我唔鐘意小朋友㗎
但好鐘意自己嘅小朋友…
所以無怨無悔，仲覺得好感恩
有小朋友後先真正感覺到幸福
但我依家見到其他小朋友依然0感覺，完全唔想理佢地，對自己個小朋友就好有耐性（本身係燥底）
3個讚
女人對女人最殘酷 <-- 講得啱, 所以我先討厭女人畀壓力其他女人…
1個讚
To be fair 講下反方論點
鍾意梗係皆大歡喜
萬一唔鍾意咁點 收唔到科架wo
唔好淨係考慮大人感受
考慮下被大人拎黎做實驗的小朋友
唔通真係話佢地唔好彩投錯胎咩
佢地一出世係有得到父母疼愛的權利
如果因為大人的不確定因素
而令小朋友的童年蒙受陰影
我覺得呢件事係折墮既
大人唔生 以後後悔 都係大人自己負責番
大人生左 以後後悔 其實係小朋友承擔囉
5個讚
到! 最後生左一個…對住仔仔非常開心sweet。當媽媽後, 你會發現自己原來有無限愛心和耐性
**仔8歲了
1個讚
我同你諗法一模一樣。
結婚衰左最多影響自己，責任自己承受返。
但如果生仔之後要離婚。。。影響既就唔係自己一個咁簡單
我老公都好鐘意小朋友，我婚前婚後都企得幾硬話唔生，一我本身無乜耐性，湊侄女都勉強，二我淨係鐘意靚既小朋友(我認我好fu浅)，三香港而家呢個環境真係無勇氣生，兩個大人苦都夠啦，仲生多個受苦？四貧賤夫妻百事哀，雖然我地唔係月光族，但生完就會，變月光族，我唔想～
用以上幾點同我老公理性分析，佢而家都開始改變心態，知道現實上唔容許生小朋友
5個讚
我婚前都有睇婚姻輔導，輔導員都有話唔好諗住生左小朋友雙方感情會進步，相反係會更差etc。我老公係因為經濟未support得到養多個小朋友，所以我有大條道理唔生。
不過我媽係我嫁前有講過一句說話(佢都覺得呢個世代唔生好過)，要有心理準備，如果他朝有一日，你老公出面有第二個女人，原因係佢肯幫佢生bb。先唔好講呢句說話make唔make sense，我真係有諗過如果呢件事發生會點，但自己同自己傾完計之後最後我都係傾得唔生。
2個讚
我以前都係咁, 唔想生, 出街見到細路會避開o個隻
老公就好鍾意小朋友
結婚頭幾年都冇諗住生
但到30之後個人諗法改變左
最後上年生左BB
生出黎之後真係冇後悔, BB好得意
每日望住佢就好開心好滿足, 愈來愈愛佢
或者你試下湊下朋友D BB, 睇下自己夠唔夠耐性, 體驗下湊B生活, 再決定啦
同我朋友一樣 老公想生 到最後都生左BB
中間都諗得清楚 總有一方要協調和解
無得搞
是但一個妥協
（睇吓邊個靠邊個多d , 好現實
）
我處境曾經同你一樣，怕後悔，同老公係好想要小朋友，身邊嘅人好多例子話俾我聽就算佢唔鍾意其他人啲小朋友都會好鍾意自己個小朋友⋯
我依家有小朋友，但係我想講我到呢一刻都係唔鍾意小朋友，當然唔會 “憎”自己小朋友，但係就只係乖同得意嘅時候咪鍾意囉（一日唔係好多個時間係係乖同得意唔煩…加上我本人極度冇耐性），所以放工見一陣我已經覺得好夠。亦都因為小朋友其實成日同老公有拗撬，當然我唔知道如果冇生到會唔會又係佢心裏面有條刺影響感情。不過我都感激我老公係神隊友，日子應該叫好過D。我有時只係覺得自己要盡責任所以就有時間就要陪佢哋，同佢地一齊做一啲人哋眼中媽咪應該要做嘅嘢，但大部份時間真心講我都唔enjoy。我本身係好鍾意享受寧靜嘅人，只可以話生左仔我冇乜變…
老公之前都唔明白點解我好似唔鍾意呢個屋企咁，覺得我變咗，經過嘈交溝通再嘗試了解對方，佢叫做認同一點, 其實我就係冇變過，唔鍾意噪，冇耐性同唔鍾意小朋友 。
神隊友好仲意好有耐性對小朋友,所以亞仔都痴隊友多D，但我亦唔介意，但我覺得自己唔係好媽媽，心入面成個想逃離，演唔到同老公一樣，小朋友其實feel到，但我自己已經覺得好大壓力
同埋當大家都攰又嘈交時，我成日忍唔住話:係你話要生ja ma…
其實冇乜實質建議，諗清楚，要生早D生,唔生協議真係唔再提
8個讚
覺得自己同你性格好似，所以都傾好咗唔生…因為我一定扮演唔好母親角色，而老公份工都忙，老爺奶奶教育方式又未必同我兩公婆夾，到時盞大家辛苦
難得佢係神隊友，咁已經好好，起碼即使你真係一走了之，小朋友都生存到。
我享受獨處享受靜，如果一星期無獨處嘅時間我會好憫好辛苦，覺得抖唔到氣咁。每日獨處嘅時間同空氣一樣，對我黎講係必需同基本，萬一生左點算呢？請問你點響有小朋友後爭取寧靜?
