呢個係我嘅親身經歷，寫出黎係想家長可以好好保護子女。我今年4×歲，喺大約6年級起多次被阿叔非禮。舊年我先鼓起勇氣向父母講出黎，但係換黎嘅係父親同埋大部分親人嘅反覆懷疑同不信任。呢種壓力令我流咗好多次眼淚。
記得當時我大約6年級，每年我地都會返廣州探親。果年，阿敊同我有好多身體接觸，而當時嘅我唔察覺有問題。直至佢經常喺無人嘅時候，有時係廚房，或者家人都出去行街而佢話留喺屋企照顧我同細我好多嘅細佬，佢就會有唔尋常嘅身體接觸。 細個嘅時候我好內向，好少出聲，而父母又係唔多埋我嘅。可能就係咁佢覺得可以落手。
當時我覺得唔鐘意，但係又唔知點反抗，亦唔敢講，怕父母不信任。結果每年返廣州，佢都會找機會落手。 當父母見到我對佢無禮貌，佢地都會罵我，令我更多唔敢講件事出黎。
我中學嘅時候，個仆街結婚，生咗個女，仲將個女個名改到同我個名差唔多。果陣我知道咗就好激動，邊哭邊同阿媽講佢咁衰格，但係我表達力有問題，講唔出佢非禮我。我媽以為我無禮貌，仲打咗我獲甘。 其實當時我都唔清楚佢摸我係咪佢唔啱，當時又無咩性教育，又無可以信任嘅人，自己又細膽。
呢件事之後，我好多年無笑過，喺學校亦好少同學講野，好難信任人。就算大個咗結識異性都有困難。
我本身有羊癇症。唔知係因為羊癇嘅藥定係呢件事嘅壓力，我嘅對課本記憶好短暫，無論我溫幾多次書都唔記得課本內容，亦理解唔到老師嘅教學。 直至大個出黎做野，遇到好老闆，比我慢慢去學習，我先開始發現自己嘅優點。亦用咗好多年時間，先可以對人有番少少信心。
舊年我將呢件事講出黎，壓力好大。個仆街仲話要我去廣州同佢當面對質。我已經唔係細路。可以預計到個仆街到時乜都唔認扮無辜，我無佢符。就當人生上咗非常重要又非常長嘅一課，今後嘅日子我要好好珍惜，亦希望可以提醒作為父母嘅各位，好好保護子女，即使係熟人，都唔好掉以輕心。
有d咁既經歷，一定好唔開心。
最慘係家人都唔信你，係雙重打擊
我都生咗2個女，我大女係4歲時已經同佢講咩叫私隱部位，因為帶咗佢上家計。有啲班係認識私隱部位、介紹人怎樣嚟等等，仲有任何人都唔掂得，很早亦都教佢自己沖涼，even 有啲好熟嘅男性朋友，類似哥哥、叔叔咁，我都會時刻提醒個女，唔可以比佢掂唔啲私隠部位，有時有意無意之間都問下個女，哥哥、叔叔係佢哋屋企會同你玩咩等等，之後又再講私隱部位唔掂得等等，去男性朋友屋企尤其是自己唔係佢身邊，一定唔可以著裙，費時比人眼多多。所以我自己好着重依點，自己嘅女唔保護，咁邊個會保護佢呢?
希望樓住你釋懷，再尋求一啲方法令自己好過啲，加油
講出來好有勇氣
但你預左改變唔到啲乜
不過至少你自己身心健康
唔使再屈住屈住喺心入面
講咗出黎真係舒服咗好多。以前睇戲見到非禮强奸片段，都會入廁所喊。有時又會唔知點解無啦啦諗起，好易情緒激動。依家講咗出黎對自己嘅影響係少咗。
你個女好幸福有你保護。性教育真係好重要
之前廿幾年都活喺陰影之下。好好彩早幾年遇到一個願意比時間我嘅另一半，我先可以慢慢走出黎。
聆聽都好重要。如果以前父母願意每日花十分鐘同我溝通，我可能會早d講件事出黎。呢種經歷，希望唔好再發生喺第二個小朋友身上。
TAKE CARE JM
樓主講得好啱，有女嘅真係要小心！
我自己都有類似經歷，四年級有一晚，我留低咗喺契媽家瞓，佢老公扮幫我蓋被揭我短褲偷睇，好彩我醒目醒後即刻借機離開間房。
我從此拒絕再見呢家人，但被媽媽鬧我衰女，話人哋咁錫我我竟然咁對人。
兩年後，佢地一家移民，我媽叫極我都不肯去見佢哋，勁鬧我，我先講出嚟，當然，佢哋都係話我亂講，人哋點會咁乜乜乜。
所以，人心難測，真係要好好保護女兒！
謝謝你將這麼痛的經歷說出來，我信惡人他日會有報應。
佢個女慘啦 
Take care JM.
多謝提醒
父母係好人，好到唔認為身邊有壞人果種。依家見到父母對其他人嘅子女好，好到又買衫又買袋送比人，又去飲茶傾偈。我個心好似比針拮咁唔舒服，成日會比較，佢地以前點樣唔理我同細佬，我點樣聖誕節無禮物交換比同學講是非。
就算大咗，講咗件事出黎，都總有少少刺留底。 如果佢地醒少少，比多少少關心，我唔洗經歷咁痛苦嘅廿幾年。 不過呢個世界無如果，唯一可以做嘅只係依家同以後條路點行。
舊年講咗呢件事出黎之後，我就諗，壞嘅日子已經夠長，我希望可以掌控返自己嘅人生。到底我最鐘意嘅係咩？最討厭嘅係咩？成世人我覺得最幸福嘅係咩時候? 真真正正咁了解一下自己之後，再同另一半商量，然後膽粗粗高齡轉工。依家嘅收入照低，而工時照長，但係好有滿足感好開心。可能係呢種滿足感令我可以安然咁渡過之前面對嘅壓力。 好多謝未來老公。 將來嘅日子會有好多困難，希望我地都可以一齊面對。
幾個月後我會結婚組織新家庭，我會好好照顧自己同未來老公，比幸福嘅生活大家。
我都希望惡人有惡報，不過我未見過。 喺惡人出手前斷佢後路先係好方法。
Take care JM 
希望樓主永遠幸福。忘記不快事