俾我帶定頭盔先，我哋唔係做移民顧問，我哋亦都唔係做買賣樓。所以我哋唔會介紹經紀或者移民顧問俾你。
我哋喺沖繩開潛水店，所以同投資，移居冇利害衝突。
我哋第一個日本簽證係搵日本行政書士入紙。行政書士佢哋只係幫手做手續，唔會幫我哋做計劃。後來因為我哋要改簽證，同埋每年幫自己公司做10幾個簽證，所以積聚左好多經驗。
今年我哋幸運地搵到自己鍾意嘅物業，所以有埋物業經驗。
反送中其間，見到好多人跳出來發國難財，最大獲就係發佈好多錯誤訊息。所以我哋開始在自己個網站/FB 話俾人聽移民日本正確觀念。
如果你問我有關於日本移居同埋投資, 因為冇利害衝突我可以好中肯咁回答你。但係如果你問我沖繩潛水邊度好玩，我一定冇可能中肯回答！
大家如果冇乜概念, 可以先睇一睇我哋個網站:
https://www.oki-family.com/2020-沖繩移居指南/
裏面有我哋嘅故事, 移居日本正確觀念影片 ，Q&A。大家可以睇一睇先發問。
**我哋唔係反對移民顧問，相反佢哋幫人走少好多冤枉路。**但係大家搵佢哋之前需要知道乜嘢係正確訊息。
例如好多經紀講，日本買咗樓就可以移民。呢個係大錯特錯。 
亦好多人講話日本做唔到移民，呢個亦錯。我哋三年就攞咗永久居住權。（唔係入日本籍），所以如果跟着日本規例，其實係可以。
最後，想唔想移民每個人有唔同嘅原因。無論想走或者唔想走，希望互相尊重。
大家有咩問題歡迎發問。
24個讚
我地一家好鍾意沖繩，雖然無諗過移居，但都想了解下…
- 較常用什麼方式移居沖繩？
- 請問你有無小朋友？沖繩的教育如何？
- 購買一户建方法程序如何？
謝謝
LM.
外國人係咪一定要同本地人一齊開，先可以成立公司㗎？
香港人其實最多係投資移居. 5,000,000日圓投資, 做生意. 可以見到銀碼唔喺多，因為政府上呢啲投資貢獻社會，製造就業機會，促進經濟。呢個先至係日本政府嘅目的而唔係一刀切。
另一個方法就係搵工作，叫公司幫你申請打工簽證。其實唔需要識日文，你需要嘅就搵到一間公司需要你嘅專長。
我哋有一個小朋友，未夠四歲過嚟，而家已經八歲。每個人對小朋友嘅教育要求都唔同，我哋暫時冇乜嘢投訴。
無論係乜嘢樓，都係要搵個本地經紀。通常係上網睇樓。沖繩佢哋冇個中央系統，每間舖頭都有佢哋自己嘅特別盤。最煩呢樣野
3個讚
即係外國人可以隨時去開公司？咁最低要求係幾多資金？有冇話要請幾多當地人？限制邊類貿易？
我哋其實唔贊成隔山買牛。
第一，如果個盤真係靚，本地經紀一定留低比本地嘅客。
第二，通常唔受本地人歡迎嘅樓盤，先至會流出海外。
第三，唔受本地人歡迎嘅樓盤，即係流動性低，第時想賣返出去，未必有人接手。
我唔想開名講邊間，但係有一間有經營茶餐廳，好多人私底下同我哋講係佢哋嗰度買得好貴。同一個盤，係其他經紀嗰度平好多。佢哋亦都會幫你地做移居。只不過有啲走灰色地帶，例如叫你投資一間餐廳但係講明你唔可以做管理。但係幫你申請嘅係投資管理簽證，換言之你申請嘅簽證同你嘅工作不符，如果有人舉報，你嘅簽證就會被吊銷。
2個讚
抱歉，你嘅意思係咪純粹想投資？定係想攞埋居留權？
可以隨時過嚟開公司，甚至唔需要過嚟都得，只要搵個行政書士幫你做。冇限要幾多個人，亦都冇限制做乜嘢行業。當然唔可以做風化。
如果你係想移居嘅，你嘅限制就係投資金額，最少要5,000,000yen. 佢唔係要你一筆過攞錢出嚟,但係要你第一年投資呢個金額. 跟住佢會睇你間公司有冇前途, 先再決定會唔會繼續你個簽證. 通常第一二年蝕錢好正常. 但係如果第三年仍然蝕錢,
咁你就要小心,非常小心.
可以分享多小小沖繩幼稚園同小學的學校種類同教育模式嗎？我以前睇過一篇文章有人為左小朋友教育而移居沖繩，好似係類似森林教學之類，我當時睇完好心動
純粹諗住多個地方退休過下生活咋，想搞下小搞作，收入可以應付日常開支便可。租樓住、醫療唔計。
好啊, 近日因為武漢肺炎好少寫餐廳同景點，都係集中生活。其實我哋之前有好多沖繩教育或者學校嗰啲嘢，但係有啲過咗時所以offline, 我會慢慢整理放返上website 
1個讚
其實租好平，一個正常區域我當係香港嘅灣仔咁嘅level, 600至800尺, 兩房一廳都係$4-5000港幣一個月.
如果做生意我會建議你唔好淨係全副精神放晒喺遊客嗰度. 最好有幾成甚至超過一半個目標為本的人. 如果唔係有乜嘢冬瓜豆腐, 例如航班停飛, 兩個國家之間好緊張(韓國同日本咁），你盤生意就凍過水，簽證亦都會有機會出現問題。
2個讚
咁係咪即係買日本樓最好去日本當地找地產經紀搵？thx
系！帶埋翻譯，或者在本地搵翻譯都平過俾人賺！應該咁講，冇咁易俾人呃。
好多人買樓, 未去過嗰個地方，喺香港聽個經紀講, 見到平就買. 通常有平就冇好。買樓唔係買菜。用多少少錢，搵個翻譯（或者好多地產舖已經識英文），去到當地搵一兩間地產舖傾吓計睇樓。你會對嗰度嘅市場加深認識。咪當在香港食一餐好貴嘅壽司～價錢都係差唔多。
日常生活從來未遇過. 沖繩人好熱情，而且傳統上對中國人比較親近。我地鄰居知我地系香港人，唔係強國，好放心 。
但我哋做生意果一行就比較排外，但如果入到圈子，就冇乜問題。即係有冇人撐你咁囉…
日本做生意，工作一定要入鄉隨俗，尊重本地文化。其實冇乜解決唔到嘅問題。
