155cm高，2X歲，第一胎有BB前83磅，生BB前磅重102磅，坐完月已經落到85磅。
第二胎半年後87磅。
第三胎頭3個月食唔落嘢，陀到第3個月85磅，有返胃口之後孕期重得好快，以前完全唔做運動，但見自己重得咁快，陀第3個月就即刻做運動，做ringfit，每日做兩個鐘，會流晒汗，生BB前一日118磅，生完一個禮拜後上磅109磅。
一坐完月就開始做運動，呢個時候係102磅，每日跟Coffee啲片做一個鐘。手，腳，肚嘅運動都有做，唔係好見效，再試埋168斷食法，試咗一個月去到95磅，但好似去到平台期，再試186斷食法，再跳埋鄭多燕，均衡飲食，食好多菜，再加烚蛋同雞胸肉，有一個禮拜每日淨係食800卡，最輕去到93磅，跟住慢慢反彈，做咩都好似無用咁。。。
今胎因為疫情關係，謝絕探訪，坐月都係自己坐，嚴格嚟講其實無坐過月，有嗌月子餐，但都揀啲好清淡嘅餸，自己細細個已經唔鐘意食飯，所以坐月淨係頭一個禮拜先有食過白飯，每日都係我幫BB沖涼，好彩傷口唔算好痛，仲要換片餵奶做家務，因為我唔鐘意同人住，所以無請工人，每日都做到死咁濟。。。成日見啲人話生完湊BB好辛苦，自自然然會瘦，真係想講，辛苦還辛苦，瘦還瘦，兩樣嘢係完全無關係。。。我仲要自己湊3個，大嗰個3歲，第二個兩歲，全部都好細個要照顧。同埋我3胎都餵人奶，其實我覺得對我嚟講餵人奶係瘦唔到！頭兩胎我覺得瘦到係唔關餵人奶事，我覺得係因為本身瘦底所以瘦得返，所以今胎瘦唔返真係好意外好傷心。。。
今胎瘦唔返驚自己係身體有咩毛病，今胎有妊娠糖尿，生完做過耐糖測試，宜家無糖尿，本身有多襄卵巢症，做咗婦科檢查話宜家情況係好輕微，跟住又驚自己甲狀腺有問題，甲減會肥，驗過血都係無事，喺西醫角度，瘦唔到都係擔心有呢3個病，但都係無事。
宜家睇緊中醫，醫生話我啲血好杰，血液循環唔好都對減肥有影響，食咗一個禮拜中藥，暫時未見效，宜家體重係99磅，距離87磅仲有12磅。。。
呢排又有好多嘢煩，減唔到肥已經令我好抑鬱，每日嘅工作已經好攰，就嚟搬屋又要一個人執一家五口嘅嘢，肥呢個問題已經令我喊過無數次。。。試過有一日起身見到自己咁肥喊咗好耐。。。我知道情緒都會對減肥有影響，但見到自己咁肥就好唔開心，唔開心又減唔到肥，不斷惡性巡環。。。
我知道減肥唔係淨係睇磅數，肌肉重過脂肪，但我望落去真係肥過以前好多，仲要之前做ringfit唔係係咪做深蹲姿勢唔啱，做到大脾前側同外側好大舊肌肉，肉側又多脂肪，完全唔知可以點做。。。
真係好灰心。。。好想減到87磅，完全接受唔到咁肥嘅自己，朋友都覺得我肥過之前好多，我真係唔想以後嘅人生都要帶住咁肥嘅身體過落去，究竟我可以點做？。。。
1湊3冇工人都瘦唔到？
