚟排到宿舍」《呢個我地全家都想吖！我父母都過左 60，有排都未輪到！ 宿舍好多係連食飯都唔可以自己做，唔可以自己行要坐輪椅，所以你肯定有排！我細個跟父母去過一次，印象好深刻。
所以個排序係：返S位→特殊中小學→等到老豆 55 歲開始排宿舍→老豆老母瓜柴先輪到宿舍→個細路喺宿舍等死
以「過來人」經歷，我可以講，你小朋友如果係輕度，咁輪宿舍嗰啲分分鐘瓜柴都未輪到你，你只能夠努力訓練等佢唔好退步，我家人中重度。俗啲講，佢識食飯，大小二便自己屙然後抹乾淨，識自己沖涼，發少啲脾氣少啲打人，就已經心足。要調整返心態諗長遠：我要訓練到佢起碼我老左唔行得嗰陣，佢都可以自己搞掂最基本，我口頭提佢就得唔洗我動手幫佢。如果情況好嘅話，起碼讀曬咁多年特殊，睇下學校或者出面中心有冇就職計畫。你要預左佢畀人呃，畀人壓榨。
21個讚
家人今年幾大？
當友人知道或同路人溝通時，通常會講：努力加油，仲有好多可以做，但我覺得最後個結果都應係“安然接受”
有時見到啲特殊學校或宿舍虐待嘅醜聞，變相令我唔係好想佢大個入呢啲地方，但到兩夫妻釘蓋嗰日又真係無可奈何。
近 30。30 年前都未有咁多人認識又缺乏支援，仲驚。父母已經講「死左之後佢賤過地底泥」。呢句好傷心，但現實殘酷。
唔知你小朋友目前係輕度、中度定重度，同埋實際自理能力，始終係細，而且自閉個譜太大，高功能可以玩到小提琴讀到主流學校有，低到連講唔到野、認唔到字、唔食到野只識得流口水嘅都有。我家人偏重。個個都唔同。如果真係讀書社交有明顯困難同明顯落後，一定一定唔好擺佢入主流，一來你自己辛苦畀老師投訴最後都要轉校，二來同學對佢態度未必好，甚至欺凌，到時候就算轉校都可能有陰影就係死都唔肯返學。閉仔好難勸，佢認定左就一定要去要做。
以前讀書有去過輕度學校接放學（雖然家人中重度，但因為嗰陣要照顧入院老人家，嗰啲學校離醫院太遠）。感覺其實麻麻，不過都冇辦法，盡左力就算。X 智嘅學校大部份都麻麻，根據做過嘅老師。
遲啲大個就更多問題，依家小朋友細未出問題，遲啲牛高馬大，九、十歲就煩。出街驚去發癲橫中亂撞，出去餐廳食飯驚佢突然尖叫全場都望住你，去旅行都變得好奢侈，坐旅遊巴驚同行團友眼超超。雖然話既然冇得改變都要接受，但唔係個個都可以一下子將呢啲全部都看得坦然。阿大遲啲大個十幾歲，可能會開始唔肯同阿細一齊出街、唔肯拖阿細，唔敢承認阿細，只會話自己獨生。阿大畢業禮、主日崇拜、彌撒，好大機會唔可以一家人一齊出席甚至坐足成個禮儀。我自己啲小中大學畢業禮都係父母撇低家人入暫託或者親戚屋企，完曬先接返佢。
唯有就係堅持「做左唔一定進步，但我今日唔做，佢就立即倒退上唔返去，所以我唔可以放手放假。」
13個讚
迷路的媽媽-愛自閉兒的路，可以去睇下。
我小孩 autism ＋ADHD Iq71 主流學校，今年15歲，從小好難照顧，容易發脾氣，及過渡活躍，由 k2發生事情，通知學校社工轉介兒童精神科，到5歲食藥ADHD, 到小學生學習上好多困難， 認唔到字，調轉啲字寫 ，做嘢好慢， 同醫生講醫生寫紙幫忙做iq test，學校唔肯做， 我同學校見咗好耐，最終做了 IQ test, 發現喺 Autims已經太遲，小學冇任何訓練， 只是Exam加時，我從小一路以嚟都adhd咁樣訓練嘅小朋友成長，自理能力，去洗手間，執功課，做功課，針灸治療多年。
當然都有情緒，打自己，唔願做， 固執等等之類……
到升中學一大考驗，不是我預期，青春期男性荷爾蒙分泌 變化好大我而家忍耐 緊， 中一試次過爆大鑊，見三個訓導主任， 亦試過阿仔比同學 挑釁出手打同學，家長報警。 我很多眼淚……
我只能等青春期過去……
15個讚
講中度智障加自閉小朋友點樣改善，讀埋band 1中學
中度智障 IQ 大約係 35-49 喎！讀到主流甚至係 Band 1 都應該係輕度。
佢話情況差，但自閉嚴重情況黎講，佢哋係好幸運，好輕微。
介紹大家睇 《向星星祈願：50＋1個克服學習困難的故事》
大家加油 
新ac原來有發言限制
覆返上面，唔係好想參照啲自閉名人經歷，有人話“佢都得，你都應該得”，但我想講，呢個世界只有一個Bill Gates，一個Steve Jobs，你做唔到就係做唔到。有啲嘢努力唔一定得，特别係先天嘅嘢。