同老公拍拖加結婚已經十年，佢大過我幾年，比我成熟。拍拖時每星期出一次街見面，其餘時間都係講電話。
結婚幾年，冇度蜜月，之後都冇咩一起去過旅行，平日放假都係落下街食午飯，買餸買日用品咁就回家。
我覺得過得好平淡，其實有時候我都想同佢有多啲有質素既相處時間，那怕只係一齊去遠少少睇下戲行下街，去下好啲既餐廳食下飯。但呢啲我地都冇。我唔知係咪我太港女，追求呢啲野，講出嚟又會俾人話結左婚都咁唔成熟。而事實上佢又覺得日日係屋企，冇約自己朋友出去玩已經係陪緊我，究竟係佢太冇情趣定點？
到bb出世，因為安排邊個湊，點樣湊既問題，又有好大分歧。所有安排都係諗bb，咁我都好理解，但有時啲決定係完全忽略左我。你話bb 出世有啲野迫不得已就話姐，但我基本上由結婚後都生左都被忽略，佢有冇一刻諗起過我？所有野好似工廠分工咁，冇考慮過人既感情需要。
佢返工好忙，壓力都大，成日都拎野回家做，我都體諒佢唔會出聲要佢陪我，但耐左就變左咁局面。呢啲分歧，究竟係男女既分別，定真係佢大過我，所以諗野比較理性成熟？係咪個個結左婚都係咁？結左婚出左仔仲期望有得二人hea下浪漫下係咪太港女？
3個讚
唔係啊，好合理！
有冇試過自己安排二人世界？
可以試吓提出先，睇下佢有咩反應！
愛情對好多男人黎講係100米賽跑，而婚姻就係終點，都到左終點，仲使乜跑
12個讚
黎個擁抱先~ 同你所有背景情節幾乎一樣
只能夠盡量搵機會兩個人出去食餐飯咁咋，同埋我慢慢會將我自己感情需要轉去阿b度，佢成日話我錫阿b唔錫佢，咁緊係啦，你咁少陪我🥲
我情況比你好小小就係未有小朋友之前年年都去幾次旅行，但依家有佐bb之後好多野吾同佐，生活方式要慢慢去適應（雖然我都係適應緊）
講多啲你嘅感受出來，好多男人以為你冇出聲就冇問題，加油
1個讚
我老公都係咁，係一個好冇情趣嘅人
同你嘅情況都係大同小異
一開始拍拖嘅時候，我已經有心理準備，同佢一齊係會悶，但係佢有責任感會好好照顧我
而家有埋小朋友，我哋都係將所有心機放晒落小朋友度
有時都覺得佢錫小朋友多過錫我，都冇辦法，我都會錫小朋友多過錫佢，一定係小朋友擺第一位
1個讚
一邊睇一邊腦中響起古天樂同謝安琪個首一個男人一個女人和浴室
屋企每個人既需要都要被照顧，如果你既需要係高質素既陪伴（例如係咩要說明），唔係過份既要求都應該被正視而唔係ignore, 或者被label 唔成熟。咩係唔成熟？邊個去define成熟？呢度係屋企唔係公司，公司要成熟處事係明白既，但呢家係屋企in between 2個人既關係，由邊個定奪？
愛情都需要滋潤的，除非大家都默許昇華成親人個種lor.但我覺得樓主心中出現警號了所以先出呢個post, 要follow your heart 去正視啊。
1個讚
有時想就安排下，我有時想食啲好餐廳，就自己搵完再叫我老公一齊去，佢對食完全無要求，但都會陪我去，例如staycation, 我老公都無興趣，咁我又自己book 再一齊去,唔駛怕咩港女，咁都係對住自己老公有咩所謂。
我覺得普遍男人都係怕麻煩，無咩情趣，但其實陪你去一般都ok
1個讚
有提出過，但佢會話唔去。
可能提出十次先有一兩次會應酬下我 -__-
咁你起碼可以專注係錫bb度。
其實我未想生，但我老公覺得是時候，因為佢大過我，我就配合左佢。湊住bb時都會覺得好矛盾（唔好打我）
