我34歲，第一胎，
12週時bb 頸皮3.9mm，Oscar超超超極高危，
想分享一下我嘅產前診斷經歷…
過山車一樣嘅個幾月，學到：
1.一定要定期做婦科檢查
2.Safe T21/ Nifty 係唔可以代替度頸皮，
正路係做一個NIPT（非入侵性測試）加度頸皮，一定要呀！
3.Safe T21/ Nifty 只係一啲比較準確嘅screening，抽絨毛、羊水先係diagnosis
4.威爾斯產科真係一流
5.There is always hope in hopeless.
27個讚
一直覺的得可生可唔生，
無計日子無測排卵期，
如果你問我係計劃懷孕定意外懷孕，
我會答:spontaneous
之後都係啲大路嘢，
察覺身體有啲轉變、發冷但無發燒感冒、
月經遲到，
仲記得12月25日驗孕，
用咗兩款驗孕棒，勁快變色，
Christmas Day開咗個baby出嚟，
我地都覺得好驚喜！
上網左睇右睇，
先知道要去診所攞懷孕證明，
再去醫院、健康院登記，
醫院俾咗個Oscar期我，
其實都唔知乜嚟。
之後上網喪睇，研究Safe T21、Nifty ，
咩教授版呀、nifty pro 呀，
睇完都唔係好知有咩分別，
一心諗住，做貴嗰個實無死。
7個讚
1.一定要定期做婦科檢查
時間一轉，8週，14/1
第一次喺私家照超聲波，
石門高醫生，
見到傳說中嘅閃閃，
第一次聽到bb嘅心跳，
喺我剛好感動到想喊嗰陣，
醫生話：「你子宮有個瘤。」
醫生度個瘤嘅size，再話：
「好似實實地，初步估計係肌瘤，
你之前有沒有做婦科檢查？」
「無呀！」
（子宮肌瘤？聽都未聽過！）
「好常見，喺上面呢度，應該唔會逼住bb ，
而家唔需要擔心嘅，因為無嘢可以做，
保持觀察就得喇！」
行出醫生房，嚇到呆咗，
之後幾日就不停睇，
各類型、位置嘅子宮肌瘤啦，
揾同路人啦，
同時又再三同老公確認：
「醫生係唔係話粒瘤喺上面？」
「係唔係話唔會掂到bb?」
3*5cm嘅瘤已經令我擔心咗好多日，
估唔到佢只係隻嘍囉…
6個讚
2.Safe T21/ Nifty 係唔可以代替度頸皮，
正路係做一個NIPT加度頸皮，一定要呀！
12週，12/2，Oscar
其實一早book咗16/2去高醫生度做SafeT21教授版，
我又以為Oscar係個低端版嘅T21，
差啲想唔去。
但上次高醫生見我乜都唔知，
提我可以政府又去，私家又去，
咁就晨咁早去威院啦。
正常度高磅重之後，
一心以為係姑娘幫我照超聲波，
點知原來係一個着便服嘅女醫生。
佢好有信心，好快咁照，
邊照邊用英文同身邊嘅一位專科實習講:
Head bone…nose bone…spine… umbilical cord… brain…no TR… nuchal… you can see the fluid （向姑娘：幫我book 個9吖)…the measurement… ratio less than one… this is good…
「你有無問題想問？」
「我有個子宮肌瘤」
「係喎，有兩個…（向姑娘）我俾三個measurement你…3.x5.xxx…4.55.xxx」
「個位置有無問題？」
「喺上面，右手邊呢度，放心唔會整到bb。
Bb 頸皮有啲厚，好，落牀先再講。」
醫生就同我解釋Oscar 嘅程序、局限，
佢話BB頸皮厚有好多原因，可能係基因問題，最常見係T21即係唐氐，
但係BB明顯見到鼻骨、CRL正常，
所以怕係其他基因問題令到佢頸皮厚。
除咗基因外亦都有機會係心臟問題，
即係照結構先見到嘅嘢。
我最記得問咗佢一句:「咁有幾厚呀？」
佢答我：「3.9mm。」
