[分類唔識揀] (咁多女人嘅討論區係咪應該要有月事專用分類版???起碼開個保健衛生???)
我夠膽講我幾乎係全香港最早用月經杯嘅人之一, 哈哈哈哈哈哈
當年 (大約2012) 做資料搜集嘅時候, 唯一一個香港中文網上資源係蘋果日報街訪, 標題叫’港女怕痛唔敢用’ lol 其他中文資源都係來自台灣, 都唔多, 所以我狂刨外國網站
先講自己黎M特性…
我M期超級唔準, 由細到大冇準過, 以前可以60日都唔黎一次, 而家 (25-30) 叫做穩定少少大約40日黎一次
可能黎得少, 唔習慣, 冇咁"認命", 而且因為我好少M痛, 所以只要解決咗M巾嘅不適, 黎M對我黎講好輕鬆
我超級討厭M巾, 可能因為有少少潔癖, 黎M嗰幾日畀M巾搞到勁燥鬱, 好難專心做其他野
17歲時有一次約左朋友去玩水, 撞正黎M, 仆街一年黎得嗰幾次M都畀我撞到正, 因為唔抵得冇得玩, 膽粗粗開始用綿條
記得係好開心唔使畀M巾焗住, 但我好討厭條繩fing fing 下, 條繩掂到小便又焗住仲核突, 又易漏, 結果為左唔好整污糟底褲, 都係要用護墊, 廢武功 (仲畀我發現左啲鬼妹用棉條又唔用護墊係因為佢地由啲血流出黎, 整污糟底褲先換棉條, 黎M就故定著嗰幾條M期專用有血蹟嘅底褲…oh well)
而且最大問題係會有toxic shock syndrome… 每隔幾年就聽到外國有十幾歲靚妹因為TSS冇咗條命… 為咗唔用M巾冇咗條命實在太浮誇
唔記得點樣無意中見到menstrual cup呢個term, 從此我嘅生命開啓咗新嘅一章
食飯先, 有人有興趣先講落去
歡迎發問呀, 我覺得月經杯係解放女人嘅偉大發明, 香港女人咁叻, 好應該普及佢!!
_________ 補充(喺留言打左勁多, 唔好嘥等大家一次過睇到)_____________
關於攞唔返隻杯出嘅憂慮
-
陰道頸太高, in other words, 下面太深(?)
聽過有人會搵唔返隻杯(?)
我唔夠膽講全部人都係咁, 但其實亞洲女仔size好難會深到探唔到子宮頸 (唔信你試下, 自己係摸到陰道盡頭架), 何況仲有個杯嘅長度, 點都起碼會摸到杯底, 而且經期間子宮頸會下降少少, 唔好太擔心, 呢個情況唔太可能發生
如果你摸到佢, 但只係緊緊摸到, 想佢再低啲捉實啲, 可以好似痾屎咁出力, 佢會再降低啲 -
杯底太滑
好多牌子杯底都有坑紋畀你捉實, 如果都係捉唔實, 可以試下坑紋深啲嘅牌子, 例如fleurcup, 佢坑紋深到我下面feel到佢存在, 要磨平啲坑黎用 -
唔識break the seal去真空
呢個有少少關乎杯身軟硬嘅問題
因為月經杯要佢唔漏, 置入嘅時候要製造一個真空狀態, 杯緣緊貼陰道壁
有啲人覺得"抆"唔到佢出黎, 係因為冇去真空!!!