我又唔係唔理bb既，但唔係母愛氾濫個種囉。
或者咁講，如果過夠二人世界再生bb，咁樣會好受啲，但我地結婚幾年其實冇認真過過好sweet既二人世界，到生左，又冇咁既空間。大家有共識就冇問題，但我地唔係。我以為係體諒緊佢，原來積壓左咁多年冇刻意講出黎，自己有啲情緒都唔知
2個讚
我最初都係有哂心理準備，知道佢係個好實際既人，有承擔，其實以結婚黎講，係好好既對象，不過都係個句啦，咁耐都係咁就好乏味。我都唔係外向追求多彩多姿既人，但我都會想有合理次數既出去娛樂，拍拖。
結婚前諗節目，佢提議去花展。結婚後我話想去，佢話唔去。我問：結婚前你又主動提出，依家結左婚係咪覺得得米喇，咩地方都唔使陪我去喇？佢好坦白話係 
本來呢啲野一定係你陪下我，我陪下你，但佢冇咩嗜好，我都冇咩機會陪佢，所以冇得拗 🤷
未生個陣二人出去茶餐廳食個飯，嚴格來說都唔係拍拖，但都叫做二人出過下去，借機可以拖下手仔。生左之後好少帶bb出街，變左一定要有一個人留係屋企湊bb ，一個出去買野，真係完全冇二人出街既機會。
咁點解唔一家三口出去呢？因為疫情，而且帶bb出街好大陣仗，寧願唔出好過🤷
1個讚
有無人幫手湊bb一陣？比你地兩公婆去食個飯都好。
有咁嘅需求唔過份呀，我見唔少父母生左b後幾個月，個b比長老睇住，兩公婆就去旅行。
你形容你老公係一個好實際嘅人，我想澄清番，實際嘅人≠冇情趣。
我同我老公都係好實際嘅人，即係唔會聖誕節個個人都出街食飯嘅日子出街食飯，都唔會情人節嘅時候送花因為嗰陣啲花係最貴。但係唔代表唔會做一啲花錢買開心嘅事。
好簡單，你老公想要BB係為咗傳宗接代，定係因為好愛你所以想有個同你一齊製造出嚟嘅小生命？
如果係愛你行先， BB嘅事永遠都係會排第二，你先係第一 。
1個讚
好明白你，其他人會同我講，
個個人結婚都係為生仔，
人生就係咁傳終接代，
一代傳一代個個人都係咁過架拉。
你太幸福啦你
唔識點換位思考諗吓老公幾禁辛苦。
呢個邏輯好有問題，下次有人咁樣同你講，你回應返佢以前啲人紮腳唔見你而家會紮腳？
以前啲人飲井水你做乜唔飲井水？
係咪要堅持盲婚啞嫁先啱呀？
唔好嘅嘢就係會改變，改變左唔代表一定會即刻好，但只要係向好嘅方向改變就會有好嘅未來。
夫婦感情都係，如果以前嘅諗法唔啱，就應該反思然後向一個幸福嘅方向出發。
樓主，我唔認為你嘅要求好過份，結咗婚都需要有愛嘅表示，需要互相珍惜。例如如果你哋冇四大長老幫手湊，星期六日可以請一日保母，用嚟拍拖。
你老公娶你之後仲要你生埋BB，梗係覺得坐定粒六唔會失去你，所以就完全唔使氹你錫你。
咁你就真係要做啲嘢話佢知你隨時離開佢，等佢知道你係佢身邊並非奉旨。
反而我家姐會勸我，
得閒打扮下自己。
著靚同老公拍下拖。行下街。
唔好禁快好似老夫老妻咁生活。
咁佢好快會睇嫌。
2個讚
唔好鑽牛角尖啦
你想去街去旅行咪主動啲囉
可能你老公比較宅啫
佢嘅性格你清楚卦
試吓約佢睇吓先啦
你係媽媽吃bb醋嘅？莫講你老公以bb為先，
你唔係㗎咩？
試吓你做主動去安排，到時同佢明示暗示鍾意咁樣兩個人相處、兩公婆咁樣二人世界好開心等等，睇下佢識唔識做。
有時男人都要有所感受先發現「係喎！原來咁都幾好」。
我一聽到一定剷佢，個仔叫佢自己湊，我會出去搵節目直至佢驚為止
3個讚