開頭個年冇乜可能，唔好話寧靜夠瞓都有啲難，神隊友有心但佢好易瞓着好難醒，BB狂喊佢真係聽唔到，如果我整醒佢佢會即刻幫，但我都醒左⋯我又好難瞓返
不過我哋有請工人，所以後來姐姐上手，我就放手，同埋讓小朋友習慣早瞓，九點後我就有自己私人時間，星期六朝有姐姐，我自己會出去coffee time .神隊友有時見我好攰“投入唔到”,偶爾weekend, 佢會下午自己帶小朋友落去公園，俾我留喺屋企靜下,
同埋我好好彩我有個好好嘅奶奶，佢好nice又係文靜型，佢知我冇咖啡唔得，同埋我個人好易炆憎，生完冇耐佢黎幫手會問我 “如果想出去唞吓行吓就出去啦,飲杯咖啡，放鬆D，工人搞得掂”
大家幫忙之下我叫做偷啲 “me time”
5個讚
我30歲嗰年，结婚五年，老公又係忽然想生仔，婚前有講好唔生。但唸深一層，会唔因此會影響婚姻？再過幾年先生會做高齡產婦？結果生咗个女，過兩年又生咗個仔陪個女。個女今年大學畢業，個仔讀year one.咁多年我依然唔鐘意細路，除咗自己嗰D。一家好好。兩公婆而家先50幾，有能力，有時間做吓自己嘢，儲備退休。但係太唔想的話，(生仔重要講經濟能力。)唔生都無話唔好。但係要有共識。
4個讚
唔鐘意真係唔好
我好多年都克服唔到對細路既厭惡
人地抱個仔行黎我度我會彈開
亦都冇人擔保到你會淨係鐘意自己個仔女
三思
我老公都唔想生，話結婚兩年先再諗
1個讚
磨咗十年啱啱掂高0條線嗰年生咗，我覺得諗幾樣野
1.事業仲想唔想上
2.會唔會因為養仔大幅下降生活質素
3.介唔介意工人/6299湊
4.就算老公零付出你都養/湊得掂個仔
如果你個人係唔多執著，唔介意outsource 湊仔task俾人還好，自問係hands on型樣樣睇唔順眼自己搞真係會好辛苦，家陣都係頂硬上，因為都係不歸路 
1個讚
你講得好啱，呢幾點都係我諗唔掂嘅。我本來唔覺自己對生活質素特別有要求，但去探朋友，見到一地玩具，牆壁畫花曬，家無寧日嘅處境真係有d心酸，我有左小朋友係咪都會咁呢？ 先生由認識個日已經強調佢熱愛家庭生活，熱愛小朋友，但原來熱愛並唔等如擅長/熱愛家務同湊小朋友，呢樣都係一個落差要調整的。
完全明白！
唔鍾意小朋友真係冇得勉強，只不過你要同老公坐低好好傾吓，畀佢知有小朋友會遇到嘅問題。同一時間你要好好處理你地嘅關係
點解我咁講？真人真事，我有舊同事當年話唔會生小朋友，仲話生小朋友要投入嘅資源太大，係蝕本。但奇怪在佢好有愛心，成日問我個女啲嘢
事後我先知其實係佢老婆唔鍾意小朋友，結果佢地解決唔到個分歧，和平分開
佢喺年幾後就同個後生啲嘅女仔閃婚，婚後唔夠一年就生咗個小朋友，而家第二個小朋友就出世添
2個讚
望住小朋友會覺得自己一世應該永遠都愛佢, 因為無法代替