啱先睇緊喱度嘅post突然有陣Deja Vu
好似夢裏面就早已經發生過呢一刻的畫面
哇果陣睇緊邊個故
無
係主頁
逐漸就feel到一種
似曾相識
樓上講開祖先上身，我就諗起關於阿爺嘅靈異事件。
話說我阿爺幾廿年前已經過咗身，佢過身前曾經交帶落，去拜佢唔洗斬雞燒衣，淨係帶鮮花就得。於是阿爺過身後，阿嫲就淨係供花比阿爺。
但係阿嫲係舊社會人，總覺得拜祭係要燒啲金銀衣紙，驚阿爺收唔到嘢好唔放心，於是就去搵人問米。我阿嫲去到問米，就同個問米婆講話擔心阿爺向下面過得唔好，個問米婆就話咁請阿爺上黎傾吓啦。攪左一堆前置作業之後，突然個問米婆就變咗把怪聲話：「我向下面好凄涼呀，又冇衫著，又冇嘢食，又冇錢洗呀～」嚇到我阿嫲勁喊，即刻衝返屋企買大量衣紙燒比阿爺。
之後，連我阿嫲都走埋，我阿爸就成日記住阿爺話唔洗燒嘢比佢，所以自從阿嫲走咗到而家三十幾年都冇再燒衣紙，每次拜祭都係帶啲鮮花生果，上柱香就走。
久唔久我都有啲迷思，究竟阿爺阿嫲向下面係咪冇啖好食呢
1個讚
我都有同你近似既經驗呀，我公公係基督徒，個個星期日佢都會帶我同阿哥返教會。
公公臨終前同我阿媽講要做基督儀式，阿媽都跟佢既意願去做。
當時我大概中一二，坐夜O係殯儀館好早就食飯，所以成家人返屋企之前就去左食宵夜食雲吞麵。
點知果晚我發夢，夢見我地第二日圍住棺材行圈瞻仰時阿公推開塊玻璃係咁話肚餓，之後我地同佢(條屍?)去左我地食宵夜果一間食雲吞麵 
俾個夢嚇醒左，即刻走去父母房嘈醒佢地，踢左老豆去我房訓，同阿媽孖鋪，但O係未訓著既時候耳邊係咁聽到有人嗌『我呀，我呀，我呀』，我問阿媽有無聽到佢又話無，阿媽話我自己嚇自己，轉個頭佢就訓著左，仆街丫。
結果我自己心入面諗囉，『我係你個孫呀，我同你個女講嫁喇，會叫佢諗下辦法嫁喇，唔好嚇我呀，我驚嫁』之後諗左幾次就訓著左嚕。
第二朝我地去殯儀館之前就買左D早餐要黎放靈堂，仲要俾個牧師話我地話公公返左天家唔需要依D野，我地無理佢，咁佢都無話丟左我地D野既。
自此我阿媽過時過節要拜祖先既時侯都會拜埋女家祖先，同埋以後都無去食果間雲吞麵。
我so far好彩冇乜「特別」經歷，比鬼壓細個都有試過，通常唔理佢一陣就無事，或者旭下手指腳趾就可以即刻成身旭返。
但我鐘意聽鬼故，成日聽埋身邊朋友同事d貨，得閒就攞出嚟嚇人
千祈唔好旅行講就得 
唔會啦，有D同事或朋友好細膽，聽咗鬼故真係會唔敢瞓。住酒店期間唔講鬼故係禮儀 
我有朋友成日嚇我去泰國乜乜乜
搞到我唔夠膽自己去
少咗個自己出遊點
泰國有好多「傳說」，未去之前我都曾經被嚇怕，連我阿媽都話果度好多降頭叫我唔好去。但去過一次之後真係返唔到轉頭，食嘢又平又好味，買嘢又平又多選擇，D按摩真係日日做都唔厭…可能真係中咗旅遊降 
係咪，但我而家成日’型’住
