我很需要支持
BB 今日12朝大，過去的晚上，佢不停喊，唔知佢喊咩，又成日吐奶，我好負面，諗野好negative , 覺得自己湊得唔好，有無人可以比d支持，比d advise 我身邊個個都話滿左月就會好，我唔信，無信心
2個讚
放鬆d，bb胃淺嘔奶係好正常嘅事，唔好咩都怪自己
我個女nb都差唔多餐餐嘔，起碼到兩三個月先會嘔少d
產後受荷爾蒙影響，再加上唔夠瞓，係會容易情緒低落
之後回望返其實會覺得所有嘢都好小事
加油，時間眨吓眼就過
你好叻女架啦。已經12朝。吐奶係因為bb胃部發展未成熟呀。好辛苦時同身邊人呻下。
1個讚
你幾歲？同你媽咪傾下。奶奶啱傾嘛？啱就傾下。通常bb肚餓，柯野就喊，但bb有時無咩原因都會喊架。有機會驚驚都會。
你記住，你又係新媽咪，bb都係新手做人類，所以大家支持大家咁。你覺得down就攬下bb。荷爾蒙係好恐怖架，但個幾月就好好多了。bb一訓你就訓。不要浪費每一秒能訓的時間。每個父母係bb初生頭個月都係會有種人都癲的感受。一個月後會好好多的。頂住。
6個讚
我兩胎産後都同你一樣好唔開心
係正常嫁, 頭一胎十個有九個九同你一樣
一個月眨下眼就過, 摸熟左個B之後就容易好多
之後你就會知佢喊乜嫁喇
喊來喊去离唔開幾樣嘢
- 食, 食得太多太飽會嘔, 掃風太急太大力會嘔, 天生容易嘔, 我大B就係咁；肚餓喊抱都抱唔住
- 痾, 有屎痾唔出會喊, 痾左屎未換屎片會喊, 尿片太濕想你換又會喊
- 瞓, 眼瞓但瞓唔着會喊
第二胎就發現, 嘔咪换衫/沖凉, 食飽掃完風由得佢喊下我當聽歌, 喊得好認真就check尿片check肚仔, 其他時間就同佢玩下, 時間過得好快, 記得影多啲相
產後情緒好大起伏
如果有信得過的人幫手，例如自己媽媽，就俾其他人幫下，休息多啲
自己照顧時一切以安全為主，沖涼沖得唔乾淨，bb成日喊，餵完奶換完片又喊，係好正常，睇淡啲，掃好風飲左奶就ok，我第一胎都有你呢個感覺，湊到懷疑人生，直頭諗係咪自己當初諗做媽媽諗得太簡單。
但去健康院同姑娘傾完發現係情緒影響，找左保母幫我湊一排，心情好啲。
1個讚
你先係生完咁短時間，同bb溝通唔到好正常，你返份新工，都要一至二個月適應時間。
一日比一日進步，你今日都叻過第一日做媽媽，初初抱都唔識抱，依家你識餵奶，掃風，換片都好快上手
媽媽同bb關係好神奇，過多一排，得你一個人明白bb既bb話講乜，佢一個動靜你就知佢要去大定去小，只係依家要時間磨合。
我果陣生完無耐都係咁，BB晚晚一到晚飯時間就喊足成個鐘，我都跟住無助咁喊，哈哈。佢地剛到呢個世界唔慣好正常，肚仔有時會有風唔舒服，你輕輕順時針搓下佢個肚仔郁下佢對腳仔，抱住佢比d安全感佢，滿月後3個月後會唔同好多，加油呀
生完個人d荷爾蒙亂哂，又無覺好瞓，無啦啦係肚度唔使點理到真係要照顧個乜都唔識嘅BB，BB同你都要好多時間習慣。無人一出世就識做呀媽，所有媽媽都會有新手嘅時間。我個仔好易嘔奶，嘔到我都無哂感覺
你要嘅除咗我哋比信心你，仲要真係實際上搵人分擔。過咗一個月之後除咗Bb好湊咗之外，你都會開始習慣多咗，個人會快上手好多，加油
吐奶係因為個胃未發育得好，唔係你唔識湊，我個囡果時都係架，係噴泉咁噴出嚟添呀。
