不喜勿插
生之前已經知自己唔係母愛爆澎既人，但當然對住自己親生骨肉都係會本能地盡心盡力照顧，但無奈我個B真係難湊到爆，頭一個月一餐奶嘔幾次，凌晨湊同佢餵完奶換完片仲要成套衫換幾次，一放落床就嘔，或者因為想嘔所以爆喊要你抱起佢，試過玩到天光我無訓過，扣埋一日泵幾次奶既時間我幾乎頭一個月從來無訓得夠。而家差唔多三個月喇，嘔少左，但開始唔訓覺，成晚喊，要抱一粒鐘至兩粒鐘哄訓覺係閒閒地既事，抱唔夠仲要你行要你搖。
我眼見好多阿媽成日話會唔捨得BB長大，我成日唔明白，點解我日日望住佢問佢可唔可以快d長大,唔通我真係唔適合做人阿媽?點解人地好似母愛可以戰勝一切到連基本個人感覺都無左咁，辛苦到暈都仲話做人阿媽充滿喜悅。
我做左阿媽但我都仲係感覺到自己湊小朋友湊到好唔開心，唔通我有產後抑鬱?
有無媽媽share下，其實係初為人母既喜悅背後，其實係咪真係可以內心一句怨言都無?
bb 好唔好湊係好大影響，我朋友個bb 好似你嗰個咁，成日嘔奶，夜晚要抱到佢零晨五點先訓，一放床仔即醒，佢由勁樂觀變到有少少產後抑鬱，但而家捱過左，又正常返。
就算我bb 好湊。都會有埋怨，例如點解大家都咁攰，bb唔訓多一個鐘，點解半夜先黎爆片，有埋怨係好正常，但其實你心底因為愛佢先付出咁多。
如果真係太辛苦，試下溝奶粉餵，叫老公幫手餵半夜餐奶，你可以抖下。
三個月唔夠訓，係人都燥，希望你快啲捱過，到bb 大啲，識tum 你識嗲你，就會開心返～
我自己堅係冇乜母愛 
生完出嚟簡直覺得顛覆自己世界
頭一個月有陪月都叫話好d
之後自己湊真係人都癲
我個B已經叫話易湊（bb時冇咩扭抱，食得好瞓得好）
返工之後交咗畀長老湊，感覺變得更難湊
衰d咁講我已經放棄咗，乜都畀哂隊友搞
純分享自己狀況
我其實好憎細路,但自己就生左個
我個b已經算係易湊
但頭幾個月我湊到好想死,餵人奶餵到崩潰
仲要加埋一堆3姑6婆唔係話你唔夠奶就係係d奶搞到個b喊乜乜乜,乜都關你事你唔岩
依家佢歲半開始識自己玩識聽少少指令
但半夜扭計喊時我仍然想死
有時仲好後悔決定生BB
日日都望佢快d大
我諗我都係沒乜母愛既人同我沒乜耐性
好難冇怨言，尤其係坐月嗰陣身體勁虛弱流住惡露傷口痛緊都要24小時隨時起身餵奶掃風，全家返工得我湊，當時仔仔唔黐我，淨係扭嫲嫲，嗰陣會諗點解我日對夜對都唔及吖嫲，除此以外仲要聽埋啲話你唔識湊唔夠奶嘅言論。就算而家好啲，bb又開始同你玩通宵唔肯瞓，越大抱佢冇耐都腰酸骨痛。見住佢眼瞓又唔瞓著唔知點搞。
自問本身唔中意小朋友，自己都好後生，佢出現改變我成個人生，但生出來見佢一日一日大，係自己餵大佢嘅，呢種滿足你會覺得辛苦係值得嘅。(好似好矛盾)
Btw其實另一半肯幫幾多都好決定到媽咪嘅心緒。有時見我老公放工幫我湊通宵，啲抑鬱感覺會慢慢冇咗
首先同新手媽媽講聲加油
。
我仔仔初生嘅時候都係唔瞓覺㗎，
一日淨係瞓10個鐘左右，
而我自己都係瞓得幾個鐘，
呢個情況維持咗4個月。
頭3個月夜晚仔仔都肯自己瞓bb車，
但係第4個月開始阿仔就唔肯自己瞓。
咁我就唯有開始瞓住埋身，
等阿仔自己食到瞓，
咁我又唔使諗辦法放佢落床。
不過瞓住埋身有個好大嘅缺點，
就係佢會勁痴你唔獨立，
但係咁樣至少媽媽都可以一齊瞓覺。
我啱啱坐完月嗰陣都畀99話我喂人奶無用。
我都有唔開心
，
無得瞓覺攰到隻狗咁都仲要受氣。
不過我硬頸兼左耳入右耳出，
消化咗d閒言閒語就算。
唔好將外人嘅說話咁上心，
畢竟你先係bb媽媽，
無人比你更了解bb。
加油，共勉之。
完全明白，我大女好難湊，因為佢有reflux問題所以一日嘔幾次，同埋晚晚入夜就開始喊，喊到凌晨三四點，我湊到好攰好辛苦，有少少抑鬱症狀，老公見到我咁，bb滿月後佢就幫我報咗興趣班，一星期兩晚俾我出去上堂放鬆吓，自己行吓街，好有幫助。阿女情況亦慢慢改善，佢瞓到過夜之後就好好多。我相信母愛係有嘅，慢慢嚟，會漸入佳境。