我嗰陣連3.9係一個咩概念都唔知，
佢就話正常範圍係2.5以內，3都已經超標。
我就話：「咁都幾厚下喎，有無人係呢個厚度但係生出來正常㗎？」
然後醫生就話：「6mm、7mm、10mm我都見過，不過通常嗰啲都有個水泡包住個bb，情況會比較嚴重。」
佢話我BB嘅情況係頸皮厚，
佢唔建議（佢前後講左三次唔建議）我做任何NIPT(無創測試)。
我嚇到呆咗唔識反應，唔識問佢點解唔建議。
佢話我一定係高危，叫我等埋個Oscar嘅驗血報告，
醫院都會Offer抽絨毛或者抽羊水俾我，
詳細檢查bb基因，睇下有咩缺失。
佢亦再一次話唔建議嘥錢做NIPT，
叫我而家開始諗究竟係抽絨毛定係羊水，
出面話抽絨毛係有1%機會流產，羊水就0.5%，
不過喺佢地度做風險都好低，
因為佢哋好專業好熟手，
絨毛羊水都一樣，大概每1000個有1個有事，
叫我早啲有定心理準備，
而又同我講：「基因問題、心臟問題都唔關你個肌瘤事㗎，唔好擔心個肌瘤。」
而由於我係高危case，
威院包埋個20-22週照結構期俾我，
即係醫生對姑娘講嘅「幫我book個9吖」，
叫我可以慳返唔使喺出面照，
同時俾咗個報告我叫我交俾健康院，
後來我Google吓醫生個名，佢姓潘，
中大婦產科教授…
行出去之後呆咗，嚇到喊出嚟，
連度頸皮係做乜都唔知，而家又話頸皮厚又話抽絨毛，
上網㩒都唔知search 厚頸皮、SafeT21、有鼻骨定抽絨毛好。
3個讚
3.原來Safe T21/ Nifty 只係一啲比較準確嘅screening，抽絨毛、羊水先係diagnosis
諗咗幾日，16/2見高醫生，太desperate，打算照驗Safe T21，驗完先算，點知…
照超聲波時，同醫生講:
「早幾日喺威院做Oscar，佢話我頸皮厚。」
「啊，（輕鬆）姑娘同你照㗎？」
「唔係呀，係中大教授嚟㗎」
「Er(一臉應該唔會錯的神情)」
高醫生度咗幾次，我見到3.9,3.94,4.14
「應該無錯，都係3.9呀4呀咁啦！」
而高醫生都一樣，就算我book咗，佢都叫我唔好做Safe T21，
佢直情直接問我:「3.9，威爾斯有冇俾個絨毛期你呀？」
我話:「冇呀，不過佢話等埋驗血應該會出比我。」
高醫生話:「3.9又有啲擲界，搞到你有得諗Safe T21。如果6呀7呀嗰啲，上晝做完Oscar即日下晝抽埋絨毛喇！你唔使嘥錢做T21，因為厚頸皮有好多原因，做非入侵性嘅都係screening，比個比率你，知道高唔高危，safe T21測唐氏比較準，去到99.65%，T13 T18都係99點幾%，但去到其他基因個準確度就好低，你呢個個案就算做完T21，最後都係要做真正嘅診斷，都係要抽絨毛或者抽羊水，做埋個晶片啦(DNA Chips)。絨毛羊水兩者，喺醫生角度係同樣操作方法，風險接近，只係14週前抽絨毛可以方便趁早打算。」
竟然，高醫生有錢都唔賺我，
居然，高醫生、潘教授嘅建議一模一樣，
咁我唔抽絨毛、羊水都唔得啦！
之後幾日好似等上刑場，一方面又知道自己係高危，同時間心底又希望自己高得嚟只係1:150/1:200嗰啲（雖然結果都係一樣要抽絨毛/羊水，但係心理上好過少少）
18/2，13週，臨收工4點幾收到威院電話，
我嘅Oscar報告出咗喇！
T21 (唐氏) 1:2
T18 (愛德華氏) positive
T13 (巴陶氏) positive
未收線已經忍唔住喊出嚟，
預咗高危啫，唔係高到咁掛？
即時喺電話book埋抽絨毛。
返屋企成程車，一直忍唔住喊，
三關高危，我點過？
當晚，我上網狂search，揾到好多1:4、1:7、1:51（咁都叫高危，咁我點算？），
最後有事/無事嘅例子，
