同大家say個Hi先，睇左好耐但依家先開ac
本人有兩個細路，細仔今年四歲已確定為自閉症(偏高度)，今年仲返緊主流幼稚園，黎緊9月就會返S位。
自從佢未夠兩歲去評估後，太太一直都會搵好多訓練班，協康救世軍循道衛理，私營公營資助錢費大大小小都有，老實講，我唔覺得真係特别有效，或者上果幾日有效，好快就打回原形。而當太太好努力去嘗試時，我唔忍心撥佢冷水。又或者只係我無發現佢進步？
然而，我對未來係相當悲觀，而就我所搵返嚟嘅資信，自閉症根本解決唔到，唔好話返工返學，就連基本自理能力都好低。好多人話有成功例子，但我只覺得佢地可能只係輕度自閉，訓練先有幫助，又或者，好多人想畀啲希望我地呢個族群，但我好拒絕呢種假希望。
就我觀察就係咁：
返S位→特殊中小學？→等到老豆60左右就嚟排到宿舍→老豆老母瓜柴→個細路喺宿舍等死
係咪去到咁嚴重呢？自理都唔ok?
我見過類似，主流學校拉牛上樹咁，幼稚園已經閱讀困難，最後讀到中三，做份清潔工咁樣，而家可能填份表格都好有困難
食飯大小便ok，超級我行我素，好鐘意打人
打人可能真係要改
太太有時好頹咁呻，我只能安慰佢，其實我都好沮喪，但唔可以喺佢面前表露出嚟，如果我都冧，相信佢更大鑊
路過，唔識呢方面，但想salute 你同你太太，睇得出你地已經比最好既野比個仔。灰心有時，失意有時，上天比個自閉症小朋友去你地身邊總有意思，希望你地堅持住。
想問一下，你大仔幾歲？有冇同佢講細佬情況？將來都要比佢知佢要點幫手照顧細佬
其實只係偏高，評估係咪話等如高度自閉？
你將佢主力訓練到叻一兩種技巧，入一個啱佢嘅行業，發揮到，佢開心就得
我相信中心會比到好多資訊你哋，如果你唔怕問，甚至可以問定佢哋最差嘅情況，你哋慢慢接受
佢哋嘅世界同我哋好唔同，佢哋唔需要過社會定義嘅所謂理想人生，你要明白呢點
好爸爸，一家人，有愛，有扶持，冇嘢係唔得嘅
慢慢嚟，冇得急
我記得有朋友幫佢個仔試過針灸，work嘅，但佢個仔係輕度，你可以去浸大研究一下
唔想因為個細嘅而令大嘅浪費或耽誤人生，生於現今香港已經好辛苦。我個人諗法係由我同太太全力照顧細仔。
試過，仲活躍左 
我明白，你兩公婆好叻好堅強，不過我咁諗：大家係一家人，一家人係要接受不同嘅問題，你大仔都係你家庭一份子，你唔好凝住照顧細佬=耽誤佢，可能同輩溝通唔同，可能佢都好接受細佬係咁，你留意下同佢溝通下先
我離少少題，我記得有個媽媽生bb時不幸腦癱，個老公、外母、工人輪流照顧，個女慢慢大個仲幫手，而且同人講好自豪有個不一樣的媽媽。我睇到好感動，希望搵到段新聞
多謝大家對我嘅鼓勵
明白到，好多人都覺得我地特殊兒童家庭係需要“希望”行落去，但我個人比較唔想咁自欺欺人，希望落空時只會更難受
大唔同細玩，有次我問佢點解，佢答我：我想同佢玩呀，但佢成日打我
我好欣賞你唔想依賴假希望，想一嘢諗定最壞情況，我覺得都係一種現實方法
但你有最壞打算後一樣可以積極樂觀面對，係咪？
仲有好多嘢可以做
都係：希望。失望。唔理。再理
無限Loop
好似自閉症電影黃金花個英文名咁：
Tomorrow is another day
訓練係有用的，仲要配合日常家長自己同小朋友訓練都好重要，同治療師多溝通
唔知你有冇睇過一位叫“迷路媽“的page, 你可以search 下
太辛苦時揾d同路人或社工傾下，加油
咁唔使極度正面充滿希望嘅，現實地處理事情，提升你細仔生活技能，提升你一家人生活質素，日子一樣會過得好
你集中訓練細仔一兩種技能，例如改善脾氣，接受佢嘅不完美，比佢感受到你哋嘅照顧同愛，將來無論佢點都有你哋支持
自閉症兒童睇得好多，反而想睇下d長大左嘅，比我有個心理準備都好。有時見到d特殊學生等校巴，但又分唔到佢地有咩智力問題
我都有ASD仔阿氏保加，雖然輕微但照顧非常辛苦，同你太太一樣，確診後不停揾方法去訓練，付出左好多時間，金錢，心血；唔係無改善，只係慢。
後來遇到位好好既心理學家，佢認為最好治療師係父母，佢叫我睇多啲有關書，自己學去訓練，果然成效比上堂有用。因為無時無亥去訓練，去教，當老師對佢行為有疑問都解釋到比老師知。
阿仔已經中學，行為有時古怪固執，不過係主流學校無問題。
有機會睇下Dr. Temple Gardin既書, 佢本身中度自閉成為左動物學博士，佢用第一身自閉角度去睇世界，你會明白有時點解會有奇怪行為。
加油！