而家環境咁, 同老公傾左好耐最後都係唔請陪月, 好彩老公同公司傾左可以work from home, 2公婆湊new born, 會唔會好難? 有冇過來人可以分享下?
1個讚
咁邊個煮嘢俾你食？
佢會wfh 幾耐？
我覺得湊 new born係辛苦，尤其夜晚餵奶，冇覺瞓。我果陣都係兩公婆自己搞掂，係得下晝有一餐亞媽煮俾我食。但捱捱下就捱過咗了
2個讚
其實我覺得最緊要既地方係食這一方面
如果解決左 我覺得同老公一齊湊都冇問題
2個讚
其實唔係唔得，叫月子餐，減少煮食，如果可以train到全埋身，就洗少好多野
湊new born 都係食訓柯，2人輪更，最緊要有得訓，媽媽要食好d補身
1個讚
唔太難，如果生產順利，BB不用照燈(黃旦)，出院後，母休息，爸負責買餸/或order買餸送上門服務，2個人一定攪得掂。
Me 
老公被放3個禮拜無薪假（但有一半時間都仲係wfh）最重要係你同佢溝通好佢知道要做啲乜同埋有啲家務唔urgent就冇咁攰先做啦
媽咪淨係會煲湯俾我飲
利申: 我冇100%跟足坐月嘢亦冇order/煮月子餐
我當日冇請陪月，冇長老幫手，冇工人，老公要返工，主力自己湊。
食方面，我已經寫好餐單，都係蒸餸同湯水，老公每日負責買同煮定，我整返熱就食得。
加油，媽媽。
1個讚
唔冼怕！
兩公婆最緊要有商有量，合作，其實問題唔大。開頭辛苦少少，但亦好有樂趣！加油
比定最壞情況你：初生最難係你哋新手+bb都新手黎到，佢未習慣呢個世界會好冇安全感，好難安靜，少少嘢足以令佢大喊，又好難入睡，預左佢會好醒訓。佢個胃又未成熟，一日會嘔幾次奶都唔定，食得慢，辛辛苦苦餵完佢食之後即刻嘔哂出黎，換衫洗衫搞到你人都癲。餵食慢側1小時，掃半個鐘都未er唔敢放落床，抱直多20min～半個鐘，想放落床訓就大喊，氹訓花一個鐘以上，到佢真係訓到就已經要下一餐奶，無限loop，身心疲累。
媽媽又有好大機會產後抑鬱，好容易少少嘢就好緊張會喊，未習慣Bb 喊聲嗰時聽到佢喊哂唔知佢需要啲咩自己乜都做唔到嗰種無力感真係你都會想一齊喊。老公亦唔係好理解點解你會少少嘢又發脾氣，然後就會產生好大磨擦⋯⋯
同埋真係要傾好邊個負責做啲乜，期望管理好重要，男人唔係唔幫手，只係懶散，餵完奶就即刻想放低Bb，掃風又hea，搞到好易嘔奶，包尿片又包到漏尿漏屎⋯⋯一日可以幫Bb換4件衫加幾套床品（一定要即時手洗左啲污漬先），洗衫洗奶樽嗰啲都唔放心比佢做。
我有請陪月都覺得頭兩個月渡日如年⋯⋯
5個讚
我覺得最關鍵係睇個bb好唔好湊，同父母既默契同心態
我地唔想勞煩四大長老，老公又要返工，放工返黎都要繼續做，加上老公份人粗心大意，唔識煮飯唔識湊仔唔識料理屋企，所以我請左工人
但主要都係得我同工人兩個湊
BB好湊就好易過，仲會唔捨得佢大得太快；但BB難湊就真係渡日如年
我覺得ok,不過煑食方面要安排,好似有坐月餐之類！
另外一定要有洗碗機，唔係奶樽洗到人都癲！
我第一個好易湊，自己攪掂都ok.第二個超級難，3個姐姐都差d攪唔掂！
1個讚
我建議你至少請陪月，有多一對手鬆動D，心情會定好多，我好好彩兩個仔都係6星期左右瞓過夜，之後就覺得兩個人都可以
前提係以下幾點，你考慮下：
1）媽媽生仔無複雜情況兼且回復得好，阿仔無大礙 <- 呢樣你唔會知，到時如果要出入醫院，有第三個人喺屋企打點三餐、洗下BB仔衫，甚至湊住BB先會好D
2）無傳統坐月的觀念（唔可以掂生水，唔可以企高蹲低等）
3）你同你先生的EQ係超超超高，係講緊你地十幾廿日唔夠瞓都仲可以有耐性、面目寬容咁對住對方同埋BB。尤其是你老公，媽媽產後的情緒老公基本上係硬食。