但頸皮厚、1:2、+、+，真係唔多覺有，
同時，雖然心知Oscar好多false positive，
但1:2喎，雙positive喎，真係會三關都false positive 咩？
我又揾埋T21、T18、T13缺失嘅soft indicators，
回憶返幾次照超聲波，又唔似吖，
又有鼻骨，心臟無倒流，CRL剛好係average…唔通真係教授所講，係其他微缺失？
3個讚
4.威爾斯產科真係一流
20/2，13週，收到電話之後兩日，威院抽絨毛
好驚，真係好驚，我從來都無穿無爛，
三十幾年嚟未入過醫院，血都唔流多滴，
怕痛，怕流產，咳緊，怕抽抽下咳，
老公份工無得請假，所以揾咗媽媽陪我。
等呀等，前幾手都喊住/眼濕濕出嚟，
終於到我。
現場有兩位醫生，一男一女，着中大袍，另外有三個護士，三個hku biochem學生。
女嗰位叫華醫生，聽佢講解咗好多嘢，我簽咗好多個名。
我一心想畀錢做DNA Chips($4900,7日），但醫生話有個新嘅叫FetalSeq，$4000，10日，可以驗多1%嘅微缺失，我就迷迷糊糊話做呢個。
醫生又話，就算你加錢特快三日拎T23、21、18、13個快速報告，得9成幾準，你都要等10日嗰個fetalseq詳細報告先放心啦，咁不如唔好加錢，直接等10日嗰個，擔心少一次，而我又迷迷糊糊咁話好。
另外，風險方面，真係有份文件講有0.1%流產風險㗎，唔需要信台灣嘅3-5%同網上講嘅1%。
男醫生姓梁，佢仲提我：「你記住一陣抽嗰陣忍住唔好咳呀。」
簽完上床，先照超聲波，D gel係暖㗎！
醫生邊自言自語，邊睇晒睇到嘅嘢，
我一直問問題，佢一直好温柔咁答。
總之，13週該見到嘅都有、都正常，
手手腳腳手指腳趾都無多無少，頸皮落返去3.5mm，都係厚。
中途我有問梁醫生（我個Oscar report係佢issue㗎）：「1:2係唔係比較少見？」
佢微笑：「係高危啲囉，screening嚟嘅啫。」
「係唔係驗血結果好差？點解會高到咁？」
「你啲血無問題呀，合格呀，但你年紀加頸皮厚會拉高個比例，而唐氏high risk會拉高埋另外兩個risk。」
之後就照位落針，華醫生話唔係好夠位，
梁醫生拎咗個probe，推過啲：「呢度啦！(霸氣外露)」
之後兩位討論要唔要做vaginal extraction，嚇到我眼都突埋。
睇完位，熄咗部分燈（好貼心，暖的gel，暗的燈，真係無咁驚），喺要消毒嗰陣，我！居！然！咳！好狠嗰隻。
華醫生苦笑:「咦？個位唔同咗。」
梁:「係喎contract 咗，要等佢relax返。」
向住我:「咳會令子宮收縮嘅，不過唔係危險嗰種宮縮，等佢鬆返就無事。」
然後，我地10個人一齊等我個子宮放鬆…
之後消毒、麻醉、落針，
梁醫生雙手輕輕按住我個肚，
華醫生負責抽，
過程中清楚感覺到佢拮入唔同嘅幾層，都幾痛下，
我忍唔住望下個screen，睇到佢撩下撩下，其實嗰刻真係太緊張，緊張到唔會咳！
我感覺到個肚皮濕濕地，仲問佢地係唔係血，姑娘話：「好少啫！」
之後聽到佢擠啲液體落個樽度，
梁醫生話：「完成喇！你做得好好呀！」
之後，其實連落牀都無力，
一用腰力就好痛，一咳就抽住痛。
但係威院啲醫生護士真係好好，
好温柔、好細心，令我好放心。
之後我睇返兩位醫生，
梁醫生係中大教授，中大婦產科嘅chairman，唔怪得咁霸氣，
而年輕嘅華醫生，係中大嘅honorary professor，威院associate consultant，
計埋度頸皮嘅教授，三位都咁權威咁專業，其實我喺威院都真係有啲運。
4個讚
5.There is always hope in hopeless.
