最近見到好多jm 懷疑自己個仔有adhd, 而小朋友得3/4歲，係最天真活潑嘅時候。 其實, 一般而言, 男仔好多都天生好動, 聰明既男仔都會諗辦法逃離功課既魔掌，佢哋未必係adhd。當然亦有啲男仔較文靜，好似女仔咁。雖然香港既教育制度畸形，要求所有人都坐定定，狂操練，但唔表達作為家長需要抑壓男仔嘅正常生長過程, 懷疑佢哋有adhd。
分辨小朋友有冇adhd, 應該要由小一開始睇起。因為小一既小朋友先開始懂事，形成咗個人既生活方式。如果小朋友坐唔定，你要睇吓佢唔可以坐定幾耐，最容易睇既就係食飯/做功課，如果小朋友係食飯/做功課期間，坐姿不停轉變，每秒都唔同，又企又瞓有坐又郁，而家長糾正完佢之後，佢都係不自覺地每秒轉換姿勢，呢類小朋友先有機會有adhd。功課方面，如果小朋友經常錯大意嘅嘢，例如漏標點，明明係識但寫長句子時會寫漏字，就算點樣糾正，要佢小心啲，佢都係漏嘅話，咁小朋友就有機會有adhd。
所以好動既男仔，玩唔停，唔代表係過度活躍，而靜既男仔，唔代表佢無adhd，作為家長，要小心觀察，唔駛急於去label 自己嘅小朋友。
希望可以幫到教男仔既家長～
我覺得最明顯 ADHD 行為就係坐低，隻腳 “會唔知做乜好”，所以就算唔出聲/認真做功課，隻腳會擺上凳、un 腳、撩腳趾、蹲坐、跪凳。呢樣 ADHD 男女都有，“正常” 學生唔會有。
持續漏野眼殘就真係好多 “正常” 小朋友都有，難用呢樣判斷，但如果到五六年級都仲出現嚴重眼殘問題，咁就真係值得注意。
小朋友細個時，我有上職業治療師教嘅playgroup (訓練大小肌肉)，大家小朋友都相差6個月內，ADHD嘅小朋友，導師好快分辨出嚟，當時我問過導師我仔情況，佢話絕對唔係，然後指一指我睇…ADHD係點
好似一個波咁，不停撞嚟撞去，playgroup 遊戲唔太願玩，導師建議家長早半個鐘到，先放電，情況就好好多
呢位同伴後嚟同我個小朋友同一間N班，KG 轉咗去KV，佢係要响公園玩一輪先返學，响其他朋友FB (KV家長)，亦見佢放學又去公園玩
中哂食飯做功課呢兩點，四歲半…可以做啲咩呢？
對ADHD嘅小朋友嚟講放電真係好緊要，要放緊啲電先可以容易啲專注你想佢專注嘅野上面
有啲小方法嘅~
做功課前要清走晒唔關事嘅物品，例如多餘嘅文具
做功課時
。可以俾佢踩住小腳踏（家用單車腳踏）
。俾個波/海綿佢邊摙邊做功課
。俾塊紫菜佢含喺口唇，做完指定範圍就可以食
完成功課再同佢去做運動放電
食飯時
。要勁提醒佢眼睛專注自己嘅食物、手扶碗、不說話
。有需要可以俾佢原地企住嚟食
一定要提醒佢遵守食飯時嘅規舉
成功專心食完要讚一讚（年紀較小嘅可用獎勵計劃儲積分），但唔守則嘅要有後果俾佢喇
對ADHA嘅小朋友唔可以太温柔㗎，必要時要嚴厲對待
ADHD 因為個坐低嗰陣個腦袋運作但個身體被迫停止，就好似用鐵鍊勉強鎖住一架高速前進火車。佢地啲小動作係提醒你佢邊方面需要刺激，例如將小零件擺落口、吹口哨、講/唱歌到唔停=口痕，俾香口膠佢咬、手搞其他野：清走多餘野，絕對唔可以有 “精緻文具” 出現，俾個壓力球佢捏住、隻腳擺黎擺去=腳痕，俾個老人家腳踏器俾佢踩、patpat 有牙坐唔定=俾佢企係度。
平日多啲玩下安靜遊戲 (呢啲考直私都有玩)，X 分鐘唔離開凳、X 分鐘唔講野，做到有獎賞。仲有每次要溫書/專心做野一定要先放電，落街跑起碼十五分鐘。上返屋企沖涼就開波做野。如果以後讀小學要背書，俾佢行黎行去，牆上貼溫書紙，俾個小彈波球佢彈中邊張就背邊度。
返學點可以減少影響人？
要睇你同埋學校老師點樣安排。有啲老師係完全接受唔到呢類學生，只能接受木頭學生。
如果係確診左，返學就一定要食藥，就算嗰日冇測考，因為佢行為係影響老師、同學對佢嘅觀感。雖然未必有心，但佢影響到人，老師就唔鍾意佢，就更容易做眼中釘，有咩野第一時間就係諗起你小朋友。食藥可以幫助最基本冷靜同專心。