4）爸爸媽媽唔係新手，可以好有效率咁照顧到BB，好快令BB可以瞓得長、唔嘔奶，同埋對BB的發展幾清楚，心情relax 〈- BB首一兩個月好多身體變化，新手爸媽會好想知"正唔正常"，點安撫BB等，有個熟手既人帶住會好好多
5）預先買齊嘢、屋企set up 得好 <- 我第一胎時基本上靠陪月同我地一齊商量換片、BB床、BB沖涼的安排，佢地多經驗好快可以set up 到，期間好多時有嘢要添置，要人手去買
6）媽媽產後荷爾蒙唔大浮動 <- 呢樣你都唔會知，產後荷爾蒙有可能會令媽媽抗拒異性（唔止身體接觸，係覺得面目可憎）、心情會大起大落，如果媽媽無咁辛苦同埋有個人分享下心情，會適應得好D
7）媽媽唔急住喺產後紮肚 <- 紮肚時好唔方便行動，基本上要靠其他人服侍
分享少少，我生兩胎都有請兩個月陪月，陪月收工之後就係我同老公湊，初生未瞓過夜/有時瞓得唔好/打完針發燒，夜晚半夜要兩公婆輪流湊，每人三個鐘咁。換言之自己瞓多陣就等如對方要熬多陣，但成個月唔夠瞓有時真係會起唔到身，尤其是男人無產後荷爾蒙幫手（媽媽會俾BB輕輕哎一聲叫醒，但男人唔會，全憑意志），老公瞓過龍發現我頂多咗時間會內疚，所以佢瞓都瞓得唔安落，發好多夢。我地當時就好需要有第三個人間中頂一頂，令我地可以安心瞓下
爆片整污糟哂的衫、要洗的奶樽泵奶配件、家務到時唔係你就係我，好容易有磨擦，如果對方有嘢做得唔夠好（例如無手尾等），會好燥底⋯⋯ 因為好多時你餵完BB、掃風、換片後已經好攰，就係得喺下餐奶前呢段時間你可以休息下，但仲要捱到做埋家務，會覺得沒完沒了，少少唔順都會炆陣
寫到好長篇，其實係想你考慮清楚，有個realistic expectation，到時你同你先生都可以handle 得好D。你要記住你唔係湊一兩日，亦唔係湊24小時，係湊24小時x至少一個月，係720小時唔夠瞓，搵多D幫手，搵多D support啦
9個讚
我BB依家6星期大，我地本來係完全唔識湊仔，連換片都唔識！頭一個月有日間陪月，但夜晚都係靠我地兩個，開頭真係雞手鴨腳，仲要勁眼訓！好彩BB算乖，依家佢夜晚餵食時間係11pm - 4am - 8am。有問題我地會google，亦可以睇youtube學習育嬰知識。真心講句：暫時比想象中容易！
無4大長老無工人姐姐無陪月,我男人仲要返工,自己坐月兼湊 newborn 
我覺唔難,但要自己控制好情緒!一聽到 bb 喊聲,係眼見安全情況底下,緊記照顧好自己先!!!你安全先可以照顧到佢! 
試過有轉我好熱要去沖涼, bb 喊,屋企剩得我同佢,自己都想洗下下底惡露…佢一爆喊,我又驚又唔捨得走開!呢 d 時候同自己講,照顧好自己先!望下 bb 床呀、被呀…全部物件拎開晒,0意外底下…我就安心沖涼洗下底 
諗返轉頭,唯一就係無力煮好野食,建議搵定坐月餐送上門,營養唔少得!自己湊同坐月一定無問題 
我仲慳左陪月錢買左成屋野比阿 b,你話吹唔吹漲呀?今時今日幾年後都未用完 
5個讚
好難講, 如果係豬隊友就難囉
1個讚
你老公只係WFH，唔係唔使做喎，佢工作忙唔忙﹖佢預咗會投入好多時間心力湊B未﹖
其實冇話唔得既！要俾多啲野老公做！
因為一般男人都唔「醒水」，唔講出口 以為你搞掂哂！
冇陪月小問題，我都冇請！（唔係錢問題，係我開刀，跟本唔食得咩，曬氣！）
冇姐姐會攰啲，因為冇人幫手執頭執尾！食完奶，奶樽沙巾叫男人洗！
（就算佢洗得唔好，要執手尾，都要叫佢做！俾返個責任感佢）
買餸個啲點？男人識唔識？唔識提前教下佢！其實都係蒸下肉餅，蒸下雞！煲個魚湯！
Wfh都好，夜晚起身餵奶，下午可以搵時間訓一陣！
如果你餵人奶，一定要搵時間訓晏教！補充體力先有多啲奶！