（長文）
由復活假開始，日日由朝到晚都睇電視，搞亂屋企，完全唔做正經野。畀自由佢，希望佢會自己安排時間做功課和執屋，都唔做。好啦咁我規定一個時間要佢做野，都係唔做，拖到夜一夜先瞓覺，真係睇到眼火爆。
每日都約定好，聽日就唔睇電視，正經學習，結果又係由朝到晚都睇電視和玩，整到屋企七國咁亂，真係好痛心絕望。
總算開始做功課，寫詞語就話手攰，做工作紙又話唔識，叫佢睇返功課表跟住做又話唔識睇，到底有乜野係識！？佢間學校都好hapoy架啦，每日只有半個鐘zoom，一路開住電視睇卡通片一路上zoom，問佢老師教咗乜就話唔記得。
我要返工，唔得閒理佢。今日由朝早開始，不斷鼓勵佢做功課，每隔一個鐘就打電話check吓佢有無做，佢話我會做架啦。我畀空間佢，相信佢下晝睇埋最鍾意的節目就會開始做功課，結果淨係睇咗少少英文書又轉返去睇電視！問佢點解唔做千篇一律都係話唔識！！叫佢睇今日老師的新video佢就話唔想！
食飯時仲係睇卡通片，我話一路食飯一路睇老師的video，佢又唔想，佢呀爸又支持佢話食飯時relax吓，食完飯先做。結果佢食飯食好耐，食完飯又要食其他野，一路拖，我頂佢唔順，因為太攰，入房瞓着咗。到我10點鍾瞓醒，佢哋都係仲未開始做，我真係好唔開心，功課越積越多，好大壓力，極夜瞓又一事無成，感覺自己真係好失敗，小朋友成個廢人咁，好唔想再見到佢，唉…明天 WFH 又係要同佢搏鬥的一天
我真係好睇唔過眼咁樣由朝到晚浪費時間，我做唔到由得佢
1個讚
小一學生很少懂得 自主學習
更不用提 自己學習
不能上課時，只能靠家長協助 一起學習
5個讚
小朋友欠缺學習動力
其中一個因素是覺得冇用
- 睇唔睇片都冇所謂啦，老師都唔知
- 學咗都冇用啦，又唔考
- 做咗功課媽咪都唔會同我對答案，唔做都得
如果老師打電話來查詢小朋友情況，
可請老師和小朋友傾2句
等佢知道老師會check 功課
唔洗返學唔等於唔洗做功課
1個讚
小一真係要教， 但得6歲幾
現在又不用返學
個心散哂都好正常
或者你常試去搵老師傾下， 睇下有咩辦法幫手
不過小朋友咁細， 好多時候都需要大人陪伴才可學習
1個讚
冇錯，基本上要當成home schooling
坐在小朋友隔離一齊上課
一齊學習的
就算做到自主學習的小朋友都是做不到自己學習的
1個讚
唉，但係邊有咁多時間教？
返到屋企好多時都8點，食埋飯都9點，仲要同佢沖涼，搞得黎已經夠鐘瞓覺。
唔計星期一至五，星期六、日我地放假，佢都係無做功課囉。我會陪佢做既，但係佢總係話要睇電視或玩，總係唔拿拿聲開始做功課。就算真係開始做，做一兩樣就話攰。玩到攰又要瞓晏覺，瞓醒又已經夜晚，要食飯，跟住食完飯又夠鐘瞓覺，咁又一日… 真係覺得自己和小朋友好無用
Takki
10
我自已就唔會比咁多自由個小朋友。只有自由玩樂時間佢才可以自由選擇。
電視方便，我吃飯從不開電視，這方面你可能要同先生相量下。你工作時，可否拔掉電視的插蘇或只開新聞台？我小朋友也是小一，開電視是要先問我，得我批准才開的。
我小朋友有時也會Hea時間，或做功課時發白日夢，我會同佢講，佢浪費我幾多時間，我就會浪費佢幾多玩樂時間，即是佢hea15分鐘才開始做功課，我就會扣佢15分鐘玩樂時間。
這些方法對我小朋友是work的，你也不妨試試。
1個讚
日頭你返工邊個睇住小朋友？要同照顧者夾好，唔可以睇電視就無得開，要嚴啲，因為小朋友都知你淨係講下，同埋時間表定左要執行，做功課時間唔做都要坐係書枱，俾佢知道你會嚴厲執行
唔好怪我直言, 你俾太多自由佢啦!