學校嘅野，根本唔到你控制，亦唔可以遷就你一個，所以有 ADHD 孩子家庭嘅父母一定要有恆心並堅定，盡量自己屋企做多啲。最理想係每朝早起身一齊跑圈，狂跑 10-15 分鐘就返屋企沖涼食早餐返學。咁樣就確保到起碼「挨」到兩三堂。零食如汽水、糖果、朱古力全部都戒，留返暑假先食。煮飯盡量煮多啲高鐵質食物，幫助提升專注力，可以嘅話自己帶飯避免啲「刺激食物」。平日有能力就帶佢係行為/情緒治療，更有效幫助小朋友建立自控。
另外如果未入學，就搵多啲學校，睇下邊間「活動」空間多。部份學校如天主教女校，對所有學生品行要求高，所以小朋友一出格就肯定畀老師針對。部份學校對 ADHD 學生係有支援，亦有部份學校小息時間係有「跑步區」，咁樣佢可以利用嗰 10 分鐘時間放電。有部份學校 PE 堂一星期多過 2 堂、運動型課後活動，亦係幫助好大。如果已經「入水坑」，咁就多同學校老師溝通，雙方保持正面態度去幫助小朋友，例如問下老師可否畀佢幫做野，例如幫手派野收野，轉堂幫手攞野去教員室（簡單啲，即係做老師「阿四」，小朋友好 enjoy 架，咁順便又畀機會佢行下放鬆下），要面對升中，就盡量搵啲學校係多活動少功課，並且一定要畀小朋友知道父母有目標佢就可以推動到自己去做到最好。
太少資料，唔係淨係關做功課事
ADHD 係有唔同程度，如果嚴重到咁細個就睇得出，就唔係我之前講個種：家長估估吓，淨係好動，唔做功課，呢啲未必一定係adhd, 就算係，都可能係輕度，所以無需要太早標簽
「佢地啲小動作係提醒你佢邊方面需要刺激，例如將小零件擺落口、吹口哨、講/唱歌到唔停=口痕，俾香口膠佢咬、手搞其他野：清走多餘野，絕對唔可以有 “精緻文具” 出現，俾個壓力球佢捏住、隻腳擺黎擺去=腳痕，俾個老人家腳踏器俾佢踩、patpat 有牙坐唔定=俾佢企係度。」
呢四項又係中哂，咁似乎要用哂四個方法，等我試下，謝謝
已經唔係讀傳統名校了、但口多真係好騷擾、唔識停咁、佢哋係咪讀國際學校最啱？但佢英文又唔好、我哋都係、同學校溝通唔掂面試都唔知點過
有冇睇過醫生/接受情緒和行為治療？
如果係比較嚴重，醫生開藥，幫助係非常大，起碼做到
“冷靜坐定” 。Borderline 醫生一定鼓勵你去參加治療，同埋多同老師溝通情況。
多數都講 HD , 或者adhd.
剩 AD 重難察覺。
有睇未食藥、佢好抗拒、連睇醫生都抗拒、而且聽人講話都唔係個個食有效
細個訓練都仲會聽下
大就更難
就算唔係個個有效都要試架，唔試點知你小朋友唔 work？如果到時候係唔得，咁咪換藥/搵第二個方法，但你總要踏出第一步。同醫生商量下藥物呢方面嘅可能性，同埋問醫生關於行為治療服務。再問小朋友 “你想食藥之後可以專心讀書，受老師歡迎，定係唔食藥，老師覺得你唔聽話而經常嚴苛責罵，少少野都被罰？”
要令小朋友明白，醫生同父母想幫佢，令佢受學校老師歡迎，佢唔睇醫生，佢就更長時間被學校老師針對。
Borderline 仲可以勉強壓抑下，但確診 ADHD 唔食藥基本上係香港學校係 “運作唔到”，送去國際學校唔會解決到問題，更何況呢個年代唔係有錢就去到國際，而且非 ESF 可能需要另外俾錢 shadow teacher、心理輔導等等服務協助 ADHD 學生。如果嚴重阻礙到課堂，國際學校都唔會接受你，亦都會叫你睇醫生食藥。
另外一定要大量運動去 wear down 佢精力，每日起碼兩小時劇烈運動 (e.g. 跑步、游水)。呢樣野唔係個個家庭都做到，堅持到嘅話一定有改善。
作為家長，擔心小朋友都好正常既。不過就算係ADHD，接受醫生治療都可以好有幫助同埋改善。
唔少家長都會好緊張自己小朋友發展，所以觀察多啲真係好緊要！如果信唔過自己既話，可以帶小朋友去做個初步估計亦可。不過就唔好標籤左就係ADHD。
請問知唔知 未夠3歲 可做評估嗎
我大女係AD，食飯全校最慢果個，完全唔理人哋食得幾快都好，佢都係可以慢到一個地步全校所有人食完佢都仲有大把剩底
然後上堂會游咗唔知去邊，加埋有 d 都係坐唔定，上文指的"隻腳會擺上凳、un 腳、撩腳趾、蹲坐、跪凳" 佢都中唔少
最後食藥同無食藥的分別在成績表上就係差咗最少 10 分
但其實真係唔多覺佢有 HD，最少佢無佢細佬咁嚴重先