抽完絨毛，10日先有報告，
感覺係，我都已經做晒做到嘅嘢。
就算bb 有事都只係基因問題，
係細胞分裂過程嘅error，
只要唔係因爲「我」惹埋啲乜菌乜毒、食錯啲乜嘢垃圾食物呀嗰啲而影響個B，
我心安理得。
但係，要過晒第21、18、13對基因，
都真係要啲運氣。
以前會諗，
想生個女，要對眼似我，鼻似老公，
好似我咁好記性讀書咁叻專注力咁強etc…
到bb 高危，
照超聲波連性別都唔想問，
真係覺得乜都無所謂，
健全、健康就得。
我同老公都覺得，如果bb基因有問題，
我地唔會咁偉大生佢出嚟。
老公覺得bb應該無事，而假如今次唔得就下次，
而我，一時覺得唔想再懷孕唔想再經歷一次同樣忐忑不安嘅心情，
一時又覺得好想好想要bb ，
等抽絨毛嗰兩日、抽完嗰兩日，
我喺街見到人哋大肚、拖住小朋友，
都忍唔住喊出嚟。
我有一個同事同我同期大肚，
我連佢個Nifty結果都唔敢問，
我怕我會妒忌佢有個健康嘅bb。
其中一個唔想做三日快速報告嘅原因，
係我想安安靜靜咁過多幾日，
每星期一個bad news，我真係受唔住。
另一個原因係，如果bb真係唔ok，
醫院應該好快會叫我去做人工流產，
但我都想拖多一兩週，喺我嘅人生至少感受一次胎動。
心底亦希望，假如報告話唔得，我都想揾個結構權威同我講bb結構正常，睇下有無機會係鑲嵌型胎盤呀、驗錯呀嗰啲。
但係，我都知機會好渺茫。
2月26日
老公約我去食米線同飲珍珠奶茶（我嘅comfort food），
飯後行緊返屋企，老公拎起電話，35056000，咦？
我好驚，好驚。
又話10日嘅？
咁早打嚟係唔係有事？
老公握實我隻手，報緊我身分證號碼嗰陣，
我驚到震，驚到流眼淚。
老公緊皺眉頭：
「係，係，你講吖！」
「無問題？咁即係點呀？」
之後佢交電話俾我聽，
係上次抽絨毛嘅姑娘。
「FetalSeq Trio報告呀，完全無事，比對過嘅基因一切正常呀。」
「21、18、13嗰幾對都無問題？」
「一切正常呀，呢幾對梗係無事啦，咁基本。你驗嘅係2019年嘅Trio，將23對基因放大好多倍喺顯微鏡下面逐條對，檢查咗百幾種微缺失，仲多過DNA Chips㗎。」
佢同我解釋返個情況，總之就係現行嘅科技下可以驗嘅都驗咗，而無驗到任何問題，下一關就係照結構。
雖然都仲有得擔心教授講嘅心臟問題，
但係，過三關，我成功咗！
T21 (唐氏) 1:2 clear!
T18 (愛德華氏) positive clear!
T13 (巴陶氏) positive clear!
基因缺失 all clear!
姑娘仲同我講，bb係女仔嚟㗎！
收線之後，我企喺街喊咗好耐，
開心到喊，感動到喊，
嚇死我喇，真係嚇死人喇。
There is always hope in hopeless.
1:2,positive, positive，
高危到我search都search唔到嘅case，
bb居然無事。
41個讚
後記:
Bb足月健健康康出咗世，而家已經7個幾月大，有兩隻牙仔喇！
佢食奶好叻，係埋身全人奶寶寶。
希望大家都順利好孕，生個健康活潑嘅bb!