一個小一小朋友,一定唔可以電視放題.
你俾的功課, 佢唔做就唔好瞓/唔好睇電視, 因為你浪費左時間, 現在9點你都要同佢完成。你要俾個信息佢, 我現在放工回去都好多時8:30PM之後先同小朋友功課
多謝您的意見，啱啱佢又hea咗好耐都唔做功課，寫幾隻字又話肚餓，跟住又要去廁所，跟住又頸痛，到終於坐低做閱讀理解，又話唔識，我話你唔好扮唔識，“香港” 2隻字佢一定識，但佢就係都話唔識。我話你照開始讀，唔識我先讀畀你聽，但係佢係都唔開始。我真係好火滾，好煩惱，所以大聲講野，佢又要我講對唔住，而家佢走咗去喊啦，又唔做功課啦…唉我真係好痛苦
唉，我都唔知做完邊樣先叫完成？淨係完成今日功課，之前果d就唔做住？我又成日覺得小朋友早瞓好重要，但佢由出世到而家唔夠1%日子做到早瞓，我真係覺得自己好失敗
以前就係問准我先睇電視，而家停課失控… 我會嘗試攞返主導權。
昨晚佢話我成日控制佢，我話我控制到你就唔會畀你睇咁多個鐘電視唔做功課啦！
其實由琴晚開始到而家我都好唔開心，我何嘗唔想親子關係好d，但我已經唔想再見到佢，而家佢去咗匿埋，我唔想去搵佢，就算我好聲好氣氹到佢出黎做功課，我一定頂唔順佢的軟皮蛇態度，然後我又會大聲話佢，不斷惡性循環…
我而家應該點做好？因為我大聲話佢，佢覺得我鬧佢所以唔開心去咗匿埋。我應唔應該去搵返佢出黎？但係我都幾肯定佢出咗黎之後，因為各種原因最後我都一定會大聲鬧佢… 咁樣又做唔到要佢坐定定做功課的效果…又係浪費時間…
你地係點樣忍得到可以唔鬧佢？其實我覺得自己唔係鬧，我只係大聲D講事實…
小朋友係男仔定女仔?
有冇試過set啲目標俾佢，完成咗之後有啲咩獎勵咁。
例如︰每日要完成中﹑英﹑數，各一份功課(或者指定題數/頁數)，做完成後可以玩遊戲/ 有自由時間etc. 又或者玩「儲分制」，每日可以完成目標就有1分(分數自訂/ 貼紙)，儲夠幾多分就可以換啲咩咁。
(一開始問男仔定女仔，可以因為小朋友喜好而定獎勵)
同埋有谷友話要同照顧者夾。我都覺得係好重要。一定要同照顧者講你希望小朋友唔係一日喺屋企hea。如果同照顧者講完情況都冇改善，就再狠啲，出大技︰熄總制。
如果我個小朋友都係咁，我都會好似媽咪你咁唔開心，一直質疑自己嘅能力，懷疑自己唔識為人父母。但係試問邊個係一出世就係育兒專家。更何況小朋友都有自己性格，咪大家一齊摸索下。又唔洗俾自己太大壓力。要記住，happy mun, happy family。
(不過講就易，係我，一早就發咗小朋友脾氣。 
)
1個讚
利伸：我冇小朋友，可能意見唔係好o岩聽
我細個果陣爸媽都要返工，冇理過我做唔做功課
但我自己會一路做一路睇電視做完佢，因為我心入面覺得冇功課交會俾老師鬧，又要罰留堂做，反而冇左時間玩，所以重點係佢要有損失佢先會去做對自己有利既事！
係咪而家停課所以唔怕冇做功課？咁你會唔會「代學校懲罰」佢呢？
我覺得你唔需要日哦夜哦佢做功課或者鬧佢，你應該表現到唔在意
哦？你唔做功課呀？咁直接炆左個電視掣唔好睇
哦？你唔做功課呀？咁我以後唔會買你鍾意既零食
你係唔係佢一喊就心軟？我覺得要賞罰分明，同埋建立返媽媽應有既威嚴
字裡行間覺得佢對你好似冇咩尊重
1個讚
我個女都係小一，佢都係日日玩功課得閒先做，學校更加無zoom,得啲影片鍾意幾時睇就幾時睇，我都冇特別理佢