我都好理解你感受，因為我第一胎同你經歷差唔多，又要湊b個b又扭又要泵奶，湊到好辛苦搞到有少少產後抑鬱，覺得內疚點解對住個b完全冇開心感覺。第一胎全泵，宜家回想返覺得泵媽係難d manage時間。我第二胎全埋身反而容易處理d個b，一喊就塞奶，起碼唔駛成日抱，就算要做人肉奶嘴都可以攤係度餵一路碌電話人都心情好d。
我到bb開始夜晚瞓得長d個抑鬱感覺就消失咗lu，希望你都一樣啦。
聽過一種講法…
未出世想個BB快D出世
出世想將個BB擺返入肚
我好明呀我bb同你bb一樣，好易嘔，又鐘意喊通宵
第一個月都勉強訓到dd，第二個月真係日又喊夜又喊，抑鬱到我又一齊喊，傷口痛仲要抱成晚，抱住行嚟行去bb先肯收聲。自己每日只訓到兩三個鐘，又覺得自己唔識湊同直情唔想湊，對住bb都唔覺得佢得意
健康院姑娘話呢啲叫百日哭，一般過咗一百日就慢慢好啲，我信呢句嘢一直捱，宜家差不多一百日，bb同自己好訓咗，都開始享受到同bb相處
呢個情況下餵人奶好大壓力，我無數次想聽日就放棄，暫時都仲餵緊。如果真係頂唔順可以補吓奶粉，照顧好自己先照顧到bb呀
希望你都唔好懷疑自己住，bb越大個越識表達自己會慢慢少啲喊，一齊加油
超有父愛揮手
我個仔最出名唔訓覺
個陣日日同老婆輪住睇個b
係好辛苦呀
直到依家所有時間比晒佢
但心甘命抵
我都係無乜母愛, 知道自己有左第一反應係爆粗
到大緊肚 見到d小朋友就好討厭好煩
剛生完係醫院我最後一日先去餵1次奶…(本身已同姑娘講我唔去
但諗下餵都唔餵好似好衰)
同我無餵人奶,
一早已諗好餵奶粉, 因為覺得餵人奶會勁辛苦,唔想佢咁痴身
有時諗返我都覺自己好衰, 好多媽媽都係努力餵人奶,想比最好既野bb, 但我就: 唔好煩我
阿仔都係勁嘔奶, 頭幾個月幾乎唔可以訓要𥄫實佢,佢隨時訓訓下嘔, 放床即喊
每日抱到手軟, 自己唔鍾意講野,好少同佢傾計(要自言自語咁款…) 有時覺得我仲未係人媽媽, 我只係湊緊佢…
到突然有日 佢無啦啦對你咔咔咁笑出聲
哇… 個心真係會溶化
而家5個幾月, 有時我望住佢訓教, 真係覺得佢好得意… 好開心自己生命有佢出現
同BK好唔同
有D另類母親
係Bk淨係好多強烈母愛痴線阿媽 
要第二胎先可以辛苦到爆都無怨無悔，因為望住大嗰個知道日子會過去，長大就無得日日抱，癡住你。
第一胎我都湊到懷疑人生，完全係想像不到做人媽媽要咁辛苦。
如果時間返轉頭會唔會試下餵人奶？
其實我唔係母愛爆棚嘅人， 有時bb喊都唔會理佢， 我淨係知道佢唔係肚餓又唔需要換片。 有時候會有佢喊下， 有心情就抱下
。 我唔想因為bb令到自己個心情同壓力咁沉重。
等我笑下輕鬆下先
我小朋友初生時都係好易嘔奶，可能我係高齡產婦，陀佢嘅時候成日見紅要瞓床，所以特別珍惜呢個BB，我都明白你好辛苦。
上天賜比我嘅小BB，我冇諗咁多，我真係冇怨言，要埋怨就係埋怨點解用錯奶樽
自問都算有愛心, 但係本身性格係好性急,有問題就一定解決嗰啲,初期真係超辛苦,過咗兩歲會好啲,加油啊媽媽!
我女都唔好湊加上我自己又無咩人奶，所以果陣都好大壓力，我女又訓得少加扭抱，一放床就醒加上我老公唔係神隊友，果陣真係辛苦。好彩叫做有阿媽同姐姐幫下手加唔餵人奶，等自己壓力細d同BB過左3個月就好d, 我女成8個月先易d處理，之前都係難湊同易喊。。所以，我好明白湊初生果種無助
都好睇身邊多唔多人support，同個b好唔好湊。個時我個仔唔肯埋身，半夜全家瞓哂我都要死起身泵奶，個下個感覺好sad，爆片嘔奶一日洗n套衫，仲要餐餐都屙屎。洗到尿墊都唔夠用，但係老公同陪月好幫得手，個感覺唔係得自己一個，老公晚晚都起身幫手餵夜奶第2日又返工，都有好SWEET嘅時間，不過過咗初生我先開始覺得係地獄，捉馬騮又唔比你行開，幾廿樣嘢我做。期期都有辛苦嘅時間，你長期唔夠瞓，又未咁快習慣到屋企多個BB，生完荷爾蒙又亂哂，覺得唔對路就開聲搵人幫輕下，唔好覺得係呀媽就要食哂，無人天生係一個呀媽。你而家就好似由6年級升上中一咁，咩都係新咩都要試。