佢喊時，抱下佢，唱下歌俾佢聽，播下啲柔和嘅音樂，樣樣都試下。佢咁細個，又唔識講野，只會喊呀，媽媽你係佢最大嘅支援，俾多啲愛佢就得架啦。。。
有冇人幫你手湊b呀？休息多啲，食啲喜歡嘅食物，有野再上嚟講。。。很多媽媽都是這樣走過來的， 你不孤單呀
我阿女都係今日12朝呀
剛剛先嘔到成件衫都係奶奶
咁佢胃仔細嘛
勉強個胃唔好啦
喊就只係搵人關心下
慢慢了解下喊聲有冇唔同
可能餓，可能濕左片片，又可能想要你嘅愛
安全感問題啫
你阿b有冇衰過我那個食唔夠又黃到差點入院呀
我其實都好自責搞到阿女咁
但我要更堅強阿女先可努力成長呀
加油
我以前都係咁，有小小產後抑鬱… 有無人可以幫手？要休息多d先得。
生完第一胎真係會情緒低落架，我冇諗過湊bb係咁辛苦，冇得訓係咁慘，唔知佢喊咩嘅時候係咁無助。我大女都好難湊，但係佢而家9歲啦，好乖好錫我，時間好快就過，湊佢嘅折磨而家變成我哋嘅笑話。
陪月教，bb喊俾啲抽油煙機/吸塵機聲佢聽，話佢哋喺肚入面都係好嘈，都唔係次次有用，不過起碼啲聲可以掩蓋過bb喊聲 
加油呀，為母則強！
揮手區
我今日做咗人哋阿媽第20日，仲係日日喊緊。
每一日我都好想塞返bb入個肚，繼續做一個自由自在嘅大肚婆。
老公話我呢10個月陀得太舒服，從來冇孕吐，冇腰痛，冇水腫，之後因為疫情問題，二月仲開始work from home好他調。
所以搞到bb出世後反差太大，我一時接受唔到…日日都覺得好辛苦好後悔，跟住冇啦啦就勁喊…
我bb雖然冇嘔奶問題，但佢唔肯埋身食人奶，次次見到我乳房就大喊同推開我，都令到我好傷心同沮喪。
產後返醫生度覆診，填完問卷醫生都話我有少少抑鬱
醫生都講得啱，冇人係一開始就識做媽媽，所有嘢都係要摸索一次，同埋要調節自己心態。
我而家大概都摸到bb喊究竟係肚餓，定係扭眼瞓，定係濕片片，好快你都可以摸索到㗎，
有時bb唔瞓淨係喊我同老公都惟有抱住佢，因為初生bb係好需要安全感，佢唔識講嘢，但係佢可能有好多嘢想同父母講，所以佢只有喊喊嚟表達自己。
我bb唔肯埋身食奶嘅問題，我都日日勸自己睇開d，唔好太介懷，做泵媽都冇問題，bb都係食我嘅人奶。
細路有排大，雖然話長憂九十九，但都唔可以擔心太多
由大肚嘅時候我就好堅信happy Mum happy baby
所以我都喊少咗，由一日喊4，5次到依家一日一次，當宣洩吓情緒!
可能我以前睇得太多cctvb嘅膠劇，
以為坐月好似嘆世界，我而家先知坐月係我人生最黑暗嘅日子…
但惟有相信好快會見到光明!!!
共勉之呀sis!
多d上嚟傾訴吓，你就知道自己唔係孤單的
3個讚
慢慢會喊少啲，你可以等你老公放假前一晚搵佢睇bb你去瞓返覺好的，咁樣會比較好
我第一胎都好似你咁呀，成日懷疑自己係咪湊得唔好。喊就睇下係咪肚餓/要換片，唔係就抱下囉。
BB好快就大，好快呢d吐奶同唔瞓覺嘅問題就唔再係問題。我宜家覺得湊3歲細路好勞氣，仲辛苦過湊nb
加油，我剛生完，都好低落，時常會喊，過咗一個月會好啲，多啲講出黎會好啲，佢喊係正常，唔洗太緊張
個個Bb都會喊都會嘔奶，正常成長階段，唔洗咁緊張。最緊要自己都多啲休息，bb瞓覺就一齊瞓，滿月之後就會好啲係真嘅。加油
日頭有無人幫你？ 例如工人姐姐或陪月 ？
你日頭盡量休息，乜都晤好理。
喂完奶一定要掃風，可減少嘔奶。