如果3-5級起, 可以彈下呢d書, children pieces, sonatina, first lesson in bach(呢本有d出版社係分開出Book1&2, 唔知點解有好多人剩係彈過Book1, 無彈Book2), Burgmuller 100&105, czerny 599
Masterpieces你唔會覺得好難咩?
謝謝！我會去買書試試自學！
Children Pieces, Sonatina, Bach都有彈過，Masterpieces難丫……之前都係揀住黎學
謝謝你！！
俾多幾本你, Bach The Inventions and Sinfonias, Tchaikovsky op. 39, Grieg Lyrical pieces op.12, Mozart Sonata
仲有要練scales 同 arpeggios
加油!!~
介紹個網站比你,
https://imslp.org/wiki/Main_Page
因為好多樂曲已經年代久遠, 已經無版權,
呢個網可以合法咁免費download琴譜落黎,
如果有需要先再去買書
請問會收新生嗎？成人初學，港島
另外我想買二手琴，請問會建議買 petrof 定yamaha u1/3?
唔好意思呀, 暫時都唔收新手了
如果買二手琴, 要小心d, 有好多呃人case,
睇啱左搵個調音師睇睇部琴有無問題先好d,
petrof 同 yamaha u1/3都可以,
最緊要係你自己鍾意咩聲,
試多d琴聽多d就會知道自己鍾意d咩,
唔好心急
真琴好定數碼琴好
各有各好
視乎你嘅需要/用途/budget
考唔考級? 主要彈古典定流行曲?
想齋彈定有多d音效玩下?
會唔會喺半夜/屋企人瞓覺時練琴?
budget有幾多?
要考慮咁多嘢諗下先
係呀,
無論買真琴 定數碼琴,
都要認真考慮清楚,
你買左之後唔會諗住好快又換琴架嘛,
部琴有排用架嘛,
得閒去琴行試多d琴,
就會知自己想要d咩
我係成人學, 開初買左數碼琴, 之後換左鋼琴 (真係考左級既…3級 
)
但宜家就唔可以夜晚練囉…
只係自娛買數碼琴就OK喇
因為通常你有時間果陣都夜夜地…所以我宜家都少彈
靜音鋼琴幫到你
如果屋企夠大嘅, 一部真琴, 一部數碼琴都得 
即係要自己去實踐，明
小朋友四歲半，話想學鋼琴，需唔需要上左唱遊班先？
定係直接俾佢上鋼琴班，每星期上30分鐘會唔會太小？
直接學鋼琴又得, 上下唱遊班先又得,
最緊要係提升到佢嘅興趣,
一開始上30分鐘, 覺得唔夠再加時
小朋友三歲幾開始上唱遊班，上左一年左右開始跟老師學琴，開頭兩個小朋友一齊學，學半小時，跟住另一位小朋友無學，我小朋友繼續跟老師學多三年左右，初時用Faber果套書學，有apps有得聽歌仔跟住學，啲歌容易上手，佢都學得好開心，又肯每日練習，進度都快，考左ABRSM Grade2 , 又有參加下比賽，到家七歲半每星期上45分鐘課。但近呢半年發覺佢開始失去左動力，無乜心機學，對比以前，學既樂曲難度高左，老師要求都高左，又講多左技巧，重複性練習佢又覺得悶，有時講一啲樂曲上的情感佢又get唔到就更無興趣，我都有同老師傾過，放慢左學習的步伐，但都唔覺得提升到佢興趣。小朋友性格比較內向，最近老師話黎緊下個月離開香港，更令佢有少少心灰意冷。其實我心目中都無求佢去到咩高度，學到幾多級都無所謂，只希望佢可以享受學習音樂。我想問問有無啲咩建議可以比下我小朋友，可能係學習上加入咩元素，或者學習方向上可以令佢多一點動力，黎緊搵新老師時都希望可以同佢討論下，謝謝你。
如果唔介意嘅, 請你詳細d講下小朋友用過咩書? 同埋用緊咩書? 佢平時有無鍾意聽咩歌? 或者對咩音樂特別有興趣?
主要係用Faber piano adventures, 由My First Piano Adventure Book A/B/C到Level 1/2/3, A dozen a day, abrsm 有時老師會揀唔同類型的曲如jazz, blues, 動畫主題曲，近排佢鍾意打Mario game就學左main theme，同埋練緊校際音樂節比賽曲，開始準備abrsm grade4
小朋友又無特別喜歡特定音樂類型，佢好鍾意跟我地聽大人流行曲，鍾意玩隻game就會成日哼bgm, 呢排迷Marvel又會唱下，如果鋼琴演奏就鍾意輕快的曲譜
樂曲嘅情感,
可能就要靠老師/家長幫幫手,
幫首歌諗個故事, 或者將d童畫故事代入首歌度,
令小朋友能夠更加理解首歌想表達嘅感情
另外, 小朋友突然由有興趣變得無動力,
有可能係基本功打得未夠好,
正常係慢慢越學越難, 將d困難一步一步咁跨過,
如果突然間d野難左一截,
小朋友就好易會灰心甚至放棄
我一直都覺得,
成功感/滿足感對學琴好重要,
彈到d自己鍾意嘅歌, 應該都會好滿足,
搵d簡單版嘅流行曲/動漫曲比佢練下,
練得好就大大力讚下,
練得唔好就多多鼓勵,
如果佢鍾意唱歌, 比佢試下自彈自唱,
如果佢唔鍾意唱, 佢彈你唱,
等佢感覺自己唔係孤軍作戰,
家人係同佢同行, 一齊努力,
不過我都係好空泛咁提出意見,
始終我未睇過佢彈,
到轉老師時再問問新老師意見吧
加油!~
1個讚
佢又唔係突然一下子無左動力，係漸漸減褪。我地都好循序漸進慢慢來，唔急，上次考G2都兩年前，平時一星期練習內容可能只係練一兩個手勢或者樂曲裡的兩句，不過就堅持每日都練，果日忙都要抽十分鐘，我都會陪住佢。參加比賽唔多，一年一兩個，都係想比啲目標，比佢獲得成就感。多謝你鼓勵同分享意見，我會試下做，謝謝你。 