我32歲，先生36 結左婚年半
先生想有小朋友， 我自己就有d擔心。我地兩個夾埋搵9萬到。
我自己個人cool d，唔算特別鐘意小朋友既人，親戚d仔女，我都係望下笑下就算。平日鐘意自靜靜地生活。得閒就自己做下gym同yoga。
我知道自己係好易緊張同焦慮既人，想像到自己有左bb會好上心，擔心無曬自己生活。
我自己做社福界，知道做媽媽既辛苦。另外亦多接觸一d有特別需要既小朋友。好擔心知道自己小朋友有依一d情況。
先生係一個溫柔同遷就我既人，我相信有左小朋友佢都會幫手會分工，係一個好爸爸。佢有講最後都係跟我意願，最緊要係我開心。不過都有表達會有少少失望。
我自己有時都會想像有自己小朋友，不過心底有對改變既恐懼同擔心。
我同先生年紀都唔細，試唔試好呢？
有冇媽媽分享，生完之後係唔係會無晒自己時間？
睇你又幾上心
一般預左病等不可抗力因素，你一定無覺好瞓。
如果你對自己同小朋友都有要求
你一定一闊唔止三大，時間，體力同錢都是不停付出。
不過，有啲滿足亦是估你唔到。
如果有長老或工人，唔會無晒自己時間或兩公婆拍拖時間。
我就因為無四大長老又無工人幫手，所以小朋友未返學前真係無二人世界呢樣嘢，最多係得少少自己嘅Me time。
我個人覺得睇住小朋友一日一日長大係一件好amazing嘅事。
冇人幫手真係會冇晒me time. 你預上兩歲返PN先可以自己去coffee shop靜靜地嘆咖啡.
同埋一開始多咗嗰人貼身不離, 又好多嘢冇經驗唔識做係幾徬徨.
不過佢漸漸長大好可愛, 你就會覺得好幸福.
只要有唔想嘅念頭就唔啦
咁嘅性格真係唔好生，我都係性格焦慮，慶幸無生，否則長期冇安樂日子。
有好多人會講，生咗出嚟就唔同，睇住佢哋大會好幸福，雖然有人會本身唔鐘意小朋友但好愛自己仔女，但唔係個個都係咁，後悔生嘅都大有人在，不過因為內疚又唔會講出口
結婚都可以離，生仔返唔到轉頭
樓主其實好清楚自己點
對。你可以揀生定唔生。
但小朋友無得揀出唔出世。
決定生，就要照顧好小朋友。
唔知呢度有冇人老公係咁，呀B屎上背可以當冇件事？
我生之前都以為老公係非常溫柔同遷就，幾乎包攬咗屋企八成家務，返工衫都幫我燙埋
但生完仔係，屎上背睇唔到
睇波食曬呀仔嘅星星餅（食咗好多樽）出街真係淨係推個b出街冇片冇後備衫；半夜起身餵奶換片係天方夜譚（我病咗嗰幾日會幫下手嘅）
最後去到K2, 為咗挽救婚姻我請咗姐姐
以為小朋友大個咗就冇事
？
一樣會有唔記得同小朋上興趣班/補習班嘅情況，又或者呢，送小朋友落樓下上校車會遲落樓（佢返嚟仲要投訴我，話比校車姨姨話幫我食咗一嘢）
朋友老公，同親小朋友游水都係坐埋一邊睇手機，咁可以點，話完佢好一兩次又係咁，離婚？咪以後朋友自己親自帶返小朋友去泳池
唔係咩大錯，但會好無奈，點解所有嘢得呀媽上心
你做呢行，應該都知道照顧特殊小朋友有幾咁艱難，如果真係好想生，留意下老公兄弟/老爺/叔伯，會唔會有啲ADHD/自閉/亞視保加之類嘅問題
我見身邊嘅例子，好多特別小朋友，媽媽都會發現爸爸或者男家親戚有人都有呢類特徵，只係原本唔認識呢樣嘢，以為佢只係唔善於交際，或者比較寡言。
我經常都覺得人係會對無揀到個條路充滿憧憬。
例如單身既就覺得自己孤獨，臨老就中騙案鐘意假高富帥
結婚既又後悔覺得自己做女時點點點。
生仔呢啲事旁人好難俾意見。雖然現代個個都會叫你唔好生，但我覺得呢啲係風向黎，幾年前都成日吹30歲唔結婚係剩女，宜家個個變晒話單身好幸福。我覺得你要係比較知自己想點個種人就會易啲（奈何好多人都係人云亦云），呢個世界無野係你贏哂咩都有。有得就有失，揀左就唔好諗返轉頭。
自己諗下係你想要小朋友定老公想要。生同唔生會得到同失去啲咩。啱啱生完頭幾年可能係會辛苦啲，大左又唔同。
同有經濟能力既就可以用錢買到某啲嘢，例如住私家醫院既舒服，有人幫手，或者買到好既野俾自己同仔女咁。
利申我係生左既。我覺得如果我100%理性既唔會生，但我都有啲感性想同老公有個family，再加四大長老都係可以經濟同能力上幫到我哋。我老公都係神隊友，同我夾到。我哋大家擅長嘅嘢都唔同，咁啱互補到。例如我係唔做家務既，佢就肯做哂。佢覺得搵學校煩但我係enjoy做research。
另外都想講，本身我都係唔鐘意小朋友既，不過我都肯定自己既小朋友係唔同。自己既就會愛錫。我都係32歲有bb。
答返你會唔會無哂自己時間，就係有錢&有人幫&工作可以成日請假就唔會無哂自己時間。唔好以為ftm好正。如果唔係闊太式ftm係最無自己時間。
32歲仲有時間喎，我啲friend全部35+先有BB，個個都好健康
我32歲生但變咗早生嗰個，我個仔小學畢業但啲friend嘅仔女都係讀緊幼稚園或者仲未識行。
佢哋都係謹慎型，諗咗好多年先決定去生。
哈哈哈哈，
我哋老公可以做好朋友呀！
雖然我只備孕中，睇到你嘅描述好有畫面！
我老公洗衫會唔記得落洗衣液，之後唔記得晾衫。。。
到一兩日後我打開洗衣機，聞到陣陣飄香
叫佢塞個頭入去聞，佢真係大力索，但係佢真心聞唔到
我可以200%肯定，如果第時生，
隊友會求其包屎片，BB啲屎會上背脊，爛pat pat係閒事，
因人為人素導致嘔奶係家常便飯，
半夜阿b努力喊佢應該都聽唔到，莫講要餵奶等等。。。
阿B第時能夠平安成長係因為佢前世做咗太多好事，福大命大。
PS隊友現在安排IVF initial consultation，
但來回左一兩次email後，冇左下文，
應該係佢唔記得覆confirmation email，
以為set左日子時間，人哋reception/nurse就會知晒佢所有資料
（一如佢以為阿B出世後就可以自動成長）
我身邊都唔少，有d 4 字先生第二、三胎