拎出黎唔係用蠻力抆架, 要用三隻手指 (有啲人用兩隻就得) 按壓杯底, 想像整一個U字出黎 (食指喺凹位, 拇指中指喺外圍), 杯緣先會變型, 真空先會被打破, 做到呢一步再慢慢左右左右向下拖好似行路咁畀隻杯行出黎
所以如果隻杯太軟, 你點按壓杯底, 個杯緣都唔會變型, 所以去唔到真空
即係你想像最cheap嗰種超薄膠水杯, 你掐個杯身, 杯口都仲係圓
所以月經杯嗰條尾唔係用黎抆個杯出黎, 係畀你順住條尾搵返個杯底喺邊架咋, 千祈唔好夾硬抆
我啲杯全部剪晒尾
呢條片講得超清楚, 我上面講嘅野都係喺呢個youtuber度學
佢係一個有長期病患嘅女仔, 黎M比一般人辛苦, 所以好細個就學用月經杯, 後尾變左月經杯KOL, 你聽過嘅牌子都可以喺佢channel搵到review
品牌分享
我用過伏嘅月經杯牌子:
(純個人分享! 我唔啱用可能其他人啱用, 勿怪)
-
台灣月釀杯
好怪嘅設計…杯身上硬下軟, 難去真空, 難取出 -
加拿大Nixit
唔係杯狀, 係碟狀, 聲稱可以have sex with it inside, 我未試過. 我根本冇辦法令個杯長期留喺裡面, 行行下會滑出黎血崩…唯一好處係唔使靠真空, 驚呢樣野嘅人可能啱. 網上review好極端, 中意嘅人會好中意 -
瑞典 Intimina 嘅 Lilly Cup One
其實唔算好伏, 好在可以縮細成一個餅, 我長期keep喺化妝袋應急, 但因為會伸縮超難擺入去, 新手搞唔掂 -
德國The Fun Cup (呢個係sex toy公司出, 質量好好, 不過唔關事)
我冇用過, 朋友分享: 個底係一粒的, 好難去真空
以上伏杯共通點係奇形怪狀, 其實傳統型嘅月經杯, 品牌間差異唔太大
外觀上嘅考慮都係顏色, 附送個袋啱唔啱你口味之類
使用上真係要考慮係軟硬, 我個人覺得揀硬好過揀軟。有啲人話硬杯比較難摺得細, 新手難放入去, 但其實, 大極唔會大得過你男人…
亦有人話，新手用硬杯，會唔小心過早放手，個杯彈到尿道口會痛
我自己冇遇過呢啲問題，畀大家參考下
另一方面，跳舞或做瑜珈之類嘅人骨盤底肌(pelvic floor muscle)比較強，要揀硬杯，太軟嘅話陰道壁會壓到杯口打唔開，會漏
而且軟杯問題係置入同取出都難, 因為置入時軟杯彈性冇咁好, 未必完全打開, 新手又唔識check真空咗未, 就會漏
取出難係因為你掐個杯底未必會去真空, 隻手要伸到好入
至於大細, 睇返自己個人流量, 但唔好太信品牌聲稱嗰個容量, 多少有啲誇大
大部分品牌都係兩個size fit晒所有人, 你真係好抗拒塞舊野落下面嘅咪揀個細, 流量大咪揀個大, 其實容量大極, 量多嗰日都係要勤力少少換架啦
有啲品牌會建議生完bb要換大杯
以下係品牌推薦:
(我好多年冇買過杯, 有少少outdated, 唔排除市面上有更好選項, 純粹個人分享)
-
FleurCup
第一個用嘅杯, 軟硬適中, 冇漏過, 缺點係質量真係冇咁好, 色澤醜, 新杯上手感覺條接鏠有啲碎屑, 同其他杯比較的確易染色, 但完全唔影響使用, 印象中我會揀佢係因為平. 因為某啲身體原因我流量變大所以先會淘汰佢. -
SuperJennie
傳統杯型中容量偏大, 靚, 軟硬適中, 唔漏, 缺點係個袋條繩會自己飛走–一個完全唔算缺點嘅缺點, 因為真係好fit我, 我應該好耐都唔會再買新杯
以下我個人冇用過, 但口碑唔錯:
-
Lady Cup
靚, 超靚, 多色揀, pantone咁款, 個袋都勁靚, 啱外貌協會, 自己上網睇 -
MeLuna
出名在多款揀, 大細, 軟硬, 條尾嘅形狀都有得mix and match -
Ruby Cup
一間超好嘅社會企業, 如果我要買新杯, 首選會係呢個, 因為每買一個佢哋就會送一個畀第三世界女仔. 嗰啲地方好多女仔一開始黎M冇耐就要退學, 因為月經深受當地文化歧視, 又負擔唔起月經產品, 一黎M就出唔到門口. Ruby Cup除左送杯仲有埋性教育同衛生教育畀當地婦女, 好有意義
