34歲就黎35… 試左半年都無, 右下腹有時陰陰痛就去照超音波啦，一照原來有多囊…
而家睇緊中醫調理，諗緊調理自然有，定去西醫食排卵藥試下
有無媽媽有過來人經驗，可以分享下
1個讚
唔好太擔心住， 可以試下做運動減重， 睇中醫調理， PCOS 如果減到重卵巢功能又會好d, 又或者可以試排卵藥， 加油！
利申： PCOS 但生咗3個
哇，你就好啦
食排卵藥，用試紙測幾時排卵，集中火力排卵期做功課…其實做功課前飲小小酒（唔係飲醉果隻呀）有助你入戲同放鬆…越諗越難有，加油呀，35歲唔係好大年紀，大把人40先第一胎
我都有啊！
但其實唔係想像中咁難，只係因為我地排卵好亂，所以好難計算幾時可以中，唔係無得生，所以不要擔心！我都可以意外有左，緣份到就有了
2個讚
如果個中醫係有料（唔係學歷），當然中醫
生仔我唔會揀西藥，連葉酸都冇食，靠食物吸收
反而去胎毒湯有飲
我老婆都係咁, 睇中醫調理咗一年後最後都有BB
我有朋友都有呢個症，但生咗兩個小朋友啦！所以唔好擔心，緣份自然會到
唔洗擔心 我都係多囊 自然去懷孕 我可以比意見你
- 煲紅豆薏米水 每日當水飲
- 做運動
- 早睡早起
- 食肌醇同聖潔莓supplemant
2個讚
我都係有多囊架，而家排緊威爾斯不育科，要下年年尾先見醫生。而家就食緊supplement (肌醇，Q10)，同時都睇緊家計會，食左一次排卵藥未成功…
各位多囊sis要加油呀！
1個讚
jm啲姨媽黎成點 一定要有規律 先有機會自然懷孕 當時我兩個月黎一次 日啪夜啪 就中左
仲要注意袪濕 唔袪濕 食咩補咩 就算人工都未必陀穩
d m真系一時時，有時好準一個月，有時就2個月, 我連我媽都唔敢俾佢知，奶奶更加唔講 
收到大家既意見，感謝！
我絕對係過來人，29歲結婚開始就無避孕，一直知自己有多囊，但恃住自己仲後生以為好易中，結果半年都無消息，開始睇中醫食補藥，試過虛不受補明明唔係經期但係咁流血，食好多人地話助孕既食物，煲雞泡膠湯進補，帶埋老公做好多身體檢查，去拜神，去拜山，拜四角，食人地生完派煲薑醋既第一隻蛋，岩岩生完既人派既利士放床褥底，拎人地bb著過既衫放床下底，浸腳，用薑油搽肚，做帶氧運動，桑拿，用排卵試紙，隔日就搵老公交功課，搵枕頭墊高個patpat, 交完功課成個人做倒立，搵西醫開排卵藥，你up得出我幾乎都做過，我覺得我經驗豐富到可以出一本書。
最後我搵左個好好既中醫調理左3個月後，搵生育科醫生做IUI(人功授精)，一次成功左（一般成功率其實只有15~18%），果陣係我結完婚2年先中，岩岩2月生左個女喇。你要一直盡力試唔好放棄呀，加油。
11個讚
少少長，不過分享下希望啱同路人
我30歲，係因為一次突然好耐無m到睇醫生發現有多囊，婚後差不多努力佐一年都無好消息，有排到廣華不育科，知道佐有多囊都刻意做多佐運動減磅，都有改善到既，起碼經期都算一個月至個半月會黎。
之後排到睇不育科，第一次都係做下普通婦科檢查，話之後m到要打電話去報經期，兩日內會安排抽血同飲糖水測試睇下有無糖尿。
