Bb 回奶係正常㗎，嘔奶嘅話，試吓餵奶到一半掃吓風先再餵，埋身試吓吱兩滴奶先畀bb 啜。個陣見佢喊好想幫佢又唔知點幫。好快佢大個㗎喇，撐住呀，大d 識嗌媽媽會好冧！
我果時都係開頭餵唔到埋身。一係太多飽到嘔，一係太少唔夠食。佢果時仲咬到我損曬。不過慢慢試下試下。佢會發現埋身快啲會喜歡啲。
不過其實問返身體既媽媽。10個應該得1個係餵到全人奶。又10個得2。3個係埋身。其實呢段時間真係好短。同b相處得好真係重要啲。
果時細，仔對住飲奶都日日喊。但而家佢日日都係最痴我。
你肯搵人問真係睇得出你係好媽媽。
我衰啲咁講。我第1胎返佐工先開心啲。仲多奶佐。
我自己湊埋第2胎。覺得有啲係bb性格既問題。有時係我唔知佢需要啲乜。但也會有陣子真係唔知佢喊乜架。不過我第2胎冷靜啲。佢唔知喊乜。就抱下佢。俾多啲安慰佢。等佢越來越有安全感。佢就越喊越少。
睇下POPA channel呢啲育兒資訊。睇下鐘意既戲，飲杯喜歡既熱飲。食啲喜歡食既野。你對自己好。佢會有好feedback的。
1個讚
食飽奶掃完風都抱BB耐D,唔好咁快放低,咁就無咁易吐奶~
Bb未適應，而且你是新手媽媽，有點無力感，是好正常的呀。
可以叫人幫嘅就叫人幫，有咩唔開心嘅，一定要同人講。覺得有需要嘅，就去求醫。我也是過路人。
相信自己！到bb大個d,對住你笑，伸手要你抱時，就會覺個一切也是值得的。
1個讚
樓主加油呀 
雖然我未生, 但由細到大都幫人湊過
都明白初初嗰種無力感
因為你生完, 你都要休息, 休息唔夠既話當然一定會攰同情緒低落
想問下你屋企人會唔會可以幫手你湊?
又或者你有無陪月姨姨嗰啲?
有既話真的, 交哂俾佢地搞, 自己要有充份既休息呀
坐月要坐得好, 如果唔係之後就仲難搞
有時候BB喊, 好可能係因為安全感唔夠
如果可以, 試下包阿B緊少少, 咁佢就有安全感啲, 瞓得都好啲
依家咁既天氣, 都有可能係BB怕熱, 怕熱都一樣瞓得唔好o家
再有可能就係個肚仔有風, 掃得唔夠, 條氣ER得唔夠
試下棟直佢咁抱咁掃風, 睇下會唔會好啲?
再大少少時, 可以用BB油幫佢推下肚仔, 等阿B啲風出黎, 佢都舒服啲
唔使怕, 唔使灰心, 我地呢度好多人俾支持你同為你加油
有咩疑難即管上黎問, 唔好收收埋埋呀~~(抱)
好多謝大家！好有愛！睇完大家留言我喊到痴左線！我會加油！我要努力！日間有陪月，奶奶都有幫手！晚上是一個挑戰，又唔想奶奶捱眼訓幫手晚上，唔想老公無精神返工，所以咩都想一個人承擔，就覺得好大壓力！我會努力調節，我相信寶寶都會錫住我，好快會捱過
2個讚
千其晤好收埋，一力承擔，夜晚嗰幾個鐘的而且確是最金的。你餵母乳？試下夜晚轉喂奶粉，可頂三個鐘，我嗰時都係咁
1個讚
果時我第一胎都係得日間陪月，朝早我媽媽會黎幫手，一到黃昏就個個都閃晒，淨番我同工人對住bb, 等老公返黎果種落寞無助嘅感覺一世難忘！夜晚bb又唔訓，又唔放心俾工人，真係顛咗。你日頭有人幫手就要訓番！bb好快就大，珍惜呢段日子，影多啲相同片，bb大咗佢自己睇番都會覺得好得意。加油！呢度大把同路人 
我嗰時讀陪月課程, 個老師都話瞓前嗰餐俾BB食奶粉, 咁佢地會飽肚啲同埋會瞓得耐啲, 我相信如果阿B瞓得耐啲, 你都可以休息多啲。建議你日間趁陪月姨姨係度, 有幾多時間眠就訓幾多, 咁你夜晚先可以有多啲戰鬥力嘛
加油!!! 你一定捱得過~~~~
我未生過，睇到d留言都情緒低落
我覺得唔應該同你講加油，因為你地應該個個都已經俾盡油～ 唔好對自己太苛刻，cheer
其實搵到傾下講下會易啲過既
又唔使太灰，始終咁多人湊過初生都是咁上下辛苦
好明白你嘅心情，當時我生完回到家，我都覺得好down，呢個咁細嘅人仔點湊大呀？幾時先唔洗喂奶拍風同換片?幾時識行識走呀？同埋最驚bb會有咩事離開我㗎！成鬼日胡思亂想，好左嗰時有我父母同家姐細妹幫我一齊湊，可以令我輕鬆好多。其實生完頭1，2個月受荷爾蒙影響，產後媽媽係情緒上會有變化 ，但記住有唔開心一定要搵人傾訴。bb好快大，要好好珍惜佢呢啲時間。唔經唔覺我女都就快升中學啦！你都要同bb一起努力呀！好快小朋友返學，你就會唔捨得佢哋大得咁快㗎啦！
2個讚
加油呀，我bb而家八月個大。生完果陣老公返工，奶奶淨係送飯，全日我自己一個湊，加上賀爾蒙影響，真係日日以淚洗面。
會覺得自己明明生左BB出來，但係好冇信心自己做嘅野岩唔岩，點解自己會唔識佢點解喊，唔知自己點可以俾到母愛佢…諗好多野。而家諗返可能好多都係因為賀爾蒙影響，而家呢啲煩惱其實都唔係問題。BB來呢個世界十幾日，好多感覺佢都係第一次（眼訓，肚餓，凍，熱，痕etc.）所以佢咩都喊出來。而媽媽都係一樣，雖然陀左BB十個月，但係面對面都係果十幾日，點會咁快識點做呢。（我相信即使小朋友十幾歲，父母都仲要學點同佢哋相處，何況岩岩做媽媽）
BB幾時可以訓耐啲真係好難講定。不過一個月左右，佢隻眼望得清楚啲，對住你笑就乜都冧哂。
身體太攰一定要揾人幫手，同屋企人朋友講佢哋出唔到力都可以揾佢哋傾下計。有咩要講出來呀
2個讚