35個讚
勁長既story但睇晒。
總結：生仔真係唔易呀
1個讚
恭喜媽媽
加油 我睇到二都驚
Btw 威記產科一流
我同我個小朋友都係威記出世 
睇到我啲腳趾都縮起晒
好開心睇到有個美好結局
我想問你威院做檢查醫生講解時
家人/老公可唔可以入去聽埋？
我成日都怕聽漏野
1個讚
好感動！！！！
1個讚
我個case同你都好似，又係威院，又係度頸皮3.9，我又係睇石門高醫生。
但唔同係我係10週做左nifty先到12週頸皮，nifty低風險，所以當時醫院話頸皮厚我自己心目中都排除唐氏，但醫院叫我做抽羊水，話始終頸皮厚有可能有其他問題，唔只係唐氏既問題。
度完頸皮打去診所約高醫生，2日後係佢診所度，佢又係問我係咪護士幫我度，佢話護士度準成度唔太可信，之後佢度左係2.4左右，再睇返nifty份報告，佢叫我唔駛太擔心，應該唔係唐氏，同埋唔駛抽羊水個啲，叫我唔好冒個1%定0.1%既水險，唔值得亦唔需要去冒，因為佢度出黎頸皮唔係唔合格。
佢再問我威記有無比結構期我返去跟，我話有，佢話到時同下個醫生講話曾經懷疑頸皮厚，等佢照清楚個心臟。之後醫院打返黎話抽血同度頸皮個結果係高危，強烈建議我抽羊水我都無抽。去到威院做結構檢查個陣，係個女醫生帶住班學生黎示範比佢地睇點做結構，個女醫生勁好人，唔知係咪教學既原因，照得好仔細，全部照到清清楚楚用左3個鐘，中間出去行都行左2，3次，等bb轉位再返入去照，結果係全部都正常。bb亦都順利出世，而家9個月大，健健康康
5個讚
我陀第二個係高齡，基本上乜都中哂
嗰時oscar係高危，但唔知點解嗰吓好有信心佢係冇事，而且因為信仰原因，唔會唔要，所以冇抽胎水嗰d
所以QE俾咗個係醫生睇嘅結構期我（普通結構期係助產士照嘅）（雖然我其實近威記，但同威記冇乜緣分，次次去次次都瀨嘢）
照咗話見唔到有唐氏特徵嗰下，真係喊到癲咗
不過佢哋話穩陣計，再俾我唔記得幾多週又照一次
又平安過咗
後來到中咗妊娠糖尿，去到三十幾週嘅時候又，醫院又有一次超聲波照大細，睇吓可唔可以順產嗰d
就係咁，其實都喺公院照咗好多次超聲波，所以我冇去私家做產檢
唯一嘅遺憾係冇超聲波嘅相留低
1個讚
恭喜晒！可喜可賀！女仔好羨慕呀但學你話齋只想bb健康健全咋
好感動，由陀到生 真係要過關斬將咁。。
最緊要bb 健康，其他所有嘢都無所謂！
潘教授真係好好
我果陣宮頸有啲短，佢即刻安排我入院安胎打強肺針
睇哂全篇好感動，最緊要真係BB健康，快高長大呀
多謝你呀！好詳細！
睇到好緊張
我個醫生都話公立度頸皮有時會度錯，如果度錯左又要我抽絨毛反而有流產風險，佢幫我度左冇問題，同理我做T21，所以我cancel左oscar
睇完你經歷好彩冇去，嚇都嚇餐死
我公立book左廣華，仲未見過醫生，希望好似你咁遇到勁醫生
我無乜嘢分享，頸皮無part 無事的，但兩胎都OSCAR test false +ve, 後來google搵過關於呢個test 的資料， false +ve 同 false -ve 機會都相當之高
睇哂全編文 都感受到當時媽媽果時心理既起起伏伏
阿B大個左要同佢分享返呀
我老婆個B都10週 正正係產檢期 多謝分享