同埋如果你自己有係外面做過有關婦科既檢查報告都帶埋去，有用既佢會影印留底。我就只有個次檢查到有多囊既報告，抹片檢查，同婚前檢查報告，就帶哂去。個時醫生見我抽血報告話德國麻疹抗體同乙肝抗體唔夠，問我係咪打佐補針，我印象中有補打到，醫生就話下次要帶返針卡/證明打佐既文件俾佢地睇。
同一時間有朋友介紹我睇一個中醫for 備孕，我之前一直無睇開中醫調理的。咁就一星期睇一次，每次有6日醫，每日飲一次，keep住睇。
第二次去廣華就開始試按佢指示試排卵藥，都係m到打電話報因為佢要由藥既分量少開始試，食完6日藥過（5-7日）佢會約你日子去照超聲波，睇下卵泡情況，我第一次照未有卵泡，醫生話有d人可能遲d, 又再約遲幾日再照。（公司難請假既會麻煩d), 不過第二次再照都係無。醫生就話下次食藥會加分量。
但同一時間我覆診時睇返得家庭醫生紀錄，原來我只係補打佐乙肝個支針，未補打德國麻疹，咁醫生就話咁一定要打返先可以，佢就俾轉介我去健康院要打返麻疹疫苗先。
個刻真心覺得又要等，因為要確保無懷孕先可以打，咁姐一直要避孕到下一次m到 先可以約日子去打疫苗，打完疫苗又要再避孕3個月（以免影響胎兒）咁姐係起碼無佐4個月可以努力。
終於打完疫苗後既三個黎M, 排卵藥今次係比第一次食加多佐分量。另一方面中醫有叫我一定要用排卵試紙check 一排卵就隔日行房。咁我當然照做啦，到廣華約我照照聲波個日，醫生一照就話卵泡有反應，話有兩粒都夠大，都係叫我隔日行房試下先。另外俾定下三個月既藥我，不成功就繼續上述步驟，如果有成功懷孕就通知醫院。
因為有醫院幫你睇住排卵情況，所以會好清楚幾時排卵，我一係一個月後未m到個日就即刻驗孕，有好淡好淡既兩條線，第二日再買另一牌子再驗，真係有兩條線，個下好開心，婚。話俾中醫知驗孕有佐，佢就轉藥啦叫我要放鬆心情啦，唔好諗咁多野唔好勞動，提我有咩唔好食，唔好攞重野個d,。 另外打電話通知廣華啦，廣華就大約7周同我照超聲波啦，話照到有胎囊，不過未照到心跳，下星期再照。
到第8周再去廣華再照，係照聲波見到閃下閃下，姐係有心跳。咁廣華就話恭喜我啦，叫我自己去排產科，順利就唔洗再返黎見啦。
咁我就keep住睇中醫調理，約私家同政府產檢。中醫師話食藥食到3個月就唔洗睇住，預產期前一個見一次佢，睇下身體咩狀況。我而家都30周啦。
雖然每個人既背景同身體狀況都唔一樣，但希望我既經歷可以為你地帶來信心，同埋真係努力佐一排都唔成功自然懷孕既姊妹早d去排不孕科（你有能力睇私家另計），因為排都排好耐（約九個月至年半），排完佢又會慢慢同你試唔同方法（可能佢見我仲年輕），大家加油，放鬆心情都緊要，唔好俾咁大壓力自己。
6個讚
我都有多囊，cycle本身34-38日，喺iherbs買咗肌醇食，好快就變返30日cycle仲bingo咗。
時間唔多就一定係西醫食排卵丸，我年紀大過你，都係有PCOS, 食左2次後Bingo.
醫生教量體溫，計日子都好重要，用apps 幫下手。
我都係iherb買 
香港太少多囊分享 台灣反而多
可唔可以分享中醫資料呀
1個讚
想問一問 點樣排不孕科？
葵涌廣場 張家怡， 係食藥粉唔洗煲
間野叫家中醫，有Facebook page 而家好似隔日開，，記得check左先去
同埋佢係好多人要攞籌架，你要預排幾耐下