精神科醫生開左血清素俾我，話我係嚴重產後抑鬱，食左三日，個人更加無乜動力，連湊bb都有逃避嘅感覺
只想攤喺床到。。。
有冇家人可以幫下您湊bb?如果經濟許可，請下鐘點/姐姐。醫生比您嘅藥，要按指示食，但唔會一時三刻就好返
2個讚
曾經經歷過，所以好明白果種辛苦 
血清素初初食係會有啲副作用㗎，個人真係會好冇精神同冇力，所以最好揾人幫手湊BB同處理家務，俾自己可以休息多啲！
初初係試藥階段，係好辛苦㗎…但都先盡量跟醫生分量！除非仲有其他副作用令到身體實在頂唔順，就最好早啲同醫生講，睇吓需唔需要調整份量或轉藥！
請問你食左幾耐先好返？醫生叫我可以照餵人奶，但都驚對bb有影響
有工人媽咪幫手湊，但我望住個bb係想逃避。。。
抱抱jm，想逃避就逃避呀，短暫休息照顧左自己先，先可以照顧BB，有冇先生同長老幫你一陣？
1個讚
同埋我連食飯都無動力，可以一日食得一碗飯就算
咁您生完bb之後，您覺得變化最大係咩？有咩令到您咁困擾？
我自己2年先停到藥…不過記住，每人都唔同㗎！我果陣係本身已有啲情緒問題冇理到，之後就爆煲到非常嚴重，所以先要食咁耐藥
醫生話無問題都應可信嘅，不過最重要都係以自己最舒服安心嘅選擇做決定較好啊！如食住藥餵人奶會令你擔心，其實轉餵奶粉都無問題㗎！最緊要令自己舒服！
記住，要先照顧好自己，先有力再照顧好BB ！
1個讚
想請教有冇政府醫生可以介紹？邊間醫院好啲？
我唔係媽咪，未必了解到產後的壓力，不過有食過血清素同其他抗抑鬱藥，開頭係有攰好眼瞓，記得嗰時返工坐係電腦面前係掙唔大眼，跟住同醫生講佢就減我藥，調教到啱嘅藥力之後就變得心境愉悅，食得訓得（食藥前睡眠質素極差）。
同埋血清素係要食咗一陣先起到真正嘅作用，你而家嘅冇動力有可能係壓力所致，暫時都係跟住醫生指示食藥先，下次覆診同醫生講吓可能藥力太勁，睇佢點調教劑量俾你啦。
最重要係自己身體健康，一定要俾自己好好休息，其他野唔好諗咁多住。
1個讚
想瞓就瞓，起碼狂瞓一星期
瞓覺可以製造血清素，起初一定成日瞓既
3個讚
嗯⋯⋯政府醫生唔太熟啊…我自己果陣係睇私家嘅精神科，因自己情況太嚴重而且身體差受唔到重藥，而且聽人講過政府用藥會重啲又少用新出嘅靚藥，所以去咗睇私家
不過依啲情況因人而異嘅！我睇果個醫生佢私人執業前都喺政府醫院做咗好耐，所以相信公立醫院都會有唔錯嘅醫生的！
如真係有經濟壓力但又唔想等排公家咁耐，可以先睇私家醫生幾次，較好藥，再請醫生介紹，幫忙寫信去公院排期！因食抗抑鬱藥真係長期戰，即使較好藥穩定咗都唔可以隨便減藥停藥，所以經濟上有一定嘅負擔！果陣我醫生都有提出過這建議的，都可以參考吓的！
1個讚
Can u pm the name of dr. 感謝
1個讚
我pm咗你啦！不過唔知成唔成功，你睇吓收唔收到？！收唔到你可試pm我啊
1個讚
趁時間隙，多d出街曬太陽+散步/做伸展
盡量擠到每日最少半個鐘係屬於自己
2個讚
支持你 （抱抱
1個讚