所以之後都係要人陪先去玩
我諗起N年前森美早霸王講佢地宿營講鬼故之前話：我地講鬼故喇～但如果講講下有怪聲怪事我地就即刻完喇去訓覺
（間房即刻熄左燈）
佢：好我地講完喇
2個讚
講一個我阿爸嘅靈異經歷。
我向上文曾經講過關於以前住過間恐怖公屋嘅經歷，當時一家四口，我阿爸因為工作關係夜晚時不時唔返黎瞓，而淨返我同阿媽家姐3個人嘅時候，就成日都比嘢攪。到搬走左之後，我哋再重提啲恐怖經歷時，我阿爸就話佢從來都冇遇過。而我哋都回想起，凡係阿爸向屋企果晚，都唔會有嘢出現。我阿爸嘅氣場好勁，樣惡，大份，鬧人超惡，可能因為咁，啲嘢唔敢攪佢。估唔到氣場咁勁嘅阿爸都試過撞嘢。
話說佢早年返大陸，向佢個朋友度借宿一宵。佢朋友住鄉村，間屋係早十幾代祖先留落嚟嘅祖屋，相當殘舊，而間屋只有佢朋友一個人住。間祖屋都幾大，但係因為日久失修，好多房都爛晒唔住得人，阿爸為有同朋友瞓同一間房，阿爸瞓床，佢朋友就旁邊開多張接床瞓。
果時正值秋涼，夜晚少許凍，我阿爸冚住張薄被，剛好冚住膊頭。瞓到半夜，阿爸話佢朦朦朧朧聽到啲boom boom聲，好有節奏，而且越嚟越大聲。當時阿爸面向牆瞓，佢轉身望一望佢朋友，見佢朋友向隔離床瞓左，於是就轉返向牆繼續瞓。但係啲boom boom聲越嚟越近，直頭覺得係向房門口傳黎，我阿爸繼續扮瞓唔理。之後啲聲就停咗落嚟，過咗一陣，我阿爸話feel到佢張被好似比嘢拎起咗咁，拎起之後又放低拍落膊頭到，連續好幾次，拎起又放低。果刻佢意識到真係撞嘢，佢估應該係佢朋友嘅祖先，於是就心入面講，我黎借宿咋，瞓一晚就走架啦，打攪晒。無耐之後，就再feel唔到有嘢揭佢張被。
到第二朝瞓醒，阿爸就將件事講比佢朋友聽，佢朋友話：「係呀，我啲祖先黎架，晚晚都係咁跳黎跳去架啦，我由細向度住到大習慣晒啦。仲以為你氣場咁勁啲祖先唔會出嚟添。」佢朋友仲話見過有啲祖先過身果時佢都未出世，係向祖先相見過先知係邊個黎。自此阿爸就無再去果個朋友間屋度瞓，費事打攪人哋祖先喎
哇佢啲祖先咩事咁多年都唔投胎呀
唔通間屋太好住
但睇相先知係邊個依樣細思極恐
呢個朋友好好笑,唔怪得冇人肯住佢間屋
1個讚
Push下睇下有冇新會員有古仔share
試過好幾年前跟團去北京,住到去7環近河北間新酒店,當時係新架啦,S字頭喜XX集團酒店,好靚架!但酒店無乜人因為太新啦~
我同阿女1間房,一入去就覺得有陣風咁,不過無理,點知個晚大鑊,無斷斷著電視,廁所有開水喉溜水聲,想叫阿女又叫唔出,又有開門關門聲等等…第2日問阿女聽5聽到,阿女都話聽到,我地仲話乜咁百厭架攪攪陣! 因為呢間酒店要住6晚,唯有轉房啦! 轉左房就好D啦,雖然入到房感覺個氣場都係麻麻地~
不過我都認同其他谷友講既,您愈係唔驚佢,氣場強過佢,佢就愈驚您既…
屋企見咪好驚， 又唔可以唔住喺度