樓主，我冇試過抑鬱，但我有好幾個朋友試過，仲食血清，佢哋都話當時係好辛苦，但瞓得夠，有家人支持就會克服到
佢哋事後話我知好感恩冇事，因為原來人生有好多嘢想做，世界咁大好多地方未去，你都一樣
冇嘢係唔得嘅，有乜上嚟呻，好多人聽你講支持你㗎
抑鬱係會令人冇動力做任何野，再加上初初食藥啲藥力未見效，會更攰，所以冇胃口都正常嘅，甚至會食乜都無味
可以食到幾多就幾多，真係食唔到都唔好迫自己，或者可以試吓少食多餐！
我果陣第一次試藥，係冇胃口之餘仲要胃痛和作嘔，超級辛苦，果陣真係即使對住自己最鍾意嘅食物都零興趣…所以如唔止無胃口，仲要有腸胃唔舒服就要注意，就早啲通知醫生，因隻藥可能唔夾或用量太重
如無腸胃不適，都可以試下慢慢適應…等到覆診時再同醫生講胃口差依樣嘢，睇吓佢可以再點幫你
明白你的辛苦 
抱抱你 
慢慢來，每人步伐都唔同，唔好俾壓力自己，你並不孤單的！多啲上嚟同我哋傾吓、抒發吓情緒
3個讚
我都經歷左兩次產後抑鬱，第一次硬頸唔肯食藥，又迫自己餵人奶，所以拖左幾年啲情緒都係好差，我完全無咩享受過育兒既快樂。
第二次係大既差唔多五歲，呢次因爲教會師母迫我我先肯睇醫生食藥。我既爆發點係餵唔到人奶，所以食藥之餘仲停埋（試）餵人奶，果時細既得幾星期。開頭幾個月，日日喊。食藥要等幾個月先可以等藥發揮得最好，果幾個月日日喊，日日message比朋友，日日罵自己無用餵唔到奶，頭一個月真係唔想照顧bb，又瞓唔好經常發惡夢。不過，啲藥發揮功效之後，加上我有信仰，有好多朋友幫，所以第四個月就慢慢變得更好，第五個月我一拖二帶住我阿媽去左個旅行，第八個月我移居左去另一國家。藥，因為我係第二次，所以食左兩年，我斷左藥宜家一年，感恩都無咩問題，食得瞓得。
我想分享既係，要有盼望，係會好既，產後抑鬱係治癒率好高既，要有希望自己會好快好！
另外，一定要食野，我第二次知道我唔會再生，怕坐月坐唔好會好似第一次咁身體變差，所以我迫自己食野，唔食到都要飲左啲雞湯，所以我第二次就算年紀大左都無話好易病。
瞓覺既問題，我食藥之餘仲有食melatonin, 係perfectly safe既，你瞓唔到可以試下，我係外國唔洗處方都買到，你可以問下醫生，幫助睡眠。我食左三個月之後就無食，因為已經瞓到覺。
頭三個月啲藥未見效時，醫生要我每日散步十五分鐘，西人醫生無坐月觀念，但我明白運動會產生血清，所以坐緊月時零下二十度我都岀去送女返學放學。其實都真係有幫助，離開下個環境同bb，有個安時間，對情緒好有幫助。
我第一次真係對食藥好反感，覺得自己要win，但第二次我發現，要醫好自己先可以行更遠既路，先係winner,所以好乖咁食足兩年。
希望你既情況可以快啲好！瞓覺一定要瞓到六個鐘（果時醫生要求），等到bb 開始笑，開始戒夜奶，開始同你玩，闘始玩口水，你個世界會好快有返色彩！
當我病時係咩興趣都提唔起勁，有個護士同我講，要迫自己pick up返個興趣，咁個動力會慢慢返來。佢講得岩，我迫自己焗左幾次蛋糕之後就係慢慢有返動力。
加油啊，你同患左感冒無分別，好快會